Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Thaum Tswv Yexus los rau hauv lub nroog Yeluxalees, Nws txais tau cov pej xeem txoj kev txais tos zoo heev. Tej lus qhuas, tej lus txhawb tau nrov tuaj, ntau zaug tseem yog los ntawm tej menyuam mos lub qhov ncauj los thiab. Tseeb tiag, Tswv Yexus los yog yam uas zoo kawg nkaus thiab yeej tsis muaj ib tug cwjpwm twg yuav zoo txaus los nthuav tawm txoj kev tos tus Tswv dhau los ntawm qhuas Nws lub npe.

Hnub no, yog hnub 23/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Matt Levy dhau ntawm Zaj kawm HOSANAS! TXAIS TOS TUS TSWV

“Muaj ntau leej hle lawv tej tsho pua hauv kev, muaj ibtxhia mus txiav nplooj tom ntug zos nqa los pua kev. Cov neeg uas ua ntej thiab cov uas lawv qab sawvdaws qw nrov nrov hais tias, “Ua Vajtswv tsaug! 8 Thov Vajtswv foom koob hmoov rau tus uas Vajtswv txib los!” (Malakaus 11:8-9)

Yeej tsis muaj ib yam dabtsi yuav zoo dua thaum uas peb mus txog ib qhov chaw twg ntawd tau sawv daws txais tos zoo. Yog koj yog ib tug neeg nyiam tej menyuam ces koj yuav nkag siab txog qhov uas tau txais tos zoo. Thaum koj los txog tsev ces cov menyuam tos ntawm qhov rooj khiav los nyob rau hauv koj lub xub ntiag txaus siab heev. Lossis zoo dua ntawm koj lub qhov rooj puv npo lub suab luag thiab txais tos sov so los ntawm koj tej phooj ywg thiab tsev neeg tomqab ntau hnub mus deb rov los. Ntseeg tias lub sijhawm ntawd yuav sov siab so, nrog tej kev sib puag xwb pwg puv npo lub siab luag tshwj xeeb.

Vajtswv txojlus nyob hauv Mathais 21:8-9 sau txog qhov xwm txheej uas Tswv Yexus tau cov pej xeem txais tos thaum nkag los rau hauv lub nroog Yeluxalees.
“Cov neeg coob coob uas nrog Yexus mus ntawd, muaj ibtxhia hle lawv tej tsho los pua kev, thiab ibtxhia txiav nplooj ntoos los pua kev. Cov neeg coob coob uas mus ua Yexus ntej thiab cov uas raws Yexus qab qw nrov nrov hais tias, “Cia li qhuas Daviv tus Tub! Thov Vajtswv foom koob hmoov rau tus uas Vajtswv txib los! Cia li qhuas Vajtswv tus uas nyob saum ntuj ceebtsheej!”

Lub sijhawm uas Tswv Yexus nkag rau hauv lub nroog Yeluxalees zoo kawg nkaus. Vajtswv txojlus nyob hauv Mathais 21:8-9 sau txog qhov uas tej pejxeem qw nrov nrov txais tos lawv tus Mexiyas: “Cia li qhuas Daviv tus Tub! Thov Vajtswv foom koob hmoov rau tus uas Vajtswv txib los! Cia li qhuas Vajtswv tus uas nyob saum ntuj ceebtsheej!”

Tswv Yexus tseem tau tej menyuam mos qhuas thaum uas lawv tseem noj niam mis zoo li Vajtswv txojlus tau sau nyob hauv Ntawv Nkauj 8:2.
“tej menyuam yaus thiab menyuam mos puavleej hu nkauj qhuas koj.Koj nyob tso siab lug tsis ntshai koj tej yeebncuab, koj tav tau txhua tus uas ua phem rau koj txoj haukev.”

Tau txhawb zog kawg thaum uas peb nyeem Vajluskub thiab nrhiav pom tej nqe muaj ntsiab lus sib thooj nyob hauv Vajluskub Qub thiab Vajluskub Tshiab. Tej lus qhuas Vajtswv thiab cov lus qhuas los ntawm Vajtswv los tau sau tseg nyob hauv Ntawv Nkauj thiab phau Mathais:
“Tus Tswv, thov cawm peb, thov cawm peb lauj ! Tus Tswv, thov pab kom peb ua tau txhua yam tiav! Thov Vajtswv foom koob hmoov rau tus uas Vajtswv txib los! Peb foom koob hmoov hauv tus Tswv lub Tuamtsev rau koj.” (Ntawv Nkauj 118:25-26).

“Yeluxalees, Yeluxalees! Koj muab cov uas cev Vajtswv lus tua povtseg, koj muab pobzeb ntaus cov tubtxib uas Vajtswv txib los qhia koj! Muaj ntau zaus kuv twb yuav muab koj cov pejxeem los puag, ib yam li tus pojqaib cuab nws cov menyuam los puag rau hauv nws ob sab qab tis, tiamsis koj tsis cia kuv ua li ntawd! Nimno koj lub Tuamtsev yuav raug muab tso tseg nyob qhuav nquas cia. Kuv qhia rau koj hais tias, txij no mus, koj yuav tsis porn kuv mus txog hnub uas koj hais tias, ‘Thov Vajtswv foom koob hmoov rau tus uas Vajtswv txib los “Mathais 23:37-39).

Vajluskub hais meej meej tias Tswv Yexus yuav rov qab los dua ib zaug ntxiv, tsis yog los zoo li tus menyuam lawm tiamsis los zoo li tus vajntxwv muaj hwjchim. Koj puas tau xav txog hnub yuav txais tos Tus Tswv los saum ntuj rov qab los lawm tau? Ntawd yuav yog ib hnub ci ntsa iab. Txhua txheej ntuj, tej timtswv nrog rau Vajtswv cov menyuam yuav tsa suab hlo qhuas Nws lub npe dawbhuv. Koj puas tau npaj txhij thiab tos ntsoov hnub ntawd lawm tau?

Thov caw nrog kuv peb thov Vajtswv ua ke.
Ua Tswv Yexus tsaug vim koj tau los rau hauv lub ntiajteb no. koj yog tus Mexiyas tau cog lus tseg, los cawm lub ntiajteb no dim ntawm txoj kev puas tshuaj, tseeb tiag kuv tsuas paub tsa suab ua koj tsaug, qhuas koj yog tus uas tau los. thov pab kom kuv qhuas koj thiab nco koj tshav ntuj los ntawm kuv lub qhov ncauj thiab kuv lub siab. Thov kom koj lub npe tau txhawb nqa dhau ntawm kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, cia li npaj koj lub siab zoo siab hlo thiab npaj kom txhij txais tos hnub Tswv Yexus rov qab los nrog lub hwjchim. Txhob ua poob ib lub sijhawm twg ua Vajtswv haujlwm vim koj tsis paub hnub thiab sijhawm tus Tswv yuav rov qab los. yog li yuav tau siv lub sijhawm uas tseem nyob rau hauv ntiajteb no los qhuas Nws ntawm peb lub siab. Ntseeg tias txhua hnub dhau mus peb puav leej ua neej nyob hauv txoj kev zoo siab tias” Hosanas! Qhuas tus Tswv tau los!”

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.