Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Nim no neeg ntiajteb tabtom txhawb txoj kev uas nyias cim civ xaiv thiab coj nyias lub neej. Peb cim civ siv zog ua txhua txoj haujlwm vim tsis xav tab kaum lwm tus, lossis xav tias yus tus kheej yeej ua tau txhua yam. Tiamsis tseeb tiag, Vajtswv tsim peb los tsis yog tseg ua haujlwm ib leeg, tiamsis yog ib leeg pab ib leeg. Peb yuav tau muab txoj kev pab no mus pab thiab kawm txais txoj kev pab no ntawm lwm tus thiab ntawm Vajtswv. 

Hnub no, yog hnub 24/10/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tiffany Stuart dhau ntawm Zaj kawm KEV PAB

“Vajtswv yog peb lub chaw nkaum thiab yog peb lub dag lub zog, thaum twg peb muaj kev txomnyem nws npaj txhij pab peb” (Ntawv Nkauj 46:1)

Mary nyuam qhuav muaj 44 xyoo xwb thaum uas tus mob ung thư tab tom rhuav tshem nws lub taub hau ua rau nws tsis meej pem. Nyuam qhuav ib feeb dhau los xwb nws yeej tseem tham lus meej meej, tiamsis ib pliag xwb nws twb tsis paub dab tsi lawm. Thaum Mary tus txiv mus ua haujlwm lawm, cov neeg ua haujlwm dawb pab rau cov neeg muaj mob mus pab nws tov dej, thiab coj nws mus los kom thiaj tsis ntog. Kuv yog ib tug nyob rau hauv cov neeg pab Mary. 

Thaum uas kuv mus saib nws zaum ob, Mary pw tsheej teev hauv txaj. Kuv nyeem ntawv thiab ua tib zoo mloog. Yeej tsis hnov dab tsi nrov txog rau thaum hnov dej nrov hauv chaw da dej tuaj. 

Mary tab tom ua dab tsi li no? Nws tsis tau cai cim civ da dej. Ib tsam nws tsaug leeg. Kuv yuav tau ua dab tsi? Kuv tsis muaj cai qheb qhov rooj mus rau hauv thaum nws da dej. 

Yog li kuv thiaj thov Vajtswv pab kom Mary txhob ntsib teeb meem, thiab tos; cia siab tias kuv yuav ua yog. Thaum kawg Mary kuj hnav tau ris tsho thiab mus taw liab tawm los. Kuv tuav nws tes nqes ntawm tej qib ntaiv thiab saib nws ntsig nws cov plaub hau uas twb hle lawm ntau heev. 

“Hnub no niam yuav tuaj coj kuv mus noj su” – Mary hais. 

“Mloog mas zoo heev os. Koj yuav mus noj su qhov twg?” Kuv ua tib zoo mloog Mary tham, txawm yog kuv paub tias Mary niam twb tuag tau ntau xyoo los lawm. 

“Kuv cheem tsum yuav hu rau kuv tus txiv” – Mary hais thaum tab tom saib mus saib los lub xov tooj. 

“Cia kuv mam hu rau koj.” 

“Tsis, kuv mam cim civ ua tau.” 

Tom qab plaub zaug sim hu tsis tau, nws thiaj cev lub xov tooj los rau kuv. Nws tus txiv hais tias yuav so haujlwm los ntxov thiab coj nws mus kuaj kws tshuaj. Mary hnov qab lawm. Mary xav tias ntshe nws yuav nrog nws niam mus noj su. 

“Mary, cia kuv muab khau thiab vuam txwv rau koj rau nawb?” 

“Tsis, cia kuv mam muab. Kuv lub chav sw heev; koj yuav nrhiav tsis pom.” 

“Ua li maj, tiamsis nco ntsoov tias kuv nyob ntawm no yuav pab koj.”

Kuv rov qab tuav Mary tes thaum Mary nce ntaiv. Kuv cia Mary nws mus nws ib leeg rau hauv nws lub chav vim nws nyiam li ntawd. Kuv nyob tshooj hauv tos. Mary rau ib nkawm khau ntaus tennis dawb thiab tsis rau vuam txwv. Pauv rau qhov ntawd, nws tuav rawv ib lub ris me dawb thiab. Kuv lub siab pom li ntawd hnov mob siab rau nws heev. 

“Mary, koj muab yuam kev lawm os. Koj sim rov qab nrhiav nkawm vuam txwv saib!”

Mary xav tsis thoob, saib ntsoov nws lub ris me. Kuv coj nws rov qab mus rau ntawm chav pw. Kuv muab ib nkawm vuam txwv dawb thiab muab nws lub ris rov qab tso tseg. Wb mam nqes los. Tom qab ntawd Mary muab nws nkawm khau khi rau. 

“Cia kuv pab koj khi puas tau” 

“Tsis, kuv mam cim civ ua,”

Mob siab heev thaum uas pom Mary cim civ siv zog ua txhua yam tshuav kuv ho muaj cuab kav pab tau kom Mary lub neej yooj yim zog. Thaum kawg Mary kuj khi tau nws nkawm khau. Kaum feeb tom qab, nws tus txiv los txog. Kuv hais lus noj qab nyob zoo thiab tsav tsheb los tsev, kuv lub siab mob. Kuv yuav tsis muaj hnub ntsib Mary ntxiv lawm. Mary tuag ob peb thiv tom qab ntawd. Tiamsis qhov haujlwm uas Mary cim civ ua txhua yam yeej tseem nyob rawv hauv kuv siab. 

Kuv kuj zoo ib yam li Mary. Kuv pheej tsis txais lwm tus txoj kev pab. Kuv tuav rawv kuv lub tswv yim uas xav tias “kuv cim civ ua tau yam ntawd”. 

Thiab kuv kuj tsis txais Vajtswv txoj kev pab. Kuv xav tias Vajtswv muaj ntau qhov haujlwm tseem ceeb dua yuav tau ua tshuav kuv li me me xwb. 

Nyob rau lub sijhawm luv luv uas tau nyob ntawm Mary ib sab, kuv saj tau txoj kev xav pab lwm tus tiamsis lawv ho tsis txais. Mob siab tshaj. Kuv yeej xav tsis tau tias Vajtswv hnov li cas thaum uas kuv pheej cim civ ua txhua yam. 

Lo lus “pab” tshwm sim txhua qhov nyob hauv Vajluskub Qub txog rau Vajluskub Tshiab. Vajtswv xav pab peb. Vim li cas peb pheej ua lub siab tawv siv zog ua lub neej los ntawm yus tus kheej, thiab txiav txim siab ua haujlwm ib leeg? Puas yog vim peb lub siab khav theeb? 

Tej Lus Qhia 4:9-10 qhia tias peb yuav tau muab pub mus thiab txais rov los yog ib feem nyob rau hauv Vajtswv lub homphiaj tseg rau peb txhua txoj kev sib raug zoo. 

“Ob leeg zoo dua ib leeg, rau qhov ob leeg ua haujlwm tau nqi zog ntau dua.  Yog ib tug ntog lawm, ib tug yuav rub nws tes sawv. Tiamsis tsis zoo rau tus uas nws ib leeg xwb, yog nws ntog lawm tsis muaj leejtwg yuav rub nws tes sawv”. 

Kuv yeej tseem kawm txoj kev vam lwm tus kev pab thaum uas muaj kev cheem tsum. Thiab kuv tab tom siv zog “Ua li ntawd” thaum uas muaj tus xav pab kuv. Qhov no yeej tsis yooj yim kiag li. 

Zaj kawm loj tshaj plaws uas kuv kawm tau ntawm Mary yog tej lus uas Vajtswv ntuas tias Vajtswv yog tus pab kuv. 

“Vajtswv yog peb lub chaw nkaum thiab yog peb lub dag lub zog, thaum twg peb muaj kev txomnyem nws npaj txhij pab peb” (Ntawv Nkauj 46:1)

“Kuv tsa qhov muag ntsia rau saum tej roob, saib kev cawm dim yuav tuaj qhov twg tuaj?  Kev pab kuv yog tuaj ntawm tus Tswv tuaj, nws yog tus tsim lub ntuj thiab lub ntiajteb” (Ntawv Nkauj 121:1-2).

Thov caw nrog kuv peb thov Vajtswv ua ke

Tus Tswv, ntev los no kuv cim civ ua txhua txoj haujlwm tsis kam txais Koj txoj kev pab lossis lwm tus nyob ib ncig txoj kev pab. Thov Vajtswv Koj zam txim rau kuv lub neej khav theeb, thiab pab kom kuv paub nrhiav Koj txoj kev pab hauv lub neej, ib yam li kuv kuj yuav pab leej twg uas cheem tsum kev pab. Kuv thov hauv Tswv Yexus Khetos lub npe. Amees.

Cov kwv tij uas hlub tshua, zoo kawg nkaus li thaum uas peb paub tias peb tsis nyob ib leeg hauv lub ntiajteb no. Vajtswv cia ntau txhais tes nyob ib ncig pab peb, thiab tej haujlwm uas peb cheem tsum ua yog qhib siab txais yuav xwb. Txhob siv zog tawm tsam ib leeg, cia li kawm txoj kev txais Vajtswv txoj kev pab thiab lwm tus txoj kev pab kiag hnub no.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj