Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Tej zaug lub sijhawm no yog lub sijhawm uas peb tab tom ua neej nyob rau lub caijnyoog uas puv npo txoj kev nyuaj siab thiab kev txhawj ntshai. Yuav ua li cas kom tiv dhau txoj kev txhawj ntshai thiab ua lub neej muaj yeej, tej uas Daviv ntsib dhau yuav tseg rau peb qee zaj kawm uas muaj nqis. 

Hnub no, yog hnub 28/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Danny Davis dhau ntawm zaj kawm Thov cawm kom kuv dim kev txhawj ntshai

Kuv thov tus TSWV, thiab Nws teb kuv tej lus thov, Nws cawm kuv dim ntawm tej kev txhawj ntshai huv tibsi lawm. (Ntawv Nkauj 34:4). 

Koj thiab kuv peb sawv daws tab tom ua neej nyob rau hauv lub ntiajteb uas puv npo tej kev txhawj ntshai. Tus kab mob kis thoob plaws qab ntuj khwb no muaj npe tias COVID-19 tau ua rau coob tug txoj kev txhawj ntshai ntau tuaj. Tej kev hloov pauv ntawm nyiaj txiag, kev lag luam yim ua rau coob tug hnov txhawj heev vim lub neej tom ntej tsis paub yuav zoo li cas, tsis muaj kev cia siab. Tej xov xwm saum tej fuab cua kuj tab tom yug thiab ua rau txoj kev txhawj ntshai tab tom loj zuj zus txhua lub sijhawm. Kuj pom tias tamsim no kiag, muaj ib txhia neeg tab tom sib mos nrog kev txhawj thiab ntshai. Yog tsis ntseeg Vajtswv ces txoj kev ntshai no yuav ua rau coob tug ua tej haujlwm txawv heev. 

Peb sawv daws cia li los saib ua ke txog zaj xwm txheej tom qab Ntawv Nkauj 34. Zaj nkauj no yog nqua hu txog kev pehawm Vajtswv ntseeg siab rau Vajtswv pauv kev txhawj ntshai. Daviv tau sau cov lus no thaum uas tab tom hnov txhawj ntshai rau nws txoj sia. Thaum mus txog rau ntawm Nkas, Daviv ntshai Akhises heev, uas yog  lub nroog Nkas tus vajntxwv (ib yam li tau hais nyob rau hauv 1 Samuyees 21:12). Daviv ntshai txog qib uas lom txwm ua ib tug neeg vwm, “Daviv ua txuj ua li tus neeg vwm, thaum luag cheem nws, nws lam tau, lam kes ntawm tej rooj vag nroog, thiab ua qaubncaug nrog zig ntawm nws tej roojvag.” (1 Samuyees 21:13). “Kev ua si sib twv lus” ntawd pab tau kom Daviv tsis raug teeb meem tiamsis ho coj yawg mus ntsib rau lwm yam teeb meem.  Thaum kawg, Daviv thiaj khiav mus nkaum rau hauv lub qab tsua hu ua Adulas, thaj chaw uas yawg dhau los ua thawj tuav 400 tus neeg raug luag tsim txom, tshuav luag nqi thiab cov uas tsis txaus siab tab tom nkaum rau hauv lub qhov tsua no nrog yawg ua ke vim kuj tab tom ntshai (1 Samuyees 22:1). 

Tiamsis nyob hauv lub qhov tsua ntawd, ua neej nrog txoj kev ntshai, thiab siv zog coj kev cov neeg uas tab tom ua neej nrog txoj kev ntshai, Daviv tsa suab hlo thov Vajtswv. Nyob hauv Daviv cov lus taij thov thiab qhuas Vajtswv, peb yuav kawm tau tej tswv yim zoo los tawm tsam txoj kev txhawj ntshai. 

Ua ntej yog hwm Vajtswv (Ntawv Nkauj 34:1-3)

Daviv pib zaj nkauj no los ntawm kev qhuas Vajtswv thiab txhawb nqa Nws. Kev txhawj ntshai pib yaj zuj zus mus thaum uas koj thiab kuv pib tsis ntsia nws lawm thiab tsom ntsoov rau Vajtswv. Peb lub qhov muag ntsia rau lub caijnyoog yuav hloov pauv thaum uas peb tig qhov muag mus ntsia rau ntawm Vajtswv tus uas muaj hwjchim loj kawg nkaus tab tom tswj txhua yam. Hauv lub qhov tsua uas txhawj ntshai ntawd, ib ncig yog 400 tus neeg tab tom txhawj ntshai. Daviv ntuas peb tias thaum peb tsom ntsoov rau Vajtswv, peb lub siab yuav tau tso dim kom ntsia pom Vajtswv – tus uas hlub peb los ntawm txoj kev hlub tsis muaj nrim. 

Qhov ob yog nrhiav Vajtswv (Ntawv Nkauj 34:4) 

Tsom ntsoov rau Vajtswv tus muaj hwjchim yuav pab kom peb ruaj siab nrhiav Nws. Nyob rau ntawm Daviv thaum ntawd, nws muab tag nrho nws tej kev txhawj ntshai cob rau Vajtswv. 

Petus tau ntuas peb txog qhov tseeb no li no: “Vajtswv yog tus uas niaj hnub tsom kwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.” (1 Petus 5:7). 

Qhov peb yog ntseeg Vajtswv lub hwjchim (Ntawv Nkauj 34:5-22) 

Txij li nqe 4 ntawm zaj nkauj no, luag pom tias kev txhawj ntshai pib khiav deb zuj zus ntawm Daviv mus lawm thaum Vajtswv lub zog hloov pauv nws. Daviv pib nkag siab tias leej twg “hwm Vajtswv” tsis yog yuav ntshai tib neeg yuav tau muab nthuav tawm, tsis muaj ib yam dabtsi tsis raug nthuav, saj tau Vajtswv yog tus cawm dim thiab ntseeg siab hais tias “Tus neeg ncaj ncees tiv ntau yam kev nyuaj siab, tiamsis tus TSWV cawm nws dim tej kev ntxhov siab ntawd huv tibsi.” (Ntawv Nkauj 34:19).

Thov caw nrog kuv peb thov Vajtswv ua ke: Tus Tswv uas muaj hwjchim loj kawg nkaus, peb qhuas Koj vim Koj yog tus ua siab ntev thiab mloog peb tej lus taij thov. Peb muab tag nrho peb tej kev txhawj thiab ntshai fij rau Koj vim Koj hlub tshua txog peb. Peb ntseeg rau Koj lub hwjchim thiab thov kom Koj tshwm ntsej tshwm muag txhawb cov neeg tab tom muaj kev txhawj ntshai lub sijhawm no. Kuv thov hauv Tswv Yexus Khetos lub npe. Amees.

Cov kwv tij, yog koj hnov txhawj thiab ntshai vim tus kab mob Covid-19 yeej tseem tsis tau paub tias thaum twg mam xaus thiab lub neej tom ntej tsis paub yuav zoo li cas, cia li mus cuag Vajtswv thiab hwm Nws, nrhiav Nws, thiab ntseeg Nws yog tus muaj hwjchim loj kawg nkaus.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.