Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Puas tau muaj zaum twg koj saj tau lub zog puv ntoob los ntawm Vajtswv los thaum koj lees hais tias koj yog tus tsis muaj zog ntawm Vajtswv xub ntiag? Thaum koj qaug zog kuj yog lub sijhawm uas koj muaj zog. Vim Vajtswv yog tus yuav ntxiv dag zog thaum uas peb vam khom rau Vajtswv. Vajtswv paub tseeb koj yog leej twg, Vajtswv nkag siab koj tej kev mob siab thiab paub ua ntej txog koj lub neej tom ntej. Koj yuav tsis nyob ib leeg vim Vajtswv nyob rawv ntawm koj ib sab, Vajtswv yog tus yuav tiv thaiv kom koj dim tej kev phomsij. 

Hnub no, yog hnub 29/06/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Beth Patch dhau ntawm Zaj kawm LUB POB ZEB NYOB MUS IB TXHIS

“Tus Tswv, kuv hlub koj kawg li, koj yog tus tiv thaiv kuv. Tus Tswv yog tus tiv thaiv kuv; nws yog kuv lub chaw fajxwm uas ruaj khov. Kuv tus Vajtswv yog tus tiv thaiv kuv, kuv nrog nws nyob tso siab plhuav. Nws tiv thaiv kuv ib yam li daim thaiv hniav ntaj, nws tiv thaiv kuv thiab pab kuv dim.” (Ntawv Nkauj 18:1-2)

Ntau zaug peb hnov tias peb tsis muaj txaus lub zog los ua kom tiav peb txoj kev npau suav thiab peb txoj kev cia siab. Muab ua lwm lo lus hais, peb hnov tias peb tus ntsujplig no qaug zog zis. Tej lub sijhawm uas peb qaug zog li ntawd, Vajtswv txojlus nyob rau hauv Vajluskub ntuas kom peb nco txog tus vajntxwv uas nto npe lug yog Daviv. Yawg yog tus qauv zoo txhawb kom peb kov yeej nyob rau hauv lub sijhawm muaj kev txomnyem. Txawm yog yuav ntsib tej kev txomnyem los Daviv yeej nco ntsoov Vajtswv yog yawg qhov chaw nkaum thiab yog tus yuav ntxiv zog rau yawg.  

Daviv sau nyob rau hauv Ntawv Nkauj18:1-2: “Tus Tswv, kuv hlub koj kawg li, koj yog tus tiv thaiv kuv. Tus Tswv yog tus tiv thaiv kuv; nws yog kuv lub chaw fajxwm uas ruaj khov. Kuv tus Vajtswv yog tus tiv thaiv kuv, kuv nrog nws nyob tso siab plhuav. Nws tiv thaiv kuv ib yam li daim thaiv hniav ntaj, nws tiv thaiv kuv thiab pab kuv dim.”

Txawm yog ntsib kev sim siab los Daviv yeej qhuas Vajtswv thiab lees hais tias yus yog tus tsis muaj zog. Tag nrho yawg lub zog nyob rau hauv Vajtswv txhais tes yog tus muaj hwjchim thiab yog tus uas tsim yawg los. 

Daviv lees tias nws yog tus neeg qaug zog yog li yawg thiaj thov Vajtswv thiab hais rau Vajtswv tias yawg tag siab, tag dag tas zog, tag ntsujplig, kev txawm ntse los hwm Vajtswv. Yawg ntseeg tias Vajtswv yuav ntxiv zog rau yawg kom yawg muaj zog. Nyob rau hauv Daviv lub neej, yawg tau ntsib ntau yam kev nyuaj siab. Yog nyuaj siab thiab tag kev cia siab vim yawg tej kev txhaum. Yawg kuj paub tias txawm yog yawg tau tsis lees Vajtswv los Vajtswv yeej tsis tau tso yawg tseg. Vajtswv pub rau kom yawg muaj lub siab tawv tig rov qab los, lees yawg tej kev txhaum thiab nrhiav Vajtswv. 

Qhov xwm txheej uas tshwm rau Daviv ua rau kuv nco txog kuv tau ua tsheb sib tsoo rau ob peb xyoos dhau los. Thaum ntawd, kuv yog tus tub hluas, kub siab lug vim thawj zaug tau tsav tsheb loj. Tiamsis vim tsav tsheb thaum los nag loj loj thiab kuv tseem tsis tau paub yuav ua li cas yog li kuv thiaj tsav tsheb ua rau tsheb ntxeev tiaj. Ntawd yog thawj zaug kuv ntsib dhau txaus ntshai hauv kuv lub neej. Nyob rau lub sijhawm txaus ntshai ntawd, kuv tsuas paub qi muag nti thov kom Vajtswv pab cawm kuv. Dhau ntawm Vajtswv lawm yeej tsis muaj leej twg pab tau kuv nyob rau lub sijhawm zoo li ntawd. Tomqab uas kuv yuav luag tuag ntawd, kuv xav ntau txog vajntxwv Daviv. Yawg kuj muaj ntau zaug nti mus nti los nyob rau hauv txoj kev nyob ib leeg nrog txoj kev sim siab. Tiamsis ua Vajtswv tsaug vim Vajtswv tsis muaj ib zaum twg tso peb tseg. Vajtswv yog tus tu tus tiv thaiv peb zoo li tus poj qaib puag nws tej menyuam. Kuv yeej tseem nco lub sijhawm uas kuv yuav luag tuag, thaum kuv lub tsheb loj ntxeev, Vajtswv ua rau muaj coob tug tuaj pab kuv txawm yeej  tawm hauv tsheb los thiab hu tsheb hauv tsev tshuaj tuaj pab kuv. Vajtswv kho kuv zoo thiab pab kuv dim ntawm txoj kev tuag rov qab los. 

Tseeb tiag, Vajtswv tsis tso peb tseg ib zaug li, Vajtswv txojlus nyob rau hauv Ntawv Nkauj 18 ua rau peb muaj kev cia siab tias Vajtswv yuav tiv thaiv peb dim ntawm cov neeg phem. Vajtswv hlub peb tsis muaj nrim. Vajtswv yog tus yuav tso peb dim ntawm tej lub sijhawm uas muaj kev txomnyem thiab dab ntxwgnyoog txoj kev tua tuaj uas yog peb tus yeebncuab.

Vajtswv txojlus ntuas kom peb nco ntsoov tias Vajtswv yog tus uas nag hmo, hnub no thiab mus ib txhis tsis hloov. Vajtswv txojlus yog zoo kawg nkaus yog cov lus muaj hwjchim nyob rau hauv peb lub neej. Vajtswv txojlus yog cov lus muaj nqis thiab nyob mus ib txhis. Vajtswv txoj kev thaum twg twb yog. Peb vam khom rau Vajtswv yog tus ua raws li Nws tej lus cog tseg. Vajtswv yuav cawm peb ib yam li tau cawm Daviv dim ntawm lub sijhawm muaj kev txomnyem thaum yawg hu txog. 

Kuv tau saj tau ntau zaug tau Vajtswv cawm kuv dim. Thaum kuv ntsib tej teeb meem nyob rau hauv lub neej, kuv nrhiav Vajtswv txojlus pab kom kuv tiv dhau tej kev sim siab. Kuv paub tias Vajtswv tib leeg thiaj yog tus pab tau kom kuv muaj txoj kev txiav txim siab tau zoo tshaj plaws rau tej teeb meem uas kuv tab tom ntsib. Ntau zaug tej ntawd tshwmsim los tsis yog raws li kuv siab nyiam tiamsis paub tseeb tias Vajtswv yog tus tab tom tswj thiab paub tias yam dabtsi zoo rau kuv thiab tes haujlwm uas kuv tab ua pub rau Vajtswv. 

Thov kom Vajtswv txojlus puv ntoob rau hauv peb lub siab  kom peb ruaj siab rau ntawm Vajtswv yog tus tiv thaiv, thiab pab kom peb kov yeej txhua yam teeb meem. Vajtswv zoo siab thaum peb ntseeg Nws thiab ua raws li Vajtswv lub siab nyiam.

Thov caw nrog kuv peb thov Vajtswv ua ke

Kuv tus Vajtswv, kuv ua Koj tsaug ntau heev, vim Koj niaj hnub tiv thaiv, saib xyuas peb txhua lub sijhawm. Thov Vajtswv Koj pab kom peb paub nrhiav Koj thiab mloog Koj lus. Thov Vajtswv Koj pab peb txawm yog thaum peb tau zoo lossis peb txomnyem los peb yuav tag siab hwm Koj thiab ua raws li Koj lub siab nyiam uas zoo rau hauv peb lub neej. Peb thov hauv Tswv Yexus Khetos lub npe. Amees.
Ib tsoom kwvtij sawv daws, Vajtswv txojlus nyob rau hauv Vajluskub yuav coj koj tiv dhau tej lub sijhawm uas koj tab tom ntsib tamsim no li cas? Koj puas ntseeg tias Vajtswv yog tus yuav pab kom koj txiav txim siab tau zoo tshaj plaws?
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj