Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Muaj ib txhia neeg nyiam ntsia pom tus duab zaj sawv  tiamsis ho tsis xav kom los nag. Tseeb tiag, tej duab zaj sawv ci zoo nkauj ntawd pheej tshwm tom qab uas los tej kab nag loj loj. Kuj ib yam li ntawd, koj yuav ntsia pom yam uas zoo tom qab uas koj ntsib tej kev sim siab hauv lub neej. 

Hnub no, yog hnub 30/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Brooke Keith dhau ntawm zaj kawm TUG DUAB ZAJ SAWV THAUM LOS NAG TAG

Tus neeg ncaj ncees tiv ntau yam kev nyuaj siab, tiamsis tus TSWV cawm nws dim tej kev ntxhov siab ntawd huv tibsi. (Ntawv Nkauj 34:19)

Kev sim siab yog ib yam uas yuav tsum muaj nyob rau hauv peb lub neej kuj zoo ib yam li lub hnub tawm tuaj thaum sawv ntxov thiab poob qho thaum tsaum ntuj. Ntau zaug kuv xav tias peb cov ntseeg Vajtswv yuav tsum tau noj qab nyob zoo thaum muaj tej lub caijnyoog tsis zoo. Kuv tau xav tias yog cov ntseeg Vajtswv lawm ces yuav muaj ib lub zog loj heev twg pab kom peb zam dhau tej kev sim siab thiab kev txomnyem. Kuv tau xav tias ntshe yus yuav nrhiav pom tus duab zaj sawv uas tsis tas yuav los nag. 

Txhua yam nyob rau hauv kuv tsev neeg yeej tshwm sim txhua hnub. Cov menyuam lawv ua si ntawm tshav puam, tshuav lub tivi hauv tsev los yeej tseem qhib. Kuv zaum ntawd, nrog kuv txoj kev mob plab tau ib hli los no. Kuv tsis nkag siab vim li cas kuv ho mob ua luaj li no. Thaum kawg, kuv tus txiv thiaj txiav txim siab coj kuv mus rau tom tsev tshuaj. Lub sijhawm ntawd, kuv lo lus xav tias  “vim li cas ho yog kuv os Tus Tswv” tau  puv npo hauv kuv lub hlwb. 

Thaum mus txog chaw, kuj zoo ib yam li txhua zaug uas kws tshuaj tshuaj xyuas, kuv tus mob ntaug zog me ntsis lawm. Zaum hauv lub chav kho mob tsis muaj qhov rai muab tej ntaub ntsuab los thaiv, kuv nov khwv heev thaum uas yuav tsum zaum twj ywm thiab tsis pom ib puas tsav yam ib ncig tab tom tshwm sim. Kuv xav mas ntshe lub suab pheej yws yws ua rau kuv npau taws ntawd tau ua rau kuv lub hlwb tsis tsom ntsoov rau kuv lub plab tab tom mob. Kuv hnov ib lub suab rov khis khaus khis khaus. Muaj ib nthwv cua tuaj yaws daim ntaub thaiv nce. Ntawd yog lub sijhawm uas kuv ntsia pom muaj ib lub tsheb cab tab tom khiav ceev ceev heev dhaum ntawd. Thaum kawg vim kuv xav paub seb yog yam dabtsi ntawd, kuv sawv tsees saum kuv lub txaj pw, rub daim ntaub saib seb muaj yam dab tsi tab tom tshwm sim. 

Lub tsheb cab no khiav ceev heev ua rau kuv ntsia tsis yeej tias leej twg tab tom zaum saud. Kuv kuj ntsia pom muaj ib tug poj niam raws qab ntawd saib mas qaug zog kawg los kuj mus ceev kawg. Vim kuv xav paub, kuv thiaj zaum ntawm lub rooj ze zog ntawd. 

Tau ib me ntsis ntev loo, lub suab khis khaus khis khaus ntawd rov qab nrov dua. Nyob ntawd, kuv zaum tim ntsej tim muag nrog ib tug tub hluas tab tom saib ntsoov rau hauv pem teb. Tus metub ntawd caws zog, ntawm nws txhais tes coj ib txoj hlua liab hauv lub tsev kho mob ntawd khi rau. Kuv pib hais lus. Tus metub  nws luag ntxhi teb kuv… tiamsis hais tsis tawm lus. Kuv paub tias tus metub nws nkag siab tej lus uas kuv hais rau nws dhau ntawm lub suab luag ntawd, tus metub nws zaum saum nws lub tsheb cab thiab tawm mus rau lwm qhov. Zaum no tseem ceev dua zaum tas los. Thiab nws niam kuj mus kom tag nrho zog ceev tshaj plaws ntawm leej niam ob txhais taw. 

Lub sijhawm uas tos kws tshuaj tuaj xyuas, kuv zaum hauv lub chav ntawd tau ob peb sij. Tiamsis tej lub sijhawm ntawd tseem dhau mus yooj yim dua li lub suab uas kuv hnov nrov khis khaus khis khaus thiab txhua zaug uas daim ntaub ntawm kuv lub chav yaws nces. Txhua zaug uas lub suab khis khaus nrov, lub tsheb cab ntawd yim fuab yim ceev, thiab cov ko taw khiav raws qab ntawd kuj maj mam raws qab. 

Thaum 3 teev tav su, kuv tau kws tshuaj tso los tsev tsis muaj ib lo lus teb twg dhau ntawm tib lo lus ua rau kuv tsis txaus siab, yuav tau rov qab tshuaj xyuas dua ntxiv. Thaum tab tom taug kev tawm los, kuv rov qab ntsib tus metub thiab nws niam nkawd! Saib tus metub, kuv hais “Mam Sib ntsib dua Daniel!” Tus metub ntawd luag ntxhi ces nws txawm mus lawm. Saib nws niam khiav raws qab, saib mas nkees kawg nkaus li. Kuv saib nws niam thiab luag, “Koj ua siab ntev heev thiab siab zoo kawg”. 

Tus niam tsev ntawd teb, “tsis muaj dab tsi os. Tus metub yog ib qhov txujci nyob rau hauv kuv lub neej. Txhua tus puav leej saj tau tej txuj ci sib txawv”. Lo lus hais no ua rau tej kev xav hauv kuv lub taubhau khiav ceev ib yam li lub tsheb cab ntawd. Tus metub zaum twj ywm ntawd tsis nti-dhau ntawm lub tsheb khiav. Tus metub tsis hais lus, tsuas luag xwb. 

Tiamsis nyob rau ntawm tej kev sim siab hauv lub neej txhua hnub uas tus niam tsev thiab nws tus tub tau ntsib, tus niam tsev no nws yeej suav tias ntawd yog koob hmoov. Nws ntsia pom muaj txuj ci hauv tej kev sim siab ntawd. 

Kuv kawm tau ntau yam heev ntawm tus niam tsev no thiab lub tsheb cab uas tseem khiav ceev dua cua ntawd. Kuv kawm tau tias thaum yus ob txhais kotaw qaug zog zis, peb yuav tau siv zog. Thaum txoj kev taug puv npo tej khaub pos, peb yuav tau tsom ntsoov saib tusTswv tsis yog saib rau tej teeb meem. 

Ua ntej tshaj plaws, peb yuav tsum tau paub tias kev sim siab thaum twg twb yuav muaj. Yog, kuv tau muaj zaug ntseeg tias peb yuav tau noj qab nyob zoo thaum muaj teeb meem. Nyob rau ib qhov twg, yeej yog tias peb tau txais kev noj qab nyob zoo, tsis yog noj qab nyob zoo vim tsis muaj kev sim siab, tiamsis noj qab nyob zoo thaum muaj cua daj cua dub. Peb tsis muaj ib lub zog loj twg pab kom peb dim dhau tej teeb meem, tiamsis peb tab tom ua haujlwm rau ib tug Vajtswv muaj hwjchim. 

Peb tsis tau cog lus kom yuav dim txhua yam teeb meem. Tiamsis peb tau cog lus tias peb yuav tau noj qab nyob zoo hauv txhua nthwv cua. Thaum tej kev sim siab los raug ntawm koj tsev lossis hauv koj chav tsev kho mob, tej zaug koj yuav hnov khwv heev los mloog tau Vajtswv lub suab thaum uas koj lub qhov ntsej mloog rawv tej lus yws npau taws vog. Lossis ntau zaug Vajtswv tsis hais ib los li. Vajtswv tsuas ib tug neeg twg tuaj xa Nws tus dej siab pub rau koj xws li tus metub Daniel thiab nws niam uas kuv tau ntsib nyob rau hauv tsev tshuaj. Tsis tas li tus metub no tseem ua rau kuv nco txog tus cev lus Daniyees yog tus uas ruaj siab rau txoj kev ntseeg txawm yog raug muab pov rau hauv qhov tsov ntxhuav. 

Tus duab zaj sawv uas zoo tshaj plaws yog tus duab tom qab uas los kab nag hlob hlob. Thiab thaum uas nrhiav yam uas zoo hauv kev sim siab, peb yuav nrhiav pom yus tus duab zaj sawv nyob rau hauv tus dej nyab thiab tej lus cog tseg uas Vajtswv cog pub rau peb dhau ntawm tej nthwv cua. 

“Tus neeg ncaj ncees tiv ntau yam kev nyuaj siab, tiamsis tus TSWV cawm nws dim tej kev ntxhov siab ntawd huv tibsi.” (Ntawv Nkauj 34:19).

Thov caw nrog kuv peb thov Vajtswv ua ke: Tus Tswv thaum ntsib tej kev sim siab hauv lub neej, thov pub kom kuv paub saib ntsoov Koj, kom pom tej koob hmoov uas Koj tseg rau kuv nyob hauv tej nthwv cua daj cua dub. Kuv thov hauv Tswv Yexus Khetos lub npe. Amees.

Cov kwv tij, nyob hauv tej kev txomnyem sim siab uas koj tab tom ntsib, cia li xav seb Vajtswv tab tom hais qhia rau koj txog yog yam dab tsi. Nco qab ntsoov tias yim muaj cua daj cua dub heev ces tus duab zaj sawv yim pom zoo. Ntseeg tias thaum uas koj ruaj siab rau ntawm Vajtswv, koj yuav ntsia pom thiab saj tau yam zoo kawg nkaus uas Vajtswv tseg rau koj. 

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.