Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Zoo ib yam li peb tau niam thiab txiv yug los yog li peb muaj tej tus yam ntxwv zoo li peb niam peb txiv, peb kuj tau nqua hu kom ua raws li Vajtswv tus yam ntxwv nyob rau hauv peb lub neej. Vim thaum uas peb nthuav tawm txoj kev ua lub neej raws li Vajtswv tus yamntxwv, ntiajteb yuav paub tias peb yog Vajtswv tus menyuam.

Hnub no, yog hnub 15/01/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cassey Nathan dhau ntawm Zaj kawm UA LUB NEEJ RAWS LI VAJTSWV TUS YAMNTXWV

“Nej yog Vajtswv cov menyuam uas Vajtswv hlub, nej yuav tsum xyaum ua nej lub neej kom raws li Vajtswv tus yamntxwv.” (Efexaus 5:1)

Tau ib tug menyuam los rau hauv tsev neeg tej zaug yog ib yam uas tseem ceeb tshaj plaws nyob hauv lub neej. Lub sijhawm uas tos ntsoov nws yuav yug los, kub siab lug xav paub saib nws yuav zoo li nws niam lossis nws txiv, yuav ua rau muaj txoj kev zoo siab puv npo rau kuv tsev neeg. Twb txog lub sijhawm yuav yug wb tus ntxhais los ua rau wb ob niam txiv zoo siab heev. Thaum uas pom nws loj hlob zuj zus nyob hauv niam plab, wb tos ntsoov kom tau pom nws yug los.

Thaum wb tus ntxhais yug los, wb tej txheeb ze phooj ywg hais tias: “nws lub txiv ntswg zoo thooj niam, ob lub qhov muag zoo li txiv”. Wb yeej tsis muaj dabtsi yuav xav tsis thoob thaum uas lawv hais tias wb tus menyuam zoo li wb, vim tus ntawd yog tus menyuam uas wb yug los! Kuv ntseeg tias tus cwjpwm lub cev ntaj ntsug yuav zoo li niam thiab txiv.

Nyob hauv Efexaus 5:1 Paulus nqua hu cov ntseeg Vajtswv:
“Nej yog Vajtswv cov menyuam uas Vajtswv hlub, nej yuav tsum xyaum ua nej lub neej kom raws li Vajtswv tus yamntxwv.”

Thaum uas hnov xov txog tej no, muaj ntau tus ntseeg niaj hnub nim no lossis cov ntseeg nyob hauv Efexaus thaum ub lawv yuav khuab xeeb tias: “yog li tseeb tiag peb yuav tau xyaum raws li yam dabtsi?” Lo lus teb peb yuav nrhiav tau txij li thaum uas tib neeg tau tsim los nyob rau hauv Chivkeeb 1:26-28, thaum uas Vajtswv qhia kom Adas thiab Evas nkawd yuav tau ua nkawd lub neej zoo li cas kom thiaj yuav yog raws li Vajtswv tus yamntxwv. Vajtswv txojlus qhia tias: “Vajtswv foom koob hmoov rau nkawd thiab hais tias, “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb. Kuv tsa neb kav tej ntses hauv hiavtxwv, tej noog uas ya saum nruab ntug, thiab txhua tsav yam tsiaj uas nyob hauv ntiajteb no.”

Ntawm no yog tus qauv uas Vajtswv nqua hu kom Vajtswv cov menyuam yuav tau xyaum raws li ntawd. Tiamsis Adas muab nws txojcai ua tus tswjhwm tso tseg thiab muab lub hwjchim ntawd rau Xatas – yog tus nab thaum ub tau los rau hauv lub vaj Edees, ces daim duab txog tib neeg cia li tsis zoo lawm.

Zoo kawg nkaus li, Tswv Yexus tau them tus nqi nyob saum Ntoo Khaub Lig kom rov qab kho Vajtswv tus yamntxwv uas Vajtswv tau muab pub rau tib neeg ntawd dua. Yog li, thaum peb ntseeg hauv siab tias Vajtswv yog tus ua rau Tswv Yexus sawv hauv qhov tuag rov qab los, thiab lees yuav Tswv Yexus ua tus tswv Cawm Seej (Loos 10:9), ces peb muaj txaus lub peev xwm los txais yuav lub npe no: yog xeem uas tau xaiv, yog cov pov thawj hlob nyob hauv vajntxwv lub loog (1 Petus 2:9).

Yuav tau paub tias thaum peb nyob rau hauv Yexus Khetos, peb tau tso dim hauv tus neeg phem txoj kev tswjhwm phem los. Yog tias peb hla dhau tus ciam uas Vajtswv tau teem tseg rau peb, ces peb yuav mus dhau Vajtswv lub homphiaj thaum pib uas Vajtswv npaj tseg rau tib neeg. Tiamsis thaum peb siv lub hwjchim uas Vajtswv pub thiab tiv dhau kev sim siab, kev txomnyem, peb yuav txais tau kev muaj yeej ib txwm muaj puag thaum pib los.

Thov caw nrog kuv peb thov Vajtswv ua ke.
Ua Vajtswv tsaug vim koj tau tsim peb tib neeg los muaj tus yamntxwv zoo li koj. Thov Vajtswv pab ntxiv koob hmoov rau peb kom peb ua lub neej raws li koj tus yamntxwv, thiab tsis yuam kev mus raws txoj kev hauv ntiajteb no. Thov Vajtswv pub lub hwjchim rau kuv kom kuv nthuav tawm tau koj txoj kev hlub los ntawm tes haujlwm thiab lo lus hais, kom ntiajteb paub tias peb yog koj menyuam. Kuv thov hauv Tswv Yexus Khetos lub npe. Amees.

Cov kwv tij thaum peb pib ib xyoo tshiab nrog ntau lub homphiaj ntau lub tswv yim tshiab, nco qab ntsoov yuav tau xyaum raws li Vajtswv uas yog peb leej txiv. Yog Vajtswv tej tub tej ntxhais, yuav tau ua los ntawm Vajtswv lub hwjchim thiab kev hlub kom ua lub neej tsimnyog rau Vajtswv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.