Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Bol he gam kìs tom dô lơgar bềng ală bơta rŭng rài, jak sò-dră mơ ò gơs lơngai. Rài kìs tŭ do lơh bol he in pal ntào di đap ală bơta bơklơ̆n bol glar, gơlòng mơ bơta tơm-pìt tơm-hà pran ngan kòp ngai. Oă cau sền gŏ he ò git đah lơi, roh bơta dòn mơ hŭi gùng tơm bơta jơngọ. Bol he pal cang dô bơta àng pơnđang sol, tề lăm mơ ceng tus bol he in gơtha, tơnggu rài kis. Bơta àng kwơ màng hơ̆ ò tus bơh lơi ndai rlau mơ să tơm Yàng bol he dê.

Ngai do, ngai 02/03/2024, Bơta Hòi Dan Kòp Ngai dan jà jơh ală cau iat kơlôi sơnưng bal Jơnau Yàng kơnòm di bơta dong kơl Michael Plemmons gan tơnggume BƠTA ÀNG CRIH CRÀI

“Do, añ ntào di mpồng mơ teh; dilah cau lơi kơno jơnau añ mơ pò mpồng, gen añ rơp mut mơ sào bal mơ khai, khai bal mơ añ.” (Yal Tơlik 3:20)

Bol he gam kis tơm dô pah rài ò hềt gơs tơm bơta yal yau. Bơta sơlồng-sơlàng mơ roh lơngai gơlik gơs hơđang dunnia kờp ngai. Ò gơs jơnau lơi rgơi đơs tus ală bơta pơrlòng mơ ală sră pơar neh cih tus nđò jơ. Bơta pin wil wơl, rngòt rngơt, roh lơngai bơh ngai tơnơ̆ lơh dơngoh kơlôi mơ nùs nhơm kòn mơnus di gơlik gơs lu-lì.

Gen tang ngai do, añ koñ pơyoa jơnau pơndòm tus ală cau lơi ơm tơm bơta jê-sồt: gơs dô Bơtau sùm kơlôi tus oh mi mơ sùm rcang sir nang dọ̆ng tă oh mi, bulah oh mi tìp bơta lơi. Pham tơlak tơman cau hơđang plai ù kŏng bơta jê-sồt, mơ kòp nă cau ceng dô bơta jê-sồt pha ìs. Nùs nhơm añ lề-làc mơ nùs añ moat-jrùng tơm tŭ sền gŏ ală bơta mơ jơh dunnia pal lòt gan.

Tơlak cau ngai do ntào di đap bơta rŭng rài bơh jên prĭa. Bol khai la ală cau lơh broă song. Bol khai ngac ngar lơh broă, ròng-siam hiu nhă, lơh jat boh lăm. Mơ ya tài bơh roh broă lơh, roh cau koñ gơboh hala kòp jê, bol khai pal añ dô bơta kơnjơ̆ bơh jên prĭa mơ să tơm bol khai ò rgơi lơh bơta lơi. Kòp ngai bềng bơta kơlôi rngòt bơh dô ngai tơnơ̆ ò git nên cê, cau ò git pal lơh bơta lơi mơ gơlơh ò joi geh gùng lik klàs.

Tơm dô lơgar sơlo ngai sơlo roh bơta ăt-bồ, bol he ji-gloh joi geh gơtha ngan rài kis dê. Ăñ dô nùs nhơm bal gơwèt mơ ală hwing nùs kwi-kwơ joi gùng lòt digul rài kis gơs oă bơta. Ngai do, bơta ji dơngoh, bơta pal kong jai oă ir neh gơlik gơs bơta bè òs pal kong kờp ngai- bơta mơ ală pah rài hơđap ò hềt lòt gan. Bơh poan đah jơng trồ, bol he gơkol sò-dră bơh rbô rhiang bơta kơlôi sơnưng pha is, sồr bol he pal joi git seng ho tơnggu mơ gơtha rài kis in.

Gơtha ngan hơ̆ ming la joi gŏ tơm Yàng Dong Klàs Jesu. Tơm măng lai mơ tŭ kong bol glar, Kơnràñ đơs mơ ală cau bơtê lah Yàng Tom Trồ gơs dô tơnggu mơ bơta rơndap bơh đang jong. Yàng Jesu la Yàng Tom Trồ gơlik gơs kòn mơnus. Kơnràñ tus tơm dunnia nang lơh cơng dunnia in gŏ bơta koñ gơboh mơ don song Yàng Bèp dê. Mpang tê Kơnràñ sơm-bơi ală cau kòp-ji, dŏng tă ală hwềng-soan gơkrăm tơm bơta roh gơn kơnom. Jơnau Kơnràñ dê la nùs nđàc sơngit mơ git wă jrô ndơp.

Dunnia ngai do gơs ală bơta kơlôi sơnưng tìs bơh Yàng Tom Trồ. Ală yàng ma-blàc neh lơh tìs nrah bơta wă wơng kòn mơnus di, lơh blàc dô rùp sơnio pơrlơ̆ wơl mơ bơta koñ gơboh lơbơn niam mơ nùs nđàc sơngit Bèp Hơđang Trồ. Mơ ya Yàng Jesu gơs dô tơnggu mơ dô bơta rơndap. Kơnràn gam lơh dô gơnoar broă kwơ màng. Nàng rgơi lơh wil tơl gơnoar broă hơ̆, Kơnràñ pal phi să. Bơh gơnoar broă Kơnrañ dê la ceng tus dô tơnggu mơ gơtha dunnia in, dô dơ̆ tơl rau.

Hơđang chi pơng, Kơnràñ neh mă añ bơta bassil baso, tồi-glài mơ bơta cahrña jơh jơi kòn mơnus in gan ală pah rài. Mơ ya Kơnrañ kung gơs dô tơnggu dờng màng rlau tai. Kơnràñ git lah gan bơta chơ̆t phi să hơ̆, Kơnrañ rơp pò gùng nang kòn mơnus dòp geh bơta ang kwơ màng bơta kis tus bơh ming Yàng Tom Trồ lơm. Bulah rài kis gơs bol-glar mbe lơi, Yàng Jesu neh chơ̆t nàng ală cau dòn Kơnràñ dòp geh bơta kis gam sùm sùm tơm Yàng Tom Trồ.

Hơ̆ la bơta rơndap dờng màng jọ̆ jòng Yàng Tom Trồ di, tò tơm pơrgơl hwing nùs kòn mơnus. Yàng Jesu đơs lah gar sơbê bulah dềt rhên rlau jơh mơ ya gơ rơp têh dờng gơlik gơs chi niăm rlau jơh. Tom tŭ bol he ơn rài kis he di Kơnràñ in, Kơnràñ ò di ming toh tôi glài bol he dê, mơ kung ceng wơl tom nùs bol he dê bơta àng kwơ màng ceng bơta kìs mơ nùs nhơm Kơnrañ dê. Kơnràñ rơp tuh bêng bơta koñ gơboh mơ bơta pơndòm pơndiang Kơnràñ dê hơđang kòp nă bol he.

Behơ̆, ơ ală hwềng nùs jê-sồt mơ roh gơn kơnom, iat tĕ jơnau Kơnràñ hòi jà oh mi ngai do, iat tĕ jơnau lơbơn niăm Kơnràñ di di-gùl ală bơta nggôr-nggàc mơ kơlôi rcang gùt dar oh mi. Kơnrañ rơp lơh rai ală bơta jê-sồt mơ roh gơn kơnom tơm nùs oh mi. Kơnrañ rơp jùt jơh ală bơta rngòt rngơt tơm oh mi, ceng wơl bơta lơngap lơngai, bơta koñ gơboh mơ nùs nđàc sơngit hwềng nùs oh mi in. Kơnràñ rơp tơm gơl bơta jê-sồt gơlik gơs hòn-chò, tơm gơl bơta bol glar oh mi dê mơ bơta lơngap lơngai, mơ pơnđang sol rài kis oh mi di mơ gơtha mơ tơnggu kwơ màng Kơnràñ dê.

Oh mi găm gơn bơta lơi ndai tai, dòp tĕ jơnau hòi jà ràc ròc Yàng Jesu dê: “Do, añ ntào di mpồng mơ teh; dilah cau lơi kơno jơnau añ mơ pò mpồng, gen añ rơp mut mơ sào bal mơ khai, khai bal mơ añ.” (Yal Tơlik 3:20)

Dan jà bol he dô nùs bal tòm bơta hòi dan:
Khoai Yàng, di gùl dunnia oă bơta sơlồng sơlàng ngai do, bol kòn pal cang Yàng ò git nđò. Dan pơnđang sol bơta àng song ngan Kơnràñ dê hơđang kòn, ai kòn in bơta kis pa tơm Kơnràñ nang ntao di đap ală bơta gơlòng tơm rài kis. Dan Kơnràñ dŏng kòn kư sền tơnggu kwơ màng Kơnràñ ai nang pơnjat gùng ntoat pơrlong tơm bơta lơngap lơngai. Kòn jơh nùs hòi dan tơm sơnđan Yàng Jesu Krist, A-men.

Ơ jơh ală ông mò, oh mi koñ gơboh, ming Yàng la Bơtau rgơi ceng wơl bol he in gơtha mơ tơnggu kis hơđang rài kis gơs oă kal-kê do. Kơnràñ òs sùm kơñ gơboh mơ git loh kờp bơta kơp koñ, bơta pal cang mơ bơta koñ dan bol he dê. Kơnràñ sùm kơlôi, sền gar mơ ai bol he in bơta lơngap lơngai kờp phuk kơp jây. Cơnđoà lòt jat tĕ jơnau hòi jà Yàng dê, mơ Kơnràñ rơp tơm pơrgơl rài kis bol he dê jat gùng niăm rlau jơh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.