Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Neh gơs tŭ lơi ồng mò oh mi sền gŏ ală bơta àñ ơnòng kơnjơ tòm rài kis dờng ngăn, kalke ngan, mơ să tòm ông mò oh mi ò rgơi pơn ring ală bơta hơ̆ sơl? Bơta bơtê ngai dô kòñ tơng kah bol he lah Bèp HơĐăng Trồ kòñ jơh tơl nă bol he jao phi tĕ bơta kơlôi rcang bol he dê Kơnràñ in.

Ngai dô, ngai 09/11/2021, bơta hòi dăn kòp ngai dăn jà ală ông mò oh mi bơtê băl jơnau Yang dê kơnom dê bơta dong kòl ồng Byron Bohnert bơh tơngume KING CRŬ TÒM YÀNG

Jào phi tĕ jơh ală bơta kơlôi rcang oh mi dê Kơnràñ in, tài bơh Kơnràñ òs sền gàr oh mi sùm. (1 Pier 5:7)

Yàng kơlôi tus jơh ală bơta dờng hala dềt mơ bol he òs tìp. Kơnràñ ò tŭ lơi kòñ bol he tă sang ală bơta kalke hơ̆ dô nă ò.

 Jơnau Yàng tòm sră goh Mathiơ 6:32-34 bơto, 

“Bèp bol mê hơđang trồ git bol mê pal ngui sa ală bơta hơ̆ rau. Mơya lài ngan, jòi jat tĕ lơgar Yàng Tom Trồ mơ bơta song ring Kơnràñ dê, gen Kơnràñ rơp ai bơtơl jơh ală bơta hơ̆ bol mê in. Behơ̆ gen, bañ kơlôi rcang bơh ngai hìng, bơh ngai hìng rơp kơlôi rcang ngai hìng in. Bơta bòl glar ngai lơi la tơl ngai hơ̆ in.”

Bol he git lah Yàng Tom Trồ mơ bol he duh khoai la Yàng làm jơh trồ tiah dê, Kơnràñ at kơ̆ dunia do tòm tê Kơnrañ dê. Să tòm Yàng Tom Trồ, là Bơtau àñ  ơnòng bơta kờn jơ̆ plai ù dê, kung rgơi àñ-ơnòng jơh ală bơta kờnjơ̆ kơnjut hơđăng pơnì bol he dê sơl. Ală bơta ơnòng kờn jơ̆ mơ bol he tìp mìng la thul ơ-mul tòm tê Yàng lơm.

Tòm rài kis să tòm añ jê, añ neh bơtê git bơta dờng màng tòm broă king crŭ tòm Yàng. Kơnràñ sùm sền gŏ ală bơta mơ añ tìp mơ Kơnràñ ai tê nàng dong kòl añ. Añ rgơi gơn kơnòm tòm Yàng mơ dòn nền cê tòm bơta dòn song Kơnràñ dê.

Dô êt nă cau tòm bol he rơp lùp is lah, “Lơh mbe lơi nàng añ rgơi ơn bơta dòn kơnòm tòm dô nă cau lơi hơ̆ taih, krơi is tòm tŭ tìp bơta kơryan kơrdơl dờng ngăn mơ ò git pal pơn jat tai mbe lơi taih? Pơn yô(yơu) broă tìs hơ̆ ơm tòm bơta bol he kơlôi lah bol he pal dong kòl Yang Tơm Trồ, mơ ngăn gơ dê la, să tòm Yàng la Bơtau rcang sir nàng dong kòl bol he.

Yàng Tom Trồ ò crơng gơs jơi kòn mơnus nàng àñ ơnòng ală bơta kờn jơ̆. Kơnràñ crơng gơs bol he nàng bol he gơrê bal mơ Kơnrẵn.

 Sră Đơs crih 68:19 cih lah, “Pal jòng ro Yàng, la Bơtau kòp ngai yò đo bol hi; Yàng Tom Trồ la Bơtau ai bơta dong klàs bol hi in.”

Bơh hơ̆, gen tàng añ rgơi dòn nên cê tòm bơta dòn song Yàng Tòm Trồ dê bơh Kơnràñ neh yal tơlik gơnap gơnoăr tòm  broă neh gơlik gơs mơ kư̆ pơn jat lơh tai tòm ngai rơp tus sơl. Gùng dà bươn rlau jơh nàng ồng mò oh mi mơ să tòm añ geh hồ toh klàs bơh bơta àñ ơnòng kơnjơ gam gơklơn kơnjơ tòm rài kis hơ̆ la ràng tơlik loh làng mơ Yàng Tom Trồ bơh ală bơta pal càng bol he dê mơ hòi dan nang dan Yàng dong kòl. Tơnơ̆ hơ̆, lòi tĕ Yàng in rcang sir jơh ală bơta tòm rai kis bol he dê.

Ngan la bơrngơl gơla ngan bol he in, tŭ  bol he kư̆ kòñ àñ ală bơta ơnòng kờnjơ̆ kơnjut rlau mơ pran tòm he dê, tòm tú jơnau Yàng neh đơs loh làng: Jào phi tĕ jơh ală bơta kơlôi rcang oh mi dê Kơnràñ in, tài bơh Kơnràñ òs sền gàr oh mi sùm. (1 Pier 5:7).  

Tòm ală tu kalke mơ sơbơng roh, Yàng Tom Trồ ơm mơ bol he, mơ tŭ bol he gơ kòl gơpừ, Kơnràñ rơp dong kòl bol he rgơi ñă ntao wơl. Sên tĕ di jơh ală cau chai rgơi tòmlơh neh gơpừ tòm tiah tòm pơrlòng tơm tŭ cau he kòñ pơrlòng lơh bol he in gơpừ. Tu hơ mo cau lơh kai ntoat tus mơ sơn tòm kòp , “Dùl, Bàr! Pe! Poan” Dilah cau chài tòmlơh ò rgơi ñă ntào tơ nơ mơ kơp tus khà jơt, gen khai la cau kŏng ơlah. Ală cau tòmlơh jak chài rơp ò bài ơm mŏ mŏ nang ai cau in kòp khà behơ̆ ò. Bol khai rơp ngui jơh pràn lơi gam wơl nàng ñă ntào mơ pơnjat tai tòm bơta pơrlòng.

Neh oă dơ̆ añ kòñ ruc wơl tòm tŭ cau sò tơm neh kơndàng dê an mơ bơta pràn dờng rlau jơh. Añ neh lòi jơnau pơrlồm blac cà Satan dê mut tòm dơngoh kơlôi añ jê.  Mơya ưnngai Yàng, añ neh bơtê git gùng dà nàng tòm dră wơl mơ bơta sòtơm cau iơh bơsak kơnòm bơh jơnau Yàng dê. Tŭ añ kơno bơta kơlôi sơnơng  ò niam tus bơh cau sòtơm dê, ală bơta dòp git đah hwềng neh lơh broă til wơl mơ añ sơntòm kơlôi sơnơng is lah: “Ơ cà Satan gơn tĕ, bañ lơh broă do in gơlik gơs kalke rlau tai ”. Añ ngui jơnau Yàng dê nàng đơs mơ cà Satan lah,

“Mơya ưnngai Yàng Tom Trồ, bơh Kơnràñ ai bol he in bơta pha lin rlau bơh Yàng Jesu Krist bol he dê” ( I Kôrintô 15:57); “Ơ cau sò-tơm di añ, bañ hừh nus bơh añ. Bulah añ neh gơpừ, añ rơp guh wơl. Bulah añ nggui tòm tiah klam-jơngo, Yàng Jehôwa rơp la bơta àng añ jê.” (Mice 7:8).

Cà Satan ò gơs gơnoar lơh bol he in kong ơlah tài bơh bol he neh dòp geh bơta pha lin tòm bơta tòmlơh bol he dê rau.

Dan jà bol he dô nùs bal tòm bơta hòi dan: Ưnngai Yàng bơh Kơnràñ òs kah kơlôi mơ sền gàr rài kis kòn dê. Tòm tŭ moat jrùng mơ jê sồt, dan ai kòn in git ntoat tus king crŭ mơ dòp geh bơta dong kòl Kơnràñ dê. Kòn ai sơnđan Yàng Jesu Krist hòi dan mơ Yàng Bèp. Amen

Ơ ală ồng mò oh mi kòñ gơboh, rơp gơs cau lơh bol he in moat jrùng. Rơp gơs broă gơlik gơs lơh bol he in moat jrùng. Mơya Yàng rơp ò tŭ lơh ông mò oh in moat jrùng ò. Bơta dong kòl Kơnrẵn dê rơp tus tòm toh dê tŭ tơngai, tŭ lơi ồng mò oh mi pal càng. Behơ̆  gen, dơ̆ rơp tus, tòm tŭ ồng mò oh mi moat jrùng, kah tĕ lah Yàng gam ơm mơ ồng mò oh mi! Ntoat tus tĕ mơ Yàng nàng dòp bơta dong kòl bơh Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.