Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Rài kis ò di tú lơi kung ang gơ crà mơ hòn chò. Gơs tú moat jrùng, gơlong bol glar gơhùc ngềt lơh he in roh bơta gơn kơnòm mơ bơta chò hòp tòm rai kis. Mơya bol he bẵn dơrcul bơh bơta gơlong bol glar lơi kung rơp lòt gan. Yàng rơp toh glài mơ ai bol he in tú nàng dòp geh dô rai kis pa. Kơnrẵn rơp ơm bal mơ dong bol he lòt gan tú jơ klam jơngo rlau jơh tòm rai kis.

Ngai do, ngai 09/03/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Gene Markland dê bơh tơnggume: PAH TƠ NGAI KAL KE

“Behơ̆ dilah cau lơi ơm tòm Bơtau Krist, hơ̆ la cau neh crơng gơs pa; ală bơta yau neh roh rau, do ală bơta gơlik gơs pa lơm.” (II Kôrintô 5:17)

Tú kơnòm lơh ală bơta pha is, cau dơng òs đơs: “Kon ẵn gam lòt gan tú òs kon dềt dê lơm”. Ẵn gam kah tú oh ur ẵn jê gam dềt pa bơtê lòt, khai gơboh sa ù. Ngăn la ù!

Bol he sên gó khai ơm nggui hơđơm ù, tê bêng kơmbuh ù mơ bơr khai bớ ù. Bol he lùp khai lah khai sa ù ò mơ khai teh bồ mơ đơs: “Ò”.

Bulah gơdan nhó mơya mè bol he dê rơngòt, mè hê lam khai lòt tìp cau gơnoar sơnơm. Cau gơnoar sơnơm tơnram mè ẵn in lah kon dềt hớ ò gơlơh mbe lơi mơ ai mè ẵn in buk cà phe neh ngui mơ neh ro. Cau gơnoar sơnơm sôr mè ẵn ai khai in kơnhơl phan hớ mơ đơs “Khai gam lòt gan tú òs kon dềt dê lơm”. Cau gơnoar sơnơm đơs di. Buk cà phe neh ngui mơ neh ro lơh khai in ò sa ù tai. Mơ tú khai kỡn lơh ală bơta khai kỡn.

Oh klau ẵn jê kung neh lòt gan ală tú hớ. Khai gơboh sơrbì tap bơh đăng tus hơđơm nàng gơ in bơcah tòm gùng. Mè ò ai khai lòt tus mơ cau gơnoar sơnơm. Mè he pù khai lơm.
Bơta ngan mơ he pal git lah jơh tơl nă bol he cau lơi kung neh lòt gan tú jơ behớ, bơh tú găm dềt tus tú kơnòm dơng. Tú bol hê neh dơng, ală tú behớ rơp gơlik gơs tú ò rgơi húi. Gơs tú ală bơta hớ rgơi lơh he in nìm. Bơta kòp jê, bơta bơrcah tơrlah mơ cau do cau ne mơ bơta roh bơta gơn kơnòm lơh he in duh tòm bơta pơlai, hớ òs la bơta tòm tòm rai kis he dê.

Ming cơnđoà lòt jat Yàng Jesus lơm, bol he rgơi gơs bơta gơn kơnòm nên cê, dòp geh bơta toh glài nàng sơntòm dô bơta pa. Tú jơ tis glài rơp geh Yàng toh glài tú bol he jơh nùs rac dan bơta toh glài Yàng dê. Bè Jơnau Yàng neh cih tòm sră II Kôrintô 5:17: “Behơ̆ dilah cau lơi ơm tòm Bơtau Krist, hơ̆ la cau neh crơng gơs pa; ală bơta yau neh roh rau, do ală bơta gơlik gơs pa lơm.”

Yàng neh toh glài mơ húi, bol he kung pal lơh behớ nàng pơnjat cơnđoà lòt tòm gung rai kis. Oă tú bol he la cau kal ke rlau jơh tol să tòm he in, buôn nàng wơng, bơh bol he la cau tòm tòm tú tơngai ngềt ngai he dê.

Mơya bơtoah ngan, jơh ală bơta ngềt ngai hớ kung neh pơndut. Digơlan ồng mò oh mi neh kong dô bơta kòp jê jó, lòt gan dô bơta jê sồt hala pal sang lòi broă mơ he gơboh.

Dilah behớ gen he kah té tus jơnau chôl bơtrut ồng Pol dê: “Añ git mbe lơh tòm tŭ rƀah lơòi, mơ kung git mbe lơh tòm tŭ geh tơngkah tơngkañ. Tòm jơh ală bơta mơ jơh ală tiah, bulah hòm lai hala jơgloh, bulah tơngkah hala siơ̆u, añ neh git mbe lơh tòm ală bơta hơ̆ rau. 13Añ rgơi lơh jơh ală bơta la kơnòm di Bơtau ai bơtơl pràn añ in” (Philip 4:12-13)

Ngan behớ, rai kis oă ngan bơta ơniai mơ tú jơ ngềt ngai, mơya ẵn dòn nền lah Yàng rơp dong kơl he lòt gan. Tú gam dềt, oh klau ẵn gơboh sorbì tap đơm gung… Tú do khai kung lơh bơcah tap kòp ngai mơya la dô nă cau gơm sa tiơng pơnro.

Behớ he kừ don kớ tòm Yàng tòm ală tú jơ tòm rai kis he dê, mơ sên té tòm ngai tơ nớ mơ bêng bơta gơn kơnòm tòm bơta rơndap tap seng Yàng dê.

Dan jà bol he dô nùs bal tòm bơta hòi dan:
Ưnggai Yàng bơh Kơnrẵn sùm lòt bal mơ kon tòm ală tú tòm rai kis kon dê. Ưnngai Yàng neh toh glài mơ ceng kon tus tòm pah rai pa tòm Kơnrẵn. Dan bơta gơn kơnòm kớ cê tòm Kơnrẵn dong kon sum pran nàng cơnđoà lòt nàng rgơi lơh sir tơnggu mơ Bèp Hơđang Trồ neh ai kon in. Kon hòi dan tòm sơnđan Yàng Jesus Krist. Amen.

Ơ ală ồng mò oh mi kỡn gơboh, ồng mò oh mi gó mbe lơi tú sên wơl ală tú jơ tòm rai kis he dê? Ồng mò oh mi neh toh glài să tòm he in mơ húi ală bơta neh rlau nàng pơnjat tai tòm gung pa hala ò? Sơmbat kớ tê Yàng nàng lòi Kơnrẵn tề lam ồng mò oh mi tus tòm pah rai pa tòm rai kis, la tiah bêng liu bơta hon chò mơ bơta gơn kơnòm ò tú lơi roh tòm Kơnrẵn

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.