Bơyan Nôel jơ̆ trŏ kơ bơyan tơdrong hơdah, hiôk chơt păng hơmĕng, mălei ưh kơ sĭ lu bơ̆n ling lang mơn thoi ei. Chă lăp, lu bơ̆n sơng iŏk bơyan Nôel kơplah oei đei tơdrong pơlong, ưh kơ hiôk păng mơn đei tơdrong hiong răm nhen thoi ưh pă kĕ wă hlôi. Lei pơm thoi yơ wă kơ gơh ‘bôh hơdah kơplah jum dăr tă kơ măng mu ngăl? Athei yua tơdrong krao khan năr anâu tơgŭm lu bơ̆n đei nơ̆r tơl lăm nơ̆r apinh anâu.

Năr anâu, năr 01/12/2024, tơdrong tơdă amăn jơ krao khan rim năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih hla ar Lori Wilkerson Stewart hăm kơ̆l ‘bai HƠDAH CHHŬT LÊ̆ MĂNG MU.

“Kon pơlei năm lăm măng mu ‘bôh bơih tơdrong hơdah tih; păng tơdrong hơdah pơchrang bơih kơ lu bơngai oei lăm dêh măng mu gueo.” (Êsai 9:1)

Buŏl hăm byơh sơng pơyan lăm kơplah đei lơ tơdrong sơ’ngon oei jum dar dah ưh? Hăm đei kơplah ih mơn kơdih huŏng jrŭ lăm măng mu, nhen thoi oei tơ ala kơ tơdrong lôch? Lăm hla bơar ‘blok đêl Noel đơ̆ng Corrie, bơngai chih roi đêl pơyan Nôel tơ hnam chĭt hơdai Ravensbruck, hơnih mă rôp chĭt yă yua kơ tơgŭm bơngai Juđê lăm tơblah mă ‘bar. Mŏ sư anao lôch anao jĭt mônh năr hơdrol kơ anoh, păng lăp năr đơng rong, Corrie gơh rơngei. Mălei wă kơ gơh lech hlôi đơng hnam chĭt, sư kăl kơ đei hla ar tơ ‘bôh oei đei jơhnơm pran đơng bơngai ‘bok pơgang. Pơlăp bơngai ‘bok pơgang roi tơbăt khan sư jĭ bơ ôr păng athei sư mơ̆t tơ hơnih pơgang hnam chĭt wă hơmet tơdrong jĭ. Corrie ‘blŏk đêl mơn bơsĕl bơsŏ lăm Nôel ei:
Jơhngơm inh ‘benh ‘bang măng mu, păng jum dăr dai măng mu ngăl…Inh hơdrin pơma hăm lu bơngai jum dăr gah tơdrong Nôel, mălei lu sư che bơle păng hyĕk pơklai inh.

Lăm măng Nôel pơsĕl ei, Corrie kơtơ̆ng nơ̆r mơ mơnh đơng minh anu alơ̆p drŏkăn kơhlôh kơwao ‘bĭch kơpal gyơng jê̆ dĕi: “Mĕ ơi! Mĕ năm tơ Oelie năm. Oelie oei pơsel dêh.” Băt kơ mĕ bơngai alơ̆p ưh kơ gơh kơ năm truh, Corrie weh đơng gyơng păng năm pơlung bơngai alơ̆p. Lăm hơdah bơbul mơ̆t đơng amăng mŏk jê̆ gyơng, Corrie ‘bôh bơngai drŏkăn hơkĕ hơkong pă hơkar lom kơting, mălei oei wei găr măt hơdah păng sŏk mơ lyơn. Yua kơ hlôi kơ đêl răih, trong răih tơrŏng kơdu Oelie lăp pơ̆n hăm minh hla ar chă bơyơ̆ng hơtăng. Corrie ‘blŏk tơchĕng jơ anoh thoi âu:

Măng anĕi inh roi kơ bơngai alơ̆p mơnat ei mơng gah ‘Bok dŏng pơklaih Kră Yang Giêsu—Khan Kră Yang đê̆ truh tơ teh đak wă pơm minh anu bơngai nge iĕ iŏch. Păng Kră Yang năm pơklaih bơ̆n hlôi đơ̆ng tơdrong yŏch.

‘Bok dŏng pơklaih Kră Yang Giêsu ‘mêm mơnat Oelie păng pŭ tang tơdrong phăk đơng Oelie tơ along pơglang. Na anâu, Oelie gô tŏk tơ plei alơ̆ng, hơnih Kră Yang Giêsu oei hơmet minh pôm hnam rơnŭk rơnua kơ oh.

Đơ̆ng rŏng kơ anoh, inh apinh lăng bơngai alơ̆p ei hăm oei ‘blok dôm tơdrong đêl inh pơma ưh.
“Hnam anoh thoi yơ?” inh apinh.
“Hnam alơng rŏ. Tơ ei ưh kơ đei bơngai kơnê̆ thoi tơ Ravensbruck—lăp đei bơngai alơng păng lu linh jang đĕch. Păng Oelie gô gơh tơ’bơp ‘Bok dŏng pơklaih Kră Yang Giêsu tơ ei.”
Bơngai alơ̆p pơma dơ̆ng: “Oelie gô apinh Kră Yang Giêsu tơgŭm inh pơ̆n nŭih mưh kơplaih jĭjăn. Oelie gô tơchĕng tơdrong jĭ pơmat Kră yang đei chu iŏk wă chông trong kơ Oelie truh tơ plei alơ̆ng.” Na Oelie quăr ti, păng lu nhôn hơdai bơnê kơ Kră Yang.
Kơplah jơ anoh, inh đei hlôh yua kơ kiơ inh đei sơng iŏk Noel tơ Ravensbruck hơnăm 1944.

Kră Yang Giêsu pơma, “’Inh jur tơ ala teh âu wă pơchrang hơdah kơ kon bơngai, na đĭ-đăng bơngai mă lui kơ Inh huay kơ oei lăm măng mu ôh” (Yôhan 12:46). Inh đei chhưu tơpă kơplaih tơchĕng truh tơdrong mă Kră Yang đei tơ ‘bôh hăm Corrie păng Oelie lăm hơnih hnam pơgang măng mu ei, chĕp tơdrong ‘mêm păng hơdah mơ̆t tơ lăm hơnih wă khan đơ̆ng hơnih nhen thoi hơnih chĭt lôch krư̆p dêh tơ Đức Quốc Xã.

Tơdah Nôel anâu buŏl oei đei tơdrong hơ angon, ưh pă hơmĕng dah mơn kơ măng mu oei gom, athei hơđơ̆ng. Nhen thoi Corrie đei chă ‘bôh tơdrong kăl lăm hơ angon, buŏl kŭm dai gơh năm tơ ‘Bok dŏng pơklaih Kră Yang Giêsu “ Hơdah tih” kơ pơyan Noel tơ angla pơchrang tơdrong hơmĕng alơ̆ng rŏ kơpal đĭ đăng tơdrong hơnat buŏl.

Apinh đĭ đăng lu bơ̆n krao khan hơdai:
Bơnê kơ Kră Yang Giêsu yua kơ Ih bơih hơdah kơ chăl arĭh kon, mă khan jum dar, kon ngeh lăp đei măng mu đĕch. Apinh tơgŭm kon lăng ‘bôh tơdrong ‘mêm păng ‘bôh Ih mă kon đei tơ ‘bơp hăm tơdrong pơlong lăng thoi yơ hĭ. Apinh Kră Yang pôk tơgŭm lu bơhngol oei gleh lap păng ăn kơ lu sư đei hơđơ̆ng lăm pơyan Noel anâu. Apinh tơdrong ‘mêm Ih chhŭt lê̆ dôm măng mu lăm jơhngơm kon păng đĭ đăng, wă kơ lu nhôn gơh mơn tôm dôm tơdrong hơđơ̆ng păng tơdrong hiôk chơt tơpă đơ̆ng Ih. Kon kơkuh krao khan lăm anăn Kră Yang Giêsu Krist, Amen.

Ơ lu bơngai mơng mă ‘mêm, năr anâu năr pơh ‘blung a kơ khei jĭt ‘bar, năr pơh pơyan hơmĕng hăm kơ̆l ‘bai hơmĕng. Mă buŏl đêl đei tơdrong hơnat hơ yơ lăm pơyan Nôel anâu, athei ‘blŏk kơ ‘Bok dŏng pơklaih Kră Yang Giêsu anoh tơm tơdrong hơdah ling lang, anoh tơm tơdrong hơmĕng ưh kơ la yơ păt ăn kơ chăl arih đĭ đăng lu bơn. Sư jur wă năm hăm buŏl, tơgŭm buŏl chă ‘bôh tơdrong alơ̆ng rŏ Sư păng pơlung lăm Sư kơplah đei tơdrong hơnat hơnot dêh. Hiôk tơpă kơplah lu bơ̆n băt kơ hơdah Kră yang ling lang hơdai mă tơ lăm hơnih măng mu dêh. Apinh hơdah tih Sư chhŭt lê̆ măng mu, chĕp truh kơ buŏl minh pơyan Nôel ‘benh blai hơđơ̆ng păng hơmĕng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.