Bơyan chơt hiôk kơ phĕt Nôel đei truh tơ jơ̆p kơ tơring, tơrang. Lăm năr hyơ̆k bơngơ̆t kơ lơ tơdrong jang, lu bơ̆n athei ‘măn jơ năr tơ chĕng tơdrong yak năm tơ ‘Betlehem wă chă păng tơ ‘bơ̆p ‘Bok Dŏng Pơklaih đơ̆ng lu ‘bok pơjâu sơ̆.

Năr anâu, năr 12/12/2024, tơdrong tơ dă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Kenneth W. Osbeck hăm kơ̆l ‘bai LU NHÔN – PƠTAO ĐƠ̆NG GAH HƠLĔCH ĐƠ̆NG DÊH ATAIH

“Tơ yơ anih mă đe ‘nao tơpŭ kơ pơtao Juđê? Nhôn ‘bôh sơnglŏng Sư đơ̆ng gah hơlĕch, na nhôn hnhoi sơnglŏng noh truh tơ âu wă năm kơkuh kơ Sư.” (Mathiơ 2:2)

Buŏl gô đei hŏk iŏk lơ tơdrong kơplah tơchĕng pơwao gah lu bơngai đei hơdai hăm hơ’mon Kră Yang Yêsu jur tơlăm teh đak, kŭm gơh roi truh tơ Mari, Yôsep, tơ’ngla wei hnam tơmoi, lu Linh jang, lu bơngai wei triu dah lu ‘bok pơjâu hơgei, mă lu bơ̆n ngăl krao lu sư ‘noh lu “pơtao”, dah lu “‘bok pơgang” tơ gah hơlĕch.

Mă lăm Sơ̆p hla bơar ‘Bok Kei-Dei ưh kơ tơ’bôh hơđăl khan đei pêng ‘nu ‘bok pơjâu, mă lei Sơ̆p hla bơar ‘Bok Kei-Dei đei roi kơ pêng tơmam phara băl đei pơyơ̆r ăn ‘noh maih, păng ‘bar anăn pơgang ‘bâu phu, đei pơm minh tơdrong hlôh băt kơ tơdrong krao anăn ‘nâu. Lu bơngai chhơ̆ gơh hơgei lăm lơ jơhnơr đei pơm tơ’bôh rup lu ‘bok pơjâu hơgei hao kơpal kơdŭ aseh lăm lu rup tơ’bôh kơ Kră Yang jur nhen minh tơdrong ‘maih wă lu sư.

Đei dôm ‘nu ‘bok pơjâu hơgei năm kơkuh kơ Kră Yang Yêsu kŭm huei kơ kăl, tơdrong kăl kơ pơma ‘noh lu sư đei kơjăp năm kiơ̆ hơdah chông trong dĭng truh tơ hơnih chă ‘bôh tơdrong bơ̆n chơ chă; lu sư năm lăm tơdrong kơkuh bơnê, păng wih brŏk lăm tơdrong hiôk chơt. Kiơ̆ kơ dôm tơdrong lăm Sơ̆p hla bơar ‘Bok Kei-Dei tơ’bôh, lu bơ̆n băt kơ lu ‘bok pơjâu hơgei đei hŭt lơ jơnăr wă kơ gơh truh tơ ‘Betlehem. Đơ̆ng gah hơlĕch, hơbŏ ‘noh teh đak Arâp, lah teh đak Ân Đô̆ dang ei, lu sư đei ‘bôh hơnglŏng- mĭnh tơdrong tơ’bôh wă kơ lu sư chă ‘bôh Kră Yang.

Trong năm truh tơ ‘Betlehem lu ‘bok pơjâu hơgei ưh kơ ‘bônh ôh; trong hơtaih, dôm tơdrong hơnat, đei tơ’bưh hăm nơ̆r pĭnh đơ̆ng ‘bok pơtao Hêrôt kơ minh ‘nu pơtao ‘nao. Mă băt kơ gô đei tơ’bơ̆p lơ tơdrong hơnat, mă lei wă chă păng tơ’bơ̆p ‘Bok Dŏng Pơklaih, lu sư hơmet jơhngơ̆m năm hloi.

“Tơ yơ anih mă đe ‘nao tơpŭ kơ pơtao Juđê? Nhôn ‘bôh sơnglŏng Sư đơ̆ng gah hơlĕch, na nhôn hnhoi sơnglŏng noh truh tơ âu wă năm kơkuh kơ Sư.” (Mathiơ 2:2)

Lu tơmam gĭt mă lu ‘bok pơjâu hơgei đei pơyơ̆r kơ Kră Yang tơ’bôh đon lui lu sư kơ Kră Yang bơih pơtao, ‘bok soi, păng kŭm ‘Bok Dŏng Pơklaih kơ teh đak: Maih, pơtih kơ tơdrong pơgơ̆r Kră Yang; ‘bar pơgang ‘bâu phu pơtih kơ Sư bơih ‘bok soi ; păng pơtih kơ dŏng pơklaih đơ̆ng tơdrong Kră Yang chu lôch tang. Lăm jơhngơ̆m pơyom tơdrong ‘mêm păng pơyơ̆r, lu ‘bok pơjâu hơgei đei pơyơ̆r kơ Kră Yang Yêsu dôm tơmam gĭt kăl tơpă. Kŭm gĭt kăl tơpă mơ̆n kơplah lu bơ̆n băt pơyơ̆r kơ Kră Yang dôm tơdrong ‘lơ̆ng hloh đơ̆ng rŏng kơ đei tơ ‘bơ̆p Kră Yang, tơ̆p kŭl tăng kơkuh kơ Kră Yang thoi lu sư.

“Đang pơtao Hêrôt khan kơ lu sư thoi noh boih, na lu sư năm. Kơplah lu sư oei nơnăm rok trong lu sư ‘bôh hloi sơnglŏng ei pơchrang hơdrol hơdrol kơ lu sư. Lu sư ‘nă hal dêh. Lu sư hnhoi sơnglŏng ei truh tơ Pơlei Betlehem. Lăp truh tơ kơpal bơbŭng hnam Yêsu, sơnglŏng ei dơ̆ng. Lu sư mơ̆t lăm hnam na ‘bôh hloi kon nge ‘noh hăm mĕ Sư Mari. Lu sư sơtơ̆p kŭl-tăng kơkuh kơ Yêsu păng iŏk ‘bar anăn pơgang ‘bâu phu hăm maih đơ̆ng lăm kơdŭng lu sư pơyơ̆r kơ Yêsu.” (Mathiơ 2:9-11)

‘Bai hơri ‘lơ̆ng rơgoh “Lu nhôn pơtao đơ̆ng gah hơlĕch hơtaih dêh” ‘noh ‘bai hơri ngăl juăt kơ hơri lăm pơyan Nôel. ‘Bok pơtho John H. Hopkins, chih ‘bai anâu, na sư kŭm dai bơngai hơmet ‘bai hơri anâu truh tơ gơ̆p kơtơ̆ng jâp jang, đei tơgŭm lăm tơdrong ‘bai hơri bơngai lui lăm jơhnơr 19, sư kŭm chih lơ ‘bai hơri Ưang kơ ‘Bok Kei-Dei oei đei truh dang ei. ‘Bai hơri Ưang kơ ‘Bok Kei-Dei “ Lu nhôn pơtao đơ̆ng gah hơlĕch hơtaih dêh” ‘noh minh ‘bai sư chih. Tơdrong hơri đei roi tơ’bôh tơdrong ‘nao ‘lơ̆ng, ưh kơsĭ tơ’bôh gah Nôel mă lei kơ tơdrong Kră Yang Yêsu chu iŏk tơdrong pơmat tat păng iung hơrih. Athei wŏng hơdai pơwao kơ nơ̆r hơri ‘noh:
“Lu nhôn pơtao đơ̆ng gah hơlĕch hơtaih dêh, ‘bôh sơhngŏng Sư pơchrang. Yak năm hlôi đơ̆ng bri kông glung đak truh tơ lu hơhngŏng wŏng tar kŭm hơri ưang kơ Pơtao ling lang.

Tơ dêh Betlehem gô đei minh ‘nu Pơtao tih hloh rơneh, drap kơkŭh pơyơ̆r pơgang ‘bâu phu ư-ang kơ Pơtao đơ̆ng kơpal plĕng ti. Apinh Ih ling lang oei hơdai inh ling lang, wei lăng inh ưh kơ đei tơklah.

Pơgang ‘bâu phu ‘nâu pơyơ̆r kơ Ih, tơ ‘bôh ‘bâu phu jơ̆p jang . Krao khan hơri ưang ‘bâu phu kơ ‘pêng anăn măng năr.

Tơdrong pơmat nhen thoi pơgang tăng ưh kơđei kiơ pơtŏ pơting, yua kơ inh Ih pŭ iŏk lơ ‘măng. Hơ’ngon jĭ jăn pham lĕch ro tơ mo lăm bơsat.

Ưang kơ Kră Yang iung hơrih bơih dang ei, plĕnh teh rơ jơwa ưang. Sư pơtao, tơmam soi, Kră Yang lu bơ̆n “‘noh ‘bai hơri ư ang kơ Sư ling lang”.

Apinh đĭ đăng krao khan hơdai:
Bơnê Ư-ang Kră Yang Yêsu Ih pơtao, ‘bok soi păng ‘Bok Dŏng pơklaih kon. Bơnê Kră Yang yua kơ năr ‘nâu gơh truh păng tơ’bơ̆p Ih rim jơ. Apinh jơhngơ̆m kon tơl tơwih hăm Ih lăm bơyan Nôel ‘nâu hăm tơdrong băt bơnê păng pơm hloi đơ̆ng hơkâu jăn kon. Kon kơkuh krao khan lăm Anăn Kră Yang Yêsu Krist, A-men.

Ơ lu bơngai mơ̆ng, buŏl tam đei chă păng tơ’bơ̆p Kră Yang jur ưh? Đei minh ‘nu đĭch đam Kră Yang kŭm pơma khan: Năm tơ phĕt Nôel mă lei ưh kơ đei tơ‘bơ̆p Kră Yang lei hmach tơpă, nhen thoi minh ‘nu bơngai ‘bĭch rơhing ‘maih nhă bơ̆t cheng đak glung! Hiôk chơt păng sŏng sa hơdai, hăm lu hơbăn ao ‘lơ̆ng rŏ đơ̆ng bơyan phĕt gô hlôi. Mă lei lăp lu bơhngol đei chă păng tơ’bơ̆p Kră Yang đĕch chă ‘bôh tơdrong hiôk chơt păng tơdrong tơm kăl tơpă. Athei ăn bơngol buŏl lăng gah Kră Yang đĕch wă kơ gơh tơ’bơ̆p Sư lăm bơyan Nôel ‘nâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.