Rim bơyan Nôel, lu bơ̆n đei tơ‘blŏk kơ tơdrong hơ’mon hlich chrơp đơ̆ng ‘Bok Dŏng Pơklaih jur jing minh anu kon nge. Kơplah kơ tơ̆ng Linh jang roi tơdrong hiôk, lu bơngai wei triu hăt hot năm chă kon nge lăm bơng ‘nhĕt. Na kơplah wơ̆t brŏk, tơdrong hơrih lu sư đei tơplih, păng kơdih lu sư jing lu bơngai blŭng a ră roi tơdrong hiôk chơt.

Năr ‘nâu, năr 11/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Wendy O’Rourke hăm kơ̆l ‘bai TƠDRONG HIÔK CHƠT ĐƠ̆NG BƠNGAI WEI TRIU.

“Lu bơngai wei triu wih, bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh tơdrong noh lei-lăi thoi linh jang ‘lơ̆ng đei khan kơ lu sư”. (Luka 2:20)

Lăm trong năm blŭng a truh tơ Isơrael, mĭnh lăm tơdrong mă pơm kơ inh hlĭch dêh ‘noh ‘bôh đơ̆ng Betlehem păng Jêrusalem jê̆ băl thoi noh. Lăm Sơ̆p hla bơar ‘Bok Kei-Dei, đơ̆ng Betlehem, pơlei ‘bok Đawit truh tơ Jêrusalem lăp kê̆ hngam gơsô̆ đĕch, păng tơdrong năm tŏk bŏk ‘bar hơnih ‘nâu kŭm ưh đei kiơ hơnat. Lu bơngai wei triu tơ Betlehem kŭm đei năm wih wơ̆t trong ‘nâu lơ wơ̆t, yua kơ lu sư bơwei hơmet lu kon triu ưh kơ đei kiơ klep, đei rơih wă pơm tơmam soi lăm Hnam hơkŭm. Păng thoi lu bơ̆n băt, lu tơmam ‘noh đei gơh pơm mĭnh wơ̆t tôm đĭ hăm ‘Bok Dŏng Pơklaih Kră Yang Yêsu, Kon triu đơ̆ng ‘Bok Kei-Dei, Tơ‘ngla iŏk đĭ tơdrong yoch teh đak! (Yôhan 1:29)

Yua kơ thoi noh, trŏ kơplah Linh jang ‘lơ̆ng roi tơdrong ‘Nao ‘Lơ̆ng kơ ‘Bok Dŏng Pơklaih đei truh tơ lu bơngai wei triu, kơplah lu sư oei wei lăng lu kon triu gĭt kăl ‘nâu lăm mĭnh măng ei. Lu sư hli tơrơ, mă lei lu Linh jang ‘lơ̆ng đei khan kơ lu sư lăm Luka 2:10-11: “Linh jang ‘lơ̆ng khan kơ lu sư: “iĕm ‘nĕ kơ hli, yua kơ inh wă roi kơ iĕm tơdrong ‘lơ̆ng, tơdrong mă đĭ đăng kon bơngai ‘nă hal. Măng ‘nâu tơ pơlei Đawit, đe tơpŭ kơ minh ‘nu ‘Bok Dŏng Pơklaih, ‘Bok Kră Yang, Krist.”

Wă kơ băt tơpă nơ̆r roi khan hlich chrơp ‘nâu, Linh jang ‘lơ̆ng đei ăn kơ lu sư mĭnh tơdrong tơ ‘bôh hơđăl: “Iĕm gô ‘bôh minh ‘nu kon nge tơsu khăn, tơ’bĭch kơpal ‘nhĕt kro lăm war rơmo.” Hăm lu bơ̆n dang ei, rup kon nge lăm ‘nhĕt kro đei juăt dêh bơih lăm pơm sen Nôel, mă lei hăm lu bơngai wei triu, tơdrong ‘nâu tơpă hlĭch dêh. Minh ‘nu kon nge khan ‘bĭch kơpal ‘nhĕt kro, hơnih mă lu kon sem dơrong sa ah?

Kơplah lu sư hăt hot kơ năm wă chă lăng nơ̆r Linh jang ‘lơ̆ng, tơdrong hli tơrơ păng tơtey blŭng a lu sư đei hiong đĭ jing hli kơkuh păng hlĭch hlăch. Trŏ tơpă, tơdrong tơ’bôh đơ̆ng ‘Bok Dŏng Pơklaih Kră Yang Yêsu đei ăn truh kơ lu sư tơdrong hiôk chơt tih ăn kơ lu sư ưh kơ gơh wă ‘măn kơ dih lu sư, păng lu sư jing lu bơngai ră roi Tơdrong ‘Nao ‘Lơ̆ng blŭng a.

Luka 2:17-18 roi đêl đơ̆ng rŏng kơplah lăng ‘bôh Kră Yang, lu bơngai wei triu đei roi đêl kơ đĭ đăng bơngai dôm tơdrong lu sư đei ‘bôh… Păng đĭ đăng lu bu kơtơ̆ng tơdrong lu sư roi đei mơn ‘bôh hlĭch hlăch.

Đơ̆ng rŏng kơ ‘noh, Luka 2:20 đei chih: “Lu bơngai wei triu wih, bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh tơdrong ‘noh lei- lăi thoi linh jang ‘lơ̆ng đei khan kơ lu sư.” ‘Noh hơbŏ lu sư đei hơri Ư-ang hăm nơ̆r bơnê kơkuh nhen nơ̆r mă linh jang ‘lơ̆ng ‘nao roi tơ‘bôh.

“Ư-ang kơ ‘Bok Kei-Dei mă oei tơ plĕnh ti, Sư wă ăn Hiôk-hian kơ lu bơngai mă Sư lăp đon tơ ala teh âu.” (Trong 14)

Apĭnh Tơdrong ‘nao ‘lơ̆ng đơ̆ng ‘Bok Dŏng Pơklaih ‘benh blai kơ jơhngơ̆m lu bơ̆n, tơ’bôh tơdrong hiôk chơt truh tơ rim hơnih lăm bơyan phĕt ‘nâu.

Apinh đĭ đăng krao khan hơdai:
Kơkuh kơ ‘Bok Dŏng Pơklaih Kră Yang Yêsu, bơnê kơ Ih đei hơchăng tơdrong ư ang Plei ‘Lơ̆ng păng truh tơ teh đak hăm tơdrong chu iŏk đon hơla thoi bơngai ‘lơ̆p. Kon kơkuh păng pơyơ̆r nơ̆r Ư-ang kơ Kră Yang, ‘noh Kon Triu chhŭt lê̆ đĭ đăng tơdrong yoch kơ teh đak, ‘noh Bơngai Wei Triu iơ̆m dim, Tơ ‘ngla chu lôch tang yua kơ khŭl kon triu. Apĭnh ăn kơ jơhngơ̆m kon gơh ‘bĕnh blai tơdrong hiôk chơt thoi lu bơngai wei triu sơ̆, wă kơ kon kŭm ră roi Tơdrong ‘nao ‘lơ̆ng đơ̆ng Kră Yang hăm đĭ jơhngơ̆m gơh hơgei. Kon kơkuh krao khan hăm Anăn Kră Yang Yêsu Krist, A-men.

Ơ lu bơngai mơ̆ng, ‘blŏk kơ năr ‘Bok Dŏng Pơklaih Kră Yang Yêsu jur, lu bơ̆n đei krao wă ră roi tơdrong hiôk chơt păng hơmĕng mă Kră Yang đei ăn kơ teh đak. Kŭm thoi lu bơngai wei triu sơ̆, lu bơ̆n đei krao jing lu bơngai ră roi tơdrong hiôk hian păng tơdrong dŏng pơklaih đơ̆ng Kră Yang. Pĭnh ăn kơ jơhngơ̆m lu bơ̆n ‘bĕnh ‘blai tơdrong hiôk chơt păng băt bơnê. Bơyan Nôel ‘nâu, buŏl hăm wă ‘maih roi tơ‘bôh Tơdrong ‘nao ‘lơ̆ng kơ đĭ đăng kon bơngai ưh?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.