Bơngai hơmet trong ‘noh bơngai năm hơdrol, năm kiơ̆ kơ ‘Bok Kei-Dei ăn pơih trong, hơmet kơ tơdrong kăl tih wă truh. Bơyan Nôel anâu, lu bơ̆n kŭm đei krao hơpơi wă kơ thoi lu bơngai hơmet trong, chĕp tơ‘bôh tơdrong hiôk hian păng hơmĕng hơnih ‘Bok Dŏng Pơklaih Kră Yang Yêsu truh tơ teh đak jum dăr bơ̆n.

Năr anâu, năr 10/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Brian Simmons hăm kơ̆l ‘bai BƠNGAI HƠMET TRONG KƠ KRĂ YANG HIÔK HIAN

“Đêl jơ̆ng lu bơngai ba tơdrong ‘nao ‘lơ̆ng tơ kơpal kông ‘lơ̆ng pă băt dang yơ. Lu bơngai roi tơdrong hiôk-hian, tơbăt tơdrong ‘nao ‘lơ̆ng. Tơbăt tơdrong dŏng pơklaih khan kơ Siôn: “Kră Yang ‘Bok Kei-Dei iĕm oei pơgơ̆r.” (Êsai 52:7)

Hơdrol kơ ‘nâu ‘bar rơ bâu hơnăm, Linh Jang đơ̆ng Kră Yang tơ’bôh păng pơma hăm minh anu ‘bok anăn Sachari khan kon hơ‘lơ̆p ih wă jê̆ rơneh ‘noh bơngai hơmet trong kơ ‘Bok Dŏng Pơklaih.

Kơplah kon drŏnglo ‘bok Sachari ‘noh Yôhan pơm ‘ba-tem pơtơm blŭng a tơdrong jang sư, sư đei roi tơ‘bôh gah tơdrong jang sư thoi âu: “Yôhan khan kơ lu sư: “Inh bơngai mă bơtho tơ char glă athei hơmet trong Kră Yang mă tơpăt dang khan tơbral kơdih tơdrong yoch, yua kơ Sư wă truh tơ bơ̆n boih kư̆m thoi Êsai khan lê̆ hơdrol sơ̆” (Yôhan 1:23).

Yôhan đei roi tơbăt hơđăl sư ‘noh ưh kơ trŏ ‘Bok Dŏng Pơklaih; sư ‘noh bơngai đei krao truh wă hơmet trong, hơmet jơhngơ̆m bơngai kơ tơdrong truh đơ̆ng Kră Yang. Păng kơplah Kră Yang Yêsu truh, Yôhan gô kơdŭn tơrŏng păng lăng tơgah Kră Yang; “ ‘Năr đơ̆ng rŏng dơning dơ̆ng, Yôhan ‘bôh Yêsu thar năm tơ sư, na Yôhan khan kơ đe: “Iĕm lăng bĕ, ‘Bok to ‘noh boih Kon Triu ‘Bok Kei-Dei, ‘Bok ‘noh boih pơklaih yoch bơngai jơ̆p-jang kơ teh đak.” (Yôhan 1:29).

Lăm lơ hơnăm, Yôhan ling lang chĕp hơdai sư tơdrong tơ‘bôh gah lu tơdrong mă Kră Yang Yêsu gô pơm: Sư gô dŏng pơklaih teh đak păng hơmet dơ̆ng dôm tơdrong hăm tơdrong sŭt đĭ tơdrong yoch kon bơngai. Hla ar Êsai đei chih: “Đêl jơ̆ng lu bơngai ba tơdrong ‘nao ‘lơ̆ng tơ kơpal kông ‘lơ̆ng pă băt dang yơ. Lu bơngai roi tơdrong hiôk-hian, tơbăt tơdrong ‘nao ‘lơ̆ng. Tơbăt tơdrong dŏng pơklaih khan kơ Siôn: “Kră Yang ‘Bok Kei-Dei iĕm oei pơgơ̆r!”

Jơ̆ng Yôhan ‘lơ̆ng tơpă yua kơ sư bơih bơngai yơ̆r ti năm hơdrol- bơngai năm hơdrol Kră Yang Hiôk Hian wă ră roi gah tơdrong hiôk hian đơ̆ng Kră Yang. Na buol liơ? Jơ̆ng buŏl hăm ‘lơ̆ng thoi noh ưh? Buŏl hăm trŏ bơngai yơ̆r ti năm hơdrol đơ̆ng Kră Yang thoi Yôhan ưh?

Sơ̆p hla bơar nơ̆r ‘Bok Kei Dei dai tơ‘blŏk kơ mĭnh ‘nu bơngai pha kŭm jang tơdrong jang yơ̆r ti năm hơdrol hơmet trong, hơmet dôm tơdrong wă năm. Buŏl hăm băt ‘noh bu ưh? Trŏ, ‘noh bơih ‘Bok Dŏng Pơklaih Kră Yang Yêsu! Athei hơdai lăng bơngai chih kơthơ Hêbrơ đei roi tơbăt Sư thoi yơ:

“Tơdrong bơ̆n chang gô noh, thoi lĕ kơ bơ̆n chĕp khêl pĕng akâu bơ̆n, yua kơ bơ̆n gơnang kơ ‘Bok Kei-Dei mă oei tơ plĕnh ti. Yêsu tŏk tơ noh hơdrol kơ bơ̆n, Sư oei ‘bơ̆t anăp ‘Bok Kei-Dei, thoi ‘bok soi tih juăt kơ mơ̆t tơ lăm hnam akŭm anih giĕng soi tih mă ‘Bok Kei-Dei oei. Sư tŏk tơ noh wă hơmet trong kơ bơ̆n, wă kơ bơ̆n gơh tŏk kiơ̆ Sư, yua kơ Sư pơm ‘bok soi tih ling-lang kiơ̆ kơ Sư adrĕch tih Mêlkisêdek sơ̆” (Hêbrơ 6:19-20).

Kră Yang Yêsu bơih Tơ‘ngla Năm Hơdrol kơ lu bơ̆n yua kơ “’Yêsu mơ̆t boih hnam ei, truh tơ anih giĕng tih hloi. Sư mơ̆t soi minh ‘măng đĕch tôm hloi kơ tơdrong soi boih yua kơ Sư soi hăm pham Sư kơdih. Ưh kơ sĭ Sư soi hăm pham bơbe pham rơmo ôh. Sư soi thoi noh đĕch, na bu wă gơnang kơ tơdrong Sư soi noh, bơngai noh gô klaih hloi kơ tơdrong yoch.” (Hêbrơ 9:12).

Lăm chăl hơrih, tơdrong lôch tang, păng iung arih đơ̆ng ‘Bok Dŏng Pơklaih Kră Yang Yêsu, lu bơ̆n gơh jô̆ ‘lơ̆ng tơpăt yua kơ đơ̆ng đon lui lăm Kră Yang- păng yua kơ ‘noh, lu bơ̆n gơh mĭnh jơhngơ̆m hăm Kră Yang ‘Bok Kei Dei. Kră Yang chu pơmat yua kơ tơdrong ưh kơ chu lu bơ̆n, chu pŭ yua kơ tơdrong yoch lu bơ̆n, wă kơ lu bơ̆n gơh hiôk hian păng gơh klaih!

‘Noh tơm tơdrong tơ‘bôh hiôk hian păng pơklaih mă Yôhan đei chĕp ba kơ teh đak. Dang ei, lu bơ̆n kŭm đei krao athei jang tơdrong jang bơngai hơmet trong, ăn tơdrong tơ‘bôh hiôk hian truh tơ đĭ đăng bơngai jum dăr.

Apinh đĭ đăng krao khan hơdai:
Ơ Kră Yang, apĭnh tơgŭm kon nuih pran năm thoi mĭnh ‘nu bơngai yơ̆r ti hơmet trong, ba tơ‘bôh tơdrong hiôk hian păng amêm mơnat Kră Yang truh tơ teh đak. Pĭnh tơdrong hơrih kon gơh jing nơ̆r kơdranh đơ̆ng tơdrong hơmĕng păng jơhngơ̆m amêm mơnat Ih. Apĭnh yua kon thoi tơmam lăm Ih, wă kơ lăm kon, bơngai nai gơh ‘bôh tơdrong hiôk hian păng tơdrong hiôk chơt tơpă đơ̆ng Ih. Kon kơkuh krao khan lăm Anăn Kră Yang Yêsu Krist, A-men.

Ơ lu bơngai mơ̆ng, lăm bơyan Nôel ‘nâu, hơpơi buol hăm inh gô jing lu bơngai yơ̆r ti năm hơdrol, ră roi tơdrong hiôk chơt ‘noh ‘Bok Dŏng Pơklaih đei jur bơih. Hơpơi kơ buol gô ba tơdrong hiôk hian mă kơdih ih đei sơng iŏk truh tơ lu bơngai lăm tơdrong hăm tơdrong roi tơbăt kơ Kră Yang Hiôk Hian jur bơih tơ teh đak- wă kơ jơ̆ng buŏl hăm inh kŭm ‘lơ̆ng thoi jơ̆ng Yôhan mơ̆n!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.