Nôel anoh jơ kơplah mă wă kơ bơ̆n tơchĕng kơ lu tơdrong kăl tơpă lăm tơdrong hơrih. Kơplah đĭ đăng kon bơngai hrăt hrot hơmet tơmam ăn păng pơ djong along hơngo, hơbŏ lu bơ̆n kăl kơ amăn tŏ set jơ năr wă apinh kơdih: “Tơdrong kiơ tơpă wă amăn ăn tơdrong hiôk chơt păng hiôk hian kơ tơdrong hơrih inh?”
Anoh hăm trŏ kơ dôm tơdrong gĭt kăl dah lu tơdrong pơ djong alơ̆ng rŏ dah liơ? Dah lei mă, hiôk hian păng tơdrong tôm mah tơpă truh đơ̆ng tơmam hmă đĕch, thoi tơdrong lui ngeh păng hiôk lăm jơhngơm?

Năr anâu, năr 02/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Missey Butler hăm kơ̆l ‘bai PƠM LIƠ WĂ KƠ ARIH HIÔK HIAN.

“Dah bơ̆n lui tơpă hăm đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk ‘lơ̆ng păng Sư boih. Kơplah lăm mĕ bơ̆n tơpŭ kơ bơ̆n oei nge sơ̆, bơ̆n ưh kơ đei chĕp tơmam kiơ tơlĕch tơ teh âu. ‘Noh thoi lĕ bơ̆n lôch ning-mônh, bơ̆n ưh kơ gơh chĕp ba tơmam kiơ ôh.” (1Ti-mô-thê 6:6-7)

Ih hăm đei hiôk hơ iă kơplah băt kơ lu tơdrong alơng trŏ wă mơmăn jên dah jơ ‘năr ưh? Dah kơplah ih chă ‘bôh tơdrong kăl yua tơgŭm ih hloh kơ bơngai nai?
Kŭm lu tơdrong anoh, tơdrong mă ‘bok Pôl đei roi lăm kơ thơ mă mônh gơ̆i ăn kơ Timôthê. Dah ih đei Sâ̆p Hla Bơar ‘Bok Kei Dei ‘bơt cheng, athei hơdai inh chă lăng tơdrong wă kơ gơh wơ̆ alŏ lăm tơdrong hơrih gah bơhngol na ưh kơ kăl kơ huăch kơ tơdrong kiơ.

Lu bơ̆n gô hơdai ‘bôh băt minh tơdrong đei tơpă pơm kơ bơ̆n hiôk iă hăm nơ̆r pơ tho tơ ‘bôh đơng ‘bok Pôl, đei chih lăm I Timôthê 6:6-7:

“Dah bơ̆n lui tơpă hăm đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk ‘lơ̆ng păng Sư boih. Kơplah lăm mĕ bơ̆n tơpŭ kơ bơ̆n oei nge sơ̆, bơ̆n ưh kơ đei chĕp tơmam kiơ tơlĕch tơ teh âu. ‘Noh thoi lĕ bơ̆n lôch ning-mônh, bơ̆n ưh kơ gơh chĕp ba tơmam kiơ ôh.”

Anâu bơih! Tơdrong pơm wă kơ buŏl gơh wơ̆ tŏk mălei ưh kơ kăl kơ pơm lơ tơdrong. Buŏl hăm ‘bôh ưh? Đei ‘bar tơdrong gĭt kăl ‘bơ̆t dâu: lui ngeh păng hiôk lăm jơhngơm. Inh amaih pơma gah tơdrong lui ngeh hơdrol păng iŏk tơdrong anoh đei yua tơdrong hơrih inh.

Trŏ tơpă, lăm tơdrong jang dŏng pơklaih hlĭch chrơp, Kră Yang Bok Kei Dei ưh kơ sĭ dŏng pơklaih bơ̆n đĕch ôh mălei hơmet tơplih lu bơn dai! Kơplah lu bơ̆n dơ̆ng ‘bơ̆t hơnăp Kră Yang, Kră Yang lăng ‘bôh nhen lu bơngai tơpăt, alơ̆ng rơgŏh ưh kơ đei tơdrong yoch, ưh kơ đei tơdrong chrĭh, păng ‘benh tơdrong lui ngeh! Anoh tơdrong đei yua đei hloi đơ̆ng tơdrong jang alơ̆ng rŏ ‘Bok Dŏng Pơklaih Kră Yang Yêsu! Ha-lê-lu-ya, yua kơ đơ̆ng tơdrong lui, lu bơ̆n gơh dơ̆ng kơjăp nhen minh tơmam đei pơm keh alơ̆ng.

Jơ anâu dơng pơma gah tơdrong hiôk lăm jơhngơm, anâu trŏ tơpă kơ minh tơdrong pơlong lăng pha ra. Tơdrong hiôk lăm jơhngơm anoh mă Kră Yang ‘Bok Kei Dei ling lang “pơ tho hơmet” lăm inh. Tơpă jơhngơm inh pơma, rim năr inh roi băt hiôk lăm jơhngơm hloh lăm tơdrong hơrih inh. Inh ưh pă hơpơi kơ lu gre alơ̆ng rŏ, hnam tih măng să dah lu jơ năr năm chă ngôi jên măk bơih.

Tơdrong “wă kơ lơ lăi thoi buŏl” dang ei ưh pă pơhlŭ inh bơih. Inh dai hiôk anhŏ kơ hruk hơ băn ao minh bô̆ minh ‘bar wơ̆t lăm minh gyeng kŭm hiôk mơn! Păng inh kŭm ưh pă kăl kơ jên lơ wă năm pơm sok, pơ rŏ. Tơplih kơ anoh inh kŭm gơh pơm tơ hnam wă kơ huay kơ huach.

Inh ưh pă lăng gor mŭh kơ jung “hơ drech” đơ̆ng ‘bă anoh minh tơdrong ưh kơ pŭn đơ̆ng hnam dơnŏ bơih. Tơplih kơ anoh, inh lăng sư nhen thoi minh tơdrong hlĭch đơ̆ng Kră Yang ‘Bok Kei Dei pơjing, tơgum pơm jing “ minh tơmam gĭt” lăm inh.

Mă kơplah lăng đêl tơmam sa anăr dơng inh chĕp ba mưh inh năm jang, inh kŭm ưh kơ jŏk na inh yua iŏk dôm tơmam inh đei.

Inh klah song đĭ đăng dôm tơdrong anoh hăm tơdrong hơmĕng kơ buŏl gô băt kơ tơdrong rơngei hơđơ̆ng oei lăm ti buŏl. Anoh bơih tơdrong rơngei kơplah buŏl hlôh băt trong năm đơ̆ng Kră Yang ‘Bok Kei Dei ưh kơ sĭ la yơ kŭm kiơ̆ thoi lu bơ̆n tơchĕng.

Trŏ kơ hiôk tơpă truh kơ jơ anei kơnh, lu bơ̆n ‘blok băt kơ tơdrong lui ngeh păng jơhngơm hiôk anoh bơih jing tơdrong mơdrŏng tih.

Buŏl tam đei kơtơ̆ng nơ̆r “roi lăp ai, roi tôm mah” ưh? Yua kơ kiơ ưh kơ yua tơdrong anoh kơ kơdih bơ̆n? Băt buŏl gô chă ‘bôh tơdrong mă đơ̆ng ki sơ̆ kơdih oei chơ chă–-Tơdrong hơđơ̆ng tơpă.

Buŏl hăm ‘blŏk kơ ‘blung a inh đei pơma anoh tơdrong ưh kơ kăl kơ huach kiơ dah ưh? Tơpă inh glăi bơih. Gô huach ơ! Yua kơ buŏl gô hơchăng đĭ đăng tơmam! Yua kơ kiơ inh băt? I Timôthê 6:7 pơkă pơkăm hơđăl dêh:

“Kơplah lăm mĕ bơ̆n tơpŭ kơ bơ̆n oei nge sơ̆, bơ̆n ưh kơ đei chĕp tơmam kiơ tơlĕch tơ teh âu. ‘Noh thoi lĕ bơ̆n lôch ning-mônh, bơ̆n ưh kơ gơh chĕp ba tơmam kiơ ôh.”

Yua kơ kiơ buŏl ưh kơ pơlong pơm lăng tơdrong anâu dang ei hloi, wă kơ gơh mơ̆t lăm minh tơdrong rơngei anao lăm bơhngol? Inh pơkă tơdrong anoh gô kăl tơpă!

“Lăp inh pơm đang boih, inh wă khan kơ inh kơdih thoi âu: Inh đei mŭk drăm lơ wă ‘măn lê̆ kơ đunh sơnăm. Inh pơdơh bĕ, sŏng sa nhă đak phĭ mah rơkah rơkai, hiôk boih inh.’ 20Mă-lei ‘Bok Kei-Dei khan kơ bơngai ei: ‘Ơ bơngai kơhlôh, măng kơnh boih Inh wă iŏk Bơhngol ih, đơ̆ng noh na ih lôch hloi măng kơnh. Mŭk tơmam ih wă ăn ngôi kơ đe iŏk đĕch.’ ” Kră Yang Yêsu khan dơ̆ng thoi âu: “Tơdrong âu wă pơtih gia kơ dôm lu bơngai hăt kơ mŭk tơmam ala teh, ưh kơ wă tơchĕng gah tơdrong ‘Bok Kei-Dei. Na Yêsu khan kơ lu bơngai pơhrăm păng Sư: “Yua kơ thoi noh na Inh wă khan kơ iĕm: ‘Nĕ tơchĕng gah tơmam sŏng sa, ‘nĕ kơ tơchĕng kơ hơbĕn ao hrŭk. ‘Bok Kei-Dei gơh pơjing iĕm arih, Sư kư̆m băt ăn kơ iĕm tơmam sa mơ̆n, Sư kư̆m băt ăn kơ iĕm hơbĕn ao hrŭk mơ̆n. Iĕm lăng sem ak, sư ưh kơ đei pơtăm ‘ba, ưh kơ đei kĕch ‘măn lê̆ tơ pơk ôh, mă-lei ‘Bok Kei-Dei kư̆m oei hiĕm ‘me sư mơ̆n. Pơma kiơ kơ iĕm, ‘Bok Kei-Dei ‘mêm kơ iĕm hloh kơ lu sem păr tơpă.” (Lu-ka 12:19-24)

Apinh đĭ đăng krao khan hơdai:
Ơ ‘Ba mă ‘mêm, kơplah oei lăm hrăt hrot, gleh lăp, hiơ̆k tơtăm lăm chăl hơrih, apinh Ih tơgŭm kon ‘băt kơnăl kơ tơdrong kăl yua kơ tơdrong lui ngeh păng jơhngơm hiôk hơđơ̆ng, wă kơ đơ̆ng noh kon gô chă ‘bôh tơdrong hiôk chơt păng hơđơ̆ng tơpă lăm jơhngơ̆m. Apinh tơgŭm kon băt hơchăng dôm tơdrong ưh kơ kăl yua, wă kơ nhăm hăm lu tơdrong kiơ mă tơpă kăl yua. Anoh bơih tơdrong tơ’bưh hăm Kră Yang păng tơduă. Kon băt bơnê kơ Kră Yang păng krao khan hăm anăn Yêsu Krist, Amen.

Ơ lu bơngai mơ̆ng, bơyan Nôel anâu, yua kơ kiơ bơ̆n ưh kơ hơdai “chih hơmet lu tơdrong kăl kơ pơm” păng “lăng hơmet mă hơđăl” wă kơ pơkă lăm tơdrong anoh đei tơdrong lui ngeh păng jơhngơm hiôk tơpă? ‘Bar tơdrong anâu gô ăn kơ đĭ đăng lu bơ̆n tơdrong hiôk chơt păng tơdrong pŭn tih!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.