Nôel anoh jơ năr gĭt wă kơ bơ̆n hơdai hăm khŭl bơngai lui tơ hnam akŭm păng hnam dơnŏ, hơri hơdai kơ Kră Yang, klah song tơdrong ‘mêm mơnat păng sơng iŏk hiôk chơt. Mălei kŭm oei đei lu tơdrong hơmĕng hloh hnang jing pơm kơ bơyan phĕt jing tơtok tơtăm. Tơpă, lu bơ̆n dan kơdih tơdrong lăp trŏ ‘blep tơ kơ pơ̆ng păng jing pơm minh tơdrong hơnat ưh kơ kăl yua na jing hiong tơdrong hiôk chơt tơpă đơ̆ng bơyan Nôel. Lei pơm thoi yơ wă kơ lu bơ̆n gơh sơng iŏk bơyan phĕt tôm mah na huay kơ hyup lăm tơdrong lăp trŏ ‘blep kiơ̆ kơ kơdih?

Năr anâu, năr 04/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Escamp hăm kơ̆l ‘bai ‘NĔ KƠ TƠ HIONG TƠDRONG HIÔK CHƠT NÔ EL!

“Đe gô pơm giĕng ‘blŏk hơdơ̆r kơ tơdrong ‘lơ̆ng Ih. Păng hơri ư-ang kơ tơdrong tơpăt Ih.” (Horiso 145:7)

Kơplah kơtơng ‘bar nơ̆r “Nô el,” buŏl ngăl tơchĕng gah tơdrong kiơ? Lu reh brŏ hiôk chơt, lu jơ tơ ‘bơ̆p hiôk hơdai hăm hnam dơnŏ, dah ‘bôh tơdrong hăt hot rat tơmam lăm jơ hơtuch, na hăm lu jơ pơjah pơjăng băl yua kơ tơdrong anoh ưh kơ lăp đon?

Lăm tơdrong hŏk pơhrăm hơchăng lu tơdrong ‘blep trŏ, inh đei hlôi sơng iŏk bơyan Nô el ưh kơ thoi hơpơi. Hơmĕng hloh hnang ba truh tơdrong ưh kơ hiôk, mơn ưh kơ lăp đon lăm jơhngơm păng kŭm đei tơdrong sơ’ngon. Anoh tơpă ưh kơ minh tơdrong alơng wă ‘blok hơdơ̆r Nôel păng sơng iŏk hơnăm anao, hăm trŏ?

Na dang ei inh hlôh bơih tơdrong wă kơ ‘blep trŏ nhen thoi minh anu bơngai tơtông krưp, bơngai juăt kơ tơtông tơdrong hiôk chơt tơdah inh ăn kơ sư pơm thoi ei. Mălei, tơdrong krưp dêh gơh truh anoh kiơ? Along hơngo ưh kơ alơ̆ng, pơ djong tim mă trŏ lăp, dah inh ưh kơ tam gơ̆ih hla ar Nôel alơ̆ng rŏ truh kơ đĭ đăng bơngai juăt kơ inh?

Mălei pơma lei đĕch, inh kŭm ưh kơ gơh weh wer pơ đĭ kơ bơyan phĕt. Tơpă, inh ‘mêm kơ Nôel dêh- yua kơ jơ anâu, inh ưh pă đei lê̆ lu rup ‘blep trŏ ưh kơ tơpă mă đĭ đăng păng kơdih inh đei dan lê̆ pơm kơ inh wing măt bơih.

Lei na, lu bơngai pơm hơkăn, lu bơngai pơm mĕ ling lang hrăt hrot kăl kơ pơm kiơ anâu? Hơdrol hloh, lu bơ̆n kăl kơ pơhrăm lăng lu tơdrong hăm kơmĭl đơ̆ng Kră Yang, pơhrăm tơdrong ăn jơhngơm iơ̆m dim păng tơdrong ‘mêm mơnat kơ kơdih akâu păng đĭ đăng bơngai jum dăr. Anoh kŭm tơm kơ tơdrong lăm Nôel: Kră Yang ăn kơ lu bơ̆n ‘mêm mơnat đơ̆ng minh anu kon nge anao rơneh.

Pơtrơp dơng, lu bơ̆n athei apinh lăng jơhngơm kơdih: bơ̆n tơpă amaih pơhiôk jơhngơm bu – con bơngai dah Kră Yang?

Bơngai chih Brennan Manning lăm hla ar “Kyĕk păng kon triu” đei pơma: “Mưh ăn kơ lu tơdrong hơmĕng đơ̆ng bơngai nai gô plah tơdrong hơmet kơ bơyan hơmĕng păng phĕt Nôel kơdih bơ̆n, lu bơ̆n tơpă oei đei tơdrong pơhlŭ lăm tơdrong pơm lăp đon kơ bơngai teh đak.”

Tơluch, tơdrong lu bơ̆n kăl anoh pơih dơ̆ng tơdrong ‘mêm tih păng tơdrong hơmĕng pran đơ̆ng tơdrong hơ’mon Nôel. Ăp kơ lu bơ̆n gơh pơm tơdrong anoh, bơ̆n gơh hơmet kơ minh bơyan phĕt tơpă ‘benh blai tơdrong tơm Nôel păng hiôk chơt.

Tơdrong Manning tơ ‘bôh iă tơpă: “ Nôel tơm anoh Kră Yang ‘Bok Kei Dei ăn kơ lu bơ̆n kơdih akâu Sư – Sư bơih ‘Bok Dŏng Pơklaih Kră Yang Yêsu Krist. ‘Nĕ kơ lăp đon kơ dôm tơdrong kiơ hơtŭch kơ anei…’Nĕ kơ năm hăm minh pôm đak glung iĕ kơplah Kră Yang ăn kơ buŏl đĭ minh đak dơsĭ đơ̆ng Kră Yang. ‘Nĕ kơ lăp đon hăm minh bơyan Nôel hiôk chơt…Athei krao khan, bơ̆jang, ngôi hiôk, song sa, ăn tơmam, hơri, klah song kơ bơngai kơ ‘bah, pơlung lu bơngai bơsĕl…athei pơm dôm tơdrong lăm anăn Kră Yang Yêsu Krist.

Apinh đĭ đăng krao khan hơdai:
Ơ Kră Yang mă ‘mêm, apinh tơgŭm kon gơh hơchăng dôm lu hơmĕng hơtaih dêh mă kon đei dan hơmet. Kon băt kơnăl lu sư pơm kơ kon hiong đĭ tơdrong hiôk chơt tơpă đơng bơyan Nôel. Apĭnh tơgŭm kon ‘blŏk kơ tơm tơdrong kăl yua tơpă đơ̆ng Nôel ưh kơ tơlăm dôm lu tơdrong hơmet hrăt hrot dah lu tơdrong hơđăl apĭnh hơnat mă anoh bơih ‘bơt tơdrong tơ ‘bôh tơdrong ‘mêm đơ̆ng Kră Yang lăm chăl arih kon. Kon kơkuh krao khan lăm anăn Kră Yang Yêsu Krist, Amen.

Ơ lu bơngai mơng mă ‘mêm, kơplah hơmet kơ Nôel, hơpơi kơ jơhngơm rim anu kơ bơ̆n gơh rơngei đơ̆ng dôm lu tơdrong tơchĕng bơngơ̆t păng gleh lap, wă kơ gơh hơlen tơchĕng lăm tơdrong ‘alơng rŏ păng ‘mêm mơnat mă Kră Yang ăn đĕch. Athei bơ wei rim kơ jơphŭt lăp ai hăm khŭl bơngai lui, hnam dơnŏ păng bôl buŏl, wă kơ ba kơnăl tơdrong ‘mêm păng tơdrong hơmĕng mă bơyan Nôel đei ‘măn ăn kơ lu bơ̆n lăm ‘Bok Dŏng Pơklaih Kră Yang Yêsu. Hơpơi bơyan Nôel ‘nâu gô ‘bĕnh blai tơdrong hiôk chơt păng tơm tơdrong, kơplah lu bơ̆n ư-ang Kră Yang tơ hơnih kăl hloh păng chă ‘bôh tơdrong hơđơ̆ng lăm tơpang ty Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.