Pơjao păng iŏk tơmam ăn đĕch ‘noh tơdrong pơm juăt bơih kơplah Nôel truh. Kră Yang Yêsu đei jur tơ teh đak nhen thoi tơmam ăn đĕch kơ lu bơ̆n ba ăn tơdrong dŏng pơklaih hăm tôm lu tơdrong pŭn hiôk. Mălei lu bơ̆n hăm trŏ bơwei kơdih bơ̆n dôm lu tơmam ăn đĕch ‘noh, dah klah song tơdrong ‘noh hăm đĭ đăng kon bơngai jum dăr?

Năr anâu, năr 05/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Kathy Thomas hăm kơ̆l ‘bai BƠ̆N ĐEI WĂ KƠ ASONG ĐE DƠ̆NG.

”Bok Kei-Dei ăn kơ lu bơngai lui bơ̆n tôm tơdrong hơgei phara, na bơ̆n athei jang kiơ̆ kơ Sư ăn kơ bơ̆n hơgei noh, wă kơ bơ̆n gơh tơgŭm băl.”
I Pet 4:10

Inh đei lơ tơdrong ‘blŏk hơdơ̆r ‘lơ̆ng gah lu pơge hrôih lăm năr Nôel. Kơplah oei ‘lơ̆p, inh đei mơmăn jên tơmam răt tơmam kơdih wă răt tơmam kơ rim anhŏng oh lăm hnam dơnŏ, păng inh kăl kơ pơdrơ̆ng khan inh ‘maih wă dêh đei iŏk tơmam ăn đĕch!

Mălei đơ̆ng rŏng kơ lui ngeh kơ Kră Yang, inh mơn đei ưh kơ hiôk lăm jơhngơ̆m yua kơ Nôel dang ei. ‘Bơ̆t jơ hơyơ inh đei đŏk dôm lu ‘bai chih pơma gah tơdrong kon bơngai ưh kơ lăng tơ Kră Yang Yêsu tơlăm năr ‘blŏk hơdơ̆r kơ năr rơneh Sư. Inh kŭm đei ‘bôh tơ’bơ̆p tơlăm tơdrong roi dôm tơdrong hơ’mon kơ gơ̆p sơng iŏk bơyan phĕt ‘nâu hăm tơ gar dah kŭm đei pơ juă dih băl lăp wă kơ đei răt minh tơmam đei tơjur kơ đeh. Đĭ đăng dôm lu tơdrong ‘noh pơm kơ lu bơ̆n hơ’ngon.

Mĕ inh bơngai hơ mrah, ling lang răt tơmam ‘noh tơmam pơ ngôi kơ lu mon inh, yua kơ sư wă ‘maih ‘bôh muh măt hiôk hơ iă đơ̆ng lu sư kơplah pơih lu tơmam ‘noh. ‘Noh ưh kơ trŏ kơ minh tơdrong kơnê̆, mălei inh tơtăm kơ lu hơ’lơ̆p gô ưh kơ hlôh tơdrong tơm kơ đĭ đăng dôm lu tơdrong ‘noh.

Nôel hơnăm anoh, mĕ đei răt kơ kon drŏnglo alŏ inh minh pôm gơtar. Mă sư lăp 15 sơnăm mălei đơ̆ng sư băt kơ pơma ‘bar nơ̆r “gơtar”, kon drŏnglo inh ling lang hơpơi kơ gơtar mưh pơyan Nôel truh. Inh đei roi kơ mĕ inh ‘nĕ kơ răt kơ kon inh yua kơ inh băt inh kơdih gô ưh kơ tôm mah wă ăn kơ jơ pơhrăm gơtar kơ kon. Thim lăm noh, kon inh kŭm minh anu bơngai alơ̆p ưh kơ pơ̆n, ưh kơ đei bu wă gơ̆h tơgŭm sư dơ̆ng ‘bơ̆t anăp lơ bơngai wă reh. Mălei mĕ ưh kơ ăn kơ tơdrong tơchĕng inh anoh trŏ lăp.

‘Blŭng a, inh tơchĕng tơmam anoh ưh kơ đei yua, lăp hiong jơ anăr păng jên tơmam. Kon drŏnglo inh đei hŏk kơdih kiơ̆ kơ hla ar păng reh pơlong lăng tơ lơ hơnih, mălei sư kŭm ‘bônh kơ bơ̆l hăl. Drơ̆ng mơ̆n tơdrong reh brŏ mă kon inh đei pơm kŭm gơh mơng mơ̆n, mălei sư ưh kơ đei hiôk dêh wă kơ pơm kơ bơngai nai amaih mơ̆ng.

Na đei Kră Yang ăn minh tơdrong tơplih tih lăm hnam dơnŏ inh, ba đĭ đăng hnam dơnŏ inh tơ mĭnh hơnih hơkŭm anao. Tơ hơnih anâu, rim măng năr pêng, hnam hơkŭm đei pơtho reh gơtar ưh kơ đei iŏk jên kơ khul mơlôh. Bơngai pơtho lăm hŏk pơhrăm đei jơhngơm hiôk klah asong kơ lu bơngai nai tơmam mă Kră yang đei ăn kơ sư, wă kơ đơ̆ng noh, tơmam ăn anâu đei pơtrơp gơh klah asong đơ̆ng lu bơngai hŏk pơhrăm.

“Plei yua đơ̆ng Inh ‘lơ̆ng hloh kơ maih se, mă maih rơgoh, Hloh kơ hu đe ‘nao hling.” (Tơdrong Pơđơ̆k 8:19)

Bơngai pơtho tơ’bôh kơ kon drŏnglo inh kŭm lăp pơtho đêl lu tơdrong đei lăm hla ar pơtho, mălei pha ra ‘bơ̆t dâu, anoh tơdrong pơkă hŏk pơhrăm păng roi tơbăt tơdrong pơhrăm sư đei hlôi bơih rim gyĕng. Tơdrong anâu đei tơgŭm kơ kon inh huay kơ hơchăng kơplah đei tơ’bơ̆p tơdrong hơnat.

Hăm tơdrong pơlung tơ iung păng pơkă anoh đei tơgŭm wơ̆ alŏ tơdrong gơh kơ kon inh thim lơ hrĕng wơ̆t dơ̆ng. Ưh kơ đei đunh đơ̆ng rŏng kơ anoh, bơngai alơ̆p đei jơhngơ̆m amaih hăm tơdrong reh mah truh tơ sư hơ oei pơhrăm rim jơ hơnơ̆ng; dang ei, kon inh gơh pơtho hơri lăm jơ hơkŭm, chih ‘bai hơri, mơ̆t lăm khul reh brŏ kơ hnam hơkŭm. Kơplah oei chih dơ̆ng lu tơdrong anâu, kon inh oei ngôi hơdai hăm Matt Redman, bơngai chih ‘bai hơri “Jơhngơm Kơkuh” (The Heart of Worship). Sư đei klah asong đêl lu tơdrong hlôi chih ;bai hơri kơdih sư kơ lu bơngai nai, lăm noh kŭm đei kon drŏ nglo inh, păng dôm lu tơdrong anâu kŭm klah asong dơ̆ng kơ lu bơngai nai.

Lăm Ma-thiơ 2:10-11, lu bơ̆n đŏk gah tơdrong hơ’mon lu ‘bok pơjâu ăn tơmam kơ Kră Yang Yêsu:
“Kơplah lu sư oei nơnăm rok trong lu sư ‘bôh hloi sơnglŏng ei pơchrang hơdrol hơdrol kơ lu sư. Lu sư ‘nă hal dêh. Lu sư hnhoi sơnglŏng ei truh tơ Pơlei Betlehem. Lăp truh tơ kơpal bơbŭng hnam Yêsu, sơnglŏng ei dơ̆ng. ‘Lu sư mơ̆t lăm hnam na ‘bôh hloi kon nge ‘noh hăm mĕ Sư Mari. Lu sư sơtơ̆p kŭl-tăng kơkuh kơ Yêsu păng iŏk ‘bar anăn pơgang ‘bâu phu hăm maih đơ̆ng lăm kơdŭng lu sư pơyơ̆r kơ Yêsu. ( Mathiơ 2:10-11)

Lu ‘bok pơjâu sơ̆ đei pơyơ̆r kơ Kră yang Yêsu lu tơmam gĭt kăl hloh đơ̆ng lu sư kơ Kră Yang. Năr anâu, lu bơ̆n hăm đei jơhngơ̆m amaih pơyơ̆r jơhngơ̆m pran, tơdrong gơh hơgei, tơdrong hơgei pha ra đơ̆ng Yang Bơhngol Alơng ăn wă kơ Kră Yang gơh yua sư ưh? ‘Bok Pôl lăm I Pêtrôs 4:10 tơ’blŏk kơ lu bơ̆n khan:
”Bok Kei-Dei ăn kơ lu bơngai lui bơ̆n tôm tơdrong hơgei phara, na bơ̆n athei jang kiơ̆ kơ Sư ăn kơ bơ̆n hơgei noh, wă kơ bơ̆n gơh tơgŭm băl.” (I Pet 4:10)

Lăm tơdrong hơ’mon đơ̆ng kon drŏ nglo inh, inh đei tơplih lăm tơdrong lăng gah tơdrong ăn tơmam. Inh ưh pă đei ‘bôh tơdrong tơplih tơmam ăn lăm năr Nôel anoh ưh pă kăl, mălei anoh minh tơdrong alơ̆ng hloh wă pơma minh tơdrong tơm anoh ‘Bok Kei Dei đei ăn Kră Yang Yêsu anoh tơmam ăn đĕch alơ̆ng hloh đĭ đăng kơ lu bơ̆n. ‘Bok Dŏng Pơklaih jur tơ lăm teh đak lăm rup minh kon nge, hơrih minh chăl hơrih alơ̆ng rơgoh wă pơm kơmĭl kơ bơ̆n chu pŭ tơdrong phăk mă trŏ kơ lu bơ̆n wă pŭ. Tơplih kơ sek tơlang, Kră Yang đei lăng lu bơ̆n lăm tơdrong ‘mêm mơnat păng ưh pă jô̆ yo đơ̆ng Sư. Anâu tơdrong hiôk chơt, tơ’bôh mă lu bơ̆n kăl kơ klah asong kơ bơngai nai lăm năr hiôk chơt Kră Yang jur. Hăm đei tơdrong kiơ kăl hloh kơ lu bơ̆n ră roi tơdrong chơt hiôk anâu păng klah asong lu tơdrong hơgei phara đơ̆ng Yang Bơngol Alơ̆ng ăn, tơdrong hơgei lu bơ̆n kơ lu bơngai nai wă kơ lu sư kŭm gơh pơyơ̆r tơdrong ư-ang kơ Kră Yang?

Ưh kơ lăp Nôel đĕch, mălei Kră Yang Yêsu bơih tơm kơ rim pơyan lăm chăl arih lu bơ̆n. Rim năr bơ̆n đei minh jơ năr wă lu bơ̆n ră roi tơ’bôh gah tơdrong dŏng pơklaih, mălei tơdrong gơh hơgei păng tơdrong pŭn Kră Yang đei ăn kơ lu bơ̆n truh kơ bơngai nai. Dang ei, mưh Nôel truh, lu nhôn ngăl amaih ăn tơmam kơ lu kon hơ’lơ̆p tơmam mă lu sư gơh song ăn kơ lu bơngai nai thoi reh brŏ, tơdrong gơh hơgei lăm reh brŏ, wă kơ lu tơdrong mă lu hơ’lơ̆p đei tơ’bôh na gơh tơ’bôh pơtrơp dơ̆ng tơ ning mônh.

Tơmam ăn đĕch hơ yơ mă Kră yang đei ăn kơ buŏl wă kơ buŏl gơh klah song dơng kơ bơngai nai lăm bơyan Nôel anâu.

Apinh đĭ đăng krao khan hơdai:
Bơnê kơ Kră Yang yua kơ rim năr kon hơrih kơpal teh đak anoh lu năr kon gơh sơng iŏk tơmam ăn đĕch tơdrong pŭn hiôk păng tơdrong ‘mêm mơnat đơ̆ng Ih. Apinh Kră Yang tơgŭm kon gơh ră roi tơdrong Ih pơklaih păng gơh yua tơdrong gơh hơgei đơ̆ng Ih ăn kơ kon kơ lu bơngai nai, wă kơ lu sư kŭm mơn đei lu tơdrong mă kon đei iŏk đơ̆ng Ih. Kon kơkuh krao khan lăm Anăn Kră Yang Yêsu Krist, Amen.

Ơ lu bơngai mă mơ̆ng, athei tơchĕng gah tơdrong ‘mêm păng tơdrong ăn đĕch đơ̆ng Kră Yang lăm chăl arih buŏl lăm lu năr đei hlôi. ‘Blŏk kơ tơdrong dŏng pơklaih Kră Yang đei ăn kơ buŏl păng chih lu tơdrong mă buŏl amaih pơm kơ Kră Yang năr anâu. Kŭm gơh tơ’bôh kơ bơngai nai minh tơdrong ih băt, krao pơtơm minh anu bơngai nai mă ưh băt kơ Kră Yang năm tơ hơnih hơkum, dah lăp ai anoh minh tơdrong ‘mêm mơnat. Mă khan kiơ, athei pơm đĭ đăng đơ̆ng jơhngơ̆m băt bơnê, yua kơ tơdrong ‘mêm păng tơdrong ăn đĕch đơ̆ng Kră Yang tih dêh lăm tơdrong hơrih buŏl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.