Dôm lu năr lăm khei 12 anoh jơ năr mă lu bơ̆n lăng ‘bôh rim hơnih đei tơdrong hiôk chơt đơ̆ng pơyan Nôel wă jê̆ truh. Rok trong đei lơ hơdah ŭnh păng đei brŏ reh ‘bai Nôel. Jơhngơm buŏl hăm ưh kơ hiôk ưh? Jơhngơ̆m buŏl hăm hiôk chơt hơ iă ưh? Lu bơ̆n đei lơ tơdrong wă hơmĕt kơ bơyan phĕt tih jâ̆p jang kơ teh đak anâu, tơdrong kăl tơpă ưh kơ gơh kơ ưh kơ đei tơdrong hơmet lu hla ar wă ăn truh tơ’bôh tơdrong kăl tơm truh tơ hnam dơnŏ bôl buŏl lăm bơyan Nôel.

Năr anâu, năr 06/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Kathy Thomas hăm kơ̆l ‘bai PƠJAO ĂN NƠ̆R AMÊM MƠNAT

“Ơ oh, inh krao khan apinh ‘Bok Kei-Dei ăn kơ ih liĕm akâu păng wei-lăng ih tôm tơdrong, thoi Sư ăn kơ ih lui kơjăp dang ei.” (III Yôhan 2)

Minh tơdrong mă inh đei iă hloh lăm pơyan Nôel anoh kơplah đei iŏk lu hla ar hiôk chơt Nôel. Inh iă tơpă lu hla ar đei rup hnam dơnŏ đơ̆ng bơngai ăn. Inh tơchĕng gah tơdrong jang kăl kơ hơmet kơ rup hnam dơnŏ anei. Tơdah buŏl bơngai mĕ đơ̆ng hnam dơnŏ, buŏl gô hơmet hơban ao, jơ nar, lăng pơyan păng rơih bơngai phin rup alơ̆ng. Đơ̆ng rong kơ anoh, rơih iŏk rup alơ̆ng hloh ôp tơ hla ar wă ăn. Inh gĭt dêh rim hla ar mă inh đei iŏk lăm bơyan Nôel thoi ei.

Đei mơn hiôk hơ iă kơplah inh pơih hôp tah hla ar păng chă ‘bôh minh hla ar Nôel. Tơdrong anoh pơm kơ inh mơn đei ‘mêm mơnat, đei hiơ̆k bơngơ̆t, păng gĭt kăl. Đei bơngai ‘blok kơ hnam dơnŏ inh! Minh hla ar đei ăn hăm nơ̆r hơkat hiôk chơt, hăm minh tơdrong tơchĕng dah nơ̆r hơkat pŭn hiôk truh tơ bơngai iŏk.

Đei minh nơ̆r apinh manuh rơngơp lăm III Yôhan 2:
“Ơ oh, inh krao khan apinh ‘Bok Kei-Dei ăn kơ ih liĕm akâu păng wei-lăng ih tôm tơdrong, thoi Sư ăn kơ ih lui kơjăp dang ei.”

Inh đei minh anu buŏl mă inh đei chang gô wă đei iŏk hla ar đơ̆ng duch ei. Duch ei đei tơdrong gơh hơgei dêh đơ̆ng lăm lu rup kơdih sư kŭm thoi roi dơng dôm lu tơdrong kăl lăm minh hơnăm hlôi đơ̆ng hnam dơnŏ sư hăm nơ̆r pơđơ̆k hiôk dêh. Hăm inh, hla ar anoh alơ̆ng dêh păng gĭt kăl tơpă.

Inh băt jơhngơ̆m păng tơdrong amaih đơ̆ng buŏl inh ưh kơ wă kơ pơang, mălei wă kơ đei klah asong tơdrong hiôk gah dôm tơdrong hnam dơnŏ duch ei đei. Lu nhôn đei lăng ‘bôh lu kon hơ’lơ̆p duch ei wơ̆ alŏ, ‘bôh tơdrong hơrih chơt hiôk đơ̆ng hnam dơnŏ ei păng tơdrong kăl hloh, lu nhôn ‘bôh Kră Yang đei ăn tơdrong pŭn hiôk kơ lu sư lăm minh hơnăm hlôi wă kơ đei hơdai hiôk chơt.

‘Bok Yôhan đei tơ’bôh kơ lu bơ̆n minh kơmĭl alơ̆ng hloh gah tơdrong song sa hơdai hiôk chơt kơ bơngai nai đei: “Inh hiôk chơt tơpă dang ei kơlih kơ đei ‘nhŏng oh bơngai lui truh tơ inh, lu sư khan ih kiơ̆ tơdrong ‘Bok Kei-Dei ‘lơ̆ng tơpă. Inh băt mơ̆n ih kiơ̆ tôm tơdrong ‘Bok Kei-Dei. Ưh pă tơdrong kiơ mă hiôk hloh dang tơdrong âu: Inh kơtơ̆ng lu bơngai lui kơ ‘Bok Kei-Dei đơ̆ng inh bơtho lu sư oei lui kơjăp khŏm khŏm.” (trong 3-4)

Ih hăm mơn đei jơhngơ̆m ‘mêm mơnat lăm kơ thơ đơ̆ng ‘Bok Yôhan ưh? Tơdrong anoh nhen thoi tơdrong đei iŏk minh hla ar Nôel anoh! Mưh lăp, lu bơ̆n lăng hla ar đei nơ̆r hơkat pŭn hiôk anoh nhen thoi hmă đĕch, mălei tơpă anoh gơh tơ’bôh minh tơdrong jang, ưh kơ sĭ lu bơngai bơ̆n đei ăn – mălei hăm jơhngơ̆m lu bơ̆n kơdih dai. Tơdrong ăn lu hla ar hơkat pŭn hiôk Nôel gơh ăn kơ lu bơ̆n đei jơ nar lăng tơdrong kăl wă pơm lăm chăl arih bơ̆n, chih dôm lu nơ̆r pơlung, păng pơma kơ đĭ đăng lu bơ̆n ling lang ‘blŏk păng krao khan tơgŭm kơ lu sư.

‘Bok Yôhan đei chih pơtrơp dơ̆ng thoi âu: “Lu sư roi kơ lu bơngai lui tơ hnam akŭm nhôn mơ̆n khan ih ‘mêm mơnat kơ lu sư. Na dang ei lu sư năm chă bơtho đe dơ̆ng. Apinh ih mơnat ăn kơ lu sư tơmam dơ̆ng hŏ, wă kơ lu sư gơh năm chă bơtho đe. ‘Bok Kei-Dei lăp đon tơpă ih pơm thoi noh.” (Trong 6). Ô! Tơdah gơ̆p pơma roi ‘bơm buŏl, hăm trŏ buŏl ưh kơ amaih lu sư pơma thoi anoh ưh? Buŏl ưh kơ kăl kơ đei rup hnam dơnŏ dah minh hla ar hơkat pŭn hiôk kăp jên, mălei đĭ đăng dôm tơdrong kăl anoh minh hla ar hơkat pŭn hiôk tơ’bôh jơhngơm ‘mêm mơnat đơ̆ng buŏl. Hla ar hơkat pŭn hiôk đơ̆ng buŏl đei pơm kơ bơngai nai hiĕk hơ iă yua kơ buŏl đei tơchĕng kơ sư, dah pơlung kơ bơngai bu anei yua kơ buŏl đei rơih iŏk nơ̆r ‘Bok Kei Dei mă lu sư kăl kơ mơ̆ng kơtơ̆ng, păng kŭm hloh kơ anoh dơ̆ng, minh nơ̆r tơ’blŏk kơ Kră Yang Yêsu- Sư bơih tơm tơdrong kăl kơ bơyan ‘mêm mơnat.

Apinh đĭ đăng krao khan hơdai:
Ơ Kră Yang ‘mêm mơnat, kon bơnê kơ Ih yua kơ tơdrong ‘mêm hlĭch chrơp đơ̆ng Ih kơplah Kră Yang Yêsu jing kon bơngai păng chu lôch tơplih tơdrong yoch kon. Kon bơnê kơ Ih yua kơ rim bơyan Nôel truh đei tơ’blŏk kơ kon anoh Ih jur yua kơ kơdih kon păng ăn jơ nar wă kơ kon ră roi tơdrong ‘mêm mơnat đơ̆ng Ih truh kơ đĭ đăng bơngai. Apinh Ih tuh ‘bĕnh blai tơdrong ‘mêm păng tơdrong hiôk chơt kơ bơyan Nôel ‘bĕnh kơ jơhngơm kon. Apinh Ih yua kon lăm bơyan phĕt anâu wă kơ ră roi tơdrong ‘mêm mơnat păng hiơ̆k bơngơ̆t kơ lơ bơngai nai. Apinh lăm dôm tơdrong kon pơm, lơ bơngai gô ‘băt păng sơng iŏk Ih. Kon bơnê kơ Ih. Kon kơkuh krao khan lăm Anăn Kră Yang Yêsu Krist, Amen.

Ơ lu bơngai mă mơ̆ng, buŏl hăm đei wă hơmet lu hla ar hơkat pŭn hiôk Nôel wă ăn kơ anhong oh, buŏl juăt ih ưh? Hơpơi kơ nơ̆r Kră Yang năr anâu đei pơlung lu bơ̆n păng thim tơdrong tơchĕng pơwao kơ lu bơ̆n wă kơ gơh pơjao ăn lu tơdrong tơ’bôh tơm lăm bơyan phĕt Nôel hơnăm anâu. Anoh kŭm thoi minh hla ar hơkat pŭn hiôk, minh hla ar krao wơ̆n truh tơ hơnih pơm kơdranh, minh tơmam ăn iĕ wă pơjao ăn, minh năr năm ngôi hơdai kăl kơ đei năm ngôi…Hơpơi kơ Kră Yang gô chông hơ nhăk lu bơ̆n lăm pơyan phĕt anâu wă kơ dôm tơdrong bơ̆n pơm anoh minh tơdrong pơlung păng tơ’bôh hơđăl gah tơdrong ‘mêm đơ̆ng ‘Bok Dŏng Pơklaih lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.