Bơyan Nôel truh, hăm tơngiĕt păng lu tơdrong juăt hrăt hrot. Đĭ đăng hăt hot hơmet hnam, hơmet kơ mĭnh bơyan phĕt hiôk chơt. Mă lei mưh lăp, lăm jơphŭt anoh, lu bơ̆n kŭm mơn đei nhen bơ̆n kơdih dơ̆ng ‘bơ̆t hơnăp lu along hơngo đĭ jô kro, hiong tơdrong hơđơ̆ng păng tơdrong hiôk chơt tơpă. Mălei, kŭm lăm lu jơ ei, bơ̆n đei ‘bôh băt minh tơdrong: mă chăl hơrih phŏ kŭm đei ‘bĕnh tơdrong hơnat păng tơdrong pơlong lăng, lu bơ̆n oei gơh chă bôh tơdrong hơmĕng Kră Yang đei ăn gơh hơrih hiôk chơt Nô El mĭnh wơ̆t dơ̆ng.

Năr anâu, năr 07/12/2024, tơdrong tơ dă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Eddie Jones hăm kơ̆l ‘bai PƠCHRANG TƠDRONG HƠMĔNG NÔ EL.

‘Iĕm bơngai khŭl nai, sơ̆ iĕm oei gơh pơm lơ tơdrong yoch, tơdrong kơnê̆, bơngai oei arih ră dang lĕ kơ bơngai lôch boih. Păng iĕm ưh kơ trŏ kơ bơngai ‘Bok Kei-Dei wă tơgŭm thoi lu bơngai Juđê ôh. Mă-lei ‘Bok Kei-Dei tơiung arih Yêsu Krist đơ̆ng lôch boih, dang Sư tơiung arih iĕm mơ̆n, Sư huay pă jô̆ yo boih dôm tơdrong yoch bơ̆n juăt kơ pơm sơ̆. ‘ (Kol 2:13)

Along hơngo Nôel hơnăm sơ̆ lê̆ tơ ‘nguaih cham, jô kro đunh bơih. Lăng hla hơlŭng đĭ tơ cham, kŭm đei ‘bôh hơđăl sư ưh pă đei tơdrong hơrih. Mă lei Nôel anâu – jơ wă lăng đêl lu tơdrong ‘blok so, hơtol môk jơla tơ kơpal amăng păng nhen bơ̆n đei tơdrong hiôk hian lăm jơhngơ̆m. Tơdrong jang inh kŭm lăp ai đĕch: tah jơ̆ng kơ along, na dui tơmơ̆t lăm hnam. Dôm tơdrong jang pha gah bơyan phĕt anâu đei hơkăn inh hyơ̆k, yua kơ sư anoh bơih bơngai wei ŭnh Nôel lăm hnam. Inh jê̆ hơdrin ĕnh wă kơ hlôi kơ tơdrong hơmet pơdjong, tơm wă kơ hiôk chơt lăm hnam. Lei na pơtơm blŭng a tơdrong tơblah hăm along Nô el.

Năr mă mĭnh, inh hơdrin pơklep along tơ jơ̆ng dreng, na prah kơđĭn bơsey lăm tơm ‘long. Inh ôr hil kơ kŏ iĕ mĭnh wơ̆t yua kơ sư wă “ tơgar iŏk hơnih” ‘bơt hơnih tơm ‘long.

Ami jur – inh tơchĕng hiôk khan tơpă Kră Yang wă tơ ‘bôh tŏ sĕt jơ Nô el mơ̆t tơ jơhngơ̆m inh anâu bơih. Inh mơn ‘bôh đei hiôk biơ̆ tŏ sĕt.

Năr mă ‘bar, tơmam dan bơ̆t tơm ưh kơ đei yua kiơ, along hơgrêng păk nhen thŏng nan lăm hơ’mon đơ̆ng inh. Hơkăn inh krê hơmơt lăng tơ along hơngo, na inh jê̆ ‘blek hil tơhli wă hơchăng weh tơnai kơ bơyan phĕt anâu. Năm brih đak poh yă tơ đak dơsĭ tơchĕng iă hloh kơ tơdrong pơdơ̆ng along hơngo.

Năr mă pêng. Along hơgrêng hơgơn tơ tơnăr, tơmam dan đĭ cheng chong, hla hơlŭng ‘bĕnh kơ che lơ̆k kok. Hơkăn pơmam jŏk thei inh hơmet. Băt inh kăl kơ pơm tơdrong kiơ hăm tơnơm along… păng hơkăn inh dai.

Năr mă puăn. Inh tơ ‘bơ̆p buŏl inh chă tơdrong wă pơm liơ. Mĭnh anoh, hŭt along anoh răt plơ̆ng. Mă ‘bar, hŭt hloi along tơpă na tơplih hăm along chai. Mă pêng, hŭt hloi hơmet pơdjong Nô el.

Năr mă đăm. Pơtơm “raih” kơ along hơngo. Hăm lu tơmam hmă đĕch, inh kăt tŏsĕt tơnơm along. Che lơ̆k hnam ‘bruih ‘brăm, na hơkăn inh năm răt tơmam dơ̆ng. Ŭnh tơsŭl. Oei ưh kơđei ‘bôh kơ bơyan Nô el hiôk hian amơ̆i.

Năr mă drâu. Along dơ̆ng nhen tơpăt. Hla along đei hơtol bĕnh kơ ŭnh hơdah. Hơkăn hơgơn ‘bơ̆t hơngiĕng inh, pơmơnh: “Anhŏng gơh dêh!” Anoh bŏ jơ anâu inh kŭm dai iă kơ bơyan phĕt anâu.

Dui mĭnh pôm along lôch mơ̆t lăm hnam ưh pă đei yua kiơ bơih. Mă lei lu bơ̆n kŭm nhen thoi along hơngo anoh mơ̆n ah? Lôch lăm tơdrong yoch, tơdrong hơrih ‘bĕnh kơ nơ̆r jŏk, hiong jơnăr, păng dôm tơdrong hmach. ‘Bok Pôl pơma hăm Kră Yang ‘Bok Kei-Dei ‘bôh lu bơ̆n jô kro, pơchah păng hơpơi chơ chă tơdrong jê̆ hăm Kră Yang. Mă tơ’nguaih oei dreng alơ̆ng, mă lei tơlăm lu bơ̆n lôch bơih – lôch hăm Kră Yang, lôch hăm bơngai jum dăr, lôch hăm tơdrong hiôk chơt mă trŏ kơ lu bơ̆n kăl kơ đei rim năr.

Mă khan lu bơ̆n oei hơdai hăm tơdrong anei, Kră Yang ‘Bok Kei-Dei oei ling lang tơiung, bơwei păng ăn kơ lu bơ̆n hăm tơdrong amêm đơ̆ng Kră Yang. Mă khan lu bơ̆n lôch lăm lu tơdrong glăi, mă lei yua kơ đơ̆ng ‘Bok Krist, lu bơ̆n gơh hơrih dơ̆ng păng ling lang dreng alơ̆ng.

Lei yua kơ kiơ lu bơ̆n nŏng kơ chĕp lu along hơngo lôch mơ̆t lăm hnam rim hơnăm? Hăm trŏ anoh bơih tơdrong tơ’bôh đơ̆ng tơdrong hơmĕng ah? Anoh bơih nơ̆r tơbăt, lu bơ̆n gơh hơrih dơ̆ng. Anoh bơih tơdrong inh oei hơdrin hơdai hăm “tơdrong tơblah along hơngo Nô el” anâu. Inh amaih chă bôh tơdrong hlĭch lăm ‘Bok Krist păng mĭnh wơ̆t dơ̆ng hơmet tơdrong lui ngeh lăm tơdrong hơrih ‘bĕnh blai mă Kră Yang đei pơkă wă amăn ăn.

Thoi Yôhan 10:10 chih: “Bơngai chă tơtông truh, sư wă tơtông iŏk đĕch păng wă pơrăm đĕch. Mă-lei inh truh tơ âu wă ăn kơ triu arih păng hiôk chơt tơpă.”

Apinh đĭ đăng krao khan hơdai:
Ơ Kră Yang, kơplah oei lăm tơdrong hơnat hơnot păng tơdrong pơlong đơ̆ng chăl hơrih, apĭnh ăn kơ kon jing thoi ŭnh kơđeng pơchrang tơdrong hiôk chơt păng hiôk hian lăm bơyan Nôel anâu. Lăm teh đak tơngiĕt păng jơhngơ̆m kon bơngai ‘bônh kơ kơtol, apĭnh ăn kơ kon đei ‘bĕnh jơhngơ̆m pran kơtang wă kơ hơrih trŏ tơdrong amêm mơnat. Apinh rim năr kon hơrih anoh mĭnh tơdrong tơ ‘blŏk kơ lu bơngai jum dăr, mă tơdrong hơrih hơnat hơnot thoi yơ, tơdrong ‘mêm đơ̆ng Kră Yang oei ling lang hơdah chông hơnhăk, anoh tơm tơdrong hơmĕng ưh kơ lai yơ hiong. Kon kơkuh krao khan lăm Anăn Kră Yang Yêsu Krist, A-men.

Ơ lu bơngai mơ̆ng, hơpơi kơ tơdrong hơ ‘mon năr anâu gô tơ ‘blŏk rim anu kơ bơ̆n gah tơdrong hơmĕng, mă khan tơdrong hơrih đei truh tơdrong pơlong lăng păng hơnat hơnot, lu bơ̆n oei chă bôh tơdrong hơrih anao lăm Kră Yang. Bơyan phĕt Nô el anâu, athei hơdai rôp iŏk tơm tơdrong hiôk hian, lui ngeh kơ dôm tơdrong ‘lơ̆ng wă truh păng bơwei tơdrong gĭt tơpă đơ̆ng Nô el – Tơdrong amêm tih đơ̆ng ‘Bok Krist đei truh yua kơ lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.