Tơdrong Kră Yang Yêsu jur tơ teh đak đei pơih ăn jơhnơr hiôk hơđơ̆ng yua kơ Sư bơih ‘Bok Dŏng Pơklaih ăn tơdrong hiôk hian kơ teh đak. Bơyan Nôel ling lang krao hơpơi lu bơ̆n mơ̆t lăm tơdrong hiôk hian tôm mah đơ̆ng Kră Yang. Tơdrong hiôk hian anoh kơpal hloh kơ dôm tơdrong hơnat đơ̆ng tơdrong hơrih. Kơplah oei lăm Kră Yang, tơdrong hiôk hian ưh kơ đei hiong ôh, mă lei đei pơthim dơ̆ng.

Năr anâu, năr 08/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Paul J. Palma hăm kơ̆l ‘bai TƠ‘NGLA PƠTHIM ĂN HIÔK HIAN.

“Tơdrong Sư pơgơ̆r rai tŏk păng hiôk-hian đei hơnơ̆ng ling-lang ưh kơ đei layơ tôch, tơ anih tang-dŏ pơtao Đawit păng dêh char pơtao pơgơ̆r noh kơjăp pran, hăm tơdrong sek tơlang trŏ păng tơdrong ‘lơ̆ng tơpăt đơ̆ng dang ei truh tơ ning-mônh ưh kơ đei layơ tôch, jơhngơ̆m hưch hanh Kră Yang Tih Hloh sĭt gô pơm tơdrong noh! Nơ̆r Kră Yang hơtă hil kơ Jakôp păng nơ̆r noh tuh ăn kơ Isơrael.” (Êsai 9: 6-7)

Lăm lu jơ năr đơ̆ng tơdrong tơblah păng tơgar, lu bơ̆n ling lang hơpo kơ mĭnh năr teh đak gơh hơrih lăm rơngei păng ưh kơ đei tơdrong truh. Mưh kơplah teh đak huŏng yua kơ tơdrong tơplih, nơ̆r krao apĭnh jơ̆p kơ dêh char gah tơdrong rơngei đei roi jơ̆p jang. Klo kăn, kon hơ‘lơ̆p, mĕ ‘bă lu bơngai linh tơ hơnih tơblah ưh kơ đei hơpơi kiơ hloh kơ wă kơ đei tơ‘bơ̆p hăm anhŏng oh kơdih, lu sư oei chang gô ling lang kơ lu bơngai linh anoh gô brok hiôk hian.

Bơyan hơmĕng anoh jơ anăr kơ tơdrong hơmĕng, chang gô păng hơmet kơ Nôel đơ̆ng ‘Bok Krist. Sơ̆p hla bơar nơ̆r ‘Bok Kei-Dei đei tơ’bôh kon pơlei Kră Yang đei hơpơi thoi yơ đơ̆ng rim kơ jơhnơr kơ mĭnh ‘nu ‘Bok Mêsi đei pơkă ăn kơ bơ̆n, Tơ‘ngla ei gô truh lăm tơdrong kĕ jei ‘lơ̆ng rŏ, kĕ jei đơ̆ng tơdrong măng mu hăm tơdrong jang sư. Bơyan hơmĕng tơgŭm lu bơ̆n sơng iŏk Nôel đơ̆ng Bok Krist lăm pêng tơdrong tơm:

Hơdrol hloh, lu bơ̆n brok tơ lăm tơdrong hiôk chơt kơ năr Nôel, tơ pơlei ‘Bet-lê-hem kơplah lu linh jang ‘lơ̆ng hơri bơnê: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu!” (Luka 2:14).

Mă ‘bar, lu bơ̆n sơng iŏk tơdrong truh đơ̆ng Kră Yang Yêsu lăm tơdrong băt bơnê yua kơ Sư kĕ jei đơ̆ng tơdrong yoch păng tơdrong lôch, pơm along hơlam kơ lu bơ̆n hăm Yang ‘Bă:

“ Tơdrong noh ‘Bok Kei-Dei pơm kơ bơ̆n, Sư athei Yêsu Krist pơgơ̆p bơ̆n jing bơngai ‘lơ̆ng hăm Sư dơ̆ng. Na dang ei sư wă kơ nhôn krao tơwih iĕm đe jing bơngai ‘lơ̆ng hăm Sư.” (II Kôrintô 5:18)

Tuch luch, lu bơ̆n lăng gah tơdrong wơ̆t dơ̆ng ‘bĕnh tơdrong ư-ang đơ̆ng ‘Bok Krist lăm tơdrong hiôk chơt păng băt kơnăl tơpă. Hla ar Tơdrong tơ ‘bôh kơ lu bơ̆n ‘bôh rup ‘bĕnh tơdrong hiôk chơt păng hơmĕng kơ tơdrong kăl tơm anâu:

“Ning-mônh Sư wă jur tơ bơ̆n hăm hơmơ̆l. Đĭ-đăng kon bơngai gô ‘bôh Sư. Lu bơngai mă pơ̆ng pơlôch Sư tơ ‘long pơglang sơ̆ kư̆m ‘bôh Sư mơ̆n. ‘Bơ̆t noh kơnh đĭ-đăng khŭl kon bơngai jơ̆p kơ teh đak nhơ̆m hmoi ‘bơ̆t anăp Sư; tơpă, trŏ kơ nhơ̆m hmoi tơpă mơ̆n. A-men.” (Tơdrong Tơ’bôh 1:7)

Tơpă, Kră Yang Yêsu gô jur dơ̆ng, đĭ đăng kon bơngai gô ‘bôh Sư mơsêh mơyang yŏng pơgơ̆r jur kơpal hơmơ̆l. Lu bơngai bu mă hơngah kơ ‘Bok Dŏng Pơklaih gô ôr re, hmach kơplah ‘bôh tơdrong Ư-ang Kră Yang năr Sư jur dơ̆ng ning mônh.

Tơpă teh đak oei đei tơ ‘bơ̆p lu tơdrong ưh kơ hơđơ̆ng hăm tơblah wang, tơdrong truh, pơngot rơ wĕt…, mă lei tơdrong hơmĕng oei đei chă ‘bôh lăm ‘Bok Dŏng Pơklaih. Tơdrong tơblah gô hiong đĭ, hiôk hian gô pơgơ̆r. Mă tơdrong hiôk hian dang ei nhen hơtaih dêh mưh bơ̆n lăng tơpă dang ei, mă lei tơdrong anoh ling lang đei chă ‘bôh lăm ‘Bok Krist, anoh Tơ‘ngla Nôel, oei lăm jơhngơ̆m bu đei lui ngeh, păng gô jur pă mĭnh ‘măng dơ̆ng. Kră Yang Yêsu, Pơtao hiôk hian oei pơgơ̆r truh ning mônh kơpal teh đak anâu, ăn tơdrong pơlung kơ lu bu oei đei tơdrong hơ‘ngon, păng sek tơlang trŏ păng tơdrong ‘lơ̆ng tơpăt Sư kơ lu bơngai pơm kơnê̆.

“Tơdrong Sư pơgơ̆r rai tŏk păng hiôk-hian đei hơnơ̆ng ling-lang ưh kơ đei layơ tôch, tơ anih tang-dŏ pơtao Đawit păng dêh char pơtao pơgơ̆r noh kơjăp pran, hăm tơdrong sek tơlang trŏ păng tơdrong ‘lơ̆ng tơpăt đơ̆ng dang ei truh tơ ning-mônh ưh kơ đei layơ tôch, jơhngơ̆m hưch hanh Kră Yang Tih Hloh sĭt gô pơm tơdrong noh! Nơ̆r Kră Yang hơtă hil kơ Jakôp păng nơ̆r noh tuh ăn kơ Isơrael.” (Êsai 9:6-7)

Apinh đĭ đăng krao khan hơdai:
Bơnê kơ Kră Yang Yêsu yua kơ Ih bơih tơm tơdrong hiôk hian mĭnh Ih đĕch mă kon chă ‘bôh tơlăm teh đak âu. kơplah oei đei lu tơdrong hơnat hơnot kơ lu năr hơtuch, apĭnh Kră Yang tơgŭm kon ling lang lăng gah tơdrong Ih wă jur dơ̆ng ‘bĕnh tơdrong ư-ang wă kơ kon huay kơ gleh lap lăm jơhngơ̆m. Kon kơkuh krao khan lăm Anăn Kră Yang Yêsu Krist, A-men.

Ơ lu bơngai mơ̆ng mă amêm, athei ră roi tơ ‘bôh gah ‘Bok Dŏng Pơklaih- Tơ‘ngla ăn hiôk hian kơ lu bơngai jum dăr buŏl, păng kŭm krao khan kơ teh đak păng dêh char lu bơ̆n lăm jơhnơr hơnat hơnot anâu. Apĭnh Kră Yang tơgŭm buŏl đei ‘bĕnh blai kơ tơdrong hiôk hian đơ̆ng Kră Yang, yua kơ tơdrong ‘noh na buŏl gơh ră roi kơ lơ bơngai nai dơ̆ng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.