Sơ̆p hla bơar nơ̆r ‘Bok Kei-Dei đei chih kơplah năr Kră Yang Yêsu jur, đei lơ bơngai chă wă tơ‘bơ̆p Sư păng kơ kuh kơ ‘Bok Dŏng Pơklaih. Kơplah đei tơ‘bơ̆p Kră Yang, jơhngơ̆m lu sư ‘bĕnh blai tơdrong hiôk chơt păng hiôk hian mă lu sư tim mă đei ‘bôh. Năr anâu, buŏl hăm ‘maih wă kơ gơh iŏk tơdrong hiôk chơt anei ưh?

Năr anâu, năr 09/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Emily L. Pippin hăm kơ̆l ‘bai JƠHNGƠ̆M HIÔK HƠMĔNG.

“Linh jang ‘lơ̆ng khan kơ lu sư: “Iĕm ‘nĕ kơ hli, yua kơ inh wă roi kơ iĕm tơdrong ‘lơ̆ng, tơdrong mă đĭ-đăng kon bơngai ‘nă hal. ‘Măng ‘nâu tơ pơlei Đawit, đe tơpŭ kơ minh ‘nu ‘Bok Dŏng Pơklaih, ‘Bok Kră Yang, Krist.” (Luka 2:10-11)

Nhen thoi lơ hnam dơnŏ lăm bơyan Nôel, hnam dơnŏ lu nhôn kŭm đei mơ‘nah đơ̆ng sơ̆ gĭt kăl wă sơng iŏk jơnăr phĕt anâu. Kon drŏnglo ‘lơ̆p hơnăn Grep lu nhôn đei tơdrong hơgei gơh pơm păng lơ tơdrong tơchĕng pơwao; yua kơ thoi noh, mưh lăm pơge Nôel rim hơnăm, kơplah lu nhôn ngôi hơdai lăm hơnih sơng tơmoi pah ‘long hơngo, gô đei tŏ sĕt tơmam ăn đĕch mă bơngai ‘lơ̆p amăn ăn kơ mĭnh anu lăm hnam dơnŏ păng đei pơm mĭnh tơdrong chă tơmam gĭt. Tơdrong pơm hơ iă noh pơm kơ phĕt Nôel jing jơnăr mă hnam dơnŏ lu nhôn chang gô.

Lăm kơdŭng tơmam ăn blŭng a đei pơih, gô đei mĭnh tơdrong tơ‘bôh hăm nơ̆r pơđơ̆k, păng bơngai pơngôi gô năm tơ mĭnh hơnih hơyơ lăm hnam wă chă tơdrong tơ ‘bôh mă ‘bar, kŭm dai hăm nơ̆r pơđơ̆k. Kŭm thoi noh, bơngai ‘noh athei năm hlôi kơ puăn truh tơ pơđăm hơnih pha ra băl. Anih tơluch gô ba bơngai pơngôi brok tơ hơnih đêl hơoei, hơnih mă đei mĭnh tơmam ăn đei hơmet pơ‘lơ̆ng. Hơ oei tŏk bŏk đĭ đăng bơngai lăm hnam dơnŏ, bơngai ‘noh gô pơih tơmam ăn lăng noh tơmam kiơ. Đơ̆ng rŏng kơ đĭ đăng, tơdrong hiôk chơt ‘noh lăp đei pơih tơmam!

Tơdrong pơchơt iĕ anâu tơ‘blŏk kơ lu nhôn gah tơdrong lăm năr Nôel blŭng a, năr Kră Yang ‘Bok Kei-Dei ăn kơ kon bơngai mĭnh tơmam ăn đĕch gĭt kăl, ‘noh ‘Bok Dŏng Pơklaih Kră Yang Yêsu. Păng nơ̆r pơkă wă ăn Yang Mêsi đei roi tơbăt đơ̆ng lu bơngai khan lê̆ hơdrol mă ‘Bok Kei-Dei đei rơih iŏk.

Blŭng a, hnam dơnŏ Yôsep păng Mari chă ‘bôh mĭnh hnam bĭch wă bĭch tơnoh mă lei đei roi hơnih noh ưh pă đei hơnih bĭch bơih, dĭng măr sư năm tơ hơdrong rơmo wă pơdơh. Đơ̆ng noh, băt kơ jơ năr tơpŭ sư wă jê̆ bơih, Mari hăm klo sư Yôsep hơmet hơnih kơ kon nghe Yêsu, Sư bơih kon ‘Bok Kei-Dei, tơ‘bĭch kơpal anhĕt kro lăm war rơmo.

Tơdrong pơtrơp gô truh hăm lu bơngai wei triu, păng “Minh ‘nu linh jang ‘lơ̆ng Kră Yang năm tơ‘bôh kơ lu sư. Tơdrong mơsêh mơyang pơchrang hơdah tăp dăr kơ lu sư. Lu sư hli tơtey.” (Luka 2:9). Đơ̆ng lu linh jang, lu sư băt ‘Bok Dŏng Pơklaih tơpŭ tơ Betlehem: “Linh jang ‘lơ̆ng khan kơ lu sư: “Iĕm ‘nĕ kơ hli, yua kơ inh wă roi kơ iĕm tơdrong ‘lơ̆ng, tơdrong mă đĭ-đăng kon bơngai ‘nă hal. ‘Măng ‘nâu tơ pơlei Đawit, đe tơpŭ kơ minh ‘nu ‘Bok Dŏng Pơklaih, ‘Bok Kră Yang, Krist.” (Luka 2:10-11)

Tuch luch, lu sư đei ‘bôh: “Tơdrong ‘nâu wă tơbăt kơ iĕm chă Sư: Iĕm gô ‘bôh minh ‘nu kon nge tơsu khăn, tơ’bĭch kơpal ‘nhĕt kro lăm war rơmo.” (Luka 2:12) Lu bơngai wei triu ‘bôh blư bla linh jang ‘lơ̆ng hơri bơnê kơ Kră Yang ‘Bok Kei-Dei, Tơ‘ngla ăn tơdrong dŏng pơklaih, anoh: “’“Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)

Kŭm thoi hnam dơnŏ lu nhôn đei ‘maih chă tơdrong tơ‘bôh pơtrơp dơ̆ng kơplah iŏk lu tơdrong tơ‘bôh lăm tơdrong pơchơt, na lu bơngai wei triu kŭm lei lăi. Đơ̆ng rŏng kơ ‘bôh lu tơdrong tơbăt, lăm tơdrong hiôk chơt dêh, lu sư hăt hot năm chă tơ Betlehem, yua kơ hơpơi wă kơ ‘bôh tơmam ăn đĕch mă linh jang đei roi tơbăt.
Đơ̆ng rŏng kơ đĭ đăng tơdrong noh, tơluch tơmam ăn đĕch noh kŭm đei pơih, Kră Yang Yêsu đei jur tơ teh đak! Tơdrong hơmĕng kơ mĭnh ‘nu ‘Bok Dŏng Pơklaih dang ei kŭm đei tơl tơwih lăm tơdrong hiôk lăm jơhngơ̆m păng iŏk tơdrong hơ đơ̆ng.

Lu bơngai wei triu đei năm kiơ̆ đơ̆ng lu linh jang tơ‘bôh, păng lu sư đei tơ‘bơ̆p Kră Yang Yêsu hăm mĕ Sư, kơkuh kơ Sư lăm tơdrong hlĭch hlăch păng pơyom hli kơkuh.

Phĕt Nôel blŭng a mă lu bơngai wei triu đei hơdai ‘noh lăm hơdrong rơmo, mă lei lu sư đei khơ̆k lăm jơhngơ̆m păng Ư-ang kơ Kră Yang ‘Bok Kei-Dei yua kơ tơ noh lu sư đei tơ‘bơ̆p ‘Bok Dŏng Pơklaih. Đĭ đăng lu bơngai ‘noh ưh kơ hiôk yua kơ hơnih ‘noh, hơnih jum dăr kơ lu sư , mă lei đei tơdrong hiôk yua kơ đei tơ‘bơ̆p, đei sơng iŏk Tơ‘ngla đei tơdrong hiôk chơt tih đơ̆ng plĕnh. Na lei, lăm tơdrong sơng iŏk, hiôk chơt, păng hiôk lăm jơhngơ̆m, lu sư băt kơ tơdrong chă ‘bôh Kră Yang Yêsu kăl tơpă, truh tơ kơplah lu sư brŏk, lu sư ưh kơ gơh ưh kơ “ Bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh tơdrong noh lei-lăi thoi linh jang ‘lơ̆ng đei khan kơ lu sư.” (Luka 2:20).

Hơnăm anâu, athei pơm kơ bơyan Nôel lăm buŏl jing ‘blŏk tơpă păng ‘bĕnh blai tơdrong hiôk chơt hăm tơdrong ră roi gah tơmam đơ̆ng Kră Yang ‘Bok Kei-Dei đei ăn kơ lu bơ̆n. Nhen lu bơngai wei triu lăm năr Nô el blŭng a, lu bơ̆n athei năm mă hrĕnh chă ‘Bok Dŏng Pơklaih, wă kơ gơh tơ‘bơ̆p Sư, kơkuh păng amêm kơ Sư. Kơplah ‘noh, jơhngơ̆m lu bơ̆n đei ‘bĕnh blai hiôk chơt păng hiôk lăm jơhngơ̆m, huei kơ mơlâu ră roi tơdrong ‘nao ‘lơ̆ng đei ăn.

Apinh đĭ đăng krao khan hơdai:
Bơnê kơ Kră Yang yua kơ jơhngơ̆m kon đei ‘bĕnh blai hiôk chơt lăm Nôel đơ̆ng Ih. Apĭnh jơhngơ̆m kon hiôk chơt, ‘bơ̆r kon pơma, jơ̆ng kon nơnăm hrĕnh wă ră roi tơdrong ‘nao ‘lơ̆ng thoi lu bơngai wei triu hmă đĕch sơ̆. Kon kơkuh krao khan lăm Anăn Kră Yang Yêsu Krist, A-men.

Ơ lu bơngai mơ̆ng, mĭnh jơhnơr anao kơ tơdrong hiôk chơt, hơmĕng, păng hiôk hian đei pơih bơih kơplah ‘Bok Dŏng Pơklaih Kră Yang Yêsu jur tơ teh đak. Lu bơngai wei triu sơ̆ đei jơhngơ̆m hiôk kơ tơdrong hơpơi wă yua kơ đơ̆ng ‘Bok Mêsi jur, lu sư ư-ang păng ră roi tơdrong ‘nao ‘lơ̆ng dŏng pơklaih. Nôel ‘nâu bơih jơ‘năr păng jơ wă kơ lu bơngai mơ̆ng tơl tơwih hăm tơdrong Dŏng Pơklaih đơ̆ng Kră Yang. Athei ră roi păng krao hơpơi lu bơngai jum dăr năm tơ Kră Yang wă kơ lu sư kŭm đei tơdrong hiôk chơt tih lăm bơyan Nôel anâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.