Tej zaum koj twb hnov dhau lo lus nto npe lug tias: “Lub neej no yeej ib txwm tsis ncaj ncees, thiab koj yuav tau xyaum ua lub neej kom swm rau qhov no”. Peb lees txais zuj zus zoo li ib qhov uas nws yuav tsum muaj. Tiamsis hais tiag mas, thaum saib rau lub neej zoo lossis tej uas lwm tus ua tau ib vuag ntawd, peb lub siab no yeej tswj tsis tau txoj kev tub qaug rau yus tus kheej thiab chim rau tus kheej. Peb yooj yim xav tias Vajtswv tab tom tsis hlub peb, Vajtswv hlub lwm tus ntau dua hlub peb. Tiamsis phooj ywg, vim li cas koj ho muab tus tshim ntsuas ncaj ncees hauv ntiajteb no los ntsuas Vajtswv txoj kev hlub – tus uas tsis muaj ib zaum twg tuaj yuav muab sawv daws los sib piv li?

Hnub no, yog hnub 16/08/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Angela Mays dhau ntawm Zaj kawm PUAS YOG LUB NEEJ YEEJ TSIS NCAJ NCEES?

“Tus Tswv yog tus muaj kev hlub thiab hmov tshua, nws tsis chim sai thiab nws muaj txojkev hlub uas tsis paub kawg. Nws ua zoo rau txhua tus thiab nws hlub ib puas tsav yam uas nws tsim (Ntawv Nkauj 145:8-9)

Kuv loj hlob rau ib cheeb tsam txomnyem, tej hnub ntawd yog ib lub caij uas txomnyem tshaj rau tsev neeg. Kuv txiv ua txhua txoj haujlwm, tshuav niam nyob hauv tsev ua zaub ua mov. Saib txiv rau siab ntso ua haujlwm tu peb cov kwv tij loj hlob, kuv tsis hmov tshua kuv tseem npau taws. Tej lub sijhawm uas muaj tsis txaus vij puas ncig, kuv ris lub nra nyhav heev hauv siab muaj kev iab siab thiab cim civ nug vim li cas Vajtswv ho hnov qab kuv. Kuv tseem yws Vajtswv tias vim li cas Vajtswv ho tsis ncaj ncees rau kuv, cia kuv tsev neeg tiv kev txomnyem dua luag lwm tus.

Yim xav, kuv yim pom yus tej kev xav txog Vajtswv tsis zoo kiag li. Kuv xav tias Vajtswv muaj qhov uas saib lwm tus tseem ceeb dua, Vajtswv hlub thiab tu lwm tus ntau dua li uas Vajtswv yuav nco txog kuv thiab kuv tsev neeg. Saib mus saib los, pom luag lwm tus muaj txaus, kuv rov qab nug vim li cas yus lub neej ho muaj tsis xws li luag. Kuv ntseeg tias Vajtswv saib ntsej muag, ntau zaug tseem saib taus tus no ntxub tus tod, thiab Vajtswv txoj kev hlub pub rau kuv tej zaum tsawg dua li uas Vajtswv hlub lwm tus. Twb yog tej kev xav no thawb kuv poob mus rau qhov tob tshaj plaws hauv sab ntsujplig, qhov chaw txaj muag, tub qaug, chim rau Vajtswv pib rhau cag thaum twg kuv twb tsis paub.

Txog rau thaum loj hlob, kuv thiaj muaj sijhawm mus tshaj tawm ib zaug nyob rau Haiti. Zaum saum tsheb mus dhau tej zej zos, kuv lub qhov muag ntsia pom cov pej xeem nyob ntawm no, kuv lub siab hmov tshua heev. Muaj tej yim lawv ua neej nyob hauv tej lub nyuag phooj muab quav nyab vov lossis muab tej ntoo tsis ruaj los txheem ua ncej, yeej tsis muaj ib lub tsev ruaj khov li. Ntau tus lawv yuav tau lam txheem ib nyuag qhov chaw pw hauv hav zoov. Kuv quaj heev rau lub sijhawm ntawd. Kuv cuag li tau ua rau ras dheev, mob siab heev, tiamsis kuj pom txog Vajtswv txoj kev hlub raws li txoj kev uas yav dhau los kuv tsis tau pom dua. Saib txoj kev txomnyem ntawd, kuv pom tias ntev loo los no yus tau tu ib txoj kev xav tsis zoo, tej kev xav raug muab khi cia nrog txoj kev sib piv thiab tsis nco Vajtswv tshav ntuj.

Txoj kev mus tshaj tawm zaum no ua rau kuv nkag siab qhov tseeb tias, yeej muaj cov neeg tiv kev txomnyem tshaj yus ntau npaug. Vajtswv hlub cov pej xeem nyob rau tebchaws Haiti ntawd yeej tsis txawv li qhov uas Vajtswv hlub kuv. Thaum kuv saib kuv lub neej dhau los, kuv pom tias kuv yuam kev loj heev thaum pheej muab tus kheej mus sib piv nrog lwm tus hnov qab tias kuv tsev neeg txais tau ntau txoj kev hlub heev los ntawm Vajtswv los. Tseeb tiag, nyob rau ntawm tej kev ua neej uas kuv tau ntsia pom nyob ntawm Haiti, kuv tsev neeg twb muaj ntau tshaj tej uas kuv cheem tsum lawm.

Vajtswv niaj hnub nthuav tawm Vajtswv txoj kev ncaj ncees nyob rau txhua lub caijnyoog. Kuv txoj kev xav txog Vajtswv tau hloov pauv tas nrho rau lub sijhawm kuv tau mus ntawd. Thaum uas loj hlob zog hauv kev ntseeg, kuv nkag siab tias Vajtswv yeej tsis xaiv leej twg ntsej muag, tiamsis Vajtswv txaus siab rau cov neeg uas ntseeg Vajtswv. Kuv nco ntsoov txog cov neeg uas lub ntsej muag luag ntxhi nyob rau ntawm Haiti ntawd: txawm yog lawv txomnyem sab nqaij tawv los, lawv muaj kev zoo siab vim lawv ib leeg muaj ib leeg, lawv sib hlub. Khoom ntiajteb yeej ua tsis tau rau kom ib tsev neeg sib hlub, twb yog vim kev hlub kev koom ua ib lub siab thiaj yog qhov uas tsim muaj tej ntawd. Txawm yog kuv tsev neeg thaum ub los kuj tsis muaj ntau, peb yeej muaj kev sib hlub ntau, ntawm no yog tej khoom muaj nqis uas kuv tau hnov qab lawm.

Tiamsis koj puas paub, Vajtswv tsis hu kom kuv siv lwm tus txoj kev mob los ua “tshuaj kho kuv” txoj kev tub qaug rau tus kheej. Tiamsis Vajtswv pab kuv pom tias: qhov uas kuv muaj nqis thiab txoj kev uas Vajtswv tu kuv yeej suav tsis tau los ntawm tej khoom ntiajteb, kuj tsis yog vim kuv muaj ntau dua lossis tsawg dua lwm tus. Saib cov pej xeem nyob hauv Haiti, txawm yog lawv muaj tsis txaus txhua yam los lawv yeej ua neej zoo siab hlo, kuv thiaj nkag siab tias Vajtswv txoj kev hlub thiaj muaj nplua mias yeej tsis yog nyob ntawm ib lub caijnyoog twg.

Kuv pom tias kuv yuam kev loj heev thaum uas pheej rau siab ntso muab lwm tus los ntsuas yus tej koob hmoov. Kuv tau txaus siab thaum uas pom tias tsuas muaj Tswv Yexus xwb txaus lawm! Txawm yog yuav muaj nplua mias lossis txomnyem los, Yexus Khetos yeej ib txwm ncaj ncees. Txawm yog kuv tsev neeg lossis cov pej xeem nyob hauv Haiti los yog, tag nrho peb puav leej tau txais Vajtswv txoj kev hlub zoo kawg nkaus. Thaum muab yus lub qhov muag tso rau ntawm Yexus Khetos. Kuv thiaj tsis muab tus kheej piv rau lwm tus, thiaj tsis yws, thiab pib luj txoj kev nco Vajtswv tshav ntuj thiab Vajtswv txoj kev tshwm ntsej muag hauv kuv lub neej.

Nyob hauv Filipis 4:8, Vajtswv tej lus sau: “Cov kwvtij, kuv thov xaus Ius li no hais tias nej yuav tsum cim ntsoov tej uas zoo thiab tsimnyog qhuas rau hauv nej lub siab: tsis hais tej uas tseeb, tej uas tsimnyog hwm, tej uas ncaj ncees, tej uas dawbhuv, tej uas ntxim nyiam thiab tej uas yuav tau koob meej, nej yuav tsum khaws tej ntawd cia rau hauv nej lub siab huv tibsi”.

Thaum peb xav txog tej yam zoo uas Vajtswv tau ua, Vajtswv txoj kev zoo siab yuav ntws lug hauv peb lub siab, thiab tej lus ua tsaug yuav ntws lug ntawm peb lub qhov ncauj. Thaum ntawd, Vajtswv txoj kev kaj siab yuav kav peb tus ntsujplig. Txhua zaug uas tej kev xav tsis yog tawm tsam koj lub hlwb, cia li nyeem II Kauleethaus 10:3-5 kom “…peb cern tej neeg uas qhia tsis tseeb kom lawv tsis muaj lus hais. Peb rhuav tej uas neeg muab los thaiv tsis pub sawvdaws paub Vajtswv. Thiab peb coj cov neeg uas ua yeebncuab rau Vajtswv los mloog Yexus Khetos lus” (nqe 5).

Peb tab tom ua neej nyob rau ntsus kev tsov rog ntawm sab ntsujplig, thiab dab ntxwgnyoog niaj hnub nrhiav kev tseb rau hauv peb lub siab kev ua xyem xyav, sib khib, tsis txaus siab. tiamsis yuav tau thov Vaj Ntsujplig ntxiv zog, tuav peb lub hlwb kom tau hloov dua tshiab, thiab muaj kev hwm Vajtswv. Nco ntsoov tias yeeb ncuab twb raug muab ntaus xwb lawm, yog li peb tsis tas yuav muaj dabtsi cim civ ua kom yus txomnyem los ntawm muab yus piv rau lwm tus. Vim Vajtswv yog tus zoo rau tag nrho peb txhua tus, thiab Vajtswv xav muab yam uas zoo tshaj plaws rau Vajtswv cov menyuam. Yuav tau xyaum muab tej kev xav tsis zoo ntawd pov tseg, thiab kawm saib txhua yam raws li Vajtswv lub siab nyiam. Thaum ua tau li no lawm, peb thiaj pib ua lub neej tsimnyog thaum uas yog Vajtswv cov menyuam tiag.

Thov caw nrog kuv peb thov Vajtswv ua ke: Tus Tswv! Ua koj tsaug vim hnub no kuv muaj sijhawm nres rov qab mus saib txhua tsav yam ntxhov nyho hauv kuv lub hlwb. Thov Vajtswv zam txim rau kuv vim tej hnub dhau los kuv tau ua xyem xyav rau koj txoj kev hlub, vim kuv tau suav koj tej koob hmoov los ntawm ntiajteb tus tshim ntsuas, hnov qab tias kuv tab tom muaj yam uas muaj nqis tshaj, ntawd yog Vajtswv txoj kev tshwm ntsej muag. Thov Vajtswv pab kuv saib txhua yam los ntawm ib tug menyuam nco koj tshav ntuj, ntseeg siab rau Txiv lub homphiaj zoo. Kuv thov hauv Tswv Yexus Khetos lub npe, Amees.

Cov kwv tij, yog Vajtswv ib tug menyuam, peb tau caw los kom muaj lub siab zoo li Yexus Khetos lub. Pauv qhov uas saib lub neej dhau los ntawm txoj kev muaj tsis txaus lossis pheeej sib ntxub, peb yuav tau xyaum saib txhua yam raws li lub qhov muag nco Vajtswv tshav ntuj thiab ntseeg Vajtswv lub homphiaj. Thaum yeebncuab tuaj ntxeev ntxias kom peb muab yus piv rau lwm tus, thiab tseb tej kev xav tsis zoo tias Vajtswv tsis tshua txog peb lossis tsis mloog koj, cia li pib nco txog Vajtswv txoj kev hlub tau pub rau koj thiab tsa suab qhuas Vajtswv. Thaum ntawd, Vajtswv tus dua ci yuav ci tuaj, rhuav tshem tej qhov tsaus ntuj hauv siab tawm, thiab koj yuav ntsia pom Vajtswv lub tshwmchim tshwm hauv koj lub sijhawm thaum ntawd.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.