Kơplah oei lăm dôm lu năr đei tơdrong gleh dah lăm tơdrong pơlong lăng, lu bơ̆n juăt kơ pơma jŏk păng apĭnh kơdih: “Kră Yang ơi, Ih tơyơ?” Kơplah oei hơdrô̆ dah pơmat tat, lu bơ̆n mơn ‘bôh nhen Kră Yang ưh kơ oei hơdai, nhen thoi Kră Yang ưh kơ tơ̆ng nơ̆r bơ̆n krao khan. Mă lei tơpă hăm thoi noh ưh? Dah kơdih lu bơ̆n ‘mơ̆i mă bơngai ataih đơ̆ng Sư?

Năr ‘nâu, ‘năr 12/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao Nơ̆r Kră Yang păng ‘bơngai chih Aaron Bull kơ̆l ‘bai KRĂ YANG ƠI, IH TƠYƠ?

“Kră Yang bơih gô năm adrol kơ ih, Sư gô oei hơdai hăm ih păng Sư ưh kơ achăng lê̆ ih, kư̆m ưh kơ weh ataih đơ̆ng ih. Ih ‘nĕ kơ hli păng ‘nĕ kơ rơdu jơhngơ̆m.” (Bơtho Khôi Juăt 31 :8)

“Kră Yang ơi, Ih oei tơyơ?” Ưh kơ băt inh đei apĭnh nơ̆r ‘nâu dôm yơ wơ̆t bơih? Mă lei jơ’nâu pha biơ̆, yua kơ inh đei băt tơpă kơ nơ̆r tơl ‘nâu:

Brei mơsơ̆, tơlei hoan kŭl tăng inh kơtĕch na raih hơmet ming tơlei hoan noh. Kơplah kơtơ̆ng ‘bok pơgang khan kơ inh kăl kơ raih păng 6 khei ‘mơ̆i klaih na gơh wơ̆t kơdâu, pơngôi đă ‘bơlŏng, jrot tang wang dah tŏk tơkông, inh mơn nhen thoi kơdih ‘nao iŏk minh tơdrong phak đĭ chăl arih.

Inh bơih mĭnh ‘nu bơngai đei jơhngơ̆m. Yua kơ thoi noh, kơplah inh băt kơ kơdih gô ưh kơ gơh pơm dôm lu tơdrong inh ‘maih wă đunh khei ‘năr, inh đei ơh dêh. Đơ̆ng rŏng kơ lĕch đak măt, krao khan păng đei hnam dơnŏ hăm bôl buăl pơlung, inh mơn băt dôm tơdrong huei kơ mah dêh hnang mơ̆n. ‘Nâu ưh kơ trŏ mĭnh tơdrong jĭ ưh kơ gơh hơmet, kŭm ưh kơ trŏ mĭnh tơdrong phak lôch; ‘noh lăp mĭnh tơdrong raih juăt kơ đei. Lei na inh pơdrơ̆ng ưh kơ pơm hloh hnang dơ̆ng.

Inh kơ tĕch tơlei hoan jơ̆ng hơnăp lăm mĭnh wơ̆t đă ‘bơlŏng pơchơt lăm gơsơ̆ Năr pơh. Kơplah oei tơgar ‘bơlŏng, inh juă hơlŭng, dah dan jơ̆ng ưh kơ trŏ lăp. Kơplah đei tơdrong jĭ truh, inh ‘bôh tơm măt, na kơtơ̆ng hơđăl dôm tơdrong krưp dêh. Tơpă, jơ’noh ưh kơ hiôk, na inh ưh kơ đei roi hơđăl ‘bơ̆t dâu.

Tơdrong raih đei keh ‘lơ̆ng. Kơplah inh hơdơ̆r, jơ̆ng gah ‘ma inh đei chô̆ mĭnh dơnơ̆ng lăm ‘long chơkăl kŭl tăng, păng jum dăr nhen oei dăr. Ưh kơ hiôk, mă lei inh băt kơ tơdrong ‘noh kăl.

Akăn inh ngôi ‘bơ̆t cheng pơma pơlung inh kơplah inh hơdơ̆r. Đơ̆ng rŏng kơ ‘noh, sư huơ̆r gre chơ inh brŏk tơhnam. Inh ‘măn năr wă đĭ lăm gyĕng ‘bĭch kơtă, hơdrin ưh kơ blĕk yua kơ pơ̆n jơ̆ng păng tơ grŏl prĕl hơnơ̆ng tơ kŭl tăng. Wă kơ buăl ‘bônh kơ hlôh, inh bơih bơngai ngôi mĭnh ‘bôt kơplah sŏng sa dah tep. Oei pă, lăm jơ nai inh kŭm chơ chă tơdrong kiơ ‘noh wă kơ jang. Hơbŏ inh lăm khŭl bơngai “đei jơhngơ̆m”? Hơbŏ trŏ tơpă.

Akăn inh ling lang chă tơdrong wă kơ inh hrăt hrot rim jơ. Inh đei sŏng sa tôm mah, ngôi chơt, păng đei wei rong ‘lơ̆ng. Mơ̆ng nhen thoi wei rong sem dơrong trŏ ưh? Pĭnh tơdrong mơnat, mă lei trŏ kơ akăn inh đei pơm ‘lơ̆ng trŏ tơdrong jang sư, păng inh pŭn tơpă kơplah đei akăn inh hơdai.

Na truh năr mônh, akăn inh kăl kơ năm jang. Inh tơhnam mĭnh drô̆, wă jê̆ klaih đơ̆ng jĭ na kŭm jang hloi đơ̆ng hơtaih yua kơ ưh kơ gơh năm tơ hơnih jang. Inh oei chĕp ‘long jra păng tah ‘long chô̆ wă kơ mĭnh dơnơ̆ng kŭl tăng . Tơdah buăl tim mă băt, ‘long chô̆ wă kơ mĭnh dơnơ̆ng ‘noh loăi kep kơ jung đơ̆ng kơnơl jơ̆ng truh tơblu, pơm kơ buăl ưh kơ gơh pơpơ̆ kŭl tăng. Nơ năm ‘bih ‘noh trŏ kơ ưh kơ ‘bônh, mă lei kŭm huei kơ ưh kơ gơh.

Pơge năr ‘noh, akăn păng kon drŏnglo inh ‘nao lĕch đơ̆ng hnam wă năm jang păng năm hŏk, na inh wă tơglơ̆m hăm mĭnh năr plơ̆ng. Đơ̆ng rŏng dôm wơ̆t hơdrin pai sa pơge, inh nhen mơn dui jơhngơ̆m hơnat păng blĕk, păng ưh kơ băt pơm liơ wă kơ adrin hơmet tơdrong ‘nâu. Trŏ kơ pơma đei đunh ‘mơ̆i ‘nao đei tơdrong pơm kơ inh ưh kĕ chơ̆n, yua kơ inh bơngai kĕ chơ̆n jơhngơ̆m mă lăm tơdrong truh tih dah tơsŭl tơwŏk. Thoi noh, ‘nâu trŏ kơ mĭnh tơdrong pơlong lăng tih hăm inh. Ưh kơ sĭ hơnat lăm tơdrong nơnăm lăm hnam gŏ, inh oei đei juă ‘bơm lơ tơmam, păng trŏ bơih, tơdrong jĭ tŏk tơ kŭl tăng pơm kơ inh đei hơ’nhĭu kơ măt.

Kơplah oei tơglơ̆m hăm tơdrong jĭ păng hơdrin chơ̆n kơ jơhngơ̆m blĕk, inh đei ôr re: “Kră Yang ơi, Ih tơyơ?” Păng đơ̆ng rŏng kơ ‘noh, inh mơn đei nơ̆r pơma lăm jơhngơ̆m, nhen nơ̆r Kră Yang đei tơl: “Kon pơma kiơ hei? Inh oei ‘bơ̆t dâu ling lang khan. Na kon, kon oei tơyơ?”

Tơdrong pơma athei ‘noh nhen thoi tap tơ muh măt inh. Kơplah ‘noh hloi, inh đei apĭnh kơdih: “Inh oei tơyơ?” Inh đei hrăt hrot wă kơ bơngai nai wei lăng inh, păng kŭm bơngơ̆t tơchĕng lăng kơdih gô pơm thoi yơ kơplah ưh kơ gơh kơdâu jơ̆ng hoh dah pơngôi đă ‘bơlŏng. Inh hiơ̆k bơngơ̆t kơ ning mônh kơplah jơ̆ng inh gô nơnăm djưl khư̆i lăm dôm khei tơ hơnăp. Mă lei kơplah inh kăl kơ arih hiơ̆ biơ̆, inh hăm đei ‘măn jơ’năr kơ Kră Yang ưh? ‘Nâu bơih jơ’năr ‘lơ̆ng rŏ wă kơ inh krao khan păng ma dơnuh hăm Kră Yang lơ hloh, mă lei inh hăm đei pơm thoi noh ưh? Ưh! Inh đei hrăt hrot hăm dôm lu tơdrong hiơ̆k bơngơ̆t păng hơmet kơdih inh. Buăl hăm ‘bôh tơdrong ‘noh juăt ưh?

Tơdrong ‘maih hiĕk ‘bơ̆t dâu ‘noh, inh đei kiơ̆ Kră Yang nhen thoi đĭ chăl arih inh. Sư đei bơtho inh năm hlôi kơ lơ tơdrong pơlong lăng. Mă lei kơplah năm hlôi kơ mĭnh tơdrong anat hơyơ, inh kŭm đei ‘maih hiĕk yua kơ inh kơwao dêh: yua kơ inh đei ưh kơ ngeh kơ Sư. Pă mĭnh wơ̆t dơ̆ng, inh wă dôm lu tơdrong hơmet đơ̆ng kơdih pơgăn tơdrong hơmet đơ̆ng Sư, tơdrong bơtho tơ’bôh đơ̆ng Kră Yang păng dôm lu tơdrong pŭn hiôk Sư ‘măn kơ inh. Inh hăm arăng kơ̆l ưh? Tơpă ‘noh đei!
Sơ̆p hla bơar ‘Bok Kei-Dei đei ba ăn lơ nơ̆r tơl kơ nơ̆r apĭnh mă inh đei tơlĕch: “Kră Yang ơi, Ih tơyơ?” Tơ ala ‘nâu bơih ‘bar nơ̆r tơl lăm hla ar Bơtho Khôi Juăt:

“Kră Yang bơih gô năm adrol kơ ih, Sư gô oei hơdai hăm ih păng Sư ưh kơ achăng lê̆ ih, kư̆m ưh kơ weh ataih đơ̆ng ih. Ih ‘nĕ kơ hli păng ‘nĕ kơ rơdu jơhngơ̆m.” (Bơtho Khôi Juăt 31 :8)

“Athei nuih pran kơtang bĕ. ‘Nĕ kơ hli tơrơ krưp dêh ‘bơ̆t anăp lu kon pơlei noh yua kơ Kră Yang ‘Bok Kei-Dei iĕm kư̆m gô năm hơdai hăm iĕm; Sư ưh kơ đei layơ achăng lê̆ iĕm kư̆m ưh kơ weh ataih đơ̆ng iĕm.” (Bơtho Khôi Juăt 31:6)

Hăm đei nơ̆r tơl hơyơ hơđăl hloh dơ̆ng ưh? Inh đei hŏk iŏk ‘noh, kơplah ‘maih wă kơnhăm kơ mĭnh tơdrong hơyơ, bơngai chih gô đei pơlơ̆k dơ̆ng pơlơ̆k dơ̆ng tơdrong ‘noh. Păng inh băt kơnăl tơpă ‘nâu trŏ bơih tơdrong mă Kră Yang wă kơ lu bơ̆n lăng. Inh đei chă ‘bôh tơdrong pơlung lăm tơdrong tơhlôh ‘noh lơ wơ̆t, păng hơpơi kơ buăl kŭm thoi ei.

Apinh đĭ đăng krao khan hơdai:
Kơ kuh kơ Kră Yang mă ‘mêm kơ kon, kon bơnê kơ Kră Yang yua kơ tơdrong ‘mêm păng Ih oei hơdai kon. Kon bơnê kơ Ih yua kơ Ih ưh kơ layơ achăng kon, mă kơplah oei lăm hơnat hơnot dah kơplah kon mơn kơ Ih nhen hơtaih. Apĭnh tơgŭm kon băt kơnăl kơ Ih ling lang oei hơdai, chông anhăk păng bơwei kon, mă khan kơplah kon ưh kơ mơn. Apĭnh ăn kơ kon jơhngơ̆m rơhing chă Ih ưh kơ sĭ lăp kơplah tơ’bơ̆p anat mă lăm rim jơphŭt lăm chăl arih kon. Kon kŭp kơ̆l krao khan lăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, dôm lu năr hlôi bơih, lu bơ̆n đei dôm wơ̆t apĭnh Kră Yang “Ih oei tơyơ? Đơ̆ng rŏng kơ ‘bai Amăn Jơ Krao Khan năr ‘nâu, mưh kơplah tơ’bơ̆p hăm dôm tơdrong hơnat hơnot, hơdrô̆, ataih đơ̆ng Kră Yang, lei hơdrol hloh lu bơ̆n athei apĭnh kơdih: “Kră Yang ơi, tơpă kon oei tơyơ?” Athei ‘blŏk ‘noh Kră Yang ling lang oei hơdai, wă chông anhăk lu bơ̆n hlôi kơ dôm tơdrong anat, dôm jơnăr măng mu, ưh kơ băt wă pơm thoi yơ. Nơ̆r apĭnh kăl hloi dang ei ‘noh: Lei lu bơ̆n oei tơyơ lăm tơdrong tơ’bưh hăm Kră Yang? Păng lei bơ̆n hăm wă hơchăng dôm lu tơchĕng kơdih kâu wă đĭ jơhngơ̆m năm tơ Kră Yang dah ưh? Athei iŏk Nơ̆r Kră Yang tơgŭm rim ‘nu lu bơ̆n năr ‘nâu gah tơdrong tơ’bôh đơ̆ng Kră Yang lăm pơhngol bơ̆n, athei chă apĭnh kiơ̆ kơ Kră Yang wă hơdrol, mơ̆ng nơ̆r pơma đơ̆ng Kră Yang hơdrol kơ năr plơ̆ng, wă kơ lu bơ̆n ling lang mơn kơ Kră Yang oei jê̆ lăm tơdrong arih bơ̆n, buăl hŏ!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.