Tòm ala tu bol glar hala gơlòng, bol he os yoăm mơ lùp is lah: “ Ơ Yàng, Kơnràn nting đah taih?” Tòm tu gơ kram tòm bơta ơm is hala kăl kê, bol he sền gơ lơh be Yàng ò gơs măt, gơ lơh be Kơnràn ò kơno iat jonau hòi dan he dê. Mơya ò git ngăn la be hơ sơl? Hala să tòm bòl he la cau neh ngai bơh Kơnràn?

Ngai do, ngai12/01/2025, tơnggu me hoi dan kòp ngai dăn ja ồng mò oh mi kơlôi sơnờng băl jơnau Yàng kơnòm di bơta dong kol Aaron Bull bơh tơng gu mê Ơ YÀNG, KƠNRÀN NTING ĐAH TAIH?

“Să tòm Yàng Jehôwa rơp lòt di đap bòl mê mơ rơp ơm băl mơ bol mê, Kơnràn rơp ò tu lơi săng bol mê hala loi bol mê ò. Băn rngòt; băn gơ p lơ nus.” (Yăl wol bơta bọh lăm 31:8)

“Ơ Yàng, Kơnràn nting đah taih?” Ò git añ neh lùp sèng do nđo dơ̆ rau? Mơya dơ̆ do gèn pha is, bơh añ ngăn neh dòp geh sèng hơ wơl.

Rềp do, añ păl lòt găn bơta reh lơh pa wơl ară bơrkăng mơđăp. Tòm tŭ kơnò cau gơnoăr sơnơm đơs lah añ păl reh mw roh 6 kơnhai nang geh pran wơl nàng rgơi pơnjat ntoat jơng, kơ-nhơl plai coh,coh rơndeh hala guh mơnơm, añ gơlơh be he dờp dô bơta lơh nền glài jam jơh rài.

Añ la dô nă cau jơh nus ngăc ngar. Bơh hơ̆, tŭ git lah he rơp ò rgơi lơh ală broă he kơñ tom dô pah tơngai jŏ jòng, añ kol nrơt kơnjơ̆. Tơnơ̆ mơ tŭ hòr dà măt, hoi dan mơ geh hiu nhă băl mơ ală gơp bơyô chồl pơn dờm, añ dờp git jơh ală broă ò tus kơnă lơi. Do ò di la ung thư, kung ò di la glài chơt; gơ ming là dô bơta reh be oă nơta gơlik ndai. Bơh hơ̆ tàng añ lơh nên ò lơh rlau tai.

Añ kòl gơtac chề ară bơrkăng mơ đăp tòm dô tŭ kơn-hơl plai coh tom ngai rlô. Tom tŭ tòm pit ai plai, añ neh jă di trồm taih, hala ơn jơng ò tơm toh. Tŭ neh gơtìp jơng gơlik, añ sền gŏ mơ mat tơm, mơ kơno dô ba loh lang kờp jơh ală bơta gơlik gơs, iơh rmơh. Ngăn , rùp sơñio hơ̆ ò buôn kong dô êt lơi, añ rơp ò yal loh lang ting do.

Bơta reh hơ̆ gơlik dô bă lơngai lơngò. Tom tŭ guh, jơng ma añ geh lơh nền crăp mơ khung di gơltăng, mơ jơh ală bơta gùt dăr gơlơh be gơpai. Ò niam dô êt lơi, mơya añ git bơta dò la păl càng.

Bau ùr añ ơm digah chồl pơn dòm tòm tŭ nrơt bơh sơnòm bic. Tơnơ̆ hơ̆, khai ăt rơndeh cng añ rê hìu. Añ ơn jơh poh nàng bic sơmpròng. Pơnđơl ò duh nùs tai bơh kol pùt jơng mơ ơn pliêr hơđăng gơltăng. Nang buôn ông mo oh mi in kơlôi, añ la dô nă cau ming rgơi nggui mŏ tŭ sa hala bĭc. Găm wơl, tŭ lơi añ kung pal joi broă lơi hơ̆ nàng lơh. Dilah gơlăn añ gơri mơ cau “pràn lơh”? Di gơlăn la tòm toh ngăn.

Bau ùr añ tŭ lơi kùng joi gùng añ in nang añ in oă broă. Añ geh sa ñô dô bă wil tơl, kơn-hơl chò hòp, mơ geh sền gàr wil tơl. Kơno gơlơh be sền gàr phăn ròng kơñ gơboh ngăn sơl? Dan toh glài, mơya ngăn la bàu ùr añ neh lơh niam rlau joeh ală gơnoăr broă he di, mơ añ ngăn geh bơtoah tŭ añ gơs bau ùr di gah.

Gen ngai dơ̆ bàr tus, bau ùr añ lòt lơh wơl. Añ ơm is tòm hiu, vừa geh pràn wơl vừa lơh broă bơh ngai bơh ò rgơi lòt tus hơ tiah lơh broă,. Añ găm jrà cơnờng mơ găm cèng khung crăp gơltăng. Dilah ông mo oh mi ò hìt git, khung lơh nền do la dô loại mơng kéo jòng bơt măt ka jơng tus hơđăng pơnô, lơh ông mo oh mi in ò rgơi lơng gơh gơltăng. Lòt bal mơ gơ ngăn là o buôn, mơya kùng ò di la ò rgơi.

Àng drim hơ̆, bau ùr mơ kòn klau añ lik bơh hiu nàng lòt lơh broă mơ lòt bơtê, ai añ gèn tom pơrlòng mơ dô ngai pa. Tơnơ̆ mơ nđò dơ̆ pơnđơl rcăng phăn sa drim, añ sơntòm gơlơh kălkê tă nhờm bơh sơ-ềt sơ-ềl mơ ò git lơh mbe lơi nang kơ̆ nùs lơh broă do. Pal đơs lah jŏ ngăn rau añ gơs broă gơlơh añ ĭn roh bơta kơ̆ dơn, bơh añ la dô nă cau kơ̆ dơn mơ tom tŭ gơs bơta căng thăng hala sơlồng sơlăng. Behơ̆ tàng, do ngăn la dô bơta gơlòng, dờng gơwèt mơ añ. Ò di mìng kalkê tòm tŭ lòt ri tòm tiah gơm sa, añ kung găm gơtìp jơng mơ broă ndai tai sơl, mơ os, bơta jề gơ guh tus hơ gơltăng lơh añ in păl krŭ măt.

Tòm tŭ tòm pơrlòng mơ bơta jề sồt mơ pơnđơl pran prap bơta gơjrañ, añ driau dơng lah: “ Ơ Yàng, Kơnràñ nting đah taih?” Mơ tơnơ̆ hơ̆, añ dòp git bơta gơchồl tòm nùs, be jơnau Yàng hơ wơl: “Kòn đơs ñchi lơi taih?” Añ sùm ơm ting do. Ai kòn, kòn găm ơm tiah lơi taih?”

Bơta gơchồl hơ̆ be dô bơta tơrpah di añ. Tŭ hơ̆ mơ añ lùp is: “Añ neh ơm tiah lơi taih?” Añ neh wă oă ngăn broă nàng cau ndai in sền gar he, mơ kùng oă broă nàng kơlồi sền he rơp lơh ñchi lơi tòm tŭ ò rgơi ntoat jơng hala kơnhơl plai coh. Añ kơlồi rcăng bơh rai tơnơ̆ mơ jơng añ păl bơtề lòt jơng rih, jơng liah tòm ală kơnhai hơđăp. Mơya tòm tŭ añ păl kơryăn kis ơlĕ- ơdàr wơl, añ neh lơi tŭ jơ Yàng in sơl? Do la tŭ lơmpah niam rlau jơh nàng añ in hòi dan mơ Kơnràñ oă rlau, mơya añ neh lơh behơ̆ sơl? Ò! Añ gơlơh wơl oă broă bơh ală bơta kơlồi rcăng mơ bơta rơndap is he di. Ông mò oh mi sền go bơta mòng sơl?

Bơta hac ting do hơ̆ la, añ neh jat Yàng mòr be jơh rài kis añ jê. Kơnràñ neh tề lăm añ lòt găn alak tơrman bơta gơlòng. Mơya kờp dơ̆ lòt gan bơta kalkê lơi hơ̆, añ pal ñŏ bơh he gơla: bơh añ pìn wil wơl bơh Kơnràñ. Dô dơ̆ tai, añ neh lơi ală tơnggu rơndap añ jê kơryăn tơnggu rơndăp Kơnràñ dê, bơta tề lăm Kơnràñ dê mơ ală bơta lơngai Kơnràñ ai añ in. Añ gơs kơdăng bồ sơl? Nền cê la gơs!

Sră goh cèng tus oă sèng hơ wơl ai ală sèng lùp mơ añ neh lùp: “Ơ Yàng, Kơnràñ nting đah taih?” Hơđơm do la bàr nơm sèng hơ wơl tòm sră Yăl Wơl Bơta Boh Lăm:

“Să tom Yàng Jehôwa rơp lot di đăp bol mê mơ rơp ơm băl mơ bol mê, Kơnràñ rop ò tŭ lơi săng lơi bol mê. Bañ rngòt, bañ gơplơ̆ nùs.” (Yăl Wơl 32:8)

“Lơh tĕ pràn kơldăng mơ khin chà. Bañ rngòt cŭ kìr tai bơh bol khai, bơh Jehôwa Yàng Tom Trồ bol mê dê lòt băl mơ bol mê, Kơnràñ rơp ò tŭ lơi sang bol mê hala lòi bol mê.” (Yal Wơl 31:6)

Gơs sèng hơ lơi loh làng rlau tai sơl? Añ neh bơtê geh lah, tòm tŭ kơñ đơs pràn bơta lơi hơ̆, cau cih sră rờp đơs wih đơs wơl bơta hơ̆. Mơ añ nền vmcê lah do la bơta mơ Yàng kơñ bol he kơlồi tus. Añ neh jòi ban bơta pơn dòm pơniang tòm jơnau song hơ̆ oă dơ̆, mơ kờp kơñ lah ồng mo oh mi kùng be hơ̆ sơl.

Dan jà bol he dô nùs bal tòm bơta hòi dan:
Khoai Yàng kơñ gơboh kòn dê, kòn ưn ngai Yàng bơh bơta kơñ gơboh mơ bơta gơs măt Kơnràñ dê. Kòn ưn ngai Yàng bơh Kơnràñ ò tŭ lơi sang lơi kòn, bulah tòm ală tŭ kalkê hala tòm tŭ kòn sền gơlơh be Kơnràñ ơm ngai. Dan dong kòn dờp git Kơnràñ sum ơm bal, tề lăm mơ sền gàr kon, be tòm tŭ kòn ò geh dờp git. Dan ai kòn in nùs jê gloh tơhìr jòi jat Yàng ò di ming tòm tŭ tìp kalkê mơ tòm kòp tŭ kòp jơ rài kis kòn. Kòn jơh nùs hòi dan tòm sơnđăn Yàng Jesu Krist, Amen!

Ơ ală ồng mo oh mi kơñ gơboh, ală ngai kơnhai lòt găn, bol he neh nđò dơ̆ lùp Yàng “Kơnràñ nting đah”?tơnơ̆ mơ bơta bơtê hòi dăn ngai do, kờp dơ̆ tòm tip mơ mơ ală tŭ kalkê, ơm is, ngai bơh Yàng, gèn lai ngăn lùp is să tòm he: “Ơ Yàng, kòn ngăn găm ntao tiah lơi?” Kah tĕ lah, Yàng sum ơm bal, rcăng sir tề lăm bol he lòt găn ală bơta gơlong, kờp tŭ klăm jơngò, mơ roh gơn kơnòm rlau jơh. Sèng lùp dơng mang tìng dô hơ̆ la: Bol he gam nting đah tòm bơta gơtòm klĕ mơ Kơnràñ? Mơ di goelăn bol he rcăng sìr sang ală bơta kơlồi sơnờng is he di nàng jơh nùs jơh bồ dơngoh wèt tus hơ Kơnràñ hala ò? Lòi tĕ Jơnau Yàng di chồl bơtrồt kòp nă bol he ngai do bơh bơta tơlik măt Kơnràñ di tòm hsềng soan bol he di, hòi lùp tĕ nùs kơn Yàng di lai ngăn, , iat kơno jơnau đơs Kơnràñ di lai mơ tŭ sơntòm dô ngai pa, nàng bol he sùm git lam Kơnràñ rềp ngăn tòm rài kis he, ồng mo oh mi yơ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.