Tơdrong arih ưh kơđei layơ truh kiơ̆ kơ thoi lu bơ̆n đei proh hơmet lê̆ hơdrol bơih. Kư̆m đei lu bơ̆n proh hơmet tơdrong wă bơ̆jang ‘nâu jang to, mă lei, Kră Yang ba lu bơ̆n yak năm ưh kơ thoi lu bơ̆n proh hơmet bơih ‘noh. Đei lơ tơdrong pơlong lăng, tơdrong truh kơ lu bơ̆n ưh kơ băt lê̆ hơdrol pơm kơ lu bơ̆n đei apinh kơdih akâu gah tơdrong tơ‘bưh lu bơ̆n hăm Kră Yang. Hăm trŏ kơ lu bơ̆n băt kơ Kră Yang thoi kơ lu bơ̆n tơchĕng ưh? Lei tơdrong pơmat ‘nâu wă tơgŭm lu bơ̆n băt kơ Kră Yang kiơ̆ kơ thoi lu bơ̆n đei tơchĕng noh?

Năr ‘nâu, ‘năr 13/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Emily Watson kơ̆l ‘bai BUĂL BĂT KƠ KRĂ YANG THOI YƠ?

“Ih băt ‘bơ̆t inh hơ-oei, kơplah inh iung. Mă đơ̆ng ataih Ih băt đĭ tơdrong inh tơchĕng.” (Hơriso 139:2)

Lu bơ̆n bơngai lui kơ ‘Bok Kei-Dei, đei lơ lăm lu bơ̆n tơchĕng lu bơ̆n băt kơ Kră Yang. Lu bơ̆n đŏk nơ̆r ‘Bok Kei-Dei, yăk năm hơdai Kră Yang păng kư̆m đei hlôi kơ tơdrong kiơ̆ Sư. Mă lei hăm trŏ kơ lu bơ̆n băt tơpă kơ Kră Yang? Tơdrong kiơ gô truh kơ lu bơ̆n tơdah tơdrong arih lu bơ̆n pơ̆k huŏng? dah tơdrong lui ngeh kơ Kră Yang tơsŭl tơwŏk, păng lu bơ̆n gô ưh kơ đei rơhou gah tơdrong tơ‘bưh lu bơ̆n hăm Kră Yang, ngĭl ngŭl ưh kơ gan ngeh gah tơdrong ‘lơ̆ng tơpăt Kră Yang?

Tơdrong arih Jop gô ăn kơ lu bơ̆n đei tơchĕng pơwao kơ tơdrong ‘nâu: “Tơ lăm dêh char Us đei minh ‘nu bơngai drŏ-nglo anăn sư Jop, sư đei đon ‘lơ̆ng tơpăt, băt hli yom kơ Kră Yang ‘Bok Kei-Dei păng weh ataih đơ̆ng tơdrong kơnê̆. Sư pơjing tơpơh ‘nu kon drŏ-nglo păng pêng ‘nu kon drŏ-kăn. Jop đei tơpơh-rơbâu tŏ triu, pêng-rơbâu tŏ aseh lăk-đa, pơđăm-hrĕng hơgrop rơmo choh, pơđăm-hrĕng tŏ aseh iĕ akăn păng đei đĭch đam lơ; sư mơdrŏng hloh kơ đĭ-đăng bơngai lăm dêh char gah Hơlĕch.” (Jop 1:1-3)

Kră Yang tuh ăn kơ Jop Tơdrong pŭn hiôk lơlang lơlap. Sư arih đei đon tơpăt, đei mơdrŏng păng đe pôk pơ-ư kơ sư hloh đơ̆ng gah hơlĕch, Tơdrong arih Jop đei tôm tơdrong, yua kơ sư đei Kră Yang bơwei sư. Truh tơ Satan kư̆m drơ̆ng kơ Jop noh bơngai Kră Yang ‘mêm:

“Satan apinh Kră Yang“ Jop hli yom kơ Kră Yang ‘Bok Kei-Dei ưh kơ đei yua kơ kiơ hă? “Yua kơ Ih war dur tăp dăr wei-lăng sư, hnam dơnŏ sư păng dôm tơmam sư đei. Ih tuh ăn pŭn kơ tơdrong jang sư păng ăn kơ sư tơmam rai lơ lăm teh.” (Jop 1:9-11)

Jop băt kơ Kră Yang jơ̆ tơm kơ tơdrong arih ưh kơ đei layơ tơplih: ling-lang tơpăt păng bơwei hăm tuh ăn pŭn hiôk kơ lu bơngai đei đon tơpăt. Kră Yang war pĕng kơjăp kơ lu bơngai ‘lơ̆ng tơpăt. ‘Noh Jop hlôh gah Kră Yang. Mă lei buăl tơchĕng thoi yơ? Hăm trŏ kơ Jop juăt bơih kơ tơ chĕng thoi ‘noh? Hơ bŏ lăng Jop kư̆m nhen thoi lu bơ̆n hrei ‘nâu, lu bơ̆n pơjing “proh lê̆”- tôm tơdrong, đơ̆ng lăm tơdrong bơ̆jang lăm hnam akŭm, pơjing hnam dơnŏ, bơwei tơdrong tơ ‘bưh hăm bôl buăl lăm tơdrong jang truh tơ hơmet tơdrong jang – kiơ̆ kơ thoi noh na lu bơ̆n kư̆ kơ bơ̆jang. Lăm lu tơdrong jang ‘noh, lu bơ̆n tơchĕng khan lu bơ̆n băt kơ Kră Yang păng lui ngeh kơ tôm tơdrong gô đei truh thoi ‘noh.

Trŏ bơih Kră Yang ‘Bok Kei-Dei ưh kơ đei tơplih. Sư bơih Kră Yang ling-lang ưh kơ đei layơ tơplih, năr brei, năr ‘nâu păng ling-lang. Đơ̆ng tơdrong mơsêh păng tơdrong ‘maih wă đơ̆ng Kră Yang gô ăn kơ lu bơ̆n băt kơ Sư pha ra kơ lu bơ̆n băt.
Tơdrong ‘noh thoi kơ buăl đei 20 sơnăm bơ̆ jang lăm công ty mă lei công ty tơlĕch lê̆ buăl ưh pă ăn bơ̆jang bơih, kư̆m thoi buăl đei tơdrong jĭ jăn mă tơdrong jĭ jăn noh ưh kơ juăt kơ jĭ, mă hơdrol kơ ‘noh buăl oei praih hiôk. ‘Noh bơih kơplah tơdrong arih truh kơ buăl pơmat tat, buăl ưh kơ ngeh tơdrong ‘noh gô truh, ưh kơ hơmet lê̆ adrol păng tôm tơdrong arih buăl đei tơsŭl tơwŏk. Yua kơ đei tơdrong pơlong lăng ‘noh, đon lui buăl ‘bônh kơ ngĭl ngŭl, mă lei ‘noh bơih kơplah blŭng a buăl ‘bôh Kră Yang hơđăl rơđah hloh, păng băt kơ Kră Yang ưh kơ thoi kơdih akâu lu bơ̆n tơchĕng.

Ưh kơ đei layơ Kră Yang kư̆m tơ ‘bôh ăn kơdih akâu Sư kơ lu bơ̆n thoi kơ lu bơ̆n chang hơmĕng. Thoi kơ bơngai chih Oswald Chambers lăm sơ̆p “Đĭ Đăng Kơ Inh Ăn Kơ Tơdrong Tih Hloh Sư”

“Kư̆m đei năr lu bơ̆n tơchĕng khan, Kră Yang nhen thoi ưh kơ găn tơpăt hăm bơ̆n, mă lei Sư ưh kơ thoi ‘noh ôh. Sư nhen thoi minh ‘nu bơngai ‘bă mă lu bơ̆n ưh kơ hlôh kơ Sư, mă lei kư̆m ưh kơ thoi ‘noh. Kră Yang nhen thoi bơngai sek tơlang ưh kơ tơpăt, mă tơpă Sư ưh kơ thoi ‘noh”.

Kră Yang drơ̆ng ăn Satan pơrăm tôm tơdrong arih Jop. Lu bơ̆n ngăl tơchĕng: “Mơnat dêh kơ Jop pŭ iŏk tơdrong pơmat tat thoi ‘noh.” Tơpă đơ̆ng rŏng kơ ‘noh, Kră Yang pơklaih sư păng tuh tơdrong pŭn hiôk lơ hloh dơ̆ng. Mă lei tơdrong kăl tơm ‘noh tơdrong tơ‘bưh Jop hăm Kră Yang. Đơ̆ng tơdrong pơlong lăng ‘nâu, Jop băt kơ Kră Yang lơ hloh dơ̆ng – Kră Yang jơ̆ bơngai ‘Bă, Sư pơklaih tơdrong jĭ jăn, ‘Bok dŏng pơklaih, tu kơ tơdrong hiôk hian, tơdrong chơt hiôk păng pran kơ tang kơ Jop. Kră Yang băt kơ lu bơ̆n hloh kơ lu bơ̆n băt kơdih akâu lu bơ̆n.

“Ơ Kră Yang, Ih đei lăng lăng inh boih păng băt kơ inh.Ih băt ‘bơ̆t inh hơ-oei, kơplah inh iung. Mă đơ̆ng ataih Ih băt đĭ tơdrong inh tơchĕng.” (Hơriso 139:1-2)

Inh lui ngeh Kră Yang ‘maih wă kơ lu bơ̆n băt kơ Sư lơ hloh dơ̆ng. Đơ̆ng lăm ‘bai pơhrăm kơ tơdrong arih Jop ưh kơ pơtho lu bơ̆n đĕch ôh păng wă ăn kơ lu bơ̆n đei ‘nơ̆r Kră Yang kơ lăm lu bơ̆n, tơgŭm lu bơ̆n rim năr gô đei tơdrong arih nhen thoi Kră Yang hloh loi.

Apinh đĭ đăng krao khan hơdai:
Kơ kuh kơ Kră Yang mă ‘mêm! Kră Yang ơi, kư̆m đei năr kon ưh kơ hlôh kơ tơdrong pơlong lăng mă kon oei tơ‘bơ̆p, mă kon lui kơ Kră Yang gô đei proh hơmet tơdrong ‘lơ̆ng wă ăn kơ kon lăm tôm tơdrong. Apĭnh Ih tơgŭm kon băt kơ Ih rơđah hơđăl hloh đơ̆ng lăm tơdrong pơmat, đơ̆ng lăm tơdrong pơlong lăng wă kơ kon jê̆ Ih păng băt kơ Ih lơ hloh dơ̆ng. Apinh tơgŭm kon ling-lang gơnang kơ lăm Ih chông bơrơng păng ưh kơ đei layơ achăng lê̆ jơhngơ̆m chang hơmĕng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăng ming tơdrong arih Jop đei hlôi bơih, lu bơ̆n kư̆m đei lĕch đak măt kơ tơdrong truh kơ sư, đei lơ tơdrong hơ‘ngon lăm tơdrong arih sư đei hlôi bơih. Mă lei lu bơ̆n băt kơ bơnê kơ đon lui sư kơ Kră Yang ưh kơ đei tơplih, pơthim kơ sư băt kơ Kră Yang rai hloh dơ̆ng, đơ̆ng tơdrong pơlong lăng chhŭr nuih ‘nâu. Đei lơ tơdrong pơlong lăng truh kơ tơdrong arih ưh kơ hmă đĕch ôh, ‘noh bơih wă kơ lu bơ̆n băt kơ Kră Yang hơđal rơđah hloh loi, wă kơ lu bơ̆n tơ‘bưh hăm Sư hloh dơ̆ng. Kră Yang ling-lang oei hơdai lu bơ̆n, mă khan lăm tơdrong chhŭr nuih dah pă đei kiơ kiơ bơih. Dah lu bơ̆n pơhrăm iŏk nơ̆r pơhrăm ‘nâu đơ̆ng lăm tơdrong pơlong lăng ‘noh, tơdrong arih lu bơ̆n gô nhen thoi Kră Yang hloh. Mă ‘bơ̆t anăp tă kơ hơmơ̆l găm găn trong yăk năm, hơpơi kơ buăl ‘blŏk chĕp kơjăp ‘nơ̆r ‘nâu, Kră Yang ling-lang đei proh hơmet bơih tơdrong ‘lơ̆ng hloh wă ăn kơ tơdrong arih buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.