Rài kis ò tŭ lơi lòt jat bơta rơndăp gen bŏl he kơp kỡn. Digơlan bŏl he neh lơh nền gùng dà lọh lang, mơya Yang cèng wơl bŏl he tơmut wơl nisơna tom ală sơnah gùng krơi is. Ală bơta gơlòng bŏl glăr, ală broă gơlik gơs òhềt git lai lơh bŏl he ĭn păl ơn dô sèng lùp bơh ală bơta gơtomklac digul he mơ Yang. Gen bŏl he rơp git Yang ngăn mbe he kơlôi sơl? Hala ală bơta kalke do rơp dŏng bŏl he git Yang jat rnoas he òhềt kơlôi tus?

Ngai do, ngai 13/01/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Emily Watson dê bơh Tơnggume HE GĂM GIT YANG MBE LƠI TAIH?

“Yàng git tòm tŭ añ nggui mơ tòm tŭ añ ñă ntào; Yàng git loh ală bơta kơlôi sơnơng añ jê bơh tiah ngài.” (Đơs Crih 139:2)

La Cau Don jat Yang, jơh ală bŏl he kơlôi la he git Yang. Bŏl he sền Sră Goh, cơnòa lòt jat Yang, mơ gơs ală bơta lòt găn hơđăng gùng dà jat Yang. Mơya gen bŏl he rơp git Yang ngăn sơl? Bơta lơi rơp gơlik gơs tŭ rài kis nisơna rlơm lề? Tŭ ală bơta he gơn kơnòm bơh Yang kol gowprah, mơ he dơrcul lùp is bơh bơta gơtomklac digul he mơ Yang, pĭn wil wơl bơh să tom Kơnrẵn?

Rài kis Jop di rơp lơh bŏl he păl kơlôi sơnơng bơh broă do:

“Tòm lơgar Us, gơs dô nă cau sơnđan la Jop. Cau hơ̆ la wil tơl mơ song ring, duh rngòt di Yàng Tom Trồ mơ pleh ngài di bơta iơh bơsak. Khai gơs poh nă kòn klau mơ pe nă kòn ùr. Khai gơs poh rbô belàt, pe rbô làkđa, pram rhiang yô kơnrồ, pram rhiang alàng me, mơ oă ngan cau duh broă. Gen tàng khai la cau pas gơs tiơng pơnro rlau jơh tòm ală làng bol ơm đah mattơngai lik.” (Jop 1:1-3)

Jop la dô nă cau geh Yang ai lơngai. Ồng kis sŏng rĭng, pas gơs mơ geh sền la dô nă cau màng ryŭ tom đah mattơngai lik. Rài kis Jop di ò siơ̆u phăn lơi, tài bơh ồng ơm tom đar sền gar Yang di. Tơ’ài lah Satan kŭng dòp git lah Jop la dô nă cau geh Yang koñ gơboh:

“Satan ho Yàng Jehôwa lah: “Jop ò di duh rngòt di Yàng Tom Trồ dô bă ò kwơ sơl ơ? Yàng ò di neh lơh dô nơm pơnggàr gùt dar khai, hìu nhă khai mơ jơh ală phan gơrê bal mơ khai, tòm kòp đah ò ơ? Yàng neh ai lơngai ală broă tê khai neh lơh, mơ lơh ală phan mơna khai dê gơbơtơl oă tòm lơgar.” (Jop 1:9-10)

Jop git bơh Yang Tom Trồ be tom ryas bơta kis ò tŭ lơi tòmgơl: sum òs dŏng sền gar mơ ai lơngai tơngkah tơngkăñ tus cau lơi wil tơl sŏng ngăn. Kơnrẵn la khèl kơ̆ cê cau sŏng rĭng ĭn. Mơya he kơlôi mbe lơi? Di ngăn la Jop òs mòng ir mơ hừh nùs bơh bơta kơlôi sơnơng hơ̆? Digơlan Jop kŭng be bŏl he ngai do. Bŏl he òs bơtào dô bơta “Rơndăp” – dô bơta păl càng nàng lơh jơh ală bơta, bơh bơta duh broă tom Hiu Jum Goh, bơt bơtào hiu nhă, kơrmap gar ală bơta gơtomklac tus di broă ràng tơlik ală broă – mơ bŏl he kư̆ ting jat gen lơh. Tom ală rnoas hơ̆, bŏl he kơlôi he neh git Yang mơ dòn lah ală bơta rơp lơh jat behơ̆.

Tom tọh ngăn la Yang Tom Trồ ò tŭ lơi tòmgơl. Kơnrẵn sum la Bơtau ò tŭ lơi tòmgơl, ngai or, ngai do mơ hìng nau sum sum. Mơya bơh gơnap gơnoăr dờng ryŭ mơ nùs kỡn Kơnrẵn di rơp ai bŏl he ĭn tŭ lơmpah git Kơnrẵn jat rnoas pha is.
Cơnòa hơ̆ rơp gơlik gơs di ngăn tŭ he ò lik bơh broă lơh rlau 20 năm, hala nisơna tìp bơta kòp ji dờng, bulah lài or pràn kơldăng ngăn. Hơ̆ la tŭ kol pơrdô tŭ ò bơtoah tìp gơlòng bŏl glăr mơ òhềt geh rcang lài, mơ ală bơta tom rài kis he di gơkòl gơprah. Bơh ală tŭ jơ gơlòng bŏl glăr hơ̆, bơta dòn he di rơp sơntom gơlơnggơr, mơya hơ̆ kung la tŭ he rơp sơntom ngăn gŏ Kơnrẵn lọh lang rlau tai, mơ git Kơnrẵn bơh ală bơta lòt găn ò kơlôi sơnơng tus.

Ò di tŭ lơi Yang kung ràng tơlik să tom Kơnrẵn jat bơta he kơp gơn. Be cau cih sră Oswald Chambers neh cih tom sră “Jơh bơta ăñ ji gơwèt tus bơta dờng ryŭ Kơnrẵn ĭn”

“Gơs tŭ, Digơlan Yang ndrom be cau bơyô ò niam, mơya Kơnrẵn ò di behơ̆ ò. Kơnrẵn ndrom be cau Bèp kalke ò wă wờng , mơya ò di behơ̆ ò. Kơnrẵn ndrom be dô nă cau cahrña ò sŏng, mơya ò di behơ̆ ò.”

Yang ai gơnoăr Satan phà rọh jơh rài kis Jop di. Bŏl he òs kơlôi : “Nđàc sơngit ngăn Jop tŭ ồng lòt găn bơta gơlòng bŏl glăr behơ̆”. Tom tŭ lồi dut, Yang rơp lơh wơl niam mơ ai lơngai lơngọ ồng ĭn bar dơ̆ oă rlau. Mơya bơta dờng màng rlau jơh la bơta gơtomklac băl Jop mơ Yang. Bơh bơta gơlòng bŏl glăr do, jop git Yang dô bă lọh lang rlau jơh – Kơnrẵn la dô nă cau Bèp, la Bơtau sơmbòi, Bơtau Dŏng Klàs, tom ryas bơta lơngap lơngai, bơta hon chò mơ gơnoăr pràn ồng di. Yang git lọh bŏl he rlau bŏl he git lọh să tom he.

“Ơ Yàng Jehôwa, Kơnràñ neh sền sơwì añ mơ git añ! Yàng git tòm tŭ añ nggui mơ tòm tŭ añ ñă ntào; Yàng git loh ală bơta kơlôi sơnơng añ jê bơh tiah ngài. (Đơs Crih 139:1-2)

Ăñ don la Yang koñ bŏl he git Kơnrẵn jrô ndơp rlau tai. Ală bơta bơtê git tom rài kis ò di mìng bơtô sôr mơ găm la phăn rcang sir bŏl he ĭn, dŏng bŏl he kòp ngai sơlơ ndrom be Kơnrẵn rlau tai.

Dan jà bol he dô nùs bal tòm bơta hòi dan:
Khoai Yang koñ gơboh kọn di! Ơ Yang, gơs tŭ kọn ò git lọh ală bơta gơlòng bŏl glăr he păl tìp, mơya kọn dòn nền la Kơnrẵn òs sum gơs tơnggume niam her kọn ĭn tom kòp ală tŭ. Dăn Kơnrẵn dŏng kọn dòp git Kơnrẵn lọh lang rlau tai bơh ală tŭ kalke, bulah mbe lơi kòp ală bơta gơlòng bŏl glăr gơlik gơs tŭ lơmpah nàng kọn ơm rềp mơ git lọh Kơnrẵn jrô ndơp rlau tai. Dăn dŏng kọn òs sum dòn kơnòm tom bơta tề lăm Kơnrẵn di mơ ò tŭ lơi săng lòi bơta gơn kơnòm. Kọn jơh nùs họi dăn, kọn ai sơnđăn Yang Jesu Krist. Amen!

Ơ ală ồng mọ ọh mi koñ gơboh, tŭ sền wơl rài kis Jop di, digơlan bŏl he rơp hor dà măt bơh ală broă gơlik gơs, ală bơta ji sồt dờng ồng păl lòt găn. Mơya bŏl he sơlơ gơn kơnòm rlau tai bơta dòn ò gơlơnggơr ồng di tom Yang, mơ dô pơnah pa ndai gen ồng geh git Yang rlau tai bơh ală bơta gơlòng bŏl glăr ji sồt do. Ală gơlòng bŏl glăr tom rài kis ò tus dô bă nisơna, mơ hơ̆ la tŭ lơmpah nàng bŏl he git Yang lọh lang rlau tai, la tŭ lơmpah nàng bơta gơtomklac băl bŏl he mơ Kơnrẵn jrô ndơp rlau tai. Yang sum ơm băl mơ bŏl he, bulah tom ală bơta ji sồt hala tom tŭ gơlơh be ală bơta rlơm lề. Mơ tŭ bŏl he bơtê geh bơta bơtô sôr kwơ màng bơh ală bơta gơlòng bŏl glăr hơ̆, bŏl he rơp sơlơ ngai sơlơ ndrom be Yang rlau tai. Bulah diđap mat la mhwăl klăm jơngọ cik, kơp koñ he kah tĕ lah Yang òs sum gơs bơta rơndăp niam rlau jơh gơwèt rài kis he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.