Rim năr, lu bơ̆n đei tơ‘bơ̆p lơ tơdrong rơih iŏk. Bơngai lui kơ ‘Bok Kei-Dei, lu bơ̆n hơpơi wă kơ arih kiơ̆ thoi Kră Yang wă, mă lei tơdrong ‘noh athei pơm thoi yơ wă kơ băt hơđăl kiơ̆ kơ Kră Yang wă lăm rim kơ tơdrong mă lu bơ̆n oei tơ’bơ̆p? Păng tơdrong ‘noh hăm trŏ kơ lăp băt kơ tơdrong Kră Yang wă đech tôm bơih?

Năr ‘nâu, ‘năr 14/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Shadia Hrichi kơ̆l ‘bai BĂT KƠ KRĂ YANG WĂ HĂM TAM TÔM?

“Na nhôn apinh tơdrong mơsêh mơyang ‘Bok Kei-Dei ăn kơ iĕm jơhngơ̆m pran adrin kiơ̆ tôm tơdrong Sư, wă kơ iĕm huay kơ achăng lê̆ Sư, mă đe pơm pơmat kơ iĕm dang yơ, ăn kơ iĕm oei hiôk oei kơjăp lăm tơdrong lui khŏm khŏm.” (Kôlôse 1:11)

Lu bơ̆n bơngai lui kơ ‘Bok Kei-Dei, bu kŭm ‘maih arih wă kơ ư-ang kơ anăn Kră Yang păng pơm kiơ̆ tơdrong ‘lơ̆ng tơpăt đơ̆ng Kră Yang wă. Rim năr, lu bơ̆n đei lơ tơdrong kăl kơ pơdrơ̆ng. Phŏ đei mĭnh tơdrong pơdrơ̆ng ‘bônh yua kơ Sơ̆p hla bơar đei bơtho tơ’bôh hơđăl, thoi ‘nĕ kơ tơtông klĕ, ‘nĕ kơ pơm pơyô kư̆ kă….

Mă lei lu tơdrong pơdrơ̆ng mă lu bơ̆n ưh kơ đei bơtho tơ’bôh hơđăl lei liơ? Inh hăm gơh tĕch hnam ưh? Hăm gơh pơdơh tơdrong jang ‘nâu ưh? Hăm gơh ăn kơ kon hŏk trưng ‘nâu ưh? Hăm gơh năm jang tơdrong jang đĭ jơnăr ưh? Lăm kơthơ ‘bok Pôl gơih kơ lu bơngai lui tơ Kôlôse, ‘bok Pôl đei krao khan kơ lu sư, apĭnh Kră Yang ‘măn ăn tơdrong hlôh wao tôm mah gah tơdrong Kră Yang wă, kŭm thoi tơdrong gơh hơgei păng hlôh wao lu sư.

“Thoi noh na iĕm gơh pơm trŏ thoi Sư wă, trŏ thoi Sư lăp đon. Iĕm gô pơm dôm tơdrong ‘lơ̆ng dôm tơdrong tơpăt, rai đunh rai hlôh băt tơdrong ‘Bok Kei-Dei.” (Kôlôse 1:10)

Mơ̆ng nhen ‘bônh đĕch, trŏ ưh? Tơdah inh ‘maih wă băt kơ Kră Yang wă, kăl kơ krao khan păng Kră Yang gô tơbăt kơ inh. ‘Bônh dêh, inh gơh pơm! Mă lei kơplah đŏk pơtrơp, inh băt kơ tơdrong ‘noh ưh kơ dơ̆ng ‘bơ̆t doh đĕch. Trong 11 pơtrơp hăm nơ̆r krao khan đơ̆ng ‘bok Pôl, apĭnh Kră Yang ăn jơhngơ̆m pran kơ lu bơngai lui “…. adrin kiơ̆ tôm tơdrong Sư, wă kơ iĕm huay kơ achăng lê̆ Sư, mă đe pơm pơmat kơ iĕm dang yơ, ăn kơ iĕm oei hiôk oei kơjăp lăm tơdrong lui khŏm khŏm.” (Kôlôse 1:11)

Gô tŏ sĕt! Adrin? Pŭ iŏk? Đei tơdrong tơm ‘noh wă kơ arih ‘lơ̆ng trŏ thoi Kră Yang lăp đon, inh kăl kơ adrin pŭ iŏk? Dah anat dêh hloh, inh kăl kơ ngôi dơnơ̆ng adrin chang gô mă ưh kơ đei pơm kiơ? Hơbŏ inh ưh kơ ‘maih wă tơdrong ‘noh dêh ôh!

Mă lei tơdong ‘nâu pơm kơ inh kăl kơ apĭnh kơdih mĭnh nơ̆r pơnhen hơđăl tơpă: Tơdah inh ‘maih wă arih mĭnh chăl arih wă kơ Kră Yang lăp đon, đei plei trem păng wă ‘măn lê̆ tơmam đunh, lei inh hăm wă adrin pŭ iŏk? Inh hăm wă năm hloi kiơ̆ mĭnh trong ataih hloh mă hui bơngai rơih iŏk, păng kĕ chơ̆n gô đei lơi yua ưh?

‘Noh mĭnh nơ̆r pĭnh kăl tơpă. Lu bơ̆n băt bơih kơ Kră Yang wă kơ lu bơ̆n arih kiơ̆ thoi Sư wă. Lu bơ̆n lui ngeh Sư gô ling lang mơ̆ng kơplah lu bơ̆n apĭnh Sư ăn kơ bơ̆n tơdrong gơh hơgei păng hlôh wao. Mă lei, lăp băt tơdrong Kră Yang wă đĕch lei tim mă tôm mah wă kơ arih mĭnh chăl arih kiơ̆ kơ Kră Yang lăp đon. Băt kơnăl păng pơm kiơ̆ thoi Kră Yang wă ‘noh ‘bar tơdrong pha ra băl. Tơdrong ‘nâu kăl kơ lu bơ̆n adrin. Buăl hăm đei layơ mơn băt tơdrong Kră Yang wă ưh kơ sĭ layơ kŭm lơ lăi thoi dôm tơdrong buăl đei rơih iŏk dah hơmĕng ưh?

Tơdah lu bơ̆n ưh kơ lăp đon hăm nơ̆r tơl đơ̆ng Kră Yang, dah mơn ‘bôh nhen thoi ưh kơ đei nơ̆r tơ̆l ayơ đơ̆ng Kră Yang, lei bơ̆n ‘bônh kơ wih rŏng hăm Kră Yang păng năm kiơ̆ trong nai. Mă lei lăm jơ‘noh, lei lu bơ̆n hăm pơ̆n pơkăm khan kơdih rơhing tơpă băt kơnăl tơdrong wă ‘lơ̆ng tơpăt đơ̆ng Kră Yang ưh? Dah lu bơ̆n lăp wă kơ Kră Yang pơdrơ̆ng dôm tơdrong mă lu bơ̆n đei pơdrơ̆ng kơdih bơih? Bơnê kơ Kră Yang yua kơ Ih hlôh băt dôm tơdrong rơdu rơmơ̆n lu bơ̆n!

‘Noh bơih tơdrong mă ‘bok Pôl bơtho tơ‘bôh kơ lu bơngai lui ưh kơ sĭ krao khan wă kơ chă băt tơdrong ‘lơ̆ng tơpăt Kră Yang wă, mă ‘noh wă kơ iŏk jơhngơ̆m pran, jơhngơ̆m adrin pŭ iŏk kăl tơpă athei pơm kiơ̆ thoi tơdrong wă ‘lơ̆ng tơpăt ‘noh. Mă lei nơ̆r Kră Yang ưh kơ sĭ dơ̆ng ‘bơ̆t doh. Tơdrong pran ‘nâu truh đơ̆ng yơ? Pơm thoi yơ wă kơ lu bơ̆n đei tơdrong pran ‘noh? Bơnê kơ Kră Yang, nơ̆r tơl ‘noh: Tơdrong pran ‘nâu ưh kơ đơ̆ng jơ̆nghơ̆m bơ̆n kơdih, ‘noh đơ̆ng Kră Yang! ‘Bok Pôk bơtho athei lu bơ̆n kăl kơ krao khan wă “Na nhôn apinh tơdrong mơsêh mơyang ‘Bok Kei-Dei ăn kơ iĕm jơhngơ̆m pran adrin kiơ̆ tôm tơdrong Sư, wă kơ iĕm huay kơ achăng lê̆ Sư, mă đe pơm pơmat kơ iĕm dang yơ, ăn kơ iĕm oei hiôk oei kơjăp lăm tơdrong lui khŏm khŏm.” (Kôlôse 1:11)

Thoi noh, kơplah buăl krao khan apĭnh Kră Yang tơ’bôh tơdrong ‘lơ̆ng rŏ kiơ̆ kơ Kră Yang wă, ‘nĕ kơ hiơt apĭnh Kră Yang ăn kơ buăl jơhngơ̆m pran hăm đĭ đăng tơdrong mơsêh mơyang ư-ang đơ̆ng Sư, wă kơ buăl đei tôm mah jơhngơ̆m chơ̆n kăl yua, wă chang gô nơ̆r akhan đơ̆ng Kră Yang păng pơm kiơ̆ thoi Kră Yang wă. Hơpơi kơ buăl păng inh gô arih mĭnh chăl arih “trŏ thoi Sư wă, trŏ thoi Sư lăp đon. Iĕm gô pơm dôm tơdrong ‘lơ̆ng dôm tơdrong tơpăt”.

Apinh đĭ đăng krao khan hơdai:
Kơ kuh kơ Kră Yang mă ‘mêm, kon bơnê kơ Ih păng lui ngeh Ih đei kơnhăm ‘lơ̆ng tơpăt kơ chăl arih kon. Kră Yang ơi, apĭnh tơgŭm kon băt kơ năl tơdrong ‘lơ̆ng rŏ đơ̆ng Ih wă kơ lăm dôm tơdrong kon pơdrơ̆ng, mă tih dah iĕ. Apĭnh ăn kơ kon jơhngơ̆m pran păng jơhngơ̆m adrin wă chang gô, băt kơ năl păng pơm kiơ̆ thoi Ih wă, mă khan tơdrong ‘noh ưh kơ ‘bônh. Kon lui ngeh, mă lăm tơdrong pơlong lăng dah pơmat tat, Ih ling lang oei hơdai kon păng ăn kơ kon jơhngơ̆m pran wă arih mĭnh chăl arih ư-ang anăn Kră Yang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, bơ̆n jing kon Kră Yang, rim bơngai lui kơ ‘Bok Kei-Dei lu bơ̆n kăl kơ băt kơnăl tơdrong Kră Yang wă păng kŭm kăl kơ pơm kiơ̆ thoi tơdrong hlôh wao mă Kră Yang đei tơbăt kơ lu bơ̆n. Lu bơ̆n gơh băt kơ tơdrong Kră Yang wă kơplah jê̆ Kră Yang tơpă hăm tơdrong tơ‘bưh hăm Kră Yang lăm tơdrong krao khan, lăm tơdrong tơchĕng pơwao nơ̆r Kră Yang rim năr yua tơdrong bơtho tơ‘bôh đơ̆ng Yang Bơhngol ‘Lơ̆ng. Athei năm tơ Kră Yang, chang gô Sư, mơ̆ng Sư, păng apĭnh Kră Yang tơbăt tơdrong Kră Yang wă ăn kơ lu bơ̆n. Kŭm athei apĭnh Kră Yang ăn jơhngơ̆m pran wă kơ rim ‘nu lu bơ̆n gơh adrin pŭ iŏk dôm tơdrong pơlong lăng đei truh păng nuih kơtang yak kiơ̆ tơdrong ‘lơ̆ng tơpăt mă ‘Bok Kei-Dei ‘măn ăn kơ kon Sư mă ‘mêm mơnat.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.