Buăl hăm đei tơtơ̆ lăm jơhngơ̆m păng hiơ̆k bơngơ̆t kơplah lăng ‘bôh lu bơngai pơm siêk yak năm tơ kơpal tơlei ‘noh ưh? Tơdrong arih lu bơ̆n kư̆m đei năr tơtăm thoi ‘noh, tŏk bŏk tơdrong arih đei lơ tơdrong tơnat păng ưh pă băt pơm thoi yơ lăm tơdrong arih tơ anăp. Mă lei lu bơngai lui kơ ‘Bok Kei-Dei, lu bơ̆n ưh kơ tơ‘bơ̆p tơdrong ‘noh minh drô̆ bơ̆n ôh, yua kơ Kră Yang oei yak năm hơdai păng pơwei lăng lu bơ̆n. Kră Yang gô chông ba lu bơ̆n hlôi đơ̆ng tơdrong tơnat ‘noh.

Năr ‘nâu, ‘năr 15/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Escamp kơ̆l ‘bai YAK NĂM LĂM TRONG IĔ.

“Yua kơ bơngai tơpăt mă sư pơ̆k tơpơh wơ̆t ră, Mă-lei gô iung dơ̆ng; Mă-lei bơngai pơm kơnê̆ gô pơrăm hăm pơmat-tat.” (Tơdrong Pơđơ̆k 24:16)

Rim sơnăm, hnam dơnŏ nhôn đei ‘măn jơ năm lăng siêk hơdai. Đei lu ‘bĕng kĕo kơpaih phyơl nhen thoi hơmơ̆l, lu kơ thŭng tih ‘măn ‘bĕng hơ‘bo ‘băt ‘ngam păng đei tơtap ti re đơ̆ng lơ bơngai pơm kơ inh hơhưt, chang gô.

Tơ kơpal anih pơm siêk, lu bơngai pơm siêk lu sư hơbĕch hơbal păng pơyong dih băl hơiă dêh lăm lơ tơdrong lu sư pơm, thoi kơ hơlŭk tơ lăm gơwang tih ‘noh. Đĭ đăng lu sư pơm pêng tŏ gơwang pha ra băl, pơm kơ inh lăng pơnhen ưh pă đei lăng tơnai.

Đơ̆ng rŏng kơ ‘noh, đei lu kon kŏ kơdâu kiơ̆ gơwang lu sư chu yom tơpă, pơplŏng păng nơnăm hăm ‘bar pah jơ̆ng pah hơdrol sư. ‘Bôh thoi ‘noh inh hiĕk ăr lơ tơpă.
Mă lei, pơm kơ inh lăng hơiă noh lu sư pơm siêk yak năm tơ kơpal tơlei. Blŭng a lu sư pơm hmă đĕch, minh ‘nu yak năm bơwei tơpăt akâu tơ kơpal tơlei, yak năm hơdar tơ kơpal tơlei, tơlei ‘noh nhen hơtăng hloh kơ đĭ đăng tơlei lăm teh đak ‘nâu.
Rim sơnăm, tơdrong pơm siêk ‘nâu lăng hơiă hloh dơ̆ng yua kơ đei ‘bar ‘nu bơngai pơm siêk yak năm tơ kơpal tơlei, đơ̆ng noh sư hơlŭk pơdăr akâu sư. Sư yua tơmam juăt kơ yua lu sư pơ̆n nuih dêh, păng kư̆m đei hao gre tang wang ‘bar tŏ tang wang dah minh pah tang wang tơ kơpal tơlei ‘noh!

Mă khan lu bơngai pơm siêk sư pơm lăp ai dah pơm hloh kơ lu bơ̆n tơchĕng, inh ling-lang tơtơ̆ lăm jơhngơ̆m. Lơwơ̆t sư yak năm wă tôch kơ tơlei, inh hli krê pă đei dui jơhngơ̆m. Kơplah ‘long jra sư pơpơ̆, dah sư dơ̆ng ‘mơ̆i, minh pah jơ̆ng sư đĕch tơ kơpal tơlei, dah sư kŭp akâu sư wă akâu sư yak năm tơpăt, inh tơ hôih jơhngơ̆m inh, hơpơi hơmĕng kơ sư hoei kơ pơ̆k.

Inh oei ‘blŏk kơ lu bơngai pơm siêk đei pơ̆k, păng sư ôr “ A…A…A” đei đơ̆ng lu bơngai lăng kư̆m mơnat ôr rơ̆n. ‘Bôh sư iung đơ̆ng hơnă bơbŭi ‘noh lu ‘nhôn tơtap ti nhen thoi bơngai đei tơdrong kĕ jei, yơ̆r ti sư hăm jơhngơ̆m hiôk hăm kơdâu tŏk hao păng yak năm đơ̆ng blŭng a tơ kơpal tơlei ‘noh dơ̆ng. Đĭ đăng kơ lu nhôn hơpơi sư yak năm mă ‘bar ‘nâu gô keh đang ‘lơ̆ng. Đơ̆ng rŏng kơ noh, lu nhôn tơtap ti păng pơlung tơ iung jơhngơ̆m sư hăm jơhngơ̆m chơt hiôk tơpă.

Kư̆m đei, năr lu bơ̆n yak năm kiơ̆ Kră Yang nhen thoi kơ yak năm tơ kơpal tơlei hli krê ưh kơ hơđơ̆ng ‘noh. Tơdrong ‘nâu pha ra kơ lu bơ̆n đei mơn lăm jơhngơ̆m lu bơ̆n yua kơ đei bơngai ôr jreo đơ̆ng bơngai lăng, pơm kơ bơngai pơm siêk trăp trĭn kơ plah sư yak năm kơpal tơlei. Đei tơdrong truh pơm kơ lu bơ̆n kơdrăt, hiong răm, tơdrong pơlong lăng lăm tơdrong tơ‘bưh hăm bôl buăl, tơnat kơ jên tơmam, dah lăp đei teng neng re tơbăt jơ iung đơ̆ng tep rim pơge, đei tơ‘bôh kơ lu bơ̆n gô đei tơ‘bơ̆p păng gô yak năm hlôi kơ “ tơlei” lăm tơdrong arih.

Mă lei, lu bơngai lui kơ ‘Bok Kei-Dei, lu bơ̆n đei tơdrong pŭn tih kơ lăm tơdrong ‘nâu. Tơpă, lu bơngai pơm siêk đei gơh hơgei thoi noh đơ̆ng lu sư hơdrin pơtơ̆p gleh hrat rim năr, lu tơmam pơm kơ sư dơ̆ng hơđơ̆ng, păng đei pơlung tơiung đơ̆ng lơ bơngai lăng.

Kư̆m đei kơplah lu bơ̆n đei jơhngơ̆m rơdu, lu bơ̆n oei đei pŭn dêh. Yua kơ lu bơ̆n đei Yang Bơhngol ‘Lơ̆ng, Sư ling-lang oei hơdai lu bơ̆n, chông lu bơ̆n yak năm lăm trong iĕ mă Kră Yang đei hơmet bơih.

Kră Yang ăn kơ lu bơ̆n hơđơ̆ng lăm tơdrong arih, tơgŭm lu bơ̆n dơ̆ng kơjăp păng hoei kơ pơ̆k huŏng. Kơplah tơtdrong arih pơm kơ lu bơ̆n yak năm lăm trong kơnê̆, lu bơ̆n ling-lang đei Nơ̆r Kră Yang gô tơ‘bôh trong yak năm ăn kơ lu bơ̆n.
Hloh kơ ‘noh dơ̆ng, lu bơ̆n đei ‘Bok Dŏng Pơklaih ‘noh jơ̆ Kră Yang Yê Su, sư ăn kơ lu bơ̆n tơdrong gơh hơgei păng chông lu bơ̆n yak năm lăm lơ tơdrong pơlong lăng.

Mă lei dah lu bơ̆n ưh pă đei dơ̆ng tơpăt bơih păng pơ̆k lei lu bơ̆n gô thoi yơ?
Tơdrong Pơđơ̆k 24:16 đei khan thoi âu: “ Yua kơ bơngai tơpăt mă sư pơ̆k tơpơh wơ̆t ră, Mă-lei gô iung dơ̆ng; Mă-lei bơngai pơm kơnê̆ gô pơrăm hăm pơmat-tat.”
Inh lui ngeh pơnăr ‘mêm mơnat ‘Bok Kei-Dei gô ling-lang thoi hơnă bơbŭi glơng iŏk lu bơ̆n, tơgŭm lu bơ̆n iung, yơ̆r ti kơjung đei jơhngơ̆m hiôk păng yăk năm lăm trong lu bơ̆n oei yak năm.

Tơdah tơ‘bơ̆p tơdrong pơlong lăng lăm tơdrong arih, athei kơ jăp yak năm lăm trong Kră Yang đei tơ‘bôh. ‘Nĕ kơ hli kơ tơdrong tơnat mă Kră Yang ăn truh.
Athei chơt hiôk yua kơ buăl đei Kră Yang dŏng tơgŭm pran kơtang, đei ‘Bok Dŏng Pơklaih iung arih đei mơsêh mơyang, păng đei pơnăr bơwei hơđơ̆ng đơ̆ng Yang ‘Bă, Kră Yang mêm mơnat kơ buăl ling-lang.

Apinh đĭ đăng krao khan hơdai:
Kơ kuh kơ Kră Yang, kon bơnê kơ Ih yua kơ tơdrong bơwei, wei lăng đơ̆ng Ih ăn kơ kon. Kon đei mơn kơ đei Ih oei hơdai, rim trong yak năm, mă loi lăm tơdrong tơnat. Apinh Kră Yang tơgŭm kon băt kơ gơnang lăm tơdrong ‘mêm păng mơsêh mơyang ling-lang đơ̆ng Ih, wă kơ yak năm lăm trong iĕ păng arih hăm tơdrong arih ư-ang anăn Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl hăm oei tơglơ̆m păng tơdrong hơđơ̆ng ‘bơ̆t anăp lu tơdrong tơnat lăm tơdrong arih ‘nâu, dah lăm tơdrong pơlong lăng đon lui lăm trong kiơ̆ Kră Yang ưh? ‘Năr ‘nâu, kơplah buăl yak năm lăm tơdrong tơnat, ‘nĕ kơ hiơt buăl ưh kơ yak năm minh drô̆. Athei kơjăp yak năm thoi kơ Kră Yang wă, păng ‘nĕ kơ hli mă khan đei tơdrong tơnat bơ̆t anăp. Tơpang ti Kră Yang gô ling-lang gô bơrơng buăl yak năm lăm trong kiơ̆ Kră Yang. Dah đei pơ̆k huŏng, athei chă tơdrong tơgŭm đơ̆ng Kră Yang. Hơpơi kơ pơnăr ‘mêm mơnat đơ̆ng Kră Yang pôk tơ iung buăl. Athei đei jơhngơ̆m đon lui kơjăp păng gơnang kơ tơdrong mơsêh mơyang bơwei tôm tơdrong đơ̆ng Yang ‘Bă buăl hŏ!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.