Ồng mò oh mi rơm să ò tú sên ală cau lòt hơđang dô nơm che sơl? Rai kis bol he dê gơs tú kung ceng tus bơta rơm să behớ, digul rai kis òs gơs oă bơta dơrcul lơnggơr. Mơya la cau dòn Yàng, bol he ò tòm dră mơ ală bơta hớ dô nă, bơh he òs gơs Yàng ơm bal mơ sên gar he. Kơnrẵn rơp tề lam he tòm ală gung lòt kal ke rlau jơh.

Ngai do, ngai 15/01/2025, Rơndap Bơta Hòi Dăn Kờp Ngai hòi jà ồng mọ oh mi kơlôi sơnơng Jơnau Yàng dê bal mơ ồng Andrew Murray bơh tơnggume CƠNĐOÀ LÒT TÒM GUNG WỀT.

“Bơh cau song ring bulah gơplơ̆ poh dơ̆, bol khai kung rơp guh wơl” (Jơnau Pơnđik 24:16)

Kòp nam, hiu nhă ẵn jê òs lòi tú jơ nàng lòt sền bơta lơh krơi bal. Ală kẹo, ală bãn tơngòi, mơ kơno cau tàp tê lơh ẵn in chò ngan, kơp gơn.

Tòm hơđang hớ, ală cau lơh bơta hớ rang tơlik bơta chài rgơi, sơnđoh gan bơh ală wil dơng. Ală bơta hớ gơlik dô dớ tòm 3 wil pha is, lơh ẵn in pal sền nền nề mơ ò sên mat bơh ală bơta do.

Tơnớ hớ, ală kon so ntoat jat dô bă lơbơn niam, sơnđoh gan wil mơ lòt mơ bàr nơm jơng lài. Bơta do lơh ẵn in nhõ.

Mơya, ẵn pal đơs ngan lah bơta lơh ẵn in rngoh rngac rlau jơh hớ lă lòt hơđang dô nơm che. Bơh sơnròp, bơta do đuôn ngan, cau hớ lòt hơđăng jơnhoa dô nơm che.

Kòp nam, bơta do sơlo ngai sơlo niam tú gơs bàr nă cau lòt bal hơđang che hớ. Bol khai kung ngui ală phan pal cang hala hao rơndeh choh hơđang che hớ.
Bulah la bơta lơh her cau in sên lơm, ẵn rơm să ngan mơ nggui digal cơnong nggui nàng sên cau lòt. Tú cau hớ khai mòr tus, ẵn ăt nhơm tă. Tú gai khai ceng lơnggơr kiau ma hala khai ơm ò lòt tai, dô nơm jơng ơn hơđang che hala khai kun bồ nàng lơh ring wơl, ẵn tă nhơm mơ hòi dan khai in.

Ẵn kah tus dô nă cau lơh behớ mơ gơplớ, cau driau “A…A…A” bơh digul oă cau. Bol he tap te tú sên gó khai ntao wơl bè dô nă cau neh pha, khai ntao tê dô bă hòn chò mơ ntoat mhar mơ sơntòm wơl. Bol he kơp kỡn dớ dô khai rơp tuh tơnggu. Tơnớ hớ, bol he tap tê mơ nggà driau dô bă chò hòp chò hòn.

Gơs tú gung lòt jat Yàng kung behớ sơl. Bơta pha is la bol he sền mơ sên gó ală cau ơm sền he chò hòp, mơ ẵn ơnong mơ dơrcul he in. Ală bơta tus dô bă nisơna, roh rui, gơlong bol glar tòm broă lơh, kal ke tòm pơnah jền priă, hala tú jơ hòi guh ang drim, kung la ală bơta hớ la bơta yal lài bol he in git bol he pal lòt gan “ală che” tòm rai kis he dê.

Mơya, la cau dòn Yàng, bol he gơs dô pơnah dong kơl dơng. Digơlan la ală cau lơh bơta chài mơ krơi is gơs bơta chài rgơi kơnòm di bơta bơtê bol glar kòp ngai mơ ală bơta dong kơl ring bal bal mơ bơta chồl bơtrut bơh di ală cau ơm sền.
Mơya tú mơ gó lơbơn lơnõ rlau jơh, bol he gơs dô pơnah dong kơl dơng ngan. Hớ la bol he gơs Yàng Hwềng Goh, Bơtau Dong Kơl sum ơm bal mơ bol he, tề lam bol he lòt gan gung wềt mơ Kơnrẵn neh wàs lai.

Kơnrẵn ceng wơl bơta ring bal tòm rai kis he in dong he ntào kớ mơ gơchồt. Tú rai kis kup bol he pal pleh tòm dô nơm gung pha is, bol he sùm gơs bơta tề lam la Jơnau Yàng nàng lam gung he.

Rlau mơ hớ tai, bol he kung gơs dô Bơtau Dong Klàs la Yàng Jesus, Kơnrẵn ai bol he in bơta jak chài mơ tề lam bol he bơh ală gung lòt bêng bơta bol glar.

Mơya dilah bol he lơh roh bơta ring bal mơ gơchồt gen lơh mbe lơi taih?
Jơnau Pơnđil 24:16 cih lah: “Bơh cau song ring bulah gơplơ̆ poh dơ̆, bol khai kung rơp guh wơl.”

Ẵn dòn lah tòm kwar tê bơta kỡn gơboh Yàng Tòm Trồ dê rơp la dô nơm tiah niam yò đo he, dong he ntao, yò te tòm bơta hòn chò mơ pơnjat gung lòt he dê.
Tú tìp bơta gơlong bol glar tòm rai kis, ntào kớ té mơ cơnđoà lòt tòm gung mơ Yàng neh tề lam he. Bẵn rngòt bơh ală bơta gơlong bol glar mơ Kơnrẵn ai gơnoar tus.

Chò hòp té bơh ồng mò oh mi gơs dô Bơtau Dong Kơl pràn kơldang, dô Bơtau Dong Klàs neh kis wơl, bêng gơnap gơnoar, mơ tơwor tê sên gar lơngap lơngai Bèp Đàn Trồ, Bơtau sum kỡn gơboh ồng mò oh mi.

Dan jà bol he dô nùs bal tòm bơta hòi dan:
Khoai Yàng, kon ưnngai Kơnrẵn bơh bơta sên gar, jơm gom mơ Kơnrẵn òs ai kon in. Kon dòp git bơta gơs mat Kơnrẵn dê tòm kòp cơnđoà, hơđang rlau jơh la ală bơta gơlong bol glar mơ dơrcul lơnggơr. Dan Yàng dong kon sơlo ngai sơlo dòn kơnòm tòm bơta kỡn gơboh ò tú lơi jơh Kơnrẵn dê, nàng kừ cơnđoà lòt tòm gung wềt mơ kis dô rai kis jong rơ sơnđan Kơnrẵn. Kon hòi dan tòm sơnđan Yàng Jesus Krist, Amen.

Ơ ală ồng mò oh mi kỡn gơboh, ngan tòm rai kis ồng mò oh mi dê kòp ngai kung gơs tú pal gơs bơta ring bal tòm ală hơta bol glar tòm rai kis do hala ală bơta long tòm bơta dòn tòm gung lòt jat Yàng ồng mò oh mi dê sơl? Ngai do, tú lòt gan ală tú dơrcul lơnggơr, bẵn húi lah ồng mò oh mi ò ơm is ò. Kừ cơnđoà lòt jat nùs kỡn Yàng dê, mơ bẵn rngòt bulah gam gơs ală bơta bol glar hơđap. Mpàng tê Kơnrẵn dê rơp sum tề lam ồng mò oh mi cơnđoà lòt tòm gung jat Yàng. Mơ dilah gơs bơta gơtup pừ, jòi té bơta dong kơl bơh Yàng. Dan mpàng te niam lơn hơn Kơnrẵn dê rơp yò đo ồng mò oh mi. Kớ nùs té mơ dòn kơnòm di gơnap gơnoar jơm gòm wil tơl Bèp Đang Trồ dê, ồng mò oh mi yơ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.