Tơdrong arih kơpal teh ling lang ‘bĕnh kơ dôm tơdrong pơmat tat, pơlong lăng, păng dôm lu tơdrong pơm kơ kon bơngai bơ̆n đei tơdrong gleh lap, bơ̆l hăl. Mă lei, dôm lu bơngai mă Kră Yang rơih păng dŏng pơklaih, lu bơ̆n ling lang lui ngeh kơ tơdrong ư-ang păng mơsêh mơyang đơ̆ng Kră Yang ăn kơ bơ̆n kơplah arih lăm teh đak ‘nâu. Lei tơdrong ư-ang ‘noh kiơ? Păng pơm liơ wă kơ băt mơn kơ đei tơdrong ‘noh?

Năr ‘nâu, ‘năr 16/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Michael Plemmons kơ̆l ‘bai Ư- ANG OEI HLƠP.

“Inh ưh kơ tŭk iĕm thoi kon mơti ôh. Inh gô jur tơ iĕm dơ̆ng.” (Yôhan 14:18)

Lu bơ̆n oei arih lăm teh đak ‘bĕnh kơ dôm tơdrong pơlong lăng, anih rim ‘nu bơngai đei tơ‘bơ̆p hăm tơdrong tơplih ưh kơ pơdơh. Dôm lu tơdrong tơbăt ưh kơ ‘lơ̆ng oei đei hơnơ̆ng pơm kơ lơ bơngai arih lăm tơdrong hiơ̆k tơtăm păng ưh kơ hơđơ̆ng. Tŏk bŏk teh đak hăm lơ tơdrong ưh kơ hơđăl tơpă, lu bơ̆n hăm đei hơmĕng hơyơ ưh?

‘Bar hơbâu hơnăm hơdrol, lăm măng hơdrol kơ Kră Yang Yêsu chu pơ̆ng tơ ‘long pơglang, Sư đei pơma hăm lu jơ̆ng ‘bang khan Sư ưh pă oei hơdai hăm lu sư ling lang. Jơnăr đơ̆ng Kră Yang đei truh bơih, ‘noh bơih trŏ kơ Kră Yang đei lôch tang kơ kon bơngai. Kră Yang băt dôm tơdrong hli păng ơh sơ’ngon đơ̆ng lu jơ̆ng ‘bang, na Kră Yang đei pơkă hăm lu sư:

“Na Inh gô apinh ‘Bă Inh ăn kơ iĕm minh ‘nu dŏng iĕm plơ̆ng dơ̆ng, anăn Sư Yang Bơhngol ‘Lơ̆ng. Sư gô tơbăt ăn kơ iĕm tơdrong ‘Bă Inh tơpă păng Sư gô oei hơdai hăm iĕm ling-lang. Lu bơngai oei ala teh âu mă ưh kơ lui, lu sư ưh kơ gơh sơng iŏk Sư ôh, kơlih kơ lu sư ưh kơ gơh ‘bôh Sư păng ưh kơ băt kơ Sư. Mă-lei iĕm, iĕm băt kơ Sư, kơlih kơ Sư oei păng iĕm, Sư kư̆m gô oei lăm jơhngơ̆m iĕm mơ̆n.“ Inh ưh kơ tŭk iĕm thoi kon mơti ôh. Inh gô jur tơ iĕm dơ̆ng.” (Yôhan 14:16-18)

Ư- ang oei hlơp ‘noh bơih tơdrong tơ‘bôh pơm tơplih tơdrong arih kơ rim bơngai lui kơ ‘Bok Krist. Kơplah lu bơ̆n krao Sư bơih Kră Yang, păng Sư bơih ‘Bok Dŏng Pơklaih lu bơ̆n, Yang Bơhngol ‘Lơ̆ng Sư gô tơplih jơhngơ̆m păng chăl arih lu bơ̆n, chhŭt rơgoh lu bơ̆n đơ̆ng dôm tơdrong yoch. Pơtơm blŭng a đơ̆ng jơ ‘noh, Sư oei hơdai lăm chăl arih lu bơ̆n. ‘Noh bơih ư- ang oei hlơp mă Yang Bơhngol ‘Lơ̆ng ăn kơ rim ‘nu bơngai mă lui păng sơng iŏk Kră Yang năr ‘nâu.

Lu bơ̆n gô sơng iŏk tơdrong mơsêh mơyang kơplah đei Yang Bơhngol ‘Lơ̆ng oei lăm jơhngơ̆m. Tơdrong mơsêh mơyang ‘noh tơ‘bôh hơđăl dêh lăm lu bơngai bu đei tơpŭ ming ‘nao yua kơ Kră Yang Dŏng Pơklaih.

Inh đei ‘blŏk kơ dôm tơdrong đêl đei mơn bơih gah pơhngol inh, kơplah Yang Bơhngol ‘Lơ̆ng bơtho tơ‘bôh kơ inh hăm dôm trong lăm Sơ̆p Hla Bơar nơ̆r ‘Bok Kei-Dei. Kŭm lơ wơ̆t Kră Yang đei yua lu đĭch đam Sư wă tơ‘blŏk kơ inh gah tơdrong Kră Yang wă. Jơhngơ̆m păng chăl arih pơhngol inh mơn đei tơplih tơpă bơih!

Yang Bơhngol ‘Lơ̆ng đơ̆ng Kră Yang kŭm tơplih lu bơ̆n hăm dôm lu tơdrong tơ lăm chăl arih. Lu bơngai lui kơ Kră Yang, lu bơ̆n lui ngeh dôm tơdrong truh kơ lu bơ̆n ưh kơ sĭ hmă đĕch ôh , mă lei ‘noh lăm tơdrong Kră Yang wă. Yang Bơhngol ‘Lơ̆ng đơ̆ng Kră Yang năm hơdai păng chông anhăk lu bơ̆n lăm rim jơ phŭt, lăm rim năr. Lăm jơ chơt hiôk dah jơ hơnat hơnot, Kră Yang oei hơdai hăm lu bơ̆n. Kơplah mĭnh ‘nu bơngai krao chă Kră Yang lăm tơdrong pơmat tat sư, ‘noh bơih kơplah nơ̆r pơma đơ̆ng Kră Yang truh tơ jơhngơ̆m lu sư, chhŭt đak măt păng pơm pơhơi đĭ dôm lu tơdrong hli, ưh kơ hơđơ̆ng. Lăp mĭnh Kră Yang bơih Tơ’ngla ‘bĕnh kơ tơdrong gơh hơgei, pơlung hloi păng bơtho tơ‘bôh kơ lu bơ̆n lăm jơ’năr đei wă.

Mă arih tŏk bŏk lăm jơhnơr pơmat tat đơ̆ng teh đak, lu bơ̆n băt Kră Yang oei jê̆ hăm lu bơ̆n tơpă, mă khan lăm dôm lu năr kơnê̆ dêh. Jơhngơ̆m Kră Yang ‘mêm mơnat kơ lu pơhngol oei pŭ tơdrong pơmat tat. Khŭl bơngai lui kơ Kră Yang bơih hơnih mă kon bơngai gơh chă ‘bôh tơdrong hơmĕng kơ chăl arih hơdai hăm tơdrong tơplih. Bơngai lăm khŭl Bơngai Lui, lu bơ̆n kăl kơ chĕp ba kơ teh đak tơdrong hơmĕng ‘noh, yua kơ Yang Bơhngol ‘Lơ̆ng Kră Yang đei ‘măn ăn jơhngơ̆m, tơdrong ‘mêm mơnat đơ̆ng Kră Yang kơ lu bơ̆n. Kơplah tơ‘bơ̆p hăm dôm tơdrong pơm pơmat đơ̆ng bơngai ayăt, đon lui ngeh păng kơmĭl đơ̆ng ‘Bok Dŏng Pơklaih bơih tơdrong tơgŭm lu bơ̆n, ăn kơ lu bơ̆n ‘bôh tơdrong kăl tơpă kơ dôm pơhngol jum dăr bơ̆n.

Lu bơ̆n ưh kơ tơ‘bơ̆p tơdrong tơ ning mônh hơdrô̆ bơ̆n yua kơ ư-ang oei hlơp đơ̆ng tơdrong arih păng jơhngơ̆m Sư pơgơ̆r lăm rim ‘nu lu bơ̆n. ‘Nĕ kơ ăn pơ̆k huŏng lăm tơdrong hli krê đơ̆ng dôm năr pơmat tat tơ hơnăp. Tơdrong ‘nâu đei jơ̆ng ‘bang Yôhan păng ‘bok khan lê̆ adrol Đaniel tơ‘bôh hơdrol. Kră Yang Yêsu kŭm đei pơkă mă khan đei tơdrong kiơ truh, Sư oei hơdai lu bơ̆n ling lang.

“Mă-lei lăp Yang Bơhngol ‘Lơ̆ng mă tơbăt ăn kơ iĕm tơdrong ‘Bok Kei-Dei ei truh, Sư bơtho ăn kơ iĕm tôm tơdrong ‘Bok Kei-Dei. Sư ưh kơ bơtho tơdrong Sư kơdih ôh, Sư bơtho iĕm dôm tơdrong Sư kơtơ̆ng đơ̆ng ‘Bă Inh. Sư kư̆m bơtho gah tơdrong ning-mônh mơ̆n.” (Yôhan 16:13)

Apinh đĭ đăng krao khan hơdai:
Kơkuh kơ Kră Yang, Tơ’ngla ‘bĕnh tơdrong mơsêh mơyang păng rang mơnhal. Kon bơnê kơ Ih yua kơ tơdrong dŏng pơklaih mă Ih ăn kơ kon. Kon bơnê Kră Yang đơ̆ng tơdrong oei hơdai păng mơsêh mơyang đơ̆ng Yang Bơhngol ‘Lơ̆ng wă tơplih kon lăm tơdrong ư-ang Ih, wă kơ kon nhen thoi Ih hloh dơ̆ng. Kră Yang ơi, mă arih tŏk bŏk teh đak ưh kơ hơđơ̆ng, kon oei chă ‘bôh tơdrong hơmĕng kơ tơ hơnăp mơsêh mơyang mă Ih ‘măn kơ lu nhôn lăm teh đak Ih. Tŏk bŏk dôm tơdrong pơmat tat gô truh lăm năr tơ hơnăp, apĭnh Kră Yang tơgŭm kơ măt kon lăp lăng tơ tơdrong ‘mêm păng nơ̆r pơkă đơ̆ng Ih. Apĭnh Yang Bơhngol ‘Lơ̆ng tơgŭm kon gơnang păng lui ngeh tơpă lăm nơ̆r Ih, đei hrŭk iŏk tơdrong mơsêh mơyang đơ̆ng Yang Bơhngol ‘Lơ̆ng Ih wă arih đei yua tŏk bŏk lơ bơngai, păng tơ‘bôh ư-ang đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n ưh kơ arih thoi lu bơngai lui kơ ‘Bok Kei-Dei oei bơbôl tŏk bŏk teh đak ‘nâu, yua kơ Tơ’ngla arih lăm lu bơ̆n bơih ‘Bok Dŏng Pơklaih bĕnh tơdrong mơsêh mơyang. Mă chăl arih buăl oei đei thoi yơ, athei ‘blŏk ư-ang păng mơsêh mơyang đơ̆ng Kră Yang ling lang oei hơdai păng pran kơtang lăm lu bơ̆n. Athei chĕp kơjăp nơ̆r pơkă đơ̆ng Kră Yang, wă kơ lu bơ̆n gơh tơ‘bơ̆p hăm dôm năr tơ hơnăp hơđơ̆ng, păng arih tơ‘bôh tơdrong gơh găt kiơ̆ thoi Kră Yang bơtho. Năr ‘nâu, mă đei tơdrong kiơ pơm kơ buăl oei ưh kơ pơ̆n lăm tơdrong tơ‘bôh đon lui kơ dih ah, athei apĭnh Yang Bơhngol ‘Lơ̆ng ăn kơ lu bơ̆n jơhngơ̆m pran wă kơ yak năm pran kơtang thoi dôm lu kon pơlei đơ̆ng teh đak ‘Bok Kei-Dei.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.