Lăm trong yak năm kiơ̆ Kră Yang, ayăt mă lu bơ̆n lăng ưh kơ ‘bôh păng măt ling-lang răp gô wă tơblah hăm lu bơ̆n đơ̆ng lơ pah lơ pang, đơ̆ng lăm tơdrong jang, hnam dơnŏ, đơ̆ng lăm tơdrong tơ‘bưh hăm bôl buăl. Tơdah ưh kơ krăng, lu bơ̆n gô jei kơ ayăt . ‘Noh jơ̆ tơm kơ Kră Yang krao lu bơ̆n wă kơ lu bơ̆n krăng răng, hơmet khêl đao Kră Yang wă kơ dơ̆ng kơjăp păng tơblah kĕ jei lơ tơdrong pơlong lăng.

Năr ‘nâu, ‘năr 17/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Jeff Calhoun kơ̆l ‘bai ATHEI HƠMET WĂ TƠBLAH.

“Thoi noh na bơ̆n athei gơnang kơ ‘Bok Kei-Dei tơgŭm bơ̆n lăm tôm tơdrong, wă kơ bơ̆n đei jơhngơ̆m pran huay kơ hiong răm kơplah bơ̆n đei tơdrong tơblah hăm yang kơnê̆. Bơ̆n athei adrin pơjăng pơjăr dĭng truh năr tôch.” (Êphêsô 6:13)

‘Nơ̆r Kră Yang đei chih lăm Êphêsô 6: 12-13:
“Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu. Thoi noh na bơ̆n athei gơnang kơ ‘Bok Kei-Dei tơgŭm bơ̆n lăm tôm tơdrong, wă kơ bơ̆n đei jơhngơ̆m pran huay kơ hiong răm kơplah bơ̆n đei tơdrong tơblah hăm yang kơnê̆. Bơ̆n athei adrin pơjăng pơjăr dĭng truh năr tôch.”

‘Nâu minh tơdrong hơđal rơđah tơpă: Lu bơ̆n oei tơblah hăm tơdrong tơblah tih.
Sơ̆p hla bơar ‘Bok Kei-Dei lơ wơ̆t pơtih kơ tơdrong arih bơngai lui thoi kơ tơdrong tơblah, kư̆m đei yua rup bơngai linh tơblah pơtih gia kơ tơdrong tơblah lu bơngai lui. Đơ̆ng sơ̆ khơ̆ tơ dang ei, kon pơlei Kră Yang krăng gah akâu akar păng hăm gah pơhngol gô tơ‘bơ̆p tơdrong tơblah. Kơplah lu bơ̆n dan jơhngơ̆m đon lui kơ ‘Bok Dŏng Pơklaih Yang Yêsu păng sơng iŏk tơdrong dŏng pơklaih đơ̆ng Sư, lu bơ̆n kư̆m mơ̆t lăm “ khŭl linh” kơ ‘Bok Kei-Dei.

Hloh kơ tôm tơdrong, lăm chăl ‘nâu, ‘bôh hơđăl Satan sư oei chă tơdrong sư đei gơh tơblah hăm lu kon pơlei Kră Yang. Păng lu bơ̆n, bơngai linh ‘Bok Kei-Dei tih hloh kơ đĭ đăng, athei ling-lang krăng wă tơplah hăm lu ayăt kơ lu bơ̆n. Mă lei bơnê kơ Kră Yang yua kơ Sư hơmet bơih lơ tơdrong ăn kơ lu bơ̆n wă kơ lu bơ̆n kĕ jei lăm tơdrong tơblah ‘nâu.

Lăm Êphêsô 6- lăm sơ̆p hla bơar ‘Bok Kei-Dei ‘nâu đei lơ bơngai lui juăt kơ đŏk, ‘bok Pôl pơma gah pơhngol lu bơ̆n gô tơ‘bơ̆p. Sư krao lu bơ̆n “hơmet tơmam tơblah đơ̆ng ‘Bok Kei-Dei”. Sư gơnhĕk lu bơ̆n wă kơ hlôh hơđăl nơ̆r krao lu bơ̆n yak năm lăm tơdrong tơblah, păng hơmet jơhngơ̆m drơ̆ng iŏk ‘nơ̆r krao ‘noh.

Lơ bơngai yua iŏk lăm sơ̆p hla bơar ‘Bok Kei-Dei ‘nâu nhen thoi nơ̆r pơlung, kư̆m trŏ bơih ‘nơ̆r ‘nâu ba ăn kơ lu bơ̆n tơdrong pôk tơiung tih tơpă. Kư̆m đei, lu bơ̆n hlôh kơ tơmam tơblah đơ̆ng ‘Bok Kei-Dei ‘nâu ưh kơ trŏ, nhen thoi hrŭk ao ‘noh ưh pă đei kiơ wă tơblah hăm lu bơ̆n bơih. Tơdah lu bơ̆n tơchĕng lăng lu bơ̆n dơ̆ng ‘bơ̆t doh, pơma hăm lu ayăt kơ lu bơ̆n thoi âu: “E ưh kơgơh pơrăm inh, inh hrŭk tôm tơmam tơblah bơih!” hlôh thoi noh ưh kơ đei glăi, mă lei ưh kơ tơ‘bôh rơđah kơ tơdrong tơblah kĕ jei ‘noh đơ̆ng ‘nơ̆r lăm sơ̆p hla bơar ‘Bok Kei-Dei lăm chăl ‘nâu.

Đơ̆ng ‘bok Pôl ‘nâu, ‘bôh hơđăl dêh ‘Bok Kei-Dei krao lu bơ̆n hrŭk ao mam ưh kơ sĭ wă bơwei kơdih akâu đơ̆ng ‘noh kơdâu chă ôn đơ̆ng lu ayăt. Tơplih kơ ‘noh, nơ̆r ‘Bok Kei-Dei ‘nâu nhen thoi kơ Yŏng Linh pơma pôk tơiung linh sư– nơ̆r hơpơi krao lu Bơngai Lui krăng wă yak năm lăm tơdrong tơblah gah pơhngol. ‘Nâu tơm kơ tơdrong ‘bok Pôl sư pơma tơ‘bôh kơ lu bơ̆n.

Yua kơ kiơ lu bơ̆n athei hrŭk ao mam, tơdah ưh kơ tơblah? Nhen thoi kơ đei nơ̆r pôk tơiung lu bơngai linh, sư pơma kơnhăm kơ tơdrong trŏ mă lu bơ̆n bơwei, tơdrong kăl kơ đon lui ‘bơ̆t anăp Pơtao mă lu bơ̆n gô bơ̆jang kơ Sư đĭ jơhngơ̆m, tơdrong tơpă gô đei chang hơmĕng: ayăt sư kư̆m pran dêh, mă lei tơblah gô jei lu bơ̆n. ‘Nâu nơ̆r krao hơngap, wă kơ lu bơ̆n băt hơmet hơdrol yua kơ lu bơ̆n bơngai lui kơ Kră Yang oei lăm linh ‘Bok Kei-Dei.

Pha ra kơ đei nơ̆r pơma gah tơdrong tơblah đơ̆ng sơ̆, Nơ̆r Kră Yang tơ‘blŏk kơ lu bơ̆n athei kơ chăng, yua kơ tơdrong tơblah ‘nâu ưh kơ đei layơ pơdơh. Thoi kơ ‘bok Pôl tơ‘blŏk kơ lu bơ̆n: “Păng bơ̆n ‘nĕ kơ hiơt krao khan kơ ‘Bok Kei-Dei, wă kơ bơ̆n hưch hanh kơ tơdrong krao khan ling-lang, gô mơ̆ng kơ Yang Bơhngol ‘Lơ̆ng wă kơ bơ̆n krao khan tơdrong kiơ, krao khan tơgŭm băl tơduă lu kon ‘Bok Kei-Dei dah krao khan kơ tơdrong kiơ nai.” ( trong 18). Sư kư̆m tơ‘blŏk ăn kơ lu bơ̆n ayăt kơ lu bơ̆n ‘noh ưh kơ kon bơngai mă lu lăm gah pơhngol. Lu ayăt ‘noh sư bơ̆jang ưh kơ thoi kon bơngai, sư ưh kơ tep, ưh kơ pơdơh dăh sŏng sa thoi kơ lu bơ̆n wă kơ đei jơhngơ̆m pran. Lu sư ling lang krăng chă tơblah prăt kơ măng prăt kơ ‘năr. Lu sư ling-lang krăng chă pơhlŭ, lu sư kơ chu păng hơrăng kơ̆l dêh, tơblah hăm sư ưh kơ ‘bônh ôh.

Đei hlôi kơ tơdrong yak năm kiơ̆ Kră Yang ăn kơ lu bơ̆n ‘bôh kư̆m đei jơ năr tơblah kư̆m đei jơ năr rơngei- kơplah lu bơ̆n đei hiôk hian tih, ‘noh kơplah Kră Yang ăn kơ lu bơ̆n pơdơh, pơ klaih tơdrong jĭ jăn, ăn tơmam sa, đei jơhngơ̆m pran, minh jơhngơ̆m đon, pran kơtang păng đei lơ tơdrong nai dơ̆ng. Kơplah jơ ‘nâu nhen thoi lu bơ̆n pơm kiơ̆ “Nơ̆r athei pơdơh kơprah brơ̆m” pơdơh ‘biơ̆ đĕch lăm gah pơhngol.

Brei mơsơ̆ ‘nâu, inh kư̆m đei jơnăr thoi ‘noh. ‘Noh ưh kơ sĭ jơ năr pơdơh wă hơmet ming đĕch ôh mă ‘noh pơjuăt hơmet wă tơblah tơ anăp. Kră Yang ăn kơ lu bơ̆n đei jơ năr rơngei ‘nâu wă kơ lu bơ̆n wơ̆ ‘lŏ, wă kơ đei pơjuăt, đei hơmet ming păng đei tơdrong pơklaih wă kơ đei krăng kơ chăng kơ tơ‘bơ̆p tơdrong pơlong lăng tơ anăp.
Đei tơdrong pơtih gia lăm sơ̆p Jôsuê chăl 5, kơ plah Isơrael pơm anih jê̆ pơlei Jêrikô, ‘noh đei kơ tơdrong pơgăn lu sư mơ̆t tơ char Kanaan. Kơplah ‘nâu, lu sư ngeh kơ ‘Bok Kei-Dei athei lu sư tơblah iŏk pơlei ‘noh. Mă lei, Kră Yang athei Jôsuê khan kơ kon pơlei kăt tơdra akar. Kơlih kơ thoi ‘noh, Jôsuê păng kon pơlei sư răp gô klaih kơ jĭ đơ̆ng kăt tơdra akar.

Tơdrong ‘nâu ‘Bok Kei-Dei wă kơplah Sư ăn kơ lu bơ̆n jơ năr lu bơ̆n rơngei. Sư jang tơdrong jang “kăt tơdra akar” lăm pơnghol lu bơ̆n, Sư jang pơkeh đơ̆ng pah lăm hơmet kơ lu bơ̆n wă tơ‘bơ̆p tơdrong tơblah gô truh tơ lu bơ̆n. Kư̆m đei gô pơm kơ lu bơ̆n đei jĭ lăm jơhngơ̆m, mă lei bơ̆n athei chu yom “ tơdrong hơmet gah pơhngol” ‘nâu, sơng iŏk tơdrong jang Yang Pơhngol ‘Lơ̆ng lăm jơhngơ̆m păng lăm pơhngol lu bơ̆n, pơdơh lăm tơdrong hiôk hian đơ̆ng Kră Yang ăn, truh tơ Sư krao lu bơ̆n iung tơblah. Tơdrong ‘nâu kư̆m đei tơnat. Mă lei, tơdah lu bơ̆n chơ̆n jơhngơ̆m chu yom Kră Yang lăm jơ năr rơngei, lu bơ̆n gô jing bơngai linh “ ling-lang kĕ jei” lăm anih tơblah gah pơhngol đei đơ̆ng Kră Yang pơtho tơ‘bôh. Lu bơ̆n gô đei mơn kơ jê̆ Kră Yang hloh yua kơ tơdrong bơ̆jang mơsêh mơyang đơ̆ng Kră Yang oei jang lăm tơdrong arih lu bơ̆n.

Brei mơsơ̆ inh đei hlôi mơn bơih kơ tơdrong ‘nâu, inh ‘bôh nơ̆r ‘Bok Kei-Dei ‘nâu kăl tơpă, trŏ kơ tơchĕng pơwao mă jrŭ hloh. Inh đei ‘bôh ưh kơ sĭ layơ kư̆m chĕp ba tôm tơmam tơblah ‘Bok Kei-Dei rim jơ rim anih. Inh kư̆m đei ‘bôh inh tim mă pơnam lăm tơdrong krao khan păng chă Kră Yang lăm jơ năr rơngei, trŏ kơ inh pơm ră. Kơplah inh hŭt lê̆ tơdrong krao khan păng chă Kră Yang rim năr, lu bơ̆n ‘bônh kơ rơdu păng gô kơdrăt kơ ayăt blah, thoi kơ blah gah pơhngol. Thoi ‘noh, tơdrong jang lu bơ̆n athei ling-lang kơ krăng păng chĕp tôm tơmam tơ‘blah đơ̆ng ‘Bok Kei-Dei.

Apinh đĭ đăng krao khan hơdai:
Kon kơ kuh kơ Kră Yang Tơ‘ngla kơ tơdrong arih kon! Kră Yang ơi, kon băt kon oei lăm tơdrong tơblah pơmat tat. Bơnê kơ Ih ăn kơ kon tơmam tơblah wă kơ dơ̆ng kơjăp păng năm tơblah. Kơplah lăm jơ năr rơngei ‘nâu, apinh Kră Yang tơgŭm kon hoĕi kơ hiơt kơ krao khan păng chă Ih, dah tơdrong pơlong lăng truh kon oei kơjăp lăm jơhngơ̆m pran đơ̆ng Ih ăn. Hơpơi kơ Ih ăn đei đon gơh hơgei, pran kơtang păng hiôk hian, wă kơ jing bơngai linh khŭl tơblah lăm ‘Bok Kei-Dei. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl oei lăm năr pơdơh hiôk, tơdrong jang tơproh ‘lơ̆ng hă? Athei bơnê kơ Kră Yang, krao khan, pơdơh păng chă Kră Yang ling-lang. Kư̆m athei bơwei jơhngơ̆m krăng kơ lơ tơdrong wă tơblah đơ̆ng ayăt kơ đon lui lu bơ̆n. Tơdah buăl oei tơblah gah lăm pơhngol, athei kiơ̆ kơ ‘Nơ̆r Kră Yang bơtho, athei hrŭk iŏk lu tơmam tơblah gah pơhngol. Lu bơ̆n kăl kơ ling-lang krăng, ưh kơ sĭ kơplah tơblah đĕch ôh kư̆m kơplah lu bơ̆n rơngei đơ̆ng Kră Yang ăn. Athei ling-lang kơ grăng păng kơjăp, yua kơ lăm tơdrong tơblah ‘nâu, Kră Yang đei hơmet bơih tôm tơdrong mă lu bơ̆n kăl wă kơ kĕ jei ăn kơ dêh char Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.