Lu bơ̆n đei krao athei hơmet wă kơ krăng răng tơblah yua kơ ayăt kơ lu bơ̆n krưp tơpă. Tơdrong lu bơ̆n kăl kơ hơmet ‘noh tơmam tơblah đơ̆ng ‘Bok Kei-Dei. Athei hơdai chă lăng wă kơ băt tơdrong tơm gĭt đơ̆ng rim kơ chăl lăm “tơmam tơblah đơ̆ng ‘Bok Kei-Dei”, wă kơ đơ̆ng noh lu bơ̆n đei hrŭk iŏk păng gơh kĕjei lăm tơdrong tơblah gah pơhngol kơ tơdrong ư ang đơ̆ng ‘Bok Kei-Dei lu bơ̆n.

Năr ‘nâu, ‘năr 18/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Kathy Schultz hăm kơ̆l ‘bai TƠMAM TƠBLAH ĐƠ̆NG ‘BOK KEI-DEI.

“Kơplah bơ̆n oei tơblah, bơ̆n athei dơ̆ng kơtă anih hloi, gơhret tơlei tơ̆n bơ̆n mă kơjăp; noh wă pơtih gia kơ bơ̆n đei đon tơpăt bơih. Bơ̆n athei hrŭk ao mam wă pĕng akâu bơ̆n; noh wă khan bơ̆n athei pơm ‘lơ̆ng kơ đe. Jơ̆ng bơ̆n trô̆ chơkhŏ; noh wă pơtih gia kơ jơ̆ng bơ̆n pơnam kơ nơnăm chă ră roi kơ đe tơdrong ‘lơ̆ng, tơdrong hiôk. Athei chĕp khêl ling-lang wă tang akâu bơ̆n hli kơ ‘brơ̆m ŭnh yang kơnê̆ prah ‘bơm bơ̆n; ‘noh wă pơtih gia kơ bơ̆n athei kơchăng hli kơ bơ̆n đei tơdrong pơhlŭ wă kơ bơ̆n oei kơjăp lăm tơdrong lui. Bơ̆n athei yơ̆l môk kơlăm; ‘noh wă pơtih gia kơ bơ̆n gơnang kơ ‘Bok Kei-Dei pơklaih bơ̆n đơ̆ng tơdrong yoch. Athei iŏk chĕp đao han đơ̆ng Yang Bơhngol ‘Lơ̆ng ăn; ‘noh wă pơtih gia kơ bơ̆n, athei bơ̆n iŏk nơ̆r ‘Bok Kei-Dei tơbăt ăn kơ đe.” (Êphêsô 6:14-17)

Hăm đei layơ buăl tơchĕng lăng “tơmam tơblah đơ̆ng ‘Bok Kei-Dei” tơpă ‘noh kiơ?” dah ưh?

Inh tơchĕng ‘nâu lăp mĭnh tơdrong tơm hmă đĕch thoi lơ bơngai lui kơ ‘Bok Kei-Dei đei tơchĕng. Trŏ, ‘noh bơih mĭnh rup tih gia ‘lơ̆ng dêh, mă lei inh mơn ‘bôh lơ bơngai lăng sư ‘noh nhen mĭnh rup chhơ̆ tơ’bôh hmă đĕch. Tơpă, inh lui ngeh ‘noh “tơmam tơblah đơ̆ng ‘Bok Kei-Dei” ‘noh bơih đĭ mĭnh tơdrong juăt lăm tơdrong arih.

Lăm kơthơ gơih kơ bơngai lui tơ Êphêsô, ‘bok Pôl đei pơ‘lơ̆ng lăm tơdrong rơih iŏk nơ̆r păng rim kơ chăl đơ̆ng tơmam tơblah hăm lu tơmam tơ kơpal akâu jăn. Rim kơ chăl tơmam tơblah đei pơtih kơ mĭnh tơdrong tơpă pơhngol gĭt kăl păng ‘bĕnh mơsêh mơyang. Yua kơ ayăt lu bơ̆n tơ‘bơ̆p ‘noh dôm tơdrong jang păng pơgơ̆r pơhngol, ưh kơ gah teh đak ‘nâu, na dôm lu tơmam tơblah lu bơ̆n yua wă tơblah kŭm kăl kơ yua gah pơhngol.

Hơdrol hloh, ‘bok Pôl đei bơtho tơ’bôh kơ lu bơ̆n “gơhret tơlei tơ̆n bơ̆n mă kơjăp; noh wă pơtih gia kơ bơ̆n đei đon tơpăt bơih” (Êphêsô 4:14). Anih tơlei tơ̆n bơih ‘bơ̆t klak păng kơiĕng, anih mă đĭ đăng lu hlŭng, klak păng anih pơjing chek lar. Nhen thoi ‘bok Pôl đei wă pơma ‘noh kơ lu bơ̆n kăl “sa luăn” tơdrong tơhlôh, ‘noh wă khan Nơ̆r Kră Yang, yua kơ tơdrong ‘noh gô bơwei hơdrĕch hơdrŭng kơ lu bơ̆n, đĭ lu kon hơ‘lơ̆p păng đĭ hloi dôm jơhnơr ning mônh. Kơplah arih păng lui kơ tơdrong tơpăt đơ̆ng ‘Bok Kei-Dei, lu bơ̆n gô đei bơwei kon sâu lu bơ̆n.

Lăm jơhnơr ‘bok Pôl, tơlei tơ̆n đei tơdrong yua wă bơwei lu chăl pha đơ̆ng tơmam tơblah pơklep kơjăp dih băl. Tơdah lu ayăt gơh kăt tơlei tơ̆n, đao gô huŏng tơteh, păng ao mam kŭm rơhơi, ưh kơ gơh bơwei bơngai hrŭk. Kŭm thoi ‘noh, “hơnih ming tơmam tơblah pơhngol” kơ lu bơ̆n đĭ đăng kŭm gah lăm tơdrong tơpăt đơ̆ng ‘Bok Kei-Dei. Hloh kơ ‘noh, kơplah oei tơ̆n tơlei tơ̆n hăm tơdrong tơpăt, lu bơ̆n gô hơnat kơ huŏng lăm dôm tơdrong pơhlŭ đei ‘bơm truh tơ lu tơdrong kăl lăm akâu ‘nâu.

Pơtrơp, lu bơ̆n kăl “hrŭk ao mam wă pĕng akâu bơ̆n; noh wă khan bơ̆n athei pơm ‘lơ̆ng” (Êphêsô 6:14). Pơma wă kơ ‘bônh, ‘lơ̆ng tơpăt ‘noh bơih lui păng pơm dôm tơdrong trŏ lăp. Kiơ̆ kơ tơblang, ‘lơ̆ng tơpăt đei tơdrong tơm ‘noh “pơm tơdrong trŏ hăm tơdrong juăt gĭt kăl dah jơhngơ̆m kon bơngai”. Tơdrong “‘lơ̆ng” păng tơdrong ‘trŏ” ưh kơ sĭ rim jơ ayơ kŭm lơ lăi. Sơ̆p Hla Bơar ‘Bok Kei-Dei đei chih, đei lu trong năm lăng nhen ‘lơ̆ng lăm măt kon bơngai, mă lei tuch luch đei chông năm tơ tơdrong pơrăm.

Ao mam tơgŭm bơwei jơhngơ̆m, păng arih lăm tơdrong ‘lơ̆ng tơpăt ưh kơ sĭ ‘noh pơdrơ̆ng đon tơchĕng, mă ‘noh bơih tơdrong pơtơ̆p gah pơhngol. Ao mam đei bơwei plei nuih, anih lu bơ̆n dui păng tơlĕch jơhngơ̆m ‘lơ̆ng tơpăt Kră Yang ăn.
‘Bok Pôl pơtho tơ’bôh kơ lu bơ̆n dơ̆ng “trô̆ chơkhŏ; noh wă pơtih gia kơ jơ̆ng bơ̆n pơnam kơ nơnăm chă ră roi kơ đe tơdrong ‘lơ̆ng, tơdrong hiôk.” (Êphêsô 6:15). Tơdrong ‘nâu đei tơdrong tơm ‘noh arih kiơ̆ kơmĭl ‘Bok Dŏng Pơklaih Kră Yang Yêsu păng pơchrang Tơdrong ‘Nao ‘Lơ̆ng- Tơdrong tơ’bôh gah tơdrong dŏng pơklaih lăm pham Kră Yang. Lu bơ̆n đei krao “yak năm” hăm Kră Yang Yêsu hăm tơdrong hŏk pơhrăm păng arih kiơ̆ dôm tơdrong Kră Yang đei pơm bơih.

“Yua đon lui pơm khêl” (Êphêsô 6:16) ‘noh bơih mĭnh tơdrong ‘bônh kơ hlôh mă lei kăl tơpă. Đon lui bơih tơdrong tơm kăl wă pơjing tơdrong tơ‘bưh hăm Kră Yang, ‘noh bơih khoă chông năm tơ tơdrong dŏng pơklaih, tơdrong pơklaih păng rơngei. Đon lui bơwei lu bơ̆n hlôi kơ dôm wơ̆t blah tơgar đơ̆ng ayăt.

Mă lei, đon lui ưh kơ sĭ ‘noh bơih tơdrong huei kơ răm. Nhen thoi khêl, đon lui kăl kơ đei bơwei păng hơmet hơnơ̆ng lăm tơdrong krao khan, tơ‘bưh hơdai păng pôk tơiung đơ̆ng khŭl bơngai lui. Khêl đei pơtih gia kơ jơhngơ̆m chu yom đơ̆ng lu bơ̆n hăm Pơtao- ‘Bok Kei-Dei, păng ‘noh bơih kŭm nơ̆r tơbăt kơ ayăt băt ‘noh lu bơ̆n gah Kră Yang.

Tơdrong Dŏng pơklaih bơih tơdrong rơngei đơ̆ng tơdrong yoch, rơngei đơ̆ng kơtul kơwao păng tơdrong tơchĕng ưh kơ đei tơpă, ‘noh bơih đei yua đơ̆ng tơdrong đĭ jơhngơ̆m dan tơdrong lui ngeh tơ lăm ‘Bok Kei-Dei. “Môk đơ̆ng tơdrong dŏng pơklaih” (Êphêsô 6:17) pơtih kơ tơdrong lu bơ̆n pơjao đon tơchĕng bơ̆n tơlăm tơdrong pơgơ̆r đơ̆ng ‘Bok Krist. Kơplah pơm tơdrong ‘nâu, lu bơ̆n ling lang bơwei kơ tơdrong tơchĕng bơ̆n gah Kră Yang păng tơdrong jang mă Kră Yang pơjao kơ lu bơ̆n.

Tuch luch ‘noh “đao han đơ̆ng Yang Bơhngol ‘Lơ̆ng” (Êphêsô 6:17), ‘noh bơih Nơ̆r Kră Yang. Nơ̆r Kră Yang ưh kơ sĭ đei chih lăm Sơ̆p Hla Bơar ‘Bok Kei-Dei mă lu bơ̆n oei đŏk, mă ‘noh bơih tơdrong wă păng nơ̆r krao chă đơ̆ng ‘Bok Kei-Dei đei tơ‘bôh lăm chăl arih lu bơ̆n đơ̆ng Yang Bơhngol ‘Lơ̆ng. Đao bơih tơmam tơblah kăl hloh mă ‘bok Pôl đei pơma, ‘noh bơih tơmam wă pơm tơ‘bôh tơdrong ‘lơ̆ng tơpăt đơ̆ng Kră Yang păng blah pơrăm ayăt.

Trŏ tơpă lu bơ̆n oei tŏk bŏk lăm tơdrong tơblah, mă lei ‘nĕ kơ hli tơrơ. ‘Bok Kei-Dei đei hơmet kơ lu bơ̆n dôm lu tơmam wă pĕng păng blah pran kơtang hloh. Athei nuih kơtang, hrŭk iŏk tơmam tơblah rim năr, yua kơ kĕjei gah lu bơ̆n lăm ‘Bok Krist!

Apinh đĭ đăng krao khan hơdai:
Kon kơkuh kơ Kră Yang bơih Pơtao kơ chăl arih kon. Kon bơnê kơ Ih đei hơmet kơ kon dôm tơmam tơblah wă kơ kon gơh dơ̆ng kơjăp lăm tơdrong tơblah gah pơhngol ‘nâu. Apĭnh Kră Yang bơtho tơ‘bôh kơ kon yua dôm lu tơmam tơblah đơ̆ng Ih gơh hơgei, wă blah pơrăm dôm lu tơdrong chă đon đơ̆ng ayăt păng wă kơ ư ang anăn Ih. Mă khan kon đei tơ‘bơ̆p hăm lơ tơdrong pơlong lăng, apĭnh Ih ling lang ăn kơ kon jơhngơ̆m pran păng jơhngơ̆m nuih. Kon lui ngeh lăm ‘Bok Krist, kon gơh kĕjei yua kơ tơdrong mơsêh mơyang đơ̆ng Ih. Kon kŭp kơ̆l krao khan hăm anăn Yang Yêsu Krit, A-men.

Ơ lu bơngai mơ̆ng mă ‘mêm kơ eng, chăl arih kiơ̆ Kră Yang kơ rim bơngai lui kơ ‘Bok Kei-Dei ‘noh bơih mĭnh tơdrong tơblah pơmat tat, mă lei lu bơ̆n ưh kơ tơblah mĭnh drô̆ lăm tơdrong tơblah tih krưp dêh ‘nâu. ‘Bok Kei-Dei đei hơmet kơ lu bơ̆n tơmam tơblah kăl tơpă wă kơ dơ̆ng kơjăp păng kĕjei.

Buăl đei hrŭk iŏk tôm dôm lu tơmam tơblah gah pơhngol ưh dah oei đei tơmam tơblah ayơ buăl tim mă hơmet kơ kơdih? hăm đei tơmam tơblah gah pơhngol ayơ đei rơdu rơmơ̆n, ưh pă pran dah đei hiơt bơih lăm dôm khei năr đei hlôi ưh? Tơdrong tơdă Amăn Jơ Krao Khan Rim Năr pơlung tơiung buăl ‘măn jơnăr lăng đêl dôm tơmam tơblah gah pơhngol đơ̆ng kơdih kâu kiơ̆ nơ̆r Kră Yang bơtho. Athei tơ̆n tơlei tơ̆n tơdrong tơhlôh, hrŭk ao mam tơdrong ‘lơ̆ng tơpăt, trô̆ chơkhŏ pơnam kơ nơnăm chă ră roi kơ đe tơdrong ‘lơ̆ng, tơdrong hiôk, ling lang yua đon lui pơm khêl, yơ̆l môk kơlăm đơ̆ng tơdrong dŏng pơklaih păng chĕp đao han đơ̆ng Yang Bơhngol ‘Lơ̆ng. Yua kơ kĕjei tuch luch gah lu bơ̆n lăm ‘Bok Krist, păng Sư gô ling lang năm hơdai lu bơ̆n lăm rim tơdrong tơblah.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.