Peb tau hu los npaj kom txhij yuav tawm tsam vim peb tus yeej ncuab yog ib tug uas heev heev. Yam peb yuav tsum npaj yog Vajtswv tej cuab yeej. Koom nrhiav lub ntsiab ntawm txhua feem cuab yeej no nyob hauv “Vajtswv tej cuab yeej”, kom dhau ntawd, peb thiaj hnav thiab kov yeej nyob rau hauv ntsus kev tsov rog ntawm sab ntsujplig ua rau Vajtswv tau koob meej.

Hnub no, yog hnub 18/01/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Schultz dhau ntawm Zaj kawm VAJTSWV TEJ CUAB YEEJ

“Yog li ntawd nej yuav tsum npaj tos. Cia li muab Txojlus tseeb los ua siv sia, muab kev ncaj ncees los ua daim hlau thaiv hauvsiab. Thiab nej yuav tsum muaj lub siab kub lug mus qhia Txojmoo Zoo uas hais txog txojkev kaj siab los ua khau rau. Nej yuav tsum niaj hnub tuav txojkev ntseeg thaiv nej ib yam li nej tuav daim hlau thaiv hniav ntaj. Yog nej ua li ntawd, nej yuav tua tau dab Ntxwgnyoog xibxub hluavtaws uas nws tua tuaj. Cia li muab txojkev dim txim uas Vajtswv pub rau nej lawm coj los ua kausmom hlau ntoo. Thiab muab Vajtswv Txojlus uas Vajtswv tus Ntsujplig pub rau nej coj los ua rab ntaj” (Efexaus 6:14-17).

Puas muaj zaum twg koj xav saib “Vajtswv tej cuab yeej” yog tus dabtsi tiag lawm tau?” lossis tsis tau xav txog?

Kuv tsis xav tias ntawm no yog ib lub ntsiab lus yooj yim ib yam li ntau tus ntseeg Vajtswv ib txwm xav. Yog, nws yog ib qhov piv txwv zoo, tiamsis kuv pom muaj ntau tug tsuas saib zoo li ib daim duab piv txwv xwb. Tseeb tiag, kuv ntseeg tias “Vajtswv tej cuab yeej” yog ib txoj kev ua neej.

Nyob hauv tsab ntawv xa rau cov ntseeg Efexaus, Paulus ua tib zoo npaj zoo zoo thaum siv lo lus los dhos rau txhua yam cuab yeej ntawm tib neeg lub cev. Txhua yam cuab yeej ntawd puav leej sawv cev rau ib qhov tseeb ntawm sab ntsujplig tseem ceeb thiab muaj hwjchim. Vim tus yeebncuab uas peb ntsib yog lub hwjchim thiab tej hwjchim sab ntsujplig, tsis yog nyob rau hauv ntiajteb no, yog li tej cuab yeej uas peb siv los tawm tsam kuj yuav tsum yog cov cuab yeej ntawm sab ntsujplig.

Ua ntej, Paulus ntuas peb “siv sia uas yog qhov tseeb” (Efexaus 6:14). Txoj siv sia nyob rau ntawm ntu qab plab thiab lub duav, yog ntu uas ntim tag nrho lub plab, tej nyuv thiab tseem yog qhov chaw xeeb tub xeeb kiv. Cuag li Paulus xav hais kom peb yuav tau “noj” qhov tseeb, uas yog Vajtswv tej lus, vim qhov no yuav tiv thaiv peb caj ces, uas yog peb tej menyuam thiab ntau tiam tom ntej. Thaum ua lub neej thiab ntseeg qhov tseeb hauv Vajtswv, peb yuav tiv thaiv tau peb caj ces.

Nyob rau Paulus tiam, txoj siv yog siv los tuav txhua yam cuab yeej kom sib khawm tau ruaj ruaj ua ke. Yog yeebncuab txiav tau txoj siv no, rab ntaj yuav poob hauv pem teb, lub tshob thaiv kuj tsis ruaj, yuav tiv thaiv tsis tau tus neeg hnav lawm. ib yam li ntawd, nyob rau hauv peb qhov chaw rau “tej cuab yeej sabntsujplig” kuj yog vam khom tag nrho rau Vajtswv uas yog qhov tseeb. Tsis tas li ntawd, thaum txojsiv uas yog qhov tseeb tau muab los sia kom ruaj, peb yuav tsis raug ntxeev ntxias mus rau ntawm tej qhov chaw phomsij no.

Txuas ntxiv, yuav tau hnav “lub tsho thaiv uas yog kev ncaj ncees” (Efexaus 6:14). Hais kom yooj yim, kev ncaj ncees yog ntseeg thiab ua raws li tej uas yog. Raws li phau ntawv teev tej lus nyuaj, lo lus ncaj ncees muaj lub ntsiab tias “ua kom phim raws li txojcai dawbhuv lossis raws li tib neeg kev ua zoo”. Yam “zoo” thiab yam “yog” tsis yog thaum twg twb zoo tib yam. Vajluskub sau ntxiv, muaj tej txoj kev saib cuag li nws zoo raws li tib neeg pom, tiamsis thaum kawg ho coj mus txog rau kev puas tshuaj.

Lub tsho thaiv yuav pab tiv thaiv lub siab thiab ua lub neej nyob rau hauv txoj kev ncaj ncees tsis yog tsuas yog kev txiav txim siab ntawm lub hlwb xwb, tiamsis tseem yog txoj kev xyaum ntawm sab ntsujplig. Lub tsho thaiv tseem tiv thaiv lub ntsws, qhov chaw uas peb haus pa mus thiab tso tawm Vajtswv txoj kev ncaj ncees uas Vajtswv pub.

Paulus ntuas peb ntxiv “rau khau uas yog Txojmoo Zoo” (Efexaus 6:15). Qhov no muaj lub ntsiab tias ua raws li Tswv Yexus tus qauv thiab tshaj tawm Txojmoo Zoo – yog lub ntsiab lus txog Tswv Yexus txoj kev cawmdim dhau ntawm Nws cov ntshav. Peb tau hu kom “txhais ruam” nrog Tswv Yexus mus dhau los ntawm kawm thiab ua raws li tej uas Tswv Yexus tau ua lawm.

“Siv kev ntseeg ua hmuv” (Efexaus 6:16) yog ib yam uas yooj yim nkag siab tiamsis nws ho tseem ceeb kawg nkaus. Kev ntseeg yog yam tseem ceeb los tsim kom muaj kev sib raug zoo ua ke nrog Vajtswv, yog tus yaum sij coj peb mus txais tau kev cawmdim, tau kho zoo thiab tau tso dim. Kev ntseeg tiv thaiv peb kom dim yeebncuab txoj kev tua xib xub tuaj.

Tiamsis, kev ntseeg tsis yog yam uas yuav pob puas tau. Zoo li tus hmuv, kev ntseeg yuav tau ntxiv, tau muab los tu dhau ntawm kev thov Vajtswv, kev sib ntsib, sib txhawb ntawm cov ntseeg. Tus hmuv tseem piv rau peb lub siab ncaj ncees rau vajntxwv – uas yog Vajtswv, kuj yog cov lus hais rau yeebncuab paub tias peb yog Vajtswv tog.

Kev cawmdim yog tso dim ntawm tej kev txhaum, dim ntawm txoj kev ruam thiab yuam kev, ntawd yog qhov uas ntseeg rau ntawm Vajtswv. “Lub mom uas yog kev cawmdim” (Efexaus 6:17). Piv rau qhov uas peb muab peb lub hlwb no fij rau Yexus Khetos cia Nws ua tus kav. Thaum peb ua tau li no, peb yuav ceev tau peb txoj kev xav tig mus rau ntawm Vajtswv thiab Nws tej haujlwm uas Nws tau muab cob rau peb.

Thaum kawg yog “Vaj Ntsujplig rab ntaj” (Efexaus 6:17). Yog Vajtswv tej lus. Vajtswv tejlus tsis yog tsuas tau sau rau hauv Vajluskub uas peb tab tom nyeem xwb, tiamsis tseem yog Vajtswv lub siab nyiam thiab Vajtswv lub suab hu tau nthuav tawm nyob hauv peb lub neej dhau ntawm Vaj Ntsujplig. Rab ntaj yog qhov cuab yeej tawm tsam uas Paulus hais txog, yog qhov cuab yeej siv los ua raws li Vajtswv txoj kev ncaj ncees thiab kov yeej yeebncuab.

Tseeb tiag peb tab tom nyob hauv ntsus tsov rog, tiamsis tsis txhob ntshai. Vajtswv twb npaj rau peb tej cuab yeej los tiv thaiv los tawm tsam uas muaj zog tshaj. Ua siab tawv, hnav tej cuab yeej no txhua hnub, vim kev muaj yeej twb yog peb tug nyob hauv Yexus Khetos lawm!

Thov caw nrog kuv peb thov Vajtswv ua ke:
Tus Tswv Koj yog Kuv tus Vajntxwv hauv kuv lub neej. Kuv ua koj tsaug tau npaj rau kuv kom muaj txhij koj tej cuab yeej sawv khov kho rau ntsus kev tsov rog ntawm sab ntsujplig no. Thov Vajtswv koj qhia kuv kom paub siv koj tej cuab yeej los ntawm lub tswv yim zoo, ntaus yeej yeebncuab tej tswv yim phem thiab ua rau Vajtswv tau koob meej. Txawm yog kuv yuav ntsib ntau txoj kev sim siab los, thov Vajtswv ntxiv zog rau kuv kom kuv muaj zog thiab muaj lub siab tawv. Kuv ntseeg tias nyob hauv Yexus Khetos, kuv tau kov yeej los ntawm Vajtswv lub hwjchim. Kuv thov hauv Tswv Yexus Khetos lub npe. Amees.

Cov kwv tij txua tus, lub neej nrog tus Tswv mus ntawm tus ntseeg Vajtswv yog ib ntsus kev tsov rog cov nyom, tiamsis peb tsis tawm tsam ib leeg nyob rau hauv ntsus kev tsov rog no. Vajtswv twb npaj rau peb kom muaj txaus txhua yam cuab yeej uas cheem tsum kom peb sawv khov kho thiab muaj yeej.

Koj puas tau hnav txhij tej cuab yeej ntawm sab ntsujplig no lawm tau lossis tseem tshuav yam cuab yeej twg uas koj tsis tau muaj rau koj tus kheej? Muaj qhov cuab yeej twg uas twb tsis zoo lawm, los yog tsis ruaj lossis hnov qab rau tej hnub dhau los lawm? Kev thov Vajtswv txhua hnub txhawb kom koj tseg sijhawm rov qab mus saib tej cuab yeej ntawm sab ntsujplig uas yog koj tus kheej li raws li Vajtswv tej lus qhia. Sia siv uas yog qhov tseeb, lub tsho thaiv yog kev ncaj ncees, nkawm khau rau yog kev npaj txhij qhia Txojmoo Zoo, siv kev ntseeg los ua daim thaiv, ntoo mom uas yog kev cawmdim. Tuav ntaj uas yog Vaj Ntsujplig. Rau qhov txoj kev muaj yeej thaum kawg yog peb tus Tswv Yexus Khetos, thiab Nws yuav nrog nraim peb ua ke nyob rau hauv txhua ntsus kev tsov rog.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.