Buăl hăm đei layơ băt mơn oei đom lăm tơdrong huơ̆r pơdăr ưh kơ đei layơ pơdơh, kơ lăm tơdrong pơang, bơngơ̆t păng hli tơrơ tơ lăm jơhngơ̆m? Đei layơ buăl ‘maih wă kơ đei tôm tơdrong gô tơplih dang ei hloi, mă lei Kră Yang tim mă tơl tơwih nơ̆r apĭnh đơ̆ng buăl? Na buăl gô ‘băt kơ tơdrong tơplih tơpă ưh kơ jah tĕnh truh, mă tơdrong ‘noh gô đunh ‘mơ̆i truh, kơplah Kră Yang ‘bơ̆ hơmet lu bơ̆n wă kơ lu bơ̆n jing ‘lơ̆ng rơgoh rim năr.

Năr ‘nâu, ‘năr 19/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Anthony Cox hăm kơ̆l ‘bai TRONG NĂM JING ‘LƠ̆NG RƠGOH.

“ ‘Bă tơm bơ̆n ‘Bok Kei-Dei băt kơ iĕm đơ̆ng blŭng-a sơ̆ boih, na Sư rơih iŏk iĕm jing kon Sư. Na Yang Bơhngol ‘Lơ̆ng ăn kơ iĕm jing bơngai ‘lơ̆ng tơpăt wă kơ iĕm lui yom kơ Yêsu Krist.” (I Pêtrôs 1:1-2)

Chang gô tơdrong dŏng pơklaih đơ̆ng Kră Yang ling-lang đei pơlong lăng hăm inh. Buăl băt bơih ‘noh, inh ưh kơ đei gơh hơgei hloh, mă lei inh kư̆m băt kơ pơ‘lơ̆ng, ưh kơ lăng dơ̆ng đêl inh yak năm, tơdrong pơang gô chă trong mơ̆t pơm kơ jơhngơ̆m inh ưh kơ đei wơ̆ pran.

Kơplah oei pơhrăm tơ hnam trưng, inh đei nơ̆r hơri ‘jăl gah drŏ nglo inh hơri lăm tơdrong tơdă hơri đei lơ bơngai pơư. Nơ̆r hơri inh pơm kơhnam dơnŏ hăm bôl buăl ‘bôh hlĭch dêh. Ưh kơ đei đunh đơ̆ng rŏng kơ ‘noh, inh dơ̆ng tơ kơpal anih hơri, inh đei hơri hơnơ̆ng, păng kơplah ‘noh, inh đei pơang lăm inh mă Kră Yang ưh kơ wă kơ inh jing thoi ‘noh.

Kơplah ‘noh inh tơchĕng inh hloh kơ bơngai nai. Đei bôl buăl pơư inh hơri hiôk đơ̆ng rŏng kơ inh hơri ‘noh, inh gô drơ̆ng iŏk đĭ ư-ang ‘noh kơ kơdih akâu inh tơplih kơ ư-ang kơ Kră Yang. Kơplah ‘noh inh ưh tim mă băt Kră Yang ‘noh tơm kơ wă ư-ang, đơ̆ng Kră Yang ăn kơ inh đei gơh hơgei kơ hơri ‘nâu.

Đơ̆ng rŏng kơ ‘noh, đei lăm jơ năr tơdrong pơmat gleh hrat truh. Bơnê kơ Kră Yang, yua kơ đơ̆ng tơdrong pơlong lăng ‘noh, Kră Yang đei tơplih inh. Hơdrol kơ Kră Yang tơplih inh, inh hơpơi đei mĭnh năr tơ anăp inh gô đei lơ bơngai pôk pơư kơ inh. Mă lei inh ưh kơ gơh yak năm tơ ataih. Mă khan đei tơdrong tơnat, inh đei pơhrăm iŏk Kră Yang đei proh hơmet ăn tơdrong nai dơ̆ng kơ inh. Tuch luch, inh hiong đĭ tôm tơdrong păng weh đơ̆ng pơlei ‘noh lăm tŏk bŏk măng, brŏk tơ pơlei inh kơdih arih hăm mĕ inh.

Truh tơ dang ei, Kră Yang oei tơplih inh ‘net ‘net. Inh băt kơ inh oei tơblah hăm lơ tơdrong. Tơdrong pơang, hli tơrơ, păng bơngơ̆t oei chă wă mơ̆t lăm jơhngơ̆m inh. Lăm jơhngơ̆m rơdu ơh sơ’ngon, inh krao apinh Kră Yang, rơhing ‘maih wă Kră Yang dŏng inh dang ei hloi, ưh pă đei gô hơya minh phŭt dơ̆ng.

Lăm I Pêtrôs 1:1-2, Pêtrôs pơma thoi âu: ‘Bă tơm bơ̆n ‘Bok Kei-Dei băt kơ iĕm đơ̆ng blŭng-a sơ̆ bơih, na Sư rơih iŏk iĕm jing kon Sư. Na Yang Bơhngol ‘Lơ̆ng ăn kơ iĕm jing bơngai ‘lơ̆ng tơpăt wă kơ iĕm lui yom kơ Yêsu Krist, na yua kơ pham Yêsu Krist iĕm klaih đơ̆ng tôm tơdrong yoch iĕm. Inh krao khan apinh Sư wei-lăng iĕm tôm tơdrong wă kơ Sư ăn kơ iĕm hiôk-hian ling-lang.”

Lu bơ̆n kon Kră Yang, lu bơ̆n ling-lang ‘maih wă tôm tơdrong đei tơl tơwih dang ei hloi. Lu bơ̆n hơpơi wă Kră Yang jah tĕnh dŏng hlôi đơ̆ng tơdrong pơang, khĕnh hơwĕng, hưch hanh, hli tơrơ păng lơ tơdrong kơnê̆ nai. Mă lei Kră Yang ưh kơ hăt hot kơ bơ̆jang; Sư wă tơplih lu bơ̆n ‘net ‘net gô jing ‘lơ̆ng rơgoh, thoi kơ “ ‘mi hngach teh gô hơ iuh đunh”.

Jing ‘lơ̆ng rơgoh ‘noh trong năm lơ sơnăm lăm chăl arih lu bơ̆n, kơplah Kră Yang ‘nhao ôp rơgoh jơhngơ̆m hăm tơdrong tơchĕng ‘maih wă lu bơ̆n. Kăl hloh, lu bơ̆n băt kơ wơ̆ ‘lŏ gah pơhngol ưh kơ đơ̆ng băt kơ bơwei kơdih akâu lu bơ̆n, mă tôm tơdrong ‘noh đơ̆ng lăm tơpang ti Kră Yang mơsêh mơyang.

Thoi ‘noh, lu bơ̆n athei chang gô Kră Yang; lu bơ̆n chang gô dêh char ‘Bă tĕnh truh, tơdrong tơchĕng ‘Bă gơh jing, mă tơ teh âu kư̆m thoi tơ plĕnh ti. Lu bơ̆n kư̆ kơ chang gô păng kư̆ kơ yak năm tơ anăp. Mă khan đei pơ̆k, lu bơ̆n iung păng yak năm dơ̆ng; đei tơdrong rôp phak lu bơ̆n chơ̆n jơhngơ̆m yak năm dơ̆ng; đei tơdrong pơjah tơhil dih băl, lu bơ̆n ưh kơ đei dơ̆ng pơdơh.

Lu bơ̆n yak năm kư̆ kơ yak năm păng pơhrăm iŏk Nơ̆r Kră Yang, ‘noh Nơ̆r ăn kơ lu bơ̆n đei tơdrong arih, sĭt tơpă păng mơsêh mơyang, thoi kơ Pêtrôs đei pơma hăm lu bơ̆n.

“Bơnê kơ Kră Yang ‘Bok Kei-Dei ‘Bă Yêsu Krist Yŏng bơ̆n, Sư ‘mêm mơnat kơ bơ̆n tơpă na Sư ăn kơ bơ̆n tơpŭ ming ‘nao, yua kơ Yêsu Krist iung arih đơ̆ng lôch. Thoi noh bơ̆n băt tơpă ning-mônh bơ̆n gô iung arih đei tôm tơdrong hiôk ‘lơ̆ng Sư wă ăn kơ bơ̆n.” ( I Pêtrôs 1:3)

Apinh đĭ đăng krao khan hơdai:
Kơ kuh kơ Kră Yang mă ‘mêm kơ kon! Kră Yang ơi, đei lơ kơnao lăm chăl arih kon, apinh Ih tơgŭm kon chơ̆n jơhngơ̆m chang gô tơdrong dŏng pơklaih đơ̆ng Ih. Apinh ih ăn kơ kon băt kơ jơ năr chang gô ‘noh kơplah Ih ‘nhao ôp kon rai jing ‘lơ̆ng rơgoh hloh dơ̆ng. Apinh yua nơ̆r Ih wă pơklaih kon păng pơtho tơ‘bôh kơ kon đei đon lui, wă kơ kon ling-lang băt kơnăl kơ tơdrong ‘Bok Kei- Dei tơpă păng tơdrong mơsêh mơyang Ih kơ lơ tơdrong arih kon đei tơ‘bơ̆p. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă khan trong năm jing ‘lơ̆ng rơgoh lăm Kră Yang đei tơnat, lu bơ̆n athei lui mă kơjăp păng yak năm tơ anăp. Kră Yang ưh kơ đei drơ̆ng hơmet tôm tơdrong ăn kơ lu bơ̆n dang ei hloi, mă lei Sư ling-lang oei hơdai lu bơ̆n, chông bơrơng păng ‘nhao ôp rơgoh lu bơ̆n rim năr wă kơ lu bơ̆n jing ‘lơ̆ng rơgoh. Lăm Kră Yang, lu bơ̆n chă ‘bôh tơdrong arih, tơdrong sĭt tơpă păng mơsêh wă kơ đei tơdrong arih grăng ‘lơ̆ng, ling-lang năm tơ tơdrong jing ‘lơ̆ng rơgoh tôm tơdrong mă Kră Yang ‘măn ăn kơ lu bơ̆n.

Đei tơdrong kiơ lăm tơdrong arih buăl Kră Yang oei hơmet ưh? Buăl hăm hơmet jơhngơ̆m ăn kơ Kră Yang pơtho, ‘bơ̆ hơmet păng tơplih wă kơ lu bơ̆n jing ‘lơ̆ng rơgoh ưh, wă kơ roi nhen thoi Kră Yang ưh? Athei ‘măn jơ hăm Kră Yăng lăm năr ‘nâu buăl hŏ!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.