Tơ lăm mĭnh teh đak rai kang tơiung tơdrong wă kơ hiôk kơ kơdih kâu, ‘măn ăn kơ tơdrong kơdih wă, na mưh lăp lu bơ̆n hiơt kơ tơdrong gĭt kăl đơ̆ng tơdrong ‘mêm tơpă. Tơdrong ‘mêm mă Kră Yang oei krao lu bơ̆n yak kiơ̆ ưh kơ hmă ‘noh jơhngơ̆m mơn tŏsĕt dah lăp kơ dôm lu bơngai lu bơ̆n ‘mêm mơnat, mă ‘noh tih hloh kơ ‘nei dơ̆ng.

Năr ‘nâu, ‘năr 20/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Stormie Omartian hăm kơ̆l ‘bai ‘MÊM MƠNAT THOI KRĂ YANG ‘MÊM MƠNAT.

“Bơngai bu ưh kơ ‘mêm mơnat kơ ‘nhŏng oh sư, bơngai ‘noh ưh kơ băt kơ ‘Bok Kei-Dei ôh, yua kơ ‘Bok Kei-Dei Sư gah tơdrong ‘mêm mơnat đĕch.” (I Yôhan 4:8)

Hăm đei layơ buăl kơtơ̆ng bơngai bu ‘noh đei hrĕch băl pơma khan sư pơm thoi noh lăp “hmă đĕch ‘noh bơih ưh pă đei ‘mêm băl bơih” dah ưh? Mĭnh tơdrong ‘mêm tơpă ưh kơ sĭ ‘noh mơn lăm jơhngơ̆m, păng kŭm ưh kơ yua kơ tơdrong arih. Tơdrong ‘mêm mơnat tơduă kon bơngai kŭm lơ tơdrong, mă lei tơdrong ‘mêm tơpăt tơpă lei lăp wă kơ gơh hlôi kơ tơdrong pơkăm.

“Ơ lu ‘nhŏng oh mă juăt păng inh, bơ̆n athei ‘mêm mơnat dih băl yua kơ ‘Bok Kei-Dei ăn kơ lu bơngai mă khŭl kon Sư athei ‘mêm mơnat dih băl. Bơngai bu ‘mêm mơnat kơ ‘nhŏng oh sư, bơngai ‘noh sư kon ‘Bok Kei-Dei păng sư băt kơ ‘Bok Kei-Dei tơpă. ‘Bơngai bu ưh kơ ‘mêm mơnat kơ ‘nhŏng oh sư, bơngai ‘noh ưh kơ băt kơ ‘Bok Kei-Dei ôh, yua kơ ‘Bok Kei-Dei Sư gah tơdrong ‘mêm mơnat đĕch.” (I Yôhan 4:7-8)

‘Mêm mơnat bơih đơ̆ng ‘Bok Kei-Dei. Jơ̆ng ‘bang Yôhan đei tơ‘blŏk kơ lu bơ̆n ‘noh tơdrong ‘mêm tơpă tu tơm đơ̆ng kơdih Kră Yang. Sư bơih đĭch đam Kră Yang, lu bơ̆n kăl kơ băt kơnăl tơdrong ‘mêm ‘nâu ưh kơ sĭ ‘noh mơn đĕch ôh, mă lei ‘noh bơih rơih iŏk wă tơ’bôh tơdrong ‘noh hăm dôm lu bơngai jum dăr, yua nơ̆r pơma, tơdrong bơ̆n pơm păng jơhngơ̆m tơ ‘bôh đơ̆ng lu bơ̆n.

Kơplah lu bơ̆n ‘mêm mơnat kơ bơngai nai, tơdrong tơm ‘noh lu bơ̆n oei tơ‘bôh kơ Kră Yang lăm chăl arih lu sư. Tơplơ̆ dơ̆ng, ưh kơ đei tơdrong ‘mêm mơnat kŭm tơ‘bôh kơ tơdrong ưh kơ hiơ̆k bơngơ̆t kơ tơdrong tơ‘bưh hăm Kră Yang. ‘Mêm mơnat thoi Kră Yang ‘mêm mơnat ưh kơ sĭ ‘noh tơdrong ‘bônh yua kơ lu bơ̆n ‘bơih kon bơngai ưh kơ gơh kơ pơm. Yua kơ thoi noh, rơih iŏk arih ‘mêm mơnat kăl kơ đei rŏu tơiung rim năr hăm Yang Bơhngol ‘Lơ̆ng. Jơ̆ng ‘bang Pôl đei tơ‘blŏk kơ lu bơ̆n gah tơdrong ‘mêm mơnat tơpă:

“Bơngai bu ‘mêm kơ ‘Bok Kei-Dei hăm bôl buăl sư, đe pơm kơnê̆ kơ sư, sư hreh đĕch; sư iŏk tơdrong iơ̆m dim ling-lang, sư ưh kơ klai kơ đe, sư huay kơ pơang akâu kơ đe, sư ưh kơ pơ’lŏ, sư ưh kơ pơ’brơh kơ đe, sư mơ̆ng kơ đe, sư ưh kơ pơjah, jơhngơ̆m sư huay kơ ‘bônh kơ blĕk. Bơngai bu ‘mêm kơ ‘Bok Kei-Dei hăm bôl buăl sư, sư ưh kơ lah jô̆ yo kơ đe pơm kơnê̆ kơ sư ôh, sư ưh kơ lăp đon kơ tơdrong kơnê̆, sư lăp đon kơ tơdrong ‘lơ̆ng tơpăt. Bơngai bu băt ‘mêm kơ ‘Bok Kei-Dei hăm bôl buăl sư, mă đe pơm kơnê̆ kơ sư, sư oei ‘mêm kơ đe; đe areh kơ buăl sư mă-lei sư oei lui kơ nơ̆r buăl sư; păng sư lui kơ ‘Bok Kei-Dei wei-lăng sư lăm tôm tơdrong khŏm khŏm; mă đei tơdrong gleh pơmat-tat, sư oei khŏm adrin lui ‘mơ̆i.” (I Kôrintô 13:4-7)

Mĭnh tơdrong tơ‘bưh oei arih păng đei rai jrŭ kăl kơ đei tơdrong adrin đơ̆ng ‘bar pah, păng lu bơ̆n gơh yua kơ gơnang tơdrong kĕ jei Kră Yang wă kơ gơh pơm tơdrong ‘nâu, hăm tơdrong apĭnh tơdrong ‘mêm mơnat đơ̆ng Sư tơbăt ăn lăm jơhngơ̆m lu bơ̆n. Đei lu năr lu bơ̆n ‘bôh kơdih ưh kơ wă ‘mêm mơnat. Tơdrong ‘nâu ưh kơ đei kiơ hlĭch yua kơ mưh lăp ‘nhŏ kơ lu bơngai oei pŭn dêh kŭm ưh kơ ‘bôh mơn lăm jơhngơ̆m dih băl. Mă lei tơpă ‘noh lu bơ̆n oei kăl kơ arih ‘mêm mơnat mă khan năr ‘noh jơhngơ̆m lu bơ̆n thoi yơ. Tơdrong ‘mêm mơnat tơpă bơih tơdrong ‘mêm đơ̆ng tơdrong pơkăm, păng dah wă bơwei đĭ tơdrong pơkăm, lu bơ̆n kăl kơ gơnang kơ Kră Yang. Lăm Kră Yang, lu bơ̆n chă ‘bôh mĭnh tơdrong ‘mêm mơnat ưh kơ yua kơ đơ̆ng tơdrong kiơ păng ưh kơ layơ tơplih. Tơdrong ‘mêm đơ̆ng Kră Yang ‘bơih tơm bơwei tơdrong tơ‘bưh kơ lu bơ̆n kơjăp, mă lăm kơplah lu bơ̆n ‘bôh kơdih rơdu kơ ‘mêm mơnat dih băl.

Bơngai lui bơih kơ Kră Yang, lu bơ̆n băt kơdih đei tơpŭ yua kơ Kră Yang- ‘Bok Kei-Dei đơ̆ng tơdrong ‘mêm mơnat. Băt kơnăl kơdih bơih bơngai đei ‘mêm mơnat, đei Yang Bơhngol ‘Lơ̆ng pơgơ̆r lăm jơhngơ̆m, lu bơ̆n ‘bônh kơ ‘mêm kơ bơngai nai hloh. Tơdrong ‘mêm đơ̆ng ‘Bok Kei-Dei hloh kơ tơdrong rơdu rơmơ̆n păng tơdrong tơplih rim năr đơ̆ng tơdrong ‘mêm mơnat kon bơngai- ‘noh bơih tơdrong ‘mêm mơnat ‘bônh kơ tơplih kơplah tơdrong đei ưh kơ kiơ̆ kơ bơ̆n wă. Bơngai lui kơ ‘Bok Kei-Dei wơ̆ ‘lŏ ‘noh bơih bơngai băt kơ tơl nơ̆r đơ̆ng Kră Yang wă kơ arih ‘mêm mơnat, păng yua kơ thoi noh, lu bơ̆n đei wơ̆ ‘lŏ lăm Kră Yang rim năr.

“’Bok Kei-Dei tơ’bôh kơ bơ̆n tơdrong Sư ‘mêm mơnat kơ bơ̆n tơpă thoi âu: Sư wơh Kon pôm Sư jur tơ ala teh âu wă kơ Sư lôch tang bơ̆n, wă kơ bơ̆n arih ling-lang hăm Sư.” (I Yôhan 4:9)

Apinh đĭ đăng krao khan hơdai:
Kơkuh kơ Kră Yang Ih bơih Tơ’ngla ‘mêm mơnat. Kon bơnê kơ Ih yua kơ đei ‘mêm mơnat kơ kon hăm mĭnh tơdrong ‘mêm tôm mah păng ưh kơ layơ tơplih. Apĭnh Kră Yang mơnat ăn kơ kon yua kơ mưh lăp kon ‘bôh kơdih ưh kơ tôm mah ‘mêm mơnat hăm lu bơngai jum dăr kon. Kră Yang ơi, apĭnh pơtho hơmet dôm lu nơ̆r pơma, jơhngơ̆m, păng tơdrong kon pơm, wă kơ đĭ đăng đei tơ‘bôh tơdrong ‘mêm đơ̆ng Ih lăm rim tơdrong tơ‘bưh, hăm rim bơngai mă Ih dan tăp dăr kon. Hơpơi tơdrong ‘mêm mơnat đơ̆ng Kră Yang rai tơbăt lăm jơhngơ̆m kon wă kơ kon kŭm ‘mêm kơ bơngai nai thoi Ih ‘mêm kơ lu sư. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah mơn kơdih ưh pă đei tơdrong ‘mêm mơnat kơ bơngai nai, ‘noh bơih trŏ kơ buăl kăl kơ lăng dơ̆ng tơdrong tơ‘bưh kơdih hăm Kră Yang. Mĭnh jơhngơ̆m jê̆ hăm Kră Yang kŭm rai băt ‘mêm mơnat thoi Sư. Năr ‘nâu, athei tơlĕch hăm Kră Yang anăn bơngai hơyơ mă buăl oei blĕk areh dah ưh kơ ‘mêm mơnat kơ sư tôm. Athei apĭnh Kră Yang ăn kơ buăl jơhngơ̆m pran wă kơ kĕ jei đơ̆ng jơhngơ̆m ưh kơ ‘lơ̆ng păng tơ‘bôh dơ̆ng tơdrong arih ‘mêm mơnat hăm lu sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.