Tom dô pah rài sơlơ ngai sơlơ yò tơngguh bơta hừh nùs să jan, ơn lài ngăn bơta jat nùs koñ is lài, gen dơ̆ dơ̆ bŏl he hŭi bơta kwơ màng bơta koñ gơboh ngăn. Bơta koñ gơboh gen Yang găm họi jà bŏl he cơnòa lòt jat ò di mìng la nùs koñ ing gòi hala mìng lòi ală cau he koñ gơboh gòi ò, mơya găm rlau behơ̆ tai sơl?

Ngai do, ngai 20/01/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Stormie Omartian dê bơh Tơnggume KOÑ BE YANG KOÑ

“Cau lơi ò kòñ gơboh gen ò dòp git Yàng Tom Trồ; bơh Yàng Tom Trồ la bơta kòñ gơboh.” (I Jang 4:8)

Gơs tŭ lơi he kơno ñcau neh lòi bau đơs lah bŏl khai lơh be hơ̆ mìng “buơn ngăn la ò găm koñ gơboh tai” hala òhềt? Dô bơta koñ gơboh ngăn ò di mìng là nùs koñ, mơ kŭng ò gơri bơh ală tŭ bơtoah hala ò bơtoah. Bơta koñ gơboh di gul jơi kọn mơnùs gơs oă pơnah, mơya bơta koñ gơboh ngăn mìng rơp geh sơmbat prap bơh bơta ho pơgon.

“Ơ ală cau kòñ gơboh, bol he kòñ gơboh tĕ bal mơ gơp; bơh bơta kòñ gơboh tus bơh di Yàng Tom Trồ, cau lơi kòñ gơboh gen tơnggơs bơh Yàng Tom Trồ mơ dòp git Yàng Tom Trồ. Cau lơi ò kòñ gơboh gen ò dòp git Yàng Tom Trồ; bơh Yàng Tom Trồ la bơta kòñ gơboh.” (I Jang 4:7-8)

Bơta koñ gơboh la Yang Tom Trồ. Cau Gơnoăr Bơtô dờng Jang neh tơngkah bŏl he la bơta koñ gơboh ngăn tom ryas bơh să tom Kơnrẵn. La cau bơtê Yang di, bŏl he păl dòp git bơta koñ gơboh do ò di là nùs koñ ing lơm, mơya la bơta sac rwah nàng ràng tơlik gơ gơwèt mơ ală cau gut dăr, bơh jơnau đơs, broă lơh mơ nùs nhờm bŏl he.

Tŭ bŏl he koñ gơboh cau ndai, gơtha la bŏl he găm ràng tơlik bơta tơlik mat Yang di tom rài kis bŏl khai di. Gơplơ̆ wơl, siơ̆u rọh bơta koñ gơboh kŭng la ràng tơlik bơta săng lòi bơta gơtomklac băl mơ Yang. Koñ be Yang koñ ò di la buơn ò tài bơh bŏl he la kọn mơnùs ò wil tơl. Kŭng tài bơh hơ̆, sac rwah kis koñ gơboh kŭng càng gơtơmchồl kòp ngai bơh Yang Hwing Gọh. Cau Gơnoăr Bơtô Pol neh tơngkah bŏl he bơh bơta koñ gơboh ngăn:

“Bơta kòñ gơboh gơs bơta kong ơt mơ kơ̆ dơn, bơta kòñ gơboh ò ƀoah gơjrañ, bơta kòñ gơboh ò jòng să mơ ò pơnhừ să, ò lơh tìs jơnau, ò jòi cồng nha is, ò mhar gơjrañ, ò kah prap bơta tìs; ò hòn chò bơh bơta ò song ring, mơya hòn chò bơh jơnau song. Bơta kòñ gơboh kong jơh ală bơta, dòn jơh ală bơta, gơn kơnòm jơh ală bơta, ơt ơl jơh ală bơta.” (I Kôrintô 13:4-7)

Dô bơta gơtomklac dềt mềr mơ gơs jrô păl gơs bơta gơtọmchồl bơh bar đah, mơ bŏl he mìng kơnòm bơh gơnoăr pràn Yang nàng geh lơh bơta do, bơh broă họi dăn bơta koñ gơboh Kơnrẵn di bềng lìu tom nùs bŏl he. Gơs ală ngai bŏl he gơlơh ò koñ gơboh. Bơta do ò di krơi tài bơh gơs dô bơyô rĭng lơngai rlau jơh kŭng rơp siơ̆u nùs koñ băl. Mơya sŏng ngăn la bŏl he păl kis koñ gơboh bulah ngai hơ̆ nùs koñ bŏl he mbe lơi. Bơta koñ gơboh sŏng ngăn la bơta koñ gơboh ho pơgon di, mơ dilah koñ kơrmap gar wil tơl bơta ho pơgon,, bŏl he păl gơn kơnòm Yang. Tom Yang, bŏl he jòi bàn bơta koñ gơboh ò càng rwat mơ ò tơmgơl. Bơta koñ gơboh Yang di la tom ryas kơrmap gar bơta gơtomklac bŏl he kơ̆ cê, bulah tom ală tŭ bŏl he gơlơh he rhòi rhòi siơ̆u rọh bơta koñ gơboh gơwèt băl mơ gơp.

La ală cau dòn Yang, bŏl he git he geh deh bơh Kơnrẵn – Yang Tom Trồ la bơta koñ gơboh. Dòp git he la cau geh koñ gơboh, geh Yang Hwing Gọh at bồ tom dơlăm, bŏl he rơp buơn koñ gơboh cau ndai rlau. Bơta koñ gơboh Yang Tom Trồ di lòt rlau bơta lơbơn lơño mơ bơta jak tòmgơl bơta koñ gơboh kọn mơnùs di – la bơta buơn ngăn tòmgơl tŭ ală broă ò jat nùs koñ he di. Cau don Yang tih dờng la cau git ho wơl jơnau Yang di, nàng kis koñ gơboh, mơ mìng tŭ hơ̆, bŏl he găm tih dờng tom Yang kòp ngai.

“Bơta kòñ gơboh Yàng Tom Trồ dê neh geh ràng tơlik bol he in tòm bơta do: Yàng Tom Trồ neh sồr Kòn Dùl Kơnràñ dê lòt tus tòm dunnia, nàng bol he in kơnòm di Kơnràñ mơ geh kis.” (I Jang 4:9)

Dan jà bol he dô nùs bal tòm bơta hòi dan:
Khoai Yang la Bơtau koñ gơboh. Kọn Ưnngai Yang tài bơh neh koñ gơboh kọn bơh dô bơta koñ gơboh wil tơl mơ ò tŭ lơi tòmgơl. Dăn Yang tọh glài kọn ĭn tài bơh gơs tŭ kọn gŏ he ò tơl koñ gơboh gơwèt mơ ală cau gut dăr kọn. Ơ Yang, dăn bơtô ală jơnau đơs, nùs nhờm, mơ broă lơh kọn di, nàng jơh ală bơta ràng tơlik bơta koñ gơboh Kơnrẵn di tom ală bơta gơtomklac gơwèt tus ală cau gen Kơnrẵn ơn gut dăr kọn. Dăn bơta koñ gơboh Yang di bềng lìu tom hwing nùs kọn nàng kọn kŭng koñ gơboh cau ndai be Kơnrẵn koñ gơboh bŏl khai. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, tŭ gơlơh he jơh hir bơta koñ gơboh gơwèt mơ cau ndai, hơ̆ la tŭ he càng sền wơl bơta gơtomklac he băl mơ Yang. Dô hwing nùs dềt mềr gơwèt mơ Yang kŭng rơp bềng lìu bơta koñ gơboh be Kơnrẵn. Ngai do, yăl tĕ mơ Yang dô nơm sơnđăn lơi he găm gơjrañ măñ hala òhềt koñ gơboh bŏl khai òhềt tơl. Họi dăn tĕ mơ Yang ai pà gơnoăr pràn nàng pha lin ală bơta kơlôi sơnơng iơh mơ sơlơ ràng tơlik bơta kis koñ gơboh gơwèt mơ bŏl khai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.