Kơplah tơ‘bơ̆p tơdrong pơmat, tơdrong pơlong lăng lu bơ̆n ngăl ‘bônh kơ rơdu. Mă lei lu bơ̆n hăm ‘bôh tơdrong tih hloh mă Kră Yang oei hơmet lăm tơdrong arih lu bơ̆n? Kră Yang ling-lang oei pơgơ̆r păng oei hơdai lăm tơdrong arih lu bơ̆n, kơplah lu bơ̆n đei tơdrong pơmat tat dêh. Păng tơdrong arih lu bơ̆n kăl kơ đei lăm tơdrong roi gah tơdrong hơ’mon kơ Kră Yang tih hloh kơ đĭ đăng, wă kơ ư-ang kơ anăn Kră Yang păng pơm kơdranh gah tơdrong ‘mêm mơnat hăm mơsêh Sư.

Năr ‘nâu, ‘năr 21/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Jeff Calhoun hăm kơ̆l ‘bai HƠPƠI KƠ KRĂ YANG PÔK PƠƯ TƠ KƠPAL.

“Hreh bĕ athei băt Inh boih Kră Yang ‘Bok Kei-Dei. Inh đe gô pôk pơư tơ jơ̆p dêh char, kư̆m pôk pơư kơ Inh tơ kơpal teh.” (Hơriso 46:10)

Năr ‘nâu, lu bơ̆n gô tơchĕng pơwao lăm hla ar Hơriso chăl 46. Chăl lăm sơ̆p ‘nâu pơih ăn tơdrong tơ‘blŏk pơ‘lơ̆ng gah jơhngơ̆m ‘bĕnh kơ tơdrong ‘mêm mơnat păng mơsêh mơyang đơ̆ng ‘Bok Kei-Dei. Đơ̆ng blŭng a lu trong lăm sơ̆p hla bơar ‘Bok Kei-Dei ‘nâu kơ đeh đĕch, bơngai chih Đawit tơ‘bôh tơdrong sĭt tơpă: mă lu bơ̆n đei tơ‘bơ̆p tơdrong pơlong lăng tih truh đơ̆ng yơ ‘noh, ‘Bok Kei-Dei lu bơ̆n tih hloh kơ đĭ đăng păng pran kơtang hloh kơ tơdrong ‘noh.

Lăm Kră Yang, lu bơ̆n đei đon lui păng hiôk hian. ‘Bok Kei-Dei ưh kơ achăng, Sư ling-lang jê̆ lu bơ̆n, ling-lang bơwei păng krôp gom tơdah đei tơdrong truh kơ tơdrong arih lu bơ̆n. Athei pơdơh ‘biơ̆ tŏ sĕt, ăn jơhngơ̆m hơđơ̆ng păng tơchĕng pơwao gah tơdrong ‘lơ̆ng tơpăt Kră Yang- Sư oei ling-lang hơdai lu bơ̆n, đơ̆ng sơ̆ khơ̆ dang ei truh tơ ning mônh. Na lăm Hơriso chăl 46 pơtôm hăm nơ̆r tơ‘blŏk pơlung: “ Kră Yang tih hloh oei hăm lu nhôn”.

Mă lei tơpă ‘noh thoi yơ? Pơm liơ wă kơ nơ̆r ‘nâu đei yua tơpă tơ lăm tŏk bŏk đei pơmat đơ̆ng lăm tơdrong arih rim năr?

Tơdrong arih kư̆m đei tơdrong pơm kơ lu bơ̆n kơdrăt đei rơdu păng ưh kơ đei hiôk. Đei pơhoach jên ‘ngoaih ko lu bơ̆n proh hơmet bơih đơ̆ng blŭng a. Đei ưh kơ lăp băl hăm rông ‘bôt. Đei krao điê̆n thoăi gơnhĕk đơ̆ng hnam dơnŏ pơm kơ buăl ưh kơ hơđơ̆ng. Tơdah kơtơ̆ng ang đei tơlĕch bơngai jang đơ̆ng lăm anih jang pơm kơbuăl hiơ̆k bơngơ̆t kơ tơdrong arih tơ anăp. Lăm lu tơdrong ‘noh, đei nơ̆r tơ ‘blŏk đơ̆ng lăm Hơriso chăl 46 pơm kơ bơ̆n đei ‘bôh mơn oei jê̆ păng gĭt kăl hloh kơ đĭ đăng.

Lei lăm Hơriso chăl 46 hăm trŏ kơ thoi ‘noh ưh? ‘Bok Kei-Dei oei hơdai ră mă lei nhen thoi ataih atŏ păng tơnat kơ đei mơn lăm jơhngơ̆m. Na đei đơ̆ng ‘noh, tơdrong chơt hiôk, hơ’ngon đei lăm jơhngơ̆m pran dêh, pơklơ̆p đĭ tôm tơdrong. Lu bơ̆n băt kăl kơ krao khan. Păng tơpă lu bơ̆n kư̆m krao khan. Mă lei lu nơ̆r krao khan ‘noh ‘bônh kơ môch tơ ala yua kơ tơdrong rơdu klơ̆p ‘bĕnh blai. Lu bơ̆n năm ngôi tơ bôl buăl wă kơ đei pơma dơnuh, pơm lơ tơdrong wă kơ jơhngơ̆m hiôk biơ̆. Kư̆m đei, lu bơ̆n đei tơdrong pơhlŭ, chă wă hŭt lê̆ tơdrong juăt kơ rơih iŏk tơdrong kơnê̆ wă kơ hiơt kơ tơdrong ơh sơ‘ngon. Mă lei đơ̆ng rŏng kơ đĭ đăng, tơdrong ‘noh ưh kơ đei layơ ba ăn tơdrong hiôk hian đunh kơ năr, pơm kơ lu bơ̆n rai ơh sơ‘ngon hloh dơ̆ng.

Hơbŏ lăng lu bơ̆n đei đŏk lăm Hơriso chăl 46 lơ wơ̆t bơih. Mă lei lu bơ̆n tam dan tơpă jơhngơ̆m lu bơ̆n lăm nơ̆r Kră Yang ưh? Dah lu bơ̆n dan tơdrong arih lu bơ̆n tơmơ̆t lăm tơdrong hơ’mon đơ̆ng ‘Bok Kei-Dei ưh? Lu bơ̆n ưh kơ sĭ arih lăm tơdrong hơ’mon đơ̆ng kơ kơdih akâu đĕch ôh, mă lu bơ̆n kư̆m arih lăm tơdrong hơ‘mon tih tin đơ̆ng ‘Bok Kei-Dei. Dah lăng đơ̆ng gah mĭnh pah ‘noh, tôm tơdrong, pơmat pă‘biơ̆ đĕch gô tơplih. Tơdrong tơpă tơpăt ‘nâu ưh kơ sĭ wă tơplih lu bơ̆n lăng ming tơdrong arih đĕch ôh mă kư̆m gô tơplih tơdrong arih lu bơ̆n hloi.

Kră Yang pơjing lu bơ̆n wă kơ ư-ang kơ ‘Bok Kei-Dei. Krao lu bơ̆n wă kơ kiơ̆ nhen thoi Kră Yang Yêsu- Sư hlôi bơih đơ̆ng tơdrong pơlong lăng- pŭ iŏk tơdrong lôch pơmat tat tơ ‘long pơglang. Đơ̆ng tơdrong arih, tơdrong pơlong lăng, tơdrong pơmat tat păng lôch iung arih Kră Yang Yêsu, lu bơ̆n ‘bôh hơđal tơdrong pơgơ̆r păng ư-ang đơ̆ng ‘Bok Kei-Dei. Lăm Hơriso chăl 46, krao lu bơ̆n wă mơ̆t lăm tơdrong pơgơ̆r ‘noh. Đĭ chăl arih, tơdrong pơlong lăng, tơdrong lôch păng tơdrong arih ling-lang kơ lu bơ̆n ưh kơ tơdrong hơdrô̆ lu bơ̆n mă hơdai tơdrong tih tin hăm ‘Bok Kei-Dei. Bơ̆n kon ‘Bok Kei-Dei, lu bơ̆n ưh kơ arih kơ kơdih akâu đĕch, arih wă pơ ư anăn Kră Yang.

Athei chă anih hrĕp, minh drô̆. Pơhơi jơhngơ̆m akâu jăn. Dui jơhngơ̆m mă tai…na dui tơlĕch. Pơm minh ‘bar ‘măng. ‘Bok Kei-Dei pơgơ̆r hloi lăm jơ‘nâu, bơwei tơdrong arih lu bơ̆n đơ̆ng lăm hơyuh dui jơhngơ̆m. Athei pơdơh wă kơ đei mơn kơ tơdrong pơgơ̆r ‘mêm mơnat đơ̆ng Kră Yang đei jum dăr păng pôk tơiung buăl. Kơplah dui hơyuh kial tơ mơ̆t lăm jơhngơ̆m athei băt tơdrong pơgơ̆r đơ̆ng ‘Bok Kei-Dei. Dui tơlĕch hơyuh kial đơ̆ng lăm jơhngơ̆m, athei ăn kơ Kră Yang oei hơdai ‘bĕnh blai lăm pơhngol buăl.

Athei tep măt tŏ sĕt. Wă kơ tơdrong đơ̆ng ‘Bok Kei-Dei pơdah tơ anih hlơp kơ lăm tơdrong arih buăl. Athei lui ngeh tơdrong ră-roi gah Kră Yang, tôm tơdrong pơmat tat gô klaih, tôm tơdrong đei hlôi bơih gô ‘blŏk păng ‘bĕnh blai kơ tơdrong ‘mêm mơnat. Tơdrong tih hloh Kră Yang, mơsêh mơyang Sư, tơdrong arih ling-lang Sư…Tôm tơdrong ‘noh tơ ‘bôh đơ̆ng lăm tơdrong arih Kră Yang. Păng đơ̆ng tơdrong arih lu bơ̆n, lu tơdrong ‘noh kư̆m tơ‘bôh ăn- tôm tơdrong đei đơ̆ng tơdrong ‘mêm mơnat, păng rim năr oei pơm tơ‘bôh kơ tơdrong pơgơ̆r đơ̆ng Kră Yang.

Jei Kră Yang bơih. Păng lăm Kră Yang lu bơ̆n kư̆m kĕ jei.

“Hreh bĕ athei băt Inh boih Kră Yang ‘Bok Kei-Dei. Inh đe gô pôk pơư tơ jơ̆p dêh char, kư̆m pôk pơư kơ Inh tơ kơpal teh.” (Hơriso 46:10)

Apinh đĭ đăng krao khan hơdai:
Kră Yang mă ‘mêm kơ kon ơi, kon bơnê kơ Kră Yang yua kơ tơdrong pơgơ̆r tih păng ‘bĕnh kơ tơdrong ‘mêm Ih lăm tơdrong arih kon. Kơplah đei tơdrong pơmat păng pơlong lăng apinh Kră Yang tơgŭm kon băt kơ Ih oei pơgơ̆r păng chih roi tơdrong tih kơ lăm tơdrong arih kon. Hơpơi kơ tơdrong arih kon tơ‘bôh tơdrong ư-ang kơ tôm tơdrong kơ Kră Yang, wă kơ anăn Ih gơh pôk pơư tơ kơpal. Kon kŭp kơ̆l krao khan hăm anăn Kră Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah bơ̆n dan tơdrong arih lăm hơ’mon roi tơdrong gah ‘Bok Kei-Dei, lu bơ̆n băt bôh tơdrong pơlong lăng, tơdrong pơmat tat đei chĕp ba tơdrong kăl yua, păng ưh kơ đei kiơ Kră Yang ăn truh mă ưh kơ đei yua kơ lăm tơdrong arih ‘nâu. Đei pơjing lu bơ̆n wă kơ pơm kơdranh ăn kơ anăn Sư, lu bơ̆n ưh kơ arih kơ kơdih akâu bơ̆n đĕch ôh păng arih wă kơ ư-ang kơ Kră Yang lu bơ̆n. Athei đei đon lui lu bơ̆n gô hlôi kơ đơ̆ng tơdrong pơmat tat, yua kơ Kră Yang kĕ jei đơ̆ng tôm tơdrong. Hơpơi kơ nơ̆r Kră Yang tơ‘blŏk, pơlung rim ‘nu kơ lu bơ̆n đơ̆ng lăm tơdrong tơchĕng, ‘nơ̆r ‘bơ̆r pơma, tơdrong jang lu bơ̆n tôm tơdrong pôk pơ ư anăn Kră Yang, ư-ang anăn Kră Yang lăm ‘năr ‘nâu păng đĭ chăl arih kơ rim ‘nu lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.