Kơplah oei lăm jơ ơh sơ‘ngon păng ưh kơ hiôk, buăl chơ chă tơdrong pơlung tơyơ? Tơ mĭnh ‘nu buăl juăt, mĭnh ‘nu anhŏng ŏh lăm hnam dơnŏ, dah dôm tơdrong juăt jum dăr buăl? Mă lei tơdah mĭnh năr ayơ, “hơnih hơđơ̆ng” mă lu bơ̆n oei gơnang ưh pă đei bơih lei liơ? Lu bơ̆n băt chơ chă tơdrong pơlung đunh, kơjăp tơ anih ayơ?

Năr ‘nâu, ‘năr 22/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Iliamari Mendoza- Gomez hăm kơ̆l ‘bai BUĂL DAN ĐON LUI TƠ ANIH AYƠ?

“Mă-lei lu bơngai gơnang kơ rup yang lu sư traih lu bơngai khan kơ lu rup lu sư man: Lu iĕm bơih yang lu nhôn, tă kơ gô kơdŭn tơ rŏng păng mơlâu.” (Êsai 42:17)

Kơplah tơ‘bơ̆p tơdrong pơmat tat, buăl ngăl chă tơ anih ayơ? bơngai bu bơih anih ăn kơ buăl gơnang lăm kơplah hơnat hơnot dêh? Bơ̆n jing kon Kră Yang bơih, lu bơ̆n kăl kơ hơnơ̆ng apĭnh kơdih dôm lu nơ̆r pĭnh ‘nâu. Yua kơ, lăm tơdrong rơdu păng dôm tơdrong bơ̆n kon bơngai ưh kơ gơh pơm, lu bơ̆n ‘bônh kơ hiơ̆k tơtăm păng pơm glăi. Ưh kơ ‘bônh ôh wă lui ngeh lăm dôm tơdrong kơdih ưh kơ lăng ‘bôh- ‘noh bơih tơdrong mă kon bơngai bơ̆n đei.

Inh đei mĭnh ‘nu buăl, duch ei ‘mêm kơ mĕ inh nhen thoi mĕ sư kơdih. Duch ei đei pơma dơnuh dôm tơdrong hăm mĕ inh, wă kơ đei pơlung, bơtho tơ’bôh păng tơiung. Mă lei kơplah mĕ inh lôch, duch ei thar hơchăng ưh kơ ma nuh hăm inh păng kŭm ưh kơ đei năm tơ hnam lôch. Đunh khei ‘năr đơ̆ng rŏng, inh đei ‘bôh tơdrong roi tơbăt đơ̆ng sư. Mon drŏkăn 16 hơnăm sư ‘nao lôch. Sư ơh sơ’ngon dêh, păng inh mơn hlôh kơ tơdrong ‘noh thoi yơ, yua kơ mĕ inh ‘nao hiong ưh tim mă đunh. Inh băt mơn kơ hiong bơngai lăm hnam dơnŏ ơh sơ’ngon thoi yơ.

Mă lei inh ưh kơ hiôk kơplah băt kơ sư mơn mĭnh drô̆, bơsĕl yua kơ ưh pă đei mĕ inh hơdai wă pơlung păng tơgŭm. Kơplah inh hơdrin yua Nơ̆r Kră Yang wă pơlung buăl inh, sư hơnơ̆ng kơ pơma khan lăp mĭnh ‘nu mĕ inh đĕch gơh ba ăn tơdrong pơlung mă sư kăl lăm jơ ‘nâu.

Mưh lăp, nhen thoi ưh kơ đei trong ayơ hlôi kơ tơdrong mă lu bơ̆n oei tơ‘bơ̆p. Lu bơ̆n hơdrin wă chă trong, mă lei dôm tơdrong oei ưh kơ gơh wă pơm thoi yơ. Phŏ kŭm đei, tơdrong ơh sơ’ngon tih dêh pơm kơ lu băt kơ gơnang kơ dôm tơdrong đei ‘bôh wă chă tơdrong pơlung. Mă lei mă hơdrin thoi yơ, dôm tơdrong ‘noh oei ưh kơ tôm wă pơhơi, dah tơgŭm lu bơ̆n hlôi kơ tơdrong sơ’ngon. Tơdrong kăl kơ pơma ‘noh mưh lăp lu bơ̆n gơnang lơ hnang kơ dôm lu tơdrong ‘noh, truh kơ pơm kơ bơ̆n lăng tơdrong ‘noh nhen thoi “yang rup” đơ̆ng bơ̆n kơdih mă ưh kơ băt.
Sơ̆p hla bơar ‘Bok Kei-Dei chih:

“Mă-lei lu bơngai gơnang kơ rup yang lu sư traih lu bơngai khan kơ lu rup lu sư man: Lu iĕm bơih yang lu nhôn, tă kơ gô kơdŭn tơ rŏng păng mơlâu.” (Êsai 42:17)

Kơplah Kră Yang Yêsu yak kơpal đak păng Pêtrôs apĭnh wă kơ gơh năm hơdai Sư, Sư đei pơma: “Năm tơ âu wăi!” Kơplah măt Pêtrôs lăng tơ Kră Yang Yêsu, sưh gơh yak kơpal đak ‘bônh đĕch. Mă lei kơplah sư lăng ‘bôh kial hơbŭt jum dăr, tơdrong hli păng tơdrong ưh kơ lui ngeh đei lăm jơhngơ̆m sư, lei na akâu sư hiŭp hiŭp wă môch. Kră Yang Yêsu đei ăn ty rôp dui sư tŏk hlôi kơ đak (lăng lăm Mathiơ 14:22-33).

Bơ̆n jing kon Kră Yang bơih, lu bơ̆n đei Sư wei rong păng bơwei. Kră Yang Yêsu đei pơma pơkă khan Sư truh wă ăn kơ lu bơ̆n tơdrong arih rơnŭk. Tơdrong lu bơ̆n kăl kơ pơm ‘noh lui ngeh kơ Sư păng pơjao dôm tơdrong hiơ̆k bơngơ̆t kơ Sư. Tơdrong ‘mêm mơnat Kră Yang ăn kơ lu bơ̆n ‘noh bơih tơdrong ‘mêm ưh kơ tôch, păng Sư ling lang tơpăt pơm trŏ dôm nơ̆r pơkă đơ̆ng Sư.

Inh đei lơ wơ̆t ‘bôh Kră Yang đei bơ̆jang lăm chăl arih inh. Lăm dôm jơnăr măng mu păng rơdu dêh, Sư bơih Tơ’ngla oei hơdai, pơlung păng tơiung inh. Roi achăng dôm lu tơdrong hiơ̆k bơngơ̆t, ơh sơ’ngon păng tơdrong ưh kơ hơđơ̆ng, inh roi mơn ‘bôh hơđăl hloh jơhngơ̆m ‘mêm mơnat păng wei lăng đơ̆ng Kră Yang lăm chăl arih inh. Tơdrong ‘mêm mơnat păng tơdrong ‘lơ̆ng tơpăt Sư đei tơplih chăl arih inh kiơ̆ thoi dôm tơdrong mă inh ưh tim mă tơchĕng truh. Inh băt kơ, dah lăp gơnang kơ kơdih, inh gô ưh kơ gơh đei thoi năr ‘nâu.

Inh ‘maih gưih kơ buăl nơ̆r pơkă ‘bĕnh tơdrong pơlung đơ̆ng ‘Bok Kei-Dei ‘Bă:

“’Nĕ hli yua kơ Inh oei hơdai iĕm, ‘nĕ tơrơ dêh, yua kơ Inh bơih Kră Yang ‘Bok Kei-Dei iĕm! Inh gô ăn kơ iĕm pran; tơpă inh tơgŭm iĕm, Inh gô wei-lăng iĕm hăm ti gah ‘ma ‘Lơ̆ng Tơpăt Inh.” (Êsai 41:10)

Apinh đĭ đăng krao khan hơdai:
Kơkuh kơ ‘Bă mă ‘mêm. Kon băt kơ nguaih kơ Ih, ưh kơ đei bu gơh ăn tơdrong hơmĕng kơjăp kơ chăl arih kon. Lăp mĭnh ‘nu Ih bơih tu jơhngơ̆m pran păng tu tơdrong pơlung ling lang kơ kon. Ih bơih anih kơ’nơp kơjăp ăn kơ kon lăm tơdrong hơbŭt. Kon hơpơi pơjao dôm tơdrong tơchĕng đơ̆ng inh lăm ty Kră Yang păng dan tơdrong lui ngeh đĭ lăm tơdrong chông anhăk đơ̆ng Ih. Kon kŭp kơ̆l krao khan hăm anăn Yang Yêsu Krits, A-men.

Ơ lu bơngai mơ̆ng mă ‘mêm kơeng, mă buăl oei tơ‘bơ̆p hăm dôm lu tơdrong pơmat hơyơ, hơpơi kơ buăl gô pơjao dôm tơdrong lăm tơpang ty ‘mêm mơnat đơ̆ng Kră Yang, păng lui ngeh kơ Sư gô pơm tơdrong ‘lơ̆ng hloh ăn kơ buăl. Mă phŏ buăl ưh kơ hlôh đĭ dôm tơdrong mă Kră Yang oei pơm, athei tep măt, achăng đĭ dôm tơdrong pŭtrăp păng ăn kơ Kră Yang bơ̆jang lăm chăl arih buăl! Năr ‘nâu, tơdrong tơdă Amăn Jơ Krao Khan Rim Năr krao wơ̆n buăl athei chih tơ ala tơdrong mă buăl oei tơ‘bơ̆p, phŏ ‘noh mĭnh tơdrong anat, mĭnh tơdrong hlôh ưh kơ trŏ, mĭnh tơdrong sơ’ngon, mĭnh tơdrong ưh kơ hiôk…. Păng kŭm athei chih tơ ala ‘bơ̆t cheng ‘noh lăm trong Sơ̆p hla bơar ‘Bok Kei-Dei Êsai 41:10. Hơpơi Nơ̆r Kră Yang pơlung păng tơiung buăl lăm năr ‘nâu. Tơdrong ‘mêm mơnat Sư ưh kơ layơ tơplih, tơpang ty Sư gô kuăr iŏk lu bơ̆n lăm jơhngơ̆m lăm dôm jơnăr rơdu dêh, pơmat tat hloh đơ̆ng rim ‘nu lu bơ̆n. Buăl hăm wă dan hloi tơdrong lui ngeh tơ Sư, pơjao dôm tơdrong sơ’ngon kơ Kră Yang păng ăn kơ Sư pơhơi pơhngol buăl năr ‘nâu ưh?
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.