Tòm tú Jennifer sốt moat jrum, ồng mò oh mi jòi bơta pơndòm pơniang he in tiah lơi taih? Tòm dô nă cau bơyô đềt mêr, dô nă cau tòm hiu nhă hala ală bơta òs mơng ơm gut dar ồng nò oh mi? Mơya dilah tòm dô ngai ne, “tiah lơngai” mơ bol he òs dòn kơnòm ò gam tai gen rơp mbe lơi taih? He rơp jòi bơta pơndòm pơniam gam sum tiah lơi?

Ngai do, ngai 22/01/2025, Rơndap Bơta Hòi Dăn Kờp Ngai hòi jà ồng mọ oh mi kơlôi sơnơng Jơnau Yàng dê bal mơ Iliamari Mendoza-Gomez bơh tơnggume ỒNG MÒ OH MI ƠN BƠTA DÒN TIAH LƠI?

“Bol khai rơp kòl ruc wơl mơ kong ƀàssìl, hơ̆ la ală cau dòn kơnòm di ală rùp ràk, ală cau đơs mơ ală rùp pac sềr lah: “Ală kơnràñ la yàng bol hi dê.” (Esai‬ ‭42‬:‭17‬)

Tú tìp bol glar kal ke, ồng mò oh mi jòi tus tiah lơi taih? Ncau la tiah gơn kơnòm he dê taih? La kon sau Yàng, bol he pal lùp is he ală seng lùp do. Tài bơh, tòm bơta lơbơn lơnõ mơ ò chài rgơi he dê, he buôn ngan gơtùp gơplừ mơ tis glài. He ò buôn nàng dòn kơnòm tòm ală bơta ò sền gó – hớ la bơta òs gơs kon mơnùs dê.
Ẵn gơs dô nă cau bơyô, khai gơboh mè ẵn bè mè tòm deh khai. Khai yal ală bơta mơ mè ẵn jê, khai geh mè ẵn pơndòm pơniang khai, bơto tơngkah. Mơya tú mè ẵn jê sang rài, khai ò gam đơs tơm bơh mơ ẵn hala tus còp. Dô jó tai, khai yal ẵn in git sau ur 16 nam khai dê neh sang rài. Khai jê sồt ngan, ẵn git khai mbe gơlơh tòm tú hớ, bơh ẵn roh mè ò jó. Ẵn git tú he ò gam cau he kỡn gơboh tai rơp mbe lơi.

Mơya ẵn rngòt tú ẵn git lah khai ò gơs cau pơndòm pơniang, ơm is dô nă tai bơh khai ò gam gơs mè ẵn jê pơndòm pơniang mơ dong kơl. Tú ẵn pơnđơl pràn nàng ngui Jơnau Yàng nàng pơndòm pơniang bơyô he dê, gen khai kừ đơs lah ming dô nă mè ẵn jê rgơi ceng bơta pơdòm pơniang khai in lơm tú do.

Gơs tú, bè la ò gơs gung lơi rgơi lik klàs he in tòm ală bơta he tìp. Bol he pơnđơl pràn nàng jòi bàn gùng dà, mơya ò gó. Gơs tú, bơta jê sồt dơng lơh he in ming git kơnòm tòm ală bơta he rgơi sền gó nàng jòi bơta pơndòm pơniang. Mơya bulah he pơnđơl pràn mbe lơi, ală bơta hớ kung ò rgơi dong kơl he. Bơta pal cang đơs tus la gơs tú he kơnòm oă ir bơh ală bơta do rơp lơh he in sền bơta do la dơng mang rlau jơh.

Sră Goh cih lah: “Bol khai rơp kòl ruc wơl mơ kong ƀàssìl, hơ̆ la ală cau dòn kơnòm di ală rùp ràk, ală cau đơs mơ ală rùp pac sềr lah: “Ală kơnràñ la yàng bol hi dê.” (Esai‬ ‭42‬:‭17‬)

Tú Yàng Jesus lòt hơđang nha dà lêng, mơ ồng Pier dan lòt tus mơ Kơnràn, Kơnràn đơs lah: “Tus té!” Tú ồng Pier ming sền di Yàng Jesus gen ồng rgơi lòt hơđang nha dà. Mơya tú ồng sền tus di càlrbut, bơta rngòt rngơt mơ bơta dơrcul lơnggơr tòm ồng, ồng gơ kram. Yàng Jesus yò mpàng tê mơ sơmbat ồng. (Sên Mathiơ 14:22-33).

La kon sau Yàng dê, bol he geh Kơnràn rong siam mơ sên gar. Yàng Jesus đơs lah Kơnràn tus nàng ai bol he in bơta kis tơng-kah tơng-kañ. Bơta he pal lơh hớ la dòn kơnòm di Kơnràn mơ jao phi ală bơta kơlôi rcang he Yàng in. Bơta kỡn gơboh mơ Yàng ai he in la bơta kỡn gơboh dơng ơnang, mơ Kơnràn sùm don song lơh jat ală jơnau ho Kơnràn dê.

Ẵn oă dớ sền gó broă Yàng lơh tòm rai kis he. Tòm tú klam jơngo mơ lơbơn lơño, ming Kơnràn la Bơtau ơm bal, pơndòm pơniang mơ yò đo ẵn. He sang lòi ală bơta kơlôi rcang, bơta jê sồt mơ bơta dơrcul, ẵn rơp sền gó nùs nđàc sơngit mơ bơta rong siam Yàng dê hơđang ẵn. Bơta kỡn gơboh mơ bơta dòn song Kơnràn dê neh tòm gơl rai kis ẵn jê jat alà bơta ẵn ò ki tus. Ẵn git lah, kơnòm dê pràn is, ẵn ò rgơi gơs bè ngai do.

Ẵn kỡn pơyoa tus ồng mò oh mi jơnau ho bêng bơta pơndòm pơniang Bèp Đang Trồ dê:

“Bañ rngòt, bơh Añ ơm bal mơ mê; bañ rngòt rngơt, bơh Añ la Yàng Tom Trồ mê dê. Añ rơp lơh mê in pràn kơldang, Añ rơp dong kòl mê mơ rơp yò tơngguh mê mơ tê ma pha lin rlau Añ jê.” (‭‭Esai‬ ‭41‬:‭10‬)

Dan jà bol he dô nùs bal tòm bơta hòi dan:
Khoai Bèp gơboh, kon git lah rlau mơ Kơnràn, ò gơs cau lơi rgơi ceng tus bơta gơn kơnòm kớcê rai kis kon in. Ming dô nă Kơnràn lơm la bơta pràn kơldang mơ cat bơta pơndòm pơniang jó jong kon dê. Kơnràn la tiah king crú kon dê tòm tú bol glar. Kon dan ơn ală bơta kơlôi rcang kon dê tòm tê Yàng mơ ơn bơta dòn wil tơl tòm bơta tề lam Kơnràn dê. Kon hòi dan tòm sơnđan Yàng Jesus Krist, Amen.

Ơ ală ồng mò oh mi kỡn gơboh, bulah ồng mò oh mi tìp bơta bol glar kal ke lơi, kơp kỡn lah ồng mò oh mi rơp ơn ală bơta tòm mpàng tê Yàng dê, mơ dòn lah Kơnràn rơp lơh ală bơta niam rlau jơh ồng mò oh mi in. Bulah ồng mò oh mi ò rgơi git jơh ală bơta mơ Kơnràn lơh, nhĩm mat, lòi jơh ală bơta kơnjớ kơnjut mơ lòi Yàng in lơh broă hơđang rai kis ồng mò oh mi dê! Ngai do Rơndap Bơta Hòi Dăn Kờp Ngai hòi jà ồng mò oh mi cih wơl ală bơta ồng mò oh mi tìp, hớ la bơta pal cang hòi dan, dô bơta ò loh lang, dô bớt moat jrum, dô bơta jê sồt,…. Mơ kung cih wơl seng Sră Goh Êsai 41:10. Dan Jơnau Yàng dê ngai do pơndòm pơniang mơ yò đo ồng mò oh mi. Bơta kỡn gơboh Kơnrẵn dê ò tú lơi tòm gơl, tơwor tê Kơnràn dê rơp kwar he tòm nùs tòm ală tú he lơbơn lơño mơ kal ke. Ồng mò oh mi rơp ơn bơta dòn tòm Yàng, ơn ală bơta jê sồt Yàng in mơ Kơnràn rơp thoa rpa hwềng soan ồng mò oh mi dê ngai do sơl?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.