23.01 Amăn Jơ Krao Khan Rim Năr: ĐEI YÊSU GAH INH HIÔK BƠIH

Tơdrong arih rim năr đei lơ tơdrong ‘maih wă păng hiơ̆k bơngơ̆t ưh kơ đei pơdơh. Lu bơ̆n ‘bônh kơ mơ̆t lăm tơdrong tơsŭl tơwŏk lăm tơdrong jang, gleh hrat kơ jên, dah tơchĕng kơ tơdrong arih tơ anăp. Lăm trong yak năm ‘noh, tơdah ưh kơ băt kơ Kră Yang tơm kơ mŭk tơmam, na gĭt kăl hloh kơ lăm tơdrong arih, lu bơ̆n ‘bônh dêh kơ rơdu, ưh pă băt hnhoi lăng tơyơ păng ưh kơ đei tơdrong hiôk tơpă.

Năr ‘nâu, ‘năr 23/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng kơ̆l ‘bai ĐEI YÊSU GAH INH HIÔK BƠIH.

“Kră Yang jing mŭk tơmam inh boih. Inh đei pơkă wă wei răk nơ̆r Ih bơtho tơtă”. (Hơriso 119:57)

Đei mĭnh gơ sơ̆ ei, kơplah oei lăng ‘brêng hơ dah măt ‘năr wă mơ̆t jơ gơ sơ̆ tơ anih inh arih ‘lơ̆ng dêh, jơhngơ̆m inh hơđơ̆ng păng tơ‘blŏk kơ inh gah Kră Yang, jơ̆ mŭk tơmam kơ inh. Tơdrong ‘nâu pơm kơ inh tơchĕng pơwao păng apinh kơdih akâu: “ Mŭk tơmam” tơdrong gĭt kăl tơpă ‘noh thoi yơ?

Kiơ̆ kơ Sơ̆p Hla Bơar ‘Bok Kei-Dei Pah So, lu bơ̆n hlôh “mŭk tơmam”, ngăl khan lăm tơdrong klah song teh choh. Kơplah kon pơlei Isơrael năm tơ pơlei Kanaan, klah song teh kơ rim adrĕch adrŭng nhen thoi mŭk tơmam sư. Mă lei ‘bok Môis ưh kơ klah song lu adrĕch adrung Lêwi yua kơ ‘Bok Kei-Dei ‘noh jơ̆ mŭk tơmam sư bơih, tơ‘bôh kơ sư gô mơ̆ng kơ lăm Kră Yang kơ tôm tơdrong lu sư ‘maih wă:

“Thoi noh lu bơngai Lêwi ưh kơ đei teh jang sa hơdai hăm lu ‘nhŏng oh lu sư, Kră Yang boih jơ̆ tơmam lu sư, kiơ̆ thoi Kră Yang đei khan boih hăm lu sư.” (Pơtho khôi juăt 10:9)

Abraham kư̆m iŏk nơ̆r pơkă đơ̆ng ‘Bok Kei-Dei gah ăn kơ sư teh choh păng adrĕch adrŭng lơlang lơlap (Blŭng-a 15:18-21). Mă kơplah ‘noh, sư tim mă đei kon hăm Sara, akăn sư hloh kơ sơnăm rơneh bơih, Abraham oei lui gơnang kơ nơ̆r pơkă đơ̆ng ‘Bok Kei-Dei. Đon lui sư ưh kơ ngĭl ngŭl, mă khan dang ei tơdrong sư ưh kơ thoi đei nơ̆r pơkă ‘noh. Đĭ chăl arih sư arih ưh kơ đei minh dơnơ̆ng, ưh kơ đei bơwei teh choh sư ling lang, mă lei jơhngơ̆m sư oei kơjăp lăm ‘Bok Kei-Dei, jơ̆ mŭk tơmam kơ tơdrong arih sư ling lang.

“’Bok Kei-Dei pơkă wă ăn kơ sư oei dêh char bơ̆n âu păng pơkă wă ăn kơ lu kon sư oei dêh char âu mơ̆n, mă-lei kơplah noh ‘Bok Kei-Dei tam mă ăn kơ sư anih oei ‘bơ̆t ayơ ôh. Hơtai ei Abraham kư̆m ưh kơ đei kon.” (Tơdrong Jang 7:5)

Bơngai chih lăm Hơriso chăl 119 đei pơma Kră Yang jơ̆ mŭk tơmam kơ lu bơ̆n, tơdrong ‘nâu wă khan minh ‘Nu Kră Yang đĕch gô ăn kơ bơngai chih ‘noh ‘bôh tơdrong sư đei jơhngơ̆m hiôk; Kră Yang jơ̆ mŭk tơmam đei ling lang, gĭt kăl hloh kơ tơdrong mơdrŏng lăm teh đak ‘nâu, păng Kră Yang oei hơdai hăm sư ‘noh tôm mah hloh kơ đĭ đăng.

Athei tơchĕng kơplah năm ngôi hơpong tơ năr et sa đei lơ tơmam sa. Buăl đei lơ tơdrong wă rơih iŏk, mă lei kơpal kơ ‘bang ‘noh, buăl lăp đon minh pôm tơmam sa đĕch, buăl ‘maih sa. Tơmam sa ‘noh tôm kơ buăl bơih, pơm kơ buăl hiôk bơih. Kư̆m đei nơ̆r khan thoi ‘noh, kơplah đei Kră Yang jơ̆ tôm kơ tơdrong arih bơ̆n, lu bơ̆n gô đei băt bơ̆n ưh kơ kăl kơdâu kiơ̆ kơ tơdrong nai dơ̆ng, yua kơ lăm Kră Yang lu bơ̆n chă ‘bôh tôm tơdrong bơih.

Kơplah băt kơ Kră Yang jơ̆ mŭk tơmam kơ bơ̆n, đơ̆ng rŏng kơ ‘noh bơ̆n gô đei tơdrong chu yom: “Inh đei pơkă wă wei răk nơ̆r Ih bơtho tơtă”. (Hơriso 119:57b). Kơplah pơma pơsĭt sơng iŏk Kră Yang jơ̆ tôm tơdrong kơ tơdrong arih bơ̆n, lu bơ̆n gô đei nơ̆r pơlung wă dan tơdrong arih bơ̆n lăm tơdrong ‘maih wă Kră Yang. Tơdrong chu yom ‘noh athei tơ‘bôh kơ đơ̆ng tôm tơdrong arih chu kiơ̆ Kră Yang rim năr. Wă khan buăl ưh kơ lê̆ pơhngol bơ̆n pơngot wă kơ ling lang phĭ jơnap lăm ‘Nơ̆r Kră Yang, wă kơ buăl băt păng pơm kiơ̆ kơ thoi tơdrong ‘lơ̆ng Sư ‘maih wă. Kră Yang wă kơ lu bơ̆n gơnang kơ Sư lăm tôm tơdrong đơ̆ng năr băt kơ Kră Yang jơ̆ mŭk tơmam bơ̆n.

Hrei ‘nâu, lu bơ̆n- bơngai lui bơih kơ Yêsu Krist, kư̆m đei mŭk tơmam đơ̆ng Sư, mŭk tơmam oei ‘măn tơ pơlei ‘lơ̆ng:

“Sư ‘mêm mơnat kơ bơ̆n tơpă na Sư ăn kơ bơ̆n tơpŭ ming ‘nao, yua kơ Yêsu Krist iung arih đơ̆ng lôch. Thoi noh bơ̆n băt tơpă ning-mônh bơ̆n gô iung arih đei tôm tơdrong hiôk ‘lơ̆ng Sư wă ăn kơ bơ̆n. Tôm tơdrong noh Sư hơmet ăn kơ bơ̆n tơ plĕnh boih, na tôm tơdrong noh ưh kơ đei layơ hiong răm bŭk ôm ôh.” (I Pêtrôs 1:3b-4)

Đei bơngai chih ‘bai hơri ư-ang kơ “Bok Kei-Dei “ Đei Yêsu Gah Inh Hiôk Bơih” đei băt bơih kơ Yêsu Krist jơ̆ tơm kơ tơdrong arih bơ̆n, yua kơ thoi ‘noh bơngai chih pơ̆n pơma: “Mă ‘bu ‘bu tơgar iŏk mơdrŏng lăm teh đak, đei Yêsu inh hiôk bơih”
Buăl hăm đei chă tơdrong ‘bŭ tơ‘bĕnh đơ̆ng Kră Yang? Lei oei chă tơdrong lăp đon đơ̆ng lăm teh đak thoi kơ mŭk tơmam, đei tơdrong jang hiôk, dah tơdrong tơ‘bưh ưh kơ jơnoi đunh?

Kơplah tơ‘bơ̆p lơ tơdrong kăl wă kơ đei, lơ tơdrong pơlong lăng tim mă hlôi, buăl hăm đei băt lăp minh ‘Nu Kră Yang đĕch jơ̆ mŭk tơmam kơ bơ̆n păng ăn kơ bơ̆n hiôk lăm jơhngơ̆m kơplah oei lăm Kră Yang ưh?

Đơ̆ng năr ‘nâu, hơpơi kơ buăl gô pơma hăm Kră Yang thoi âu: “Kră Yang jơ̆ tơdrong jang sa inh Na jơhngơ̆m inh gơnang kơ Sư.” (Nhơ̆m Hmoi 3:24)

Apinh đĭ đăng krao khan hơdai:
Kơ kuh kơ Kră Yang mă ‘mêm kơ kon! Kon bơnê kơ Ih yua kơ Ih jơ̆ mŭk tơmam gĭt kăl, jơ̆ tơdrong jang ling lang, păng tơm kơ tơdrong tuh ăn tôm tơdrong kơ kon ‘maih wă. Apinh Kră Yang tơgŭm kon chĕp răk tơdrong trŏ tơpă ‘nâu, wă kơ kon hoei kơ ngĭl ngŭl kơ tơdrong arih ‘biơ̆ đĕch lăm teh đak ‘nâu. Hơpơi kơ Kră Yang tơgŭm kon arih rim năr hăm đon lui kăl kơ đei minh ‘nu Ih đĕch, kon đei tôm tơdrong bơih. Kon kŭp kơ̆l krao khan hăm anăn Yang Yêsu Krist, Amen.

Ơ lu bơngai mơ̆ng mă ‘mêm kơ eng, kơplah apinh Kră Yang: “ Kră Yang jơ̆ mŭk tơmam kơ kon,” ‘nơ̆r ‘noh đei khan kơ lu bơ̆n tơpă lăm Kră Yang, lu bơ̆n đei chă ‘bôh tôm tơdrong; Kră Yang tơm kơ tơdrong ăn kơ bơ̆n đei jơhngơ̆m hiôk. ‘Nơ̆r pơma khan ‘noh kư̆m tơ‘bôh tơdrong adrin dan tôm tơdrong gơnang kơ Kră Yang, mă đei tơdrong pơmat tat dah pơlong lăng. Athei arih tôm tơdrong lăm tơdrong tơpă tơpăt ‘Bok Kei-Dei ‘nâu hăm tơdrong pơyơ̆r kơ Sư tơdrong tơchĕng, hiơ̆k bơngơ̆t đơ̆ng buăl, păng apinh tơpăt đơ̆ng Kră Yang ăn kơ buăl đei jơhngơ̆m lui gơnang kơ Kră Yang rim năr. ‘Bai pơhrăm Krao Khan Rim Năr ‘năr ‘nâu kư̆m tơgŭm lu bơ̆n đei yua kơ bơ̆n lăm tơdrong chu yom ‘noh bơih tơdrong arih hiôk lăm Kră Yang. Hơpơi kơ buăl đei minh năr ‘bĕnh kơ tơdrong đei hơdai yak năm hăm Kră Yang lăm tơdrong hiôk lăm jơhngơ̆m hăm chu yom kơ Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.