Rài kis kờp ngai la ală ngai gi-ga mơ ală bơta pal cang mơ kơlôi rcang sùm. Bol he buôn gơkòl tơmut tom kơrwàl broă lơh, ơnòng kơnjơ̆ bơh jên prĭa, hala ală bơta pal kơlôi rcang bơh ngai tơnơ̆. Tom gùng lòt hơ̆, dilah ò đal git lah Yàng la pơnah srê brê, la bơta kàs mang rlau jơh rài kis dê, bol he buôn ngan sền gŏ nùs nhơm he ‘hut-hung’, ò git đah lơi mơ siău bơta hừh nùs ngan.

Ngai do, ngai 23/01/2025, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng bơh tơnggume GƠS JESU ĂÑ HỪH NÙS RAU.

“Yàng Jehôwa la băl mơ ăñ; Ăñ ho pơgŏn prap gàr jơnau Kơnràñ dê.” (Đơs Crih 119:57)

Tom dô mhô ne, tom tŭ sền mattơngai mùt hàng mơnĕ ngan tom tiah mơ ăñ kis, nùs ăñ rngơt mơ geh tơngkah bơh Yàng, la srê brê ăñ jê. Bơta do lơh ăñ pal kơlôi sơnơng mơ lùp is tom nùs: “pơnah srê brê” gơs gơtha ngan la mbe lơi?

Jat Sră Goh Bơta Ho Bal Yau, bol he wă wơng “pơnah srê brê” gơs gơtha bal mơ “Pơnah geh lòi wơl”, òs tòm jat bal mơ ală bơta tompà ù tiah. Tom tŭ lang bol Israel mùt tom tiah geh ho ai, kờp lang bol geh tompà dô pơnah ù tiah kung bè srê brê bol khai dê. Mơ ya Môise ò tơmpà ù tiah cau Lêbi in tai bơh Yàng Tom Trồ neh la srê brê bol khai dê, ai gŏ bol khai sùm gơrê mơ Kơnràñ tom jơh ală bơta pal cang he dê:

“Hơ̆ la ñchi bơh tài ală cau Lebi ò gơs pơnah srê brê lơi di gùl ală ọh mi bọ̆l khai dê, Yàng Jehôwa la sre brê bọ̆l khai dê, tomtọh jat be Jehôwa Yàng Tom Trồ bọ̆l mê dê neh yal bọ̆l khai in.” (Yal Wơl Bơta Bọh Lăm 10:9)

Apbraham kung dòp geh jơnau ho Yàng Tom Trồ dê bơh broă ai ông in ù tiah mơ dô jơi bơtian oă (Sơnròp Gơlik Gơs 15:18-21). Bulah tŭ hơ̆, ông òhêt gơs kòn mơ Sara, bau ur ông dê, ò găm sơnăm rgơi gơs kòn, Apbraham kư dòn kơnòm di jơnau ho Yàng Tom Trồ dê. Bơta dòn ông dê ò tŭ lơi lơngơh lơngơr, bulah ală bơta gơpơrlơ̆ wơl mơ jơnau ho hơ̆. Jơh rài kis, ông kis be dô nă cau lòt ting dô ting dă, ò dòp geh ù tiah, mơ ya nùs nhơm ông sùm wèt hơ Yàng Tom Trồ, la pơnah sre brê sùm sùm ông dê.

“Kơnràñ ò ai khai in dô êt lơi sre brê tom lơgar do, dô pet ù ơn jơng kung ò gơs sơl, mơ ya Kơnràñ ho ai lơgar do lơh gơs sre brê tòm khai in mơ jơi bơtiàn khai in sơl, bulah tom tŭ hơ̆ khai òhềt gơs kòn.” (Broă 7:5)

Cau cih sră Đơs Crih 119 neh yal tơlik Yàng la pơnah sre brê he dê, bơta do gơs gơtha la mìng dô nă Yàng la Bơtau mơ cau cih sră jòi bàn bơta hừh nùs; Kơnràñ la sre brê gam sùm sùm, kas màng rlau mơ bơta pas-sơm lơi tom dunnia, mơ bơta gơs mat Yàng dê gơwèt mơ rài kis khai dê la tơl rau.

Kơlôi sơnơng tĕ tom tŭ oh mi tùs tom dô bơta sa cho-hòp bal mơ oă ngan phan sa. Oh mi gơs oă ngan bơta sac rwah, mơ ya hơđang cơnòng sa hơ̆, gơs mìng dô nơm phan sa rgơi di pal bơta mơ oh mi kơp koñ rgơi sa. Pơnah să hơ̆ neh tơl oh mi in rau, tom tŭ git lam Yàng gen hơ̆ neh tơl rài kis he in rau, bol he rơp đal git lah he ò cang pal ntoàt jat ală bơta ndai tai, tài bơh tom Kơnràñ bol he joi geh jơh ală bơta.

Tom tŭ dòp git Yàng la pơnah sre brê he dê, bơta dòn bơr la công nha be òs jat tơnơ̆: “Ăñ ho pơgŏn prap gàr jơnau Kơnràñ dê.” (Đơs Crih 119:57b). Tom tŭ yal sơnđăn Yàng la jơh ală bơta rài kis he dê, bol he sơlo geh pơndòm pơndiàng nang ơn rài kis he jat nùs koñ Kơnràñ dê. Bơta dòn bơr hơ̆ pal geh rang tơlik loh lang gan rài kis don duh Yàng kờp ngai, gơtha la oh mi ò tŭ lơi lòi ji-gloh đah hwềng he dê mơ ya sùm hòm lai tom Jơnau Kơnràñ dê, nang oh mi đal git mơ lơh jat nùs koñ niam Kơnràñ dê. Yàng koñ bol he sơnđìng di Kơnràñ wil tơl bơh tŭ git Kơnràñ la pơnah sre brê he dê.

Ngai do, bol he-ală cau neh don dòp Bơtau Krist, kung dòp geh pơnah sre brê bơh Kơnràñ, pơnah sre brê hơ̆ geh prap lòi hơđang trồ:

“Bơh bơta koñ nđàc dờng ơ nàng Kơnràñ dê mơ bol he geh deh wơl pa, tô gơs bơta kis wơl bơh bơta chơt Yàng Yesu Krist dê, mơ tô dòp geh sre brê ò roh rui, ò bơ̆-bơl, ò ro jrùh, prap lòi hơđang trồ oh mi in.” (I Piêr 1:3b-4)

Cau cih seng đơs chò Goh “Gơs Jesu Ăñ Hừh Nùs Rau” neh đal git mìng Bơtau Krist la pơnah tom rài kis he dê, tai behơ̆ cau cih sră hơ̆ khin cha yal tơlik: “Bulah cau tơm-pìt pas dunnia, Gơs Je-su ăñ hưh- nùs rau”

Oh mi gam joi jat bơta lơh bîng tơl bơh să tòm Yàng sơl? Hala joi jat bơta hừh nùs să tòm he in bơh dunnia kung bè phan mơna, bơta công nha, hala ală bơta gơtmò klac mhar roh?

Tom tŭ pal ntào di đap ală bơta pal cang òhềt geh dòp, ală bơta gơlòng òhềt lòt gan, oh mi dòp git sơl mìng dô nă Yàng la sre brê he dê mơ sền gŏ bơta hừh nùs tom tŭ geh ơm tom Kơnràñ?

Bơh di ngai do, kơp koñ oh mi rơp đơs mơ Yàng lah: “Hwềng-soàn ăñ đơs: Yàng Jehôwa la sre brê ăñ, gen ăñ ơn nùs gơn kơnòm di Kơnràñ.” (Ñim Rac 3:24)

Dan jà bol he dô nùs bal tòm bơta hòi dan:
Khoai Yàng koñ gơboh kòn dê! Kòn jơh nùs ưnngai Yàng tai bơh Kơnràñ la srê brê kas mang, la srê brê gam sùm sùm, mơ la tom ryàs bơta pal cang kòn dê. Dan Yàng dong kòn sơmbat kơ̆ jơnau song do, nang kòn ò lơngơh-lơngơr bơh ală bơta ìng bă lĭa dunnia dê. Dan Yàng dong kơl kòn kis kờp ngai mơ bơta dòn mìng pal cang gơs Kơnràñ lơm, gen kòn neh gơs ală bơta. Kòn jơh nùs ưnngai tom sơnđan Yàng Dong Klàs Jesu Krist, Amen!

Ơ jơh ală ông mò, oh mi koñ gơbọh, tom tŭ bol he đơs mơ Yàng lah: “Kơnràñ la srê brê kòn dê”, bơta hơ̆ gơs gơtha la bol he lơh nền lah tom Kơnràñ, bol he joi ban jơh ală bơta; Kơnràñ la tom ryàs bơta hừh nùs bol he dê. Jơnau yal tơlik hơ̆ kŭng rang tơlik bơta lơh nền ơn bơta dòn wil tơl dòn kơnom di Yàng, bulah bòl glar kalkê hala gơlòng. Kìs tĕ wĭl tơl tom jơnau sọ̆ng do mơ bơta jào phi Kơnràñ in jơh ală bơta moat-jrùng, kơlôi rcang oh mi dê, mơ jơh nùs ràc dan Kơnràñ ai gơnoar pràn nang pơnjat dòn kơnom di Kơnràñ kờp ngai. Bơta Bơtê Hòi Dan Kờp Ngai ngai do kung gơchôl bol he gơlik gơs công nha tom bơta dòn bơr he dê bè la dô bơta be òs dô rài kis hừh nùs tom Yàng. Kơp koñ oh mi rơp gơs dô ngai git lam oă tom tŭ cơnđoà lòt mơ Yàng tom bơta hừh nùs mơ dòn bơr Kơnràñ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.