Yak năm kiơ̆ Kră Yang nhen thoi tơdrong kơdâu pơjei băl tơ rok trong. Đei kơ chăl trong năm lu bơ̆n yak năm đei jơhnơ̆m pran păng hơmĕng dêh. Mă lei kư̆m đei trong năm đei tŏk kơ krang, đei kial tơwih plơ̆, păng jơ̆ng yak trăp trĭn truh tơ lu bơ̆n wă ‘maih pơdơh. Mă lei kơplah ‘noh, pơm liơ wă kơ lu bơ̆n đei jơhngơ̆m wă kơdâu dơ̆ng, truh tơ anih đe hơgăt đei kơ ư-ang?

Năr ‘nâu, ‘năr 25/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Shirley A. Reynolds hăm kơ̆l ‘bai ‘NĔ KƠ ACHĂNG!

“Thoi noh na lu bơ̆n athei … adrin kơdih kơdih kơdâu rok trong mă ‘Bok Kei-Dei đêl pơkă kơ bơ̆n boih. Bơ̆n athei lăng Yêsu ling-lang, yua kơ Sư pơih trong kơ bơ̆n lui kơ ‘Bok Kei-Dei kơjăp truh tôch.” (Hêbrơ 12:1-2)

“Mĕ ơi! mĕ ơi! Kon drŏ-kăn inh kơdâu hăt hot mơ̆t tơ lăm hnam, păng krao inh, ti chĕp kơjăp sơ̆p hla ar. “ Mĕ ơi, mĕ kĭ asong kon năm kơdâu pơjei băl kiơ̆ hnam trưng mĕ hŏ!”

Inh lăng muh măt kon inh ‘maih dêh hăm ‘bôh hơđăl sư ‘maih wă jing lăm khŭl kơdâu pơjei băl đei ư-ang hloh kơ đĭ đăng hnam trưng nai. Inh băt kon inh ‘maih wă tơpă kơ năm kơdâu pơjei băl, mă lei lăng akâu jăn sư iĕ, hơkĕ lăng nhen thoi ưh kơ pran, inh tơchĕng kon inh gô tơ‘bơ̆p tơdrong tơnat wă oei hơdai khŭl kơdâu sư. Mă lei, ‘bôh măt sư đei tơdrong hơmĕng, inh ưh kơ gơh wă pơma khă sư. Thoi noh inh hiĕk păng pơma:

“Trŏ bơih, mĕ gô kĭ ăn kơ kon.”

Đei lơ năr giĕng bơih, đang kơ jơ hŏk pơhrăm kon inh pơnam kơ pơtơ̆p hăm ‘bok thây pơtho sư.

Thoi ‘noh năr wă kơdâu pơjei blŭng a kư̆m truh. Hnam dơnŏ nhôn ngôi ‘bơ̆t tang dŏ blŭng a tơ kơpal anih ngôi ‘măn kơ bơngai lăng hăm hnam dơnŏ nai. Inh krao khan hăm Kră Yang lăm jơhngơ̆m:

“Kơ kuh kơ Kră Yang, apinh Ih pơthim ăn kơ jơ̆ng kon inh gơh pran, ăn kơ plei nuih sư dui jơhngơ̆m ‘lơ̆ng. Kră Yang ơi, kon drŏ kăn inh iĕ ioch đĕch, iĕ hloh kơ đĭ đăng lăm khŭl sư. Apinh Kră Yang oei hơdai sư păng tơgŭm sư năr ‘nâu.”

Jơ kơdâu pơjei wă jê̆ truh bơih, tơ anih ‘măn kơ bơngai lăng bĕnh bơih. Khul jreo oei ôr jreo, tơtap ti re jơ̆p kơ anih, rim ‘nu bơngai ‘nă hal.

Pơtơm kơdâu blŭng a. Kon inh dơ̆ng ‘bơ̆t anih sư hăm buăl nai. Bơngai hơlam yơ̆r hla kơ păng pơma khan: “Kơ chăng, hơmet wă… kơdâu!”

Lu bơngai kơdâu minh ‘măng kơdâu tơ anăp, rim ‘nu bơwei jơhngơ̆m hrĕnh hiơ̆ kơdih kơdih lăm trong kơ dâu dăr kơ anih cham ‘noh. Kon inh sư kơdâu pleh ploh tơrŏng ‘biơ̆ minh ‘bar yak. Kơplah hlôi kơ minh puăt trong kơdâu, đĭ đăng đei gơret đĭ jơhngơ̆m kơdâu truh tơ anih đe hơgăt.

Lu mĕ ‘bă thoi kơ lu nhôn ôr kher đĭ kơ hơlŏng wă kơ ôr pôk tơ iung kơ kon lu nhôn.

Kơdâu dăr tăl mă ‘bar dơ̆ng, inh ‘bôh kon inh kơdâu rai hiơ̆ biơ̆, sư dui jơhngơ̆m trăp, muh măt sư tơ‘bôh sư gleh lap.

“Kơ kuh kơ Kră Yang, apinh Ih tơgŭm kon drŏkăn kon oei đei jơhngơ̆m kơdâu pơkeh kơ tơdrong kơ dâu pơjei ‘nâu” inh krao khan.

Dăr tăl mă pơh, kon inh kơdâu oei tơ tuch luch, mă lei kon inh ưh kơ achăng lê̆.
Lu bơngai kơdâu hrĕnh hơdrol brŏk truh bơih tơ anih đe hơgăt đơ̆ng bơngai mă minh, mă ‘bar, mă pêng.

Kon drŏ kăn inh oei kơdâu tơ trong kơdâu pơjei băl, yak kơdâu trăp trĭn mă lei oei adrin.

‘Net ‘net, bơngai lăng đei iung, tơtap ti re, lơ bơngai ôr rơ̆n: “Adrin mon, mon gô truh tơ anih đe pơkă!”

Kơplah kon inh kơdâu tơ tăl tuch luch, kơ tơh sư tơtơ̆, đak măt sư lĕch ro tơ tơ‘bŏk, jâng sư rơdu mơ‘nhŭi mơ‘nhăi.

Jơ ‘noh, inh ‘nao ‘bôh klo inh jur tơ ala mư̆k tôch kơ anih đe pơkă. Sư pơ‘lơ̆ng sơtơ̆p kŭl-tăng, yơ̆r ti păng pơma:

Kon drŏ kăn ơi, kơdâu dơ̆ng hŏ, ‘Bă oei tơ âu, ‘bă gô pôk iŏk kon. ‘Nĕ kơ achăng kon hŏ!”

“Kon wă jê̆ tơ anih đe pơkă bơih, kon gơh pơm thoi ‘noh!” Klo inh ôr pơma thoi ‘noh.

Jum dăr kơ inh, kư̆m đei lơ nơ̆r ôr jreo: “ Adrin mon! mon gô truh tơ anih đe pơkă!”
Păng thoi ‘noh… kon drŏ kăn inh pơ̆k tơ lăm tơpang ti ‘bă sư.

Đĭ đăng bơngai tơ anih ‘noh ôr jreo hăm tơtap ti ưh kơ tôch.

Buăl hăm băt kơ Kră Yang lu bơ̆n hăm nhen thoi bơngai ‘bă ưh? Inh ưh kơ băt dôm yơ ‘măng Kră Yang pơma dơdar hăm inh:

“Yăk năm dơ̆ng kon, ‘Bă oei tơ âu. ‘Bă gô pôk glơng kon. Đei minh năr anhơ ‘noh kon gô truh tơ anih pơkă.”

Tơdrong arih nhen thoi trong kơdâu pơjei ataih đei lơ tơdrong pơlong lăng. Kư̆m đei năr lu bơ̆n kơdâu hrĕnh, đei jơhngơ̆m pran păng adrin. Mă lei kư̆m đei năr lu bơ̆n kơdâu gleh lap, dui jơhngơ̆m hơdrơ̆k hơdre, păng ưh kơ wă kĕ yak minh yak tơ anăp dơ̆ng.

Mă lei Kră yang lu bơ̆n ưh kơ pơdê kơ lu bơ̆n dah bơ̆n pơ̆k dah yak năm hiơ̆. Kră Yang ling-lang chang gô tơ ‘noh, chro ti Sư, pơlung lu bơ̆n kơdâu pơjei jing keh đang.

Đei lơ wơ̆t lu bơ̆n mơn kơ gleh lap yua kơ đơ̆ng tơdrong jang, hnam dơnŏ, dah đei jơhngơ̆m sơ‘ngon? Lơ wơ̆t lu bơ̆n nhen thoi ưh pă đei jơhngơ̆m pran wă jang lăm năr dơning dơ̆ng? Mă lei Kră Yang ling-lang oei tơ ‘noh, Sư chơ̆n păng ‘mêm mơnat, pơlung lu bơ̆n thoi âu Kră Yang ưh kơ đei layơ achăng lu bơ̆n lăm tơdrong kơdâu pơjei băl ‘nâu.

Tuch luch, kơplah bơ̆n truh tơ anih đe pơkă – mă khan jơ̆ng tơtơ̆, dah đak măt lĕch ro tơ tơ‘bŏk – Kră Yang oei gô sơng iŏk lu bơ̆n mơ̆t lăm tơpang ti Sư păng pơma “ Kon jang ‘lơ̆ng tơpă!”

“Bơ̆n ‘bôh lơlap lơlang lu bơngai noh sơ̆, lu sư đei đon lui kơjăp tơpă, na lu bơ̆n athei adrin kiơ̆ thoi lu sư. Bơ̆n adrin thoi lu bơngai kơdâu pơjei băl. Thoi noh na lu bơ̆n athei tŭk lê̆ dôm tơdrong mă pơm kơ akâu bơ̆n trăp păng tôm kơ tơdrong yoch mă oei chô̆ pơkơ̆ng bơ̆n. Bơ̆n athei adrin kơdih kơdih kơdâu rok trong mă ‘Bok Kei-Dei đêl pơkă kơ bơ̆n boih” (Hêbrơ 12:1)

“Na yŏng sư khan: ‘Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang ‘lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.” (Mathiơ 25:23)

Apinh đĭ đăng krao khan hơdai:
Kơ kuh kơ Kră Yang mă ‘mêm, đei lơ wơ̆t kon gleh lap, rơdu păng ‘maih achăng lê̆. Mă lei kon băt Ih ling-lang oei hơdai, pơlung păng pôk tơ iung kon đei đơ̆ng rim yak kon năm. Apinh Kră Yang ăn kơ kon đei jơhngơ̆m pran kơplah kon rơdu, pơthim đei jơhngơ̆m nuih kơplah hli tơrơ, kư̆m pơthim ăn tơdrong chang hơmĕng kơplah kon bơ̆l hăl. Hơpơi kơ ‘Bă tơ‘blŏk kơ kon Ih ling-lang oei hơdai kon lăm đĭ kơ trong yak năm ‘nâu. Kon kŭp kơ̆l krao khan hăm anăn Yang Yêsu Krit, A-men.

Ơ bơngai mơ̆ng mă ‘mêm kơeng, buăl oei ‘bơ̆t ayơ tơ lăm trong kơdâu pơjei băl năm tơ ‘Bok Kei-Dei ‘nâu? Buăl oei hưch hanh, đei jơhngơ̆m pran, dah jơ̆ng yak năm gleh lap? Athei ‘blŏk kơ nhăm kơ tơdrong kơdâu pơjei truh tơ ‘Bok Kei-Dei ăn kơ rim ‘nu Bơngai Lui lu bơ̆n ‘noh tơm kơ pơkeh kơdâu pơjei băl đơ̆ng đon lui kơjăp kơ Kră Yang Sư oei chang gô lu bơ̆n truh tơ mư̆k đei pơkă ‘noh. Mă khan đei tơdrong tơnat dah gleh lap, apinh ‘nĕ kơ achăng. Athei yak năm pă minh yak lăm jơhngơ̆m adrin păng lăng tơ Kră Yang, Sư oei chro ti Sư chang gô lu bơ̆n hăm tơmam apah ‘lơ̆ng rŏ wă ăn kơ bơngai bu đei jơhngơ̆m ‘lơ̆ng tơpăt truh tơ năr tơ ‘bơ̆p Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.