Peb txhua tus ib leeg nyias yeej muaj nyias ib yam xav muab zais cia-tej zaum yog tej uas peb ua yuam kev, kev qaug zog lossis tej kev mob siab nyob tob tob. Peb ntshai tsam raug lwm tus txiav txim, ntshai raug muab nthuav tawm, thiab ntau zaug, peb hnov cuag li yooj yim dua thaum peb khiav nkaum hauv qhov tsaus ntuj. Tiamsis ua neej nrog txoj kev zais thiab ntshai tsis yog yam uas Vajtswv nqua hu peb. Vajtswv xav kom peb txhais ruam mus nrog qhov pom kev – qhov chaw uas peb yuav txais tau kev zam txim, kev ywj pheej thiab tsim muaj txoj kev sib raug zoo ua ke nrog Vajtswv.

Hnub no, yog hnub 04/03/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jill Dube dhau ntawm Zaj kawm NROG VAJTSWV SIB RAUG ZOO

“Tiamsis yog peb nyob hauv qhov porn kev ib yam li Vajtswv tus uas nyob hauv qhov porn kev, peb ib leeg yeej nrog ib leeg sib raug zoo thiab Vajtswv tus Tub Yexus Khetos cov ntshav twb ntxuav peb tej kev txhaum huv tibsi lawm.” (1 Yauhas 1:7)

“Hnub no yuav muaj kev sib raug zoo tom qab pehawm tas!” – Kuv niam hais li ntawd thaum uas peb npaj mus pehawm. Kuv hnov mas kuv zoo siab heev. Vim kuv yeej ib txwm tsis tshua nyiam mus tom tuam tsev, tiamsis kuv ho xav tej zaug “sib raug zoo” li ntawd. Thaum tseem me, kuv xav tias “sib raug zoo” yog lub sijhawm uas cov laus lawv sib tham ua ke, tshuav tej menyuam ces ywj siab khiav ua si tsis raug leej twg nthe, thiab tshwj xeeb yog muaj ntau yam khoom noj. Zoo kawg nkaus li! Thaum ntawd kuv pheej hu tias tej zaug sib ntsib ntawd yog “sib raug zoo kom plab sov”, hnov cuag li yog kev kawg!

Thaum uas kuv ntseeg Vajtswv tiag tiag, Vajtswv qhib kuv lub qhov muag ua rau kuv pom tias “sib raug zoo” tsis yog tsuas yog sib ntsib kom muaj kev zoo siab li kuv tau xav yav dhau los. 1 Yauhas 1:7 sau tias: “Tiamsis yog peb nyob hauv qhov porn kev ib yam li Vajtswv tus uas nyob hauv qhov pom kev, peb ib leeg yeej nrog ib leeg sib raug zoo thiab Vajtswv tus Tub Yexus Khetos cov ntshav twb ntxuav peb tej kev txhaum huv tibsi lawm.”

Yav dhau los kuv xav tias sib raug zoo tsuas yog kev noj kev haus, tej kev sib ntsib nrog lwm tus ntseeg hauv Pawg Ntseeg ua ke. Tiamsis thaum no kuv nkag siab tias “sib raug zoo ua ke” nyob hauv Vajluskub yog hais txog txoj kev sib txuas ua ke ntawm Tswv Yexus thiab Nws cov menyuam. Thaum no nyob ntawm kuv sib ntsib yog lub sijhawm zoo tseg rau kuv mus nyob ze Vajtswv, thiab kuv nyiam qhov no.

Lub ntsiab “mus hauv qhov pom kev” ua rau kuv nco txog tej hnub thawj uas kuv nyuam qhuav ntseeg Vajtswv, thaum ntawd kuv yeej tseem muaj ntau yam kev tawm tsam vim txaj muag rau lub neej yav dhau los, thiab tsis xav kom yus tej kev txhaum raug nthuav tawm. Kuv xav, yog yus mus hauv qhov pom kev ces zoo li tab tom sawv ntawm tej teeb cig saum sam thiaj, tas sawv daws puav leej ntsia pom taw tes, hais lus saib tsis taus yus! Mus hauv qhov pom kev, txais yuav txoj kev nthuav tawm tej kev qaug zog thiab tej yam uas yus muab zais cia nws yog ib txoj kev uas tsis tab pov. Kuv tsuas xav khiav nkaum, kom txhob muaj tug ceev faj txog kuv xwb.

Yog li kuv thiaj pheej khiav nkaum qhov pom kev. Lub neej zoo li no nyuaj kawg, tiamsis ua mus ua tuaj kuv pib swm zuj zus. Ntau zaug kuv tseem hnov tsis ua cas, vim xav txog qhov uas yus kam sawv tim ntsej tim muag qhov tseeb nws tseem txaus ntshai dua. Tej zaug peb muaj ntau tug kuj pom zoo li no. Ib sab, kuv xav tau tej koob hmoov thaum mus hauv qhov pom kev, xav tau mus nyob ze Vajtswv. Tiamsis ib sab hauv kuv lub hlwb tsuas yog tej yam tsis zoo, thaum uas txhua zaug kuv tej kev txhaum, kev qaug zog, tej yam muab zais cia nrog kuv txoj kev puas tshuaj raug muab nthuav tawm. Txawm li los, kuv yuav khiav tsis tau twj ywm hauv qhov tsaus ntuj mus li. Vajluskub hais txawv: txawm kuv yuav ua li cas los, Vajtswv yeej pom tseeb txhua yam txog kuv.

“los qhov tsaus ntuj twb tsis tsaus rau koj li; hmo ntuj los koj yeej porn kev kaj nrig ib yam li nruab hnub, koj saib qhov tsaus kaj nrig ib yam li qhov kaj… Tsis muaj ib yam dabtsi uas neeg yuav muab ntis tau tsis pub Vajtswv porn. Ib puas tsav yam uas Vajtswv tsim los lawm Vajtswv yeej porn huv tibsi, thiab peb txhua tus nyias yuav tsum piav nyias lub neej qhia rau Vajtswv. (Ntawv Nkauj 139:13; Henplais 4:13)

Mloog cuag li yog ib lub ntxiab cuab, tiamsis tseeb tiag nws yog ib lub ntxiab zoo. Qhov kev ntshai raug muab nthuav tawm, tej yam uas npog tsis tau, nrog lub siab ntshaw nrhiav Vajtswv – Vajtswv twb siv tag nrho tej ntawd kom tig kuv mus rau qhov tseeb. Qhov kaj tsis yog yam txaus ntshai, tiamsis yog txoj kev uas coj mus txog rau txoj kev nrog tau Vajtswv sib txuas ua ke, qhov chaw peb dhau los ua ib nyob hauv Vajtswv thiab Yexus Khetos. Thaum ntawd, peb lub neej yuav raug zais nrog Yexus Khetos ua ke hauv Vajtswv (Kaulauxais 3:3)

Xatas niaj hnub muab peb kaw cia hauv txoj kev dag ntxias thiab kev ntshai. Tiamsis Vajtswv niaj hnub ua haujlwm hauv peb:

“Qhov kaj cia li ci hauv qhov tsaus ntuj tuaj,” tus ntawd yog tus Vajtswv uas ua kom qhov kaj ci tuaj rau hauv peb lub siab, qhia kom peb paub Vajtswv lub tshwjchim uas ua rau Yexus Khetos lub ntsejmuag ci ntsa iab. (2 Kauleethaus 4:6).

Peb muaj ib Leej Txiv nyob saum ntuj, Nws caw kom peb los sib koom ua ke nrog Nws. Nws kuj cog lus yuav cawm peb, zam txim thiab ntxuav txhua tus uas kam nkag los rau hauv Nws qhov pom kev.

“Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus” (1 Yauhas 1:9).

Thov caw nrog kuv peb thov Vajtswv ua ke:
Tus Tswv uas muaj kev hlub! Txiv hnub no kuv los cuag Koj thiab hais rau Koj tias kuv tsis xav ua lub neej nyob hauv qhov tsaus ntuj ntxiv. Kuv xav txhais ruam mus hauv qhov pom kev, kom kuv tau zam txim, tau hloov pauv, thiab txais yuav txoj kev ywj pheej uas koj pub. Kuv xav tau ua ib lub neej muaj kev sib raug zoo ua ke nrog Koj. Thov Vajtswv pab kom kuv tso tau kuv tej kev ntshai tseg, qhib lub siab los txais yuav qhov tseeb, thiab muaj lub siab tawv ua lub neej haum Vajtswv siab. Kuv thov hauv Tswv Yexus Khetos lub npe. Amees.

Cov kwv tij txhua tus, hnub no, tseg ib me ntsis sijhawm los saib yus lub siab. Puas muaj yam dabtsi tab tom tav koj ua rau koj tsis nyob ze Vajtswv? Puas muaj txoj kev ntshai twg, kev txaj muag twg tab tom muab koj tuav cia rau hauv qhov tsaus ntuj? Yeej tsis muaj yam dabtsi koj ua Vajtswv tsis paub, txawm li ntawd los, yeej tsis muaj ib qhov yuam kev twg loj dua Vajtswv txoj kev hlub tseg rau koj. Vajtswv twb npaj txhij txoj kev tseg rau koj mus kom yuav nkag rau hauv Vajtswv txoj kev sib txuas lus ua ke. Vajtswv tab tom tos koj – tsis paub hnub no koj puas kam txhais ruam mus hauv qhov pom kev?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.