Lub neej yog txoj kev xaiv txhua hnub, peb puav leej yuav tau txiav txim siab saib yam twg yog tseem ceeb dua. Tej lub sijhawm uas txomnyem, peb yuav mus cuag Vajtswv, tiamsis thaum uas txhua yam zoo, tsis paub peb puas tseem nco txog Nws? Thaum sawv ntawm txoj kev ncau hauv lub neej, koj yuav xaiv txoj kev dav raws li cov neeg coob coob lossis taug txoj kev nqaim tig rov qab los rau ntawm tus uas niaj hnub tos koj?

Hnub no, yog hnub 18/03/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jordan Buntgen dhau ntawm Zaj kawm TIB TUG UAS TIG ROV QAB LOS

“Lawv cov ntawd muaj ib tug porn hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug.” (Lukas 17:15).

Nyob rau lub sijhawm Tswv Yexus ua haujlwm hauv ntiajteb, Tswv Yexus cawm ntau tus neeg uas txomnyem, muaj mob muaj nkeeg thiab cov neeg uas raug ntiajteb ua saib tsis taus. Zaj xwm txheej hais txog kaum tus mob ruas hauv Lukas 17:11-19 hais txog Tswv Yexus ib qhov txujci:

“Thaum Yexus mus nram lub nroog Yeluxalees, nws hla lub xeev Kalilais mus. Thaum nws tabtom yuav mus rau hauv ib lub zos, nws ntsib kaum tus mob ruas. Lawv sawv deb deb, thiab hu nrov nrov hais tias, “Tswv Yexus! Thov koj hlub peb!” Thaum Yexus porn dheev lawv, nws hais rau lawv hais tias, “Nej cia li mus cuag cov povthawj kom lawv saib nej.” Thaum cov neeg mob ruas ntawd tabtom mus, lawv tej ruas twb zoo lawm. Lawv cov ntawd muaj ib tug porn hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug. Nws txhos caug ntua ntawm Yexus kotaw ua Yexus tsaug Tus ntawd yog neeg Xamalis. Yexus hais tias, “Kaum leej twb zoo huv tibsi lawm; cuaj leeg dua twg tas lawm? Vim li cas tsuas muaj tib leeg uas yog lwm haivneeg los ua Vajtswv tsaug xwb? “Thiab Yexus hais rau tus ntawd hais tias, “Koj cia li sawv mus tsev; koj txojkev ntseeg twb ua rau koj tej ruas zoo lawm”

Nyob hauv kaum tus ntawd, tsuas muaj ib tug thiaj rov qab los! txiav txim siab nrog Tswv Yexus mus yog ib yam, tiamsis nrog Nws mus txhua hnub ho yog lwm yam. Thaum tseem nyob hauv ntiajteb, Tswv Yexus pom ntau tus neeg tig nraub qaum rau Nws zaum no tas lwm zaug.

Peb ntsib cov neeg txomnyem, muaj mob muaj nkeeg muaj ntau txoj kev tu siab. Peb coj lawv los cuag tus kws kho zoo, kom lawv saj tau Tswv Yexus txoj kev hlub – tiamsis lawv rov qab los ua lawv lub neej qub, pauv qhov uas tig rov qab los thiab ua Vajtswv tsaug.

Tiamsis yeej tseem tshuav ib tug. Tus ntawd xaiv tig rov qab los, txawm yog txoj kev rov qab los ntawd yog los rau ntawm Tswv Yexus tus uas tau kho rau kaum tus tau zoo, ces thaum no tsuas tshuav ib tug lawm xwb. Ntawd yog tus neeg nrhiav Vajtswv, qhuas Vajtswv thiab tham rau sawv daws mloog txog tej uas Tswv Yexus tau ua rau yus. Tshuav koj ne zoo li cas? Koj puas yog ib nyob rau hauv cuaj tug ntawd, lossis yog tus uas tig rov qab los ntawd?

“Nej yuav tsum mus lub qhovrooj nqaim, rau qhov lub qhovrooj loj thiab txojkev dav coj mus rau ntujtawg thiab muaj coob leej taug txojkev ntawd, tiamsis lub qhovrooj nqaim thiab txojkev me uas mus nyuaj yuav coj mus tau txojsia, cov neeg uas taug txojkev ntawd tsis muaj coob leej.” (Mathais 7:13-14).

Vajtswv tsis quab yuam kom peb hlub Nws. Nws muaj cai yuam kom peb mloog Nws, tiamsis Nws xaiv kav los ntawm txoj kev hlub, lub siab hlub tshua thiab kev hlub. Peb nrog Nws mus, taug txoj kev nqaim, tsis yog lub nra tiamsis vim yog peb hlub Vajtswv – thiab ntawd yog qhov uas Vajtswv muab cai rau peb cim civ txiav txim siab.

Muaj tej hnub kuv kuj hnov qab Vajtswv tshav ntuj, cia raug ntxias caum cuaj tus ntawd qab mus. xaiv txoj kev yooj yim dua. Tiamsis thaum kawg Vaj Ntsujplig kuj ntuas kuv: “Kuv twb xaiv koj, koj tau hu los nrog Kuv mus txog rau thaum kawg, txhob tso tseg”

Tswv Yexus tseg cuaj caum cuaj tug mus nrhiav tus uas ploj lawm. thiab hnub no Vajtswv kuj nrhiav koj. Yog li, koj puas npaj txhij dhau los ua ib tug txiav txim rov qab los cuag Vajtswv? Thiab tsis yog tsuas yog ib zaug, koj muaj cuab kav txiav txim nrog tus Tswv mus txhua hnub, txawm yog txoj kev ntawd nws nqaim thiab txomnyem tab tom tos koj? Txoj kev xaiv nws nyob ntawm koj txhais tes.

Thov caw nrog kuv peb thov Vajtswv ua ke:
Ua Leej Txiv saum ntuj tsaug, vim dhau ntawm Tswv Yexus lub neej, kuv tau kawm, tau loj hlob thiab mus raws li Vajtswv lub siab nyiam. Thov pub kom kuv muaj lub siab tawv sawv khov kho hauv txoj kev no, tsis yog tsuas yog hnub no tiamsis txhua hnub hauv kuv lub neej. Thov Vaj Ntsujplig ntuas kom kuv txhua zaug uas kuv yuam kev, kom kuv tsim dheev rov qab los thiab ua lub neej haum leej txiv siab. Kuv thov hauv Tswv Yexus Khetos lub npe. Amees.

Cov kwv tij phooj ywg, koj txoj kev txiav txim siab hnub no yog dabtsi? Koj yuav caum cov neeg coob coob, lossis yuav yog tus uas tig rov qab los, txhos caug ntawm Vajtswv xub ntiag, fij lo lus ua tsaug thiab muab tag nrho yus lub neej rau Vajtswv? Yuav muaj tej lub sijhawm qaug zog, tej lub sijhawm raug ntxias mus ntawm txoj kev dav, yooj yim. Tiamsis nco ntsoov tias, Tswv Yexus twb cawm koj, muab Nws txojsia tuag theej koj. Yog li yuav tau xaiv taug txoj kev nqaim, txawm yog txomnyem los puv npo koob hmoov, vim ntawd yog txoj kev uas coj mus txais tau txojsia ntev dhawv ib txhis.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.