Thaum tseem yau, tej zaug peb txhua tus kuj tau tsa qhov muag saib saum ntuj thiab nug tias: “Leej twg yog tus tsim muaj tej fuab dub tab tom khiav tsheej ntsauv tsheej ntsauv saud?” Lossis thaum ntsia pom tej paj sib tw tawg zoo nkauj ntawd, peb lub siab cia li tsa suab tias: “Vim li cas tej ntawd yuav zoo nkauj ua luaj li?” Nyob rau hauv tej tib neeg laus lub neej khwv tsis muaj sijhawm so no, peb yooj yim hnov qab tej yam uas me me thaum peb yog menyuam yaus tau saib. Tiamsis txoj kev zoo nkauj thaum ntawd thiaj yog yam nthuav tawm Vajtswv txhais tes muaj hwjchim – tus uas tsim lub ntuj ntiajteb thiab txhua yam nyob hauv peb lub neej.

Hnub no, yog hnub 02/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Missey Butler dhau ntawm Zaj kawm LUB NEEJ THAUM YAU KAJ SIAB LUG

Vajluskub: “Txij thaum Vajtswv tsim lub ntiajteb los, txawm yog neeg tsis porn Vajtswv tus muaj hwjchim uas nyob mus ibtxhis thiab qhov uas nws yog Vajtswv los yog lawv saib ib puas tsav yam uas Vajtswv tsim, lawv yeej paub hais tias muaj Vajtswv tiag. Yog li ntawd, lawv yuav hais tias lawv tsis paub Vajtswv yeej tsis tau li” (Loos 1:20)

Koj puas tseem nco lub sijhawm tsis paub txhawj dabtsi thaum txog lub caij ntuj sov thaum tseem yog ib tug menyuam yaus? Tej hmo sov sov ntawd, yog tau rov qab mus pem zos, peb yuav muaj sijhawm mus caum tej kab ci ci thaum hmo ntuj, txog qhov uas tsis nco tias muaj ib pab yoov tab tom nyob ib ncig.

Peb pw saum tej nyom, saib saum lub ntuj tsaus nti muaj tej hnub qub cig lam lug. Tas peb txhais tes me me xav cev tes mus tuav tag nrho lub ntuj. Kuj muaj tej zaum peb ua tib zoo mloog tej suab kab zaug quaj, qav quaj ntxhia nrho nrooj hauv hmo.

Txog muaj ib hnub, tej lub sijhawm li ntawd pib hloov pauv. Xwb tim peb xav kom yus loj sai sai, tsuas xav kom rov qab txog lub sijhawm nco txog yus lub hnub yug xyoo txuas ntxiv vim muaj ntau yam yus xav paub, tshuav ib lub ntuj loj heev tab tom tos, thiab tsis muaj sijhawm los tos ntxiv.

Thaum peb loj hlob zuj zus, kuv pib hnov muaj ib lub suab hais – ntxhi xwb tiamsis pheej hais tsis tseg – tshoov kuv lub siab mus nrhiav lo lus teb. Ntawd yog xav paub txog txoj sia thiab txoj kev tuag. Nws ua twjywm nkaum hauv kuv lub siab, txog rau thaum uas kuv ua txuj ua tug tsis paub tsis tau lawm tiamsis yuav tau nqes tes mus nrhiav.

Muaj ntau zaug kuv niam yuam kom kuv yuav tau nyob twj ywm hauv chaw pw vim muaj ntau yam tsis zoo hais tawm. Tiamsis nyob rau tej lub sijhawm ntawd, kuv pheej mus rau ntawm kuv niam thiav kuv txiv lub hauv ncoo txaj, pw saud saib kuv tsev neeg phau Vajluskub uas twb qub qub lawm.

Txhua zaug uas qhib Vajluskub los, kuv puav leej ua tib zoo tso zoo zoo tej kev nco txog ntawm txhua nplooj ntawd: ib txoj plaub menyuam mos, daim duab caj ceg, ob peb txoj plaub noog tso hauv hnab. Ntawd yog tej khoom nco txog thaum tseem yau, tau kuv niam khaws cia zoo zoo los ntawm nws txoj kev hlub.
Kuv qhib ib plooj ntawv zuj zus, saib tej duab piv txwv. Kuv zaum tsheej sijhawm tsuas yog ntsia Daniyees daim duab nyob hauv qhov tsov ntxhuav, Yakhauj nrog tim tswv sib mos, lossis Mauxes cais dej hiav txwv liab.

Tiamsis muaj ib daim duab tau chwv txog kuv tob tshaj yog – lub sijhawm uas Tswv Yexus raug ntsia saum Ntoo Khaub Lig. kuv yeej tseem nco lub sijhawm ntawd kuv ntsia pom Vajtswv tus tub raug muab dai nyob nruab nrab ob tug tub sab. Kuv lub qhov muag maj nroos mus nrhiav lo lus teb nyob hauv qab daim duab ntawd. Thiab thaum kuv nyeem txog cov lus taij thov tas siab: “Txiv thov koj zam txim rau lawv vim lawv tsis paub lawv tab tom ua dabtsi”, ces kuv lub siab tau tshoov tiag tiag.

Txawm yog kuv tsis tau nkag siab tag nrho lo lus ntawm txoj kev cawmdim los kuv yeej tseem nco nqe Vajluskub uas kuv kawm hauv tsev kawm hnub so: “Tsis muaj ib txoj kev hlub twg loj dua txoj kev hlub vim phooj ywg uas tuag theej”. Lub sijhawm ntawd, kuv tus ntsujplig muaj ib txoj kev ntshaw tob tob – ntshaw kom tau paub Vajtswv, thiab tau Vajtswv paub txog.

Kuv tus Vajtswv uas tsim kuv los nws paub zoo Nws tej haujlwm thaum tsim kuv nyob rau hauv niam plab. Nws tseg ib qhov chaw tsis muaj dabtsi hauv kuv lub siab tsuas yog Vajtswv xwb thiaj yuav txhawm tau kom puv. Qhov khoom ntawd yog kuv tsis paub dabtsi tab tom saib ib tug kab ntawm kuv txhais tes, thiab nug tias: Leej twg yog tus tsim tej teev zoo nkauj ntawd?

Kuv ua Vajtswv tsaug vim tej xyoo menyuam yaus ntawd, thiab Vajtswv txoj kev ncaj ncees tau coj kuv mus txog rau ntawm qhov tseeb. Txhua zaug uas kuv ua tau, kuv yeej tseem pua ib daim pam nraum zoov, saib tej uas Vajtswv tsim los. txawm yog tsis yog ib tug menyuam yaus lawm los, kuv yeej tseem xav txog tej tauv fuab dub, thiab ua tib zoo saib tej npauj npaim nkag saum kuv txhais tes.
Kuv tsuas paub ntsia thiab koom siab ua ke nrog tej uas Vajtswv tau tsim los, nrog rau ib puas tsav yam lees tias: zoo tshaj, zoo tshaj tus uas tsim ib puas tsav yam! Vim Vajtswv yog TUS VAJTSWV NTAWM IB PUAS TSAV YAM ZOO KAWG NKAUS.

Thov caw nrog kuv peb thov Vajtswv ua ke:
Kuv tus Vajtswv, tus Tswv, kuv nyho hau ua Koj tsaug vim koj tau tsim ib puas tsav yam los zoo kawg nkaus. Thov qhib kuv lub qhov muag kom kuv paub tias koj yog tus Tswv ntawm txhua txoj kev zoo nkauj hauv lub qab ntuj no. nyob rau lub ntiajteb puv npo kev tsis sib haum li no, thov pab kom kuv tsis muaj ib zaum twg yuav ua poob kuv txoj kev xav tsis thoob, thaum ntsia ib puas tsav yam uas koj tsim los, kom kuv yuav txo hwjchim rau tej uas koj tsim los. Kuv thov hauv Tswv Yexus Khetos lub npe. Amees.

Cov kwv tij, tej menyuam yaus lub neej thaum tseem yau nws txuas ua ke nrog lub caij ntuj so muaj ntau yam nco ntsoov tseg, thiab nyob hauv kuj muaj sab ntsujplig tob tob, yog tias peb txhua tus tseg peb lub siab los xav txog Vajtswv. Vajtswv yeej tseem tab tom caw koj los rau hauv lub ntiajteb uas Vajtswv tau tsim. Vajtswv xav kom koj tsis yog tsuas mus saib xwb, tiamsis tseem yog cia kom koj tus ntsujplig tau tshoov siab, tau hloov pauv los ntawm Vajtswv lub hwjchim. Cia li qhib siab thiab tig mus saib Vajtswv, vim Vajtswv muaj ntau yam zoo tab tom tos koj lees paub thiab nrog Nws mus ua ke – mus nrhiav lub homphiaj zoo uas Vajtswv tau kos tseg rau koj lub neej.

Los ntawm lub ntsiab lus zoo no, kev thov Vajtswv txhua hnub caw sawv daws tseg sijhawm pub rau yus tej menyuam, tej xeeb ntxwv, tej menyuam ib ncig uas Vajtswv tau tseg rau peb rau lub caij ntuj sov xyoo no. tseg sijhawm rau tej haujlwm muaj nqis, qhia Vajtswv tej lus rau lawv, nrog lawv xav txog tej yam muaj nqis ntawm sab ntsujplig, kom lub caij ntuj sov xyoo no yuav yog tej hnub zoo muaj ntau yam muaj nqis khaws cia rau tej menyuam ua kev nco txog hauv lawv lub neej txog Vajtswv txoj kev hlub uas Vajtswv tseg rau peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.