Rài kis do òs gơ la dô tơngai ò nĭ nền. Gơs ală ngai jơh ală broă gơlik gơs la niam, be dô nơm rơndeh pàr sŏng ngăn di gùl trồ tơlìr niam. Mơya kùng gơs ală tŭ , bol he sền gŏ he be găm gơlơng gơh lơnggởr digùl càl rbùt, wil tơl roh gùng dà, mơ ò git ñchi broă rơp gơlik gơs pơnjat tai. Mơya ala bơh rngòt rngơt mờ pìn wil wơl, gơs dô nơm broă mơ bol he pal càng lơh rlau jơh: hơ̆ la tờnggơr măt hơ Bèp Hơđăng Trồ, Bơtau sơmbăt kơ̆ rài kis bol he di tòm mpang tê sền gàr Kơnràñ dê.

Ngai do, ngai 17/7/2025, tonggu Hòi Dan Kòp ngai dăn jà ông ò oh mi kơlồi sơnơng bal Jơnau Yàng kơnơm di bơta dong kơl Tori Troncone bơh tonggume TƠMỀT SỀN BƠTASƠMBĂT PRĂP RÀI TƠNƠ̆

Sră Goh: “Băñ rngòt, bơh añ ơm bal mơ mê; băñ kơnđap-kla, bơh añ la Yàng Tom Trồ mê!” (Esai 41: 10)

Añ ò hoan kờñ hao rơndeh pàr. Dilah trồ ang tơngai niam, gùng lòt lơbơñ niam gèn di dò. Moya tŭ tơngai iơh lơh rơndeh pàr in gơlơng gơh bơh nhiễu động, ăñ rờp gơlơh căng thẳng mơ ò rgơi kong.

Gơs dơ̆ añ lòt công tác, rơndeh pàr añ jê pàl pàr lòt găn dô nơm càl rbut dờng. Lai mơ hơ̆ jơh ală rơndeh ndai gơ păl ơm dơh wơl tài bơh trồ tơngai ò niam. Jơl tùs di tơnơ̆ hơ̆ bol hi rgơi geh gơnoăr nàng pàr, mơya tŭ mòr tùs di ơnih tiah gèn càl rbùt gơ pràn ngăn. Tian gơs añ rgơi kơno loh miu pliar gơtùp di să rơndeh pàr. Càl gơ pràn tian gơs rơndeh gơlơng gơh lơnggơr pràn ngăn, ò rgơi rơp di tiah. Kòp dơ̆ rcăng rờp jùr gèn pal guh wơl. Bơta do gơlơh behơ̆,wih wơl oă dơ̆. Căng thẳng ò jai kòng.

Nggui rềp di gah añ la cau ăt bồ rơndeh pàr sŏ kò – kùng lơh broă tờm ơnih pàr do, mơ tòm gùng ri hiu tơnơ̆ mơ tŭ neh trực. Digùl rơndeh pàr gơlơng gơh bơh di rbùt dơng, ông găn nggui sà ƀañ, ñồ dà mơ lăng phim tòm màn hình be ò gơs broă lơi gơlik gơs. Rơndeh pàr sơlơ̆ pràn ngăn, mơ ồng ò pờ bồ hơđăng . Sền gŏ ông bình tỉnh behơ̆, să tòm añ kùng gơlơh lơngai sơl. Bulah lơh ñchi lơi ông kùng la cau ăt bồ rơndeh pàr! Dilah gơs bơta iơh rmơh ngăn gơlik gơs gèn nền cê ồng neh lơh bơta lơi hơ̆ rau. Ồng ò rngòt gèn nền cê añ ò căng pal rngòt rngơt oă ìr.

Tòm Mak tap 4, bol he neh sền git đo nơm rbùt tòm dàlềng Galilê. Yàng Jêsu mơ ală cau bơtê găm ơm hơđăng ơhồ gèn nisơna càl khồm pràn ngăn. Ryà dà gơtfp prà ò git nđờ, tian gơs dà sơntòm gơmùt tòm ơhồ (Mak 4: 35 – 37).

Mơya Kơnràñ ơm tơnơ̆ di tiah tơrwơl ơhồ sơndìng bồ di kơrnờl mơ bic. Ală cau bơtê pơrlai Kơnràñ mơ đơs lah: “Ơ cau Bơtô, ồng ò kơlồi bol he chơt roh ơ?” Phul Yàng Jêsu guh mơ, lah pơrhơng càl mơ đơs mơ dàlêng lah: “thit tĕ, ơm tĕ mŏ mŏ!” càl thit mò mơ ơm mŏ mŏ gèn gơs rìng drìk ngăn. Chòp Yàng Jêsu đơs mơ ală cau bơtê lah: “Ñchi bơh tai bol he rngòt taihs? Òhềt gơs bơta dòn ơ?” (Mak 4: 38- 440.

Gơs dơ̆, digùl ală rbùt rài kis, bol he sền gơlơh be Yàng Jesu găm bic tòm lồi dùt ơhò. Kùng gơs dơ̆, bol he kờñ hòi driau be ală cau bơtê: “Ơ Yàng, Kơnràñ ò kơlồi tùs ơ?!” Mơya Mak tap 4 ai bol he in git lah, Yàng Jêsu bic ò di bơh Kơnràñ ò kơlồi tùs, mờya bơh Kơnràñ git jơh tơl nă rơp lòt găn càl rbùt hơ̆ (Mak 4: 41).

Tòm jơh pah tơngai gơnoăr broă he dê, cau ăt bồ rơdeh par tòn ngai hơ̆ añ jê di gơlăn eh lòt găn oă càl rbùt ndai, digơlăn kùng bòl glăr oă rlau tai! Bơh bơta kơ̆ dơn ồng dê dong ăñ gơlơh rìng lơngai rlau.

Tòm tŭ rài is sơntơm lơnggơh lơnggơr, bol he kah tĕ tơnggờr măt sền tĕ cau ăt bồ rơndeh pẳr rài kis he dê, nàng jôi geh bơta lơngai mơ kơ̆ nùs. Jơnau Yàng tòn Kôlôsê 1: 17 tơngkah bol he lah Kơnràñ gơs măt lai mơ jơh ală phăn, mơ să tòm Kơnràñ pràp gàr jơh ală phăn tòm bơta rơndap wil niam. Dilah sùm wèt nùs hơ Yàng Jêsu, bol he rơp gŏ lah Kơnràñ ò tŭ lơi kơlồi rcăng (Luka 12: 25 -26; Jăng 14: 27)! Lơi tĕ Jơnau hơ Yàng Tom Trồ ơm bal mơ bol he (Êsai 41: 10) mơ dong tò bol he (Rôma 8: 31) cèng tùs bơta lơngai ông mò oh mi in mơ añ găn di ală bơta gơlik gơs tòm rài kis.

Dăn bol he pờ bơr jòng rơ Yàng be cau tòm cih sră Đơs Crih46: 1- 3: “Yàng Tom Trồ là tiah king crŭ mơ bơta pràn kơldăng bol he dê; Kơnràñ gơs mat nàng dong kòl tòm bơta bol glăr. Tài bơh hơ̆ bol he ò gớs rngòt, bulah ù gơs tòmgơl, bulah mơnơm gơlơnggơr tòm kơnàng dàlêng. Bulah dàlêng nggồr ur ur mơ gơlik kơmbuh, bulah ală mơnơm gơlơnggơr tài bơh bơta gơtơngguh ryà dà dê.”

Dan jà bol he dô nùs bal tòm bơta hòi dan:
Khoai Yàng, gigùl ală tŭ rài kis lơnggơh lơnggơr, dan dong kòn kah lah Kơnràñ găm ơm bal mơ kòn. Bulah kòn wơng jơh ală broă găm golik gơs, kòn don lah Kơnràñ găm sơmbăt kơ̆ tê ăt rơndeh dô bă kơ̆ cề mơ tề lăm kòn lòt găn kờp nơm gùng. Dan ai kòn in dô nơm nùs rìng lơngai diđăp càl rbùt, mơ dô dô bơta dòn ò lơnggơh tòm Kơnràñ. Dan bơtô kòn git tơnggơr măt wềt sền hơ Kơnràñ, Bơtau lơh dàlêng in rìng drik càl rbùt ơm mŏ mŏ. Kòn hoi dăn tòm sơđăn Yàng Jêsu Krist, Amen.

Ơ ală ông mò oh mi kờñ gơboh, ală bơta gơlik gơs gùt dăr ò di là bơta lơh nền bơta ring lơngai tòm hwềng soàn bol he. Bơta rìng lơngai ngăn tùs bơh di bol he dờp git Bơtau Krist gam sơmbăt kơ̆ rài kis he. Bulah ală phăn gơ lơnggơh lơnggơr tùs di tiah lơi, Yàng găm ơm bal mơ bol he. Kơnràñ ò săng lời, kùng ò tŭ lơi lơi tê bol he. Càl rbùt ò lơh nền cồng nhà lơi rai kis he dê, bơh Bơtau lơh càl rbùt in ring drìk găm sùm lòt bal mơ bol he tòm jơh gùng dà.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.