Hăm đei layơ buăl đei jet kơdih: lu bơ̆n gô ‘măn lê̆ mŭk tơmam kơ jơhnơr đơ̆ng rŏng? Jên tơmam, tơdrong jang dah dôm tơdrong kĕ jei lu bơ̆n gơh đei na kŭm gô hiong đĭ kiơ̆ kơ jơnăr. Mă lei đei mĭnh tơdrong tơpăt gô jing bơnă kơjăp khŏm khŏm kơ dôm jơhnơr ning mônh, dah lu bơ̆n băt tơnăp ră roi păng bơtho tơ’bôh kơ kon sâu bơ̆n: ‘noh jơ̆ jơhngơ̆m ‘mêm yom kơ Kră Yang- Tơ’ngla đei dŏng păng pơklaih lu bơ̆n, ba lu bơ̆n mơ̆t hnam dơnŏ Sư.

Năr ‘nâu, ‘năr 16/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Maria Schleicher kơ̆l ‘bai NƠ̆R KRAO ATHEI PƠYƠ̆R ĐĬ JƠHNGƠ̆M.

“Na lu iĕm athei đĭ jơhngơ̆m klơm klak, đĭ đon tơchĕng đĭ jơhngơ̆m pran ‘mêm kơ Kră Yang ‘Bok Kei-Dei iĕm. Lu iĕm athei chih răk lăm jơhngơ̆m lu nơ̆r mă inh đei bơtho lu iĕm năr âu.” (Bơtho Khôi Juăt 6:5-6)

Đơ̆ng oei ‘lơ̆p truh tơ ‘lŏ, lu bơ̆n đei pơhrăm băt lơ tơdrong. Đei tơdrong mơ’nah athei pơjuăt, thoi kơ chô̆ tơlei chơ khŏ dah pơhrăm iŏk tơdrong tơ’bôh pơyom; mơ’nah lei đei pơhrăm iŏk kiơ̆ hăm trong hmă đĕch, đơ̆ng kơmĭl arih đơ̆ng dôm lu bơngai jum dăr. Mă lei lăm đĭ đăng dôm lu tơdrong ‘noh, ‘bai pơhrăm gĭt kăl hloh oei jơ̆ bơtho kon hơ’lơ̆p băt ‘mêm yom kơ Kră Yang hăm đĭ jơhngơ̆m, bơhngol păng jơhngơ̆m pran.

Bơtho Khôi Juăt 6 jơ̆ mĭnh lăm dôm kơ chăl Sơ̆p Hla Bơar ‘Bok Kei-Dei mă inh ling lang hơ iă. Lăm Sơ̆p Hla Bơar ‘Bok Kei-Dei inh, chăl ‘nâu đei kơ̆l jơ̆ “Nơ̆r Krao Pơyơ̆r Đĭ Jơhngơ̆m.” ‘Bơ̆t dou, ‘bok Môis kơ nhăm khan tơdrong gĭt kăl hloh jơ̆ athei đĭ jơhngơ̆m ‘mêm kơ Kră Yang păng wei răk dôm nơ̆r tơtă Sư ăn. Sư kŭm krao kon pơlei Isơrael ưh kơ sĭ arih kiơ̆ dôm tơdrong tơtă ‘noh đĕch, na kŭm athei pơnam bơtho dơ̆ng kơ kon sâu kơdih. ‘Nâu jơ̆ nơ̆r krao ‘măn ăn kơ lơ jơhnơr, kŭm đei tơ’blŏk gah tơdrong ‘lơ̆ng tơpăt păng tơdrong pơ yua ăn đơ̆ng ‘Bok Kei-Dei, đei pơkăm khan tơdrong tơpă đơ̆ng Sư kăl kơ đei ră roi păng ưh kơ layơ gơh hiơt.
Duch ma inh đei oei tơmĭnh anih hnam ei. Lăm kơpal tơnang ‘măng hnam đei hơtol mĭnh pôm kơthŭng iĕ krao ‘noh “mezuzah”. Tơ’ngla ăn oei jơ̆ bơngai Juđê, đei dan mezuzah ‘bơ̆t doh kiơ̆ kơ tơdrong juăt đơ̆ng lu sư. Tơ lăm mezuzah tah dôm trong Nơ̆r ‘Bok Kei-Dei lăm Bơtho Khôi Juăt 6:4-9 păng 11:13-21, tơ lăm nơ̆r krao khan Shema. ‘Nâu jơ̆ nơ̆r krao khan tơdrong juăt tơ’blŏk kon pơlei Isơrael khan lăp đei mĭnh ‘Bok Kei-Dei tơpăt tơpă mĭnh Sư đĕch, păng krao lu sư athei đĭ jơ̆hngơ̆m ‘mêm yom kơ Sư. Tơdrong juăt hơtol mezuzah ‘nâu pơtơm tu đơ̆ng nơ̆r bơtho lăm Bơtho Khôi Juăt 6:9: “Ih athei chih răk nơ̆r âu tơ jrăng ‘măng hnam ih păng tơ ‘măng jang pơlei.”

Rŏ lăng lu bơ̆n ưh kơ hơtol mezuzah tơ kơpal tơnang ‘măng thoi bơngai Juđê, mă lei lu bơ̆n gơh chĕp răk Nơ̆r Kră Yang lăm kơdih tơdrong arih bơ̆n. ‘Noh kŭm gơh jơ̆ hơtol mĭnh nơ̆r ‘Bok Kei-Dei lăm hnam, ‘blŏk răk lăm jơhngơ̆m, dah ăn Nơ̆r Kră Yang hơdai lăm dôm tơdrong pơma dơnuh đơ̆ng lu bơ̆n rim năr. Dôm nơ̆r tơ’blŏk iĕ ‘noh tơgŭm lu bơ̆n ling lang dan Nơ̆r Kră Yang tơ tŏk bŏk chăl arih bơ̆n, kŭm hơdai bơtho kơ jơhnơr đơ̆ng rŏng kŭm băt yak năm kiơ̆ Sư.

Lăm jơ năm ngôi tơ Pơlei Tih, inh dơ̆ng ala yơ̆p ‘long ôliwơ kơpal kông Ôliwơ, mơ̆ng kơtơ̆ng ‘Bok Bơtho klah asong ‘bai krao khan lăm Rôm 11:17. Đei dơng ‘long đei chre tŭk đơ̆ng tơnơm ‘long ôliwơ đơ̆ng ‘bok Abraham- wă khan jơ̆ bơngai mơ ‘nah lăm kon pơlei Isơrael. Na lu bơ̆n jơ̆ kon pơlei tơmoi ‘ngoaih, trŏ kơ thoi dôm dơng ‘long đơ̆ng ‘long ôliwơ tơ bri brah, dang ei đei pơklep tơ lăm anih ‘noh. Dang ei, lu bơ̆n kŭm gơh hơdai lăm tơdrong pŭn hiôk ‘Bok Kei-Dei đei pơkă kơ ‘bok Abraham păng kon sâu sư, hơdai sơng iŏk tơdrong arih rơkah rơkai đơ̆ng tơm ‘long ôliwơ gĭt kăl gah ‘Bok Kei-Dei.

Jơhngơ̆m inh tơpă đei hơtŭt ‘bơm kơplah tơchĕng gah mŭk tơmam đon lui mơdrŏng mă lu bơ̆n đei sơng iŏk yua đơ̆ng ‘Bok Krist. Yua kơ tơdrong lôch păng tơdrong arih đơ̆ng Sư, lu bơ̆n gơh hơdai lăm dôm tơdrong pŭn hiôk mă ‘Bok Kei-Dei đei pơkă ăn kơ ‘bok Abraham păng adrĕch adrŭng sư. Tơdrong tơpă ‘noh tơ’blŏk kơ inh khan ‘nâu jơ̆ tơdrong mơnat ăn đĕch, kŭm jơ̆ tơdrong bơ̆jang: lu bơ̆n đei krao ră roi đon lui ‘nâu kơ jơhnơr đơ̆ng rŏng, thoi nơ̆r ‘Bok Kei-Dei đei khan lăm Bơtho Khôi Juăt chăl 6. Păng hăm inh, tơdrong ‘noh pơtơm hloi lăm hnam dơnŏ, kơplah klo akăn nhi bơtho Nơ̆r Kră Yang kơ ‘bar ‘nu kon drŏnglo nhi.
Đơ̆ng rŏng kơ noh, tơ Jêrusalem, inh lăng ‘bôh mĭnh pôm tơ khiĕn hu đei chhơ̆ ‘long ôliwơ ‘lơ̆ng dêh. Hăm inh, tơ khiĕn ‘noh lĕi lăi thoi mezuzah đơ̆ng kơdih inh- mĭnh tơdrong tơ’bôh tơ’blŏk ‘bôh hloi khan inh gah hnam dơnŏ ‘Bok Kei-Dei, inh đei krao arih kơ Sư păng ră roi tơdrong tơpă đơ̆ng Sư. Rim wơ̆t ‘bot tơ khiĕn, inh đei ‘blŏk tơ Rôm 11:17.

Tơdrong gĭt kăl hloh ‘noh jơ̆ đơ̆ng kơplah kon drŏnglo inh kơnhăm kơ tơ khiĕn, ‘noh trŏ kơ jơ̆ jơ ‘lơ̆ng rŏ ăn kơ inh bơtho tơ’bôh păng bơtho kơ kon lăm đon lui. Yua kơ ưh kơ đei tơdrong gơh hơgei ayơ gĭt kăl kơ hăm mĭnh jơhngơ̆m băt ‘mêm yom kơ Kră Yang păng tơnăp yak năm hăm Sư. ‘Noh trŏ kơ jơ̆ hơnă kơjăp hloh wă kơ dôm jơ hnơr đơ̆ng rŏng lu bơ̆n gơh gơnang pơm pơjing đĭ chăl arih kơdih kơpal ‘noh, lăm tơdrong pơgơ̆r đơ̆ng Kră Yang mă ‘mêm mơnat.

Apĭnh đĭ đăng krao khan hơdai: Kơkuh kơ Kră Yang, kon pơyơ̆r nơ̆r bơnê kơ Ih yua kơ Ih đei ăn kơ kon gơh hơdai lăm hnam dơnŏ đon lui đơ̆ng lăm ‘Bok Krist. Apĭnh tơgŭm kon ưh kơ lăp hŏk pơhrăm Nơ̆r Ih kơ kơdih akâu kon đĕch, na kŭm băt pơnam ră roi dơ̆ng kơ dôm jơhnơr đơ̆ng rŏng, hăm kơdih kơmil arih đơ̆ng kon. Hơpơi kơ hnam dơnŏ kon ling lang pôk pơư Kră Yang tơ anih tŏk bŏk, wă kơ jơhnơr pơtrơp đơ̆ng kon kŭm băt ‘mêm mơnat păng yak năm hăm Ih đĭ jơhngơ̆m, đĭ bơhngol păng đĭ jơhngơ̆m pran kơdih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr ‘nâu, buăl gô rơih iŏk trong ayơ wă ‘blŏk răk tơdrong tơpă Kră Yang ăn lăm chăl arih kơdih? Krao apĭnh Kră Yang tơgŭm rim ‘nu lu bơ̆n ling lang pơrơ̆ng pơhrăm iŏk ‘mêm kơ Sư hăm đĭ jơhngơ̆m, bơhngol păng jơhngơ̆m pran, păng kŭm ră roi dơ̆ng tơdrong tơpăt ‘noh kơ jơhnơr đơ̆ng rŏng. Yua kơ, ưh kơ đei mŭk tơmam ayơ gĭt kăl hloh jơ̆ mĭnh jơhngơ̆m tôm mah pơyơ̆r kơ Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.