Rơih iŏk tơdrong bơ̆jang jơ̆ mĭnh tơdrong tơplih gĭt kăl mă lu bơngai hơ’lơ̆p đei tơ’bơ̆p. Rim wơ̆t đei lăng lăm điê̆n thoăi, buăl gô ‘bôh lơ tơdrong bơ̆jang đei pơư: tơdrong jang jên lơ, tơdrong jang “đei hơnơ̆ng”, dah tơdrong jang lăm teh đak gĭt dêh. Mă lei hăm bơngai lui kơ Kră Yang, tơdrong jang ưh kơ sĭ lăp jơ̆ mĭnh pôm hla ar kơ thơ ‘lơ̆ng rŏ wă năm tơ’bôh hăm bơngai nai. ‘Noh kŭm jơ̆ pơgar teh choh mă buăl đei krao wă rei hơdrĕch găr Tơdrong ‘Nao ‘Lơ̆ng, wă kơ ŭnh hơdah Kră Yang pơchrang đơ̆ng tơdrong bơ̆jang buăl jang.

Năr ‘nâu, ‘năr 18/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jennifer E. Jones kơ̆l ‘bai YANG YÊSU BƠNGAI JANG OT ‘LONG.

“Bơngai âu Sư jang ot ‘long đĕch lah. Sư kon Mari, ‘nhŏng đe Yakơ, Jôsê, Jut, Simôn. Lu oh Sư drŏ-kăn oei tơ âu mơ̆n. Na lơliơ Sư gơh pơm dôm tơdrong noh?” Lu đe ei klai kơ Sư hơgei na jing kuă lui kơ Sư.” (Markôs 6:3)

“Bơngai âu Sư jang ot ‘long đĕch lah. Sư kon Mari, ‘nhŏng đe Yakơ, Jôsê, Jut, Simôn. Lu oh Sư drŏ-kăn oei tơ âu mơ̆n. Na lơliơ Sư gơh pơm dôm tơdrong noh?” Lu đe ei klai kơ Sư hơgei na jing kuă lui kơ Sư.” (Markôs 6:3)

Kơplah Yang Yêsu pơtơm yak lăm tơdrong bơ̆jang, kon bơngai oei juăt kơ lăng Sư thoi mĭnh ‘nu bơngai jang ot ‘long đĕch. Đơ̆ng hơ’lơ̆p truh tơ ‘lŏ, hnam dơnŏ, rông ‘bôt păng buăl juăt ling lang ‘bôh Sư đei hơdai hăm tơdrong jang pơm păng hơmet tơmam. Trŏ tơpă lăm kơplah ‘noh, bu kŭm kăl kơ đei jơnăr wă sơng iŏk tơdrong krao Sư jơ̆ “ ‘Bok Thây Yêsu”.

Mă lei, đei mĭnh tơdrong mă kon bơngai kơplah ‘noh tim mă băt- kŭm jơ̆ tơdrong mă lu bơ̆n kăl kơ băt kơnăl dang ei: tơdrong jang ot ‘long lăm teh đak trŏ jơ̆ tơdrong hơmet ‘lơ̆ng tôm kơ tơdrong bơ̆jang ‘lơ̆ng rŏ đơ̆ng Sư. Yua kơ lăm pêng sơnăm tơ anăp, Sư gô ‘măn đĭ jơnăr wă pơklaih dôm jơhngơ̆m pơchah.

“Lu bơngai liĕm akâu ưh kơ kăl kơ ‘bok pơgang ôh, pôm lu bơngai jĭ jăn đĕch kăl kơ ‘bok pơgang. Inh năm tơ âu ưh kơ sĭ chă wơ̆n lu bơngai ‘lơ̆ng ôh. Inh năm tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.” (Markôs 2:17)

Mă tơpă lu bơ̆n oei arih lăm tơdrong pơmat tat yua kơ đơ̆ng tơdrong yoch. Hăm dôm tơdrong đêl đơ̆ng tơdrong yoch- phŏ kŭm yua kơ đơ̆ng kơdih bơ̆n pơm, phŏ kŭm yua kơ đơ̆ng bơngai nai. ‘Noh jơ̆ tơdrong ‘mong ăn sơ’ngon dêh đơ̆ng tơdrong pơ̆k huŏng. Gah ‘ngoaih pơgar Êđen, chăl arih kon bơngai ling lang năm hơdai hăm tơdrong ơh sơ’ngon păng hiong răm. Ưh kơ hrôih jê̆ klui, bu bu kŭm đei kơplah pơchah lăm jơhngơ̆m: phŏ kŭm jơ̆ mĭnh tơdrong pơgơ̆p ưh kơ jing, mĭnh jơnăr đei hlôi hiong, mĭnh tơdrong jĭ blư truh, dah bơngai lăm hnam dơnŏ weh ataih ling lang. Dah buăl hiơ̆k bơngơ̆t tơpă păng ‘mêm kơ mĭnh tơdrong kiơ ‘noh lăm chăl arih ‘nâu, lei na wă khan kŭm gô đei kơplah plei nuih buăl gô đei ơh sơ’ngon dah tơ hiong lê̆ tơdrong ‘noh.

Đei mĭnh wơ̆t, inh chih tơlăm sơ̆p hla ar krao khan đĭ đăng dôm tơdrong ơh sơ’ngon lăm jơhngơ̆m inh. Dôm tơdrong mong đơ̆ng ki sơ̆, inh tơ lĕch hăm dôm trong chih chư ưh kơ tơklă, phŏ kŭm đei chrek tơ ala mă rơ̆n: “Jơhngơ̆m kon pơchah Kră Yang ơi!” Kơplah ‘noh inh nŏng kơ tơchĕng ‘Bok Kei-Dei wer kơ tơdrong ơh sơ’ngon đơ̆ng inh, păng inh đei ôr krao pơret mă re na Sư gơh mơ̆ng ‘bôh, na gơh chă ‘bôh inh. Mă lei, lăm jơ krao khan năr ‘nâu, inh thar băt kơnăl kơdih đei hloi ưh kơ trŏ tơpă:

“Yua kơ Ih ưh kơ wă tơmam soi ră mă-lei inh pơyơ̆r boih. Lu tơmam soi ‘buh Ih kư̆m ưh kơ lăp đon. Tơdrong pơm Yang lăp đon Kră Yang ‘Bok Kei-Dei noh jơ̆ jơhngơ̆m pơchah. Ơ Kră Yang ‘Bok Kei-Dei! Jơhngơ̆m tơbral pơchah Ih kư̆m ưh kơ pơdê.” (Hơriso 51:16-17)

‘Bok Kei-Dei ưh kơ weh wer dah ‘bôh lăm jơhngơ̆m lu bơ̆n ‘bĕnh kơ dôm “kơ ‘bang tơ’bôh tơdrong jang”, roi tơbăt ăn mĭnh tơdrong bơ̆jang pơchah răm. Sư mơ̆t tơklă lăm noh. Sư lăng hơmet dôm anih pơchah, tơ’bôh dôm lu anih đei pơrăm ‘net ‘net yua kơ đơ̆ng tơdrong yoch. Sư kŭm lăng ‘bôh hơđăl dôm anih lu bơ̆n đei adrin hơmet kơdih mă lei ưh kơ kĕ. Na Sư pơtơm wă pơrăm tŭk, wă pơm pơjing ‘lơ̆ng. Ưh kơ sĭ pơm hơmet plơ̆ng đĕch ôh, Sư kŭm pơm kơ tơdrong jang pơjing ‘noh ‘lơ̆ng rŏ hloh, kơjăp hloh kơ adrol. Păng truh kơ tơdrong bơ̆jang keh đang, đơ̆ng tơdrong iĕ hloh, đei ‘bơ̆t trŏ kơ anih sư. Tơdrong jang đơ̆ng Sư ling lang ‘lơ̆ng tôm.

Sơ̆p Hla Bơar ‘Bok Kei-Dei ưh kơ tơbăt hơđăl đơ̆ng rŏng kơ pơtơm tơdrong bơ̆jang, Yang Yêsu hăm oei đei pơtrơp bơ̆jang tơdrong jang ot ‘long dơ̆ng lah ưh. Mă lei đei mĭnh tơdrong tơpă: đĭ dôm sơnăm oei kơpal teh đak, na păng đĭ kơ lăm dêh char khŏm khŏm, Sư pơklaih păng oei wă pơklaih tơdrong pơchah kon bơngai. Năr ‘nâu, Sư kŭm oei chro ti, krao buăl wơ̆n Sư mơ̆t lăm kơdih “tơdrong jang pơchah pơchek” lăm chăl arih bơ̆n. Athei lui gơnang kơ tơpang ti gơh hơgei păng kơjăp đơ̆ng Sư. Gô truh kơ Sư ăn kơ buăl ‘bôh tơdrong jang Sư đei jang, păng buăl gô băt kơnăl: lăp đei Bơngai Jang Ot ‘Long Juđê truh đơ̆ng Nasaret đĕch gơh pơklep hơmet păng pơklaih buăl kiơ̆ hăm tơdrong tôm mah.

Păng ‘nâu kŭm jơ̆ tơdrong gĭt kăl mă lu bơngai druh tơdăm kăl kơ tơchĕng pơwao: Yang Yêsu lăng gĭt kơ mĭnh tơdrong bơ̆jang mă khan “hmă đĕch”. Đơ̆ng tơdrong jang ot ‘long tă kơ jang hơnă kơ tơdrong bơ̆jang tih hloh đơ̆ng Sư ning mônh. Dah buăl oei dơ̆ng ‘bơ̆t anăp ‘măng rơih iŏk tơdrong jang păng pơm pơjing tơdrong jang, ‘nĕ kơ lăp lăng tơ anăn pơư dah jên tơmam gô đei. Tơdrong gĭt tơpă đơ̆ng mĭnh tơdrong jang ‘bơ̆t anih: buăl gơh yua tơdrong jang ‘noh wă tơ’bôh tơdrong ‘mêm mơnat păng tơdrong tơpăt đơ̆ng ‘Bok Krist kơ bơngai nai liơ.

Rŏ lăng Kră Yang oei krao buăl rơih iŏk mĭnh tơdrong bơ̆jang hơdai truh tơdrong bơwih bơwăn kơ Sư păng Khŭl Bơngai Lui, ba ăn hloi tơdrong gĭt kăl Bơngai Lui. Mă lei kŭm rŏ lăng Sư wă kơ buăl ba tơdrong gĭt kăl Bơngai Lui lăm kơdih tơdrong jang mă kơdih lăm tơpang ti đơ̆ng Sư pơgơ̆r, lei tơdrong jang ưh pă jơ̆ tơdrong chă sa, mă gô jing tơmam wă pơm pơjing, tơplih păng ba tơdrong dŏng pơklaih truh kơ teh đak pơchah tăp dăr buăl.

Apĭnh đĭ đăng krao khan hơdai: Bơnê kơ ‘Bok Kei-Dei ‘Bă yua kơ Ih đei ăn ‘Bok Dŏng Pơklaih Yang Yêsu truh tơ teh đak, pơm mĭnh ‘nu bơngai jang ot ‘long iơ̆m dim wă pơklaih dôm kơ bơhngol pơchah. Apĭnh Kră Yang bơtho kon băt chơ chă tơdrong Ih wă tơ lăm tơdrong jang kon, tơplih kơ dâu kiơ̆ tơdrong pơư, jên tơmam dah đei lơi yua ‘bônh kơ hlôi. Apĭnh ăn kơ kon tơdrong gơh hơgei wă mơ̆ng kơtơ̆ng nơ̆r Ih krao, păng rơih iŏk mĭnh tơdrong bơ̆jang pơư anăn Ih. Hơpơi kon pơchrang hơdah Tơdrong ‘Nao ‘Lơ̆ng tơ kơdih anih kon bơ̆jang, ba tơdrong ‘mêm mơnat pơklaih praih đơ̆ng anih Sư truh kơ đĭ kon bơngai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆n, mă hloh ‘noh jơ̆ lu buăl hơ’lơ̆p mă ‘mêm, buăl gô ‘măn ăn wă mĭnh puăt chăl arih buăl kơ tơdrong jang. Lei thoi noh buăl hăm ‘maih wă jang mĭnh tơdrong jang năr hlôi kơ năr lăp wă kơ chă arih, wă kơ hơđơ̆ng, wă kơ đei na hơiă hăm bơngai jum dăr? Dah buăl ‘maih yua kơdih tơdrong bơ̆jang kơdih wă bơ̆ jang kơ Kră Yang păng pơchrang tơdrong pŭn hiôk truh tơ bơngai nai? Dah buăl lăng tơdrong jang đơ̆ng kơdih jơ̆ mĭnh kơdơ teh ‘lơ̆ng wă rei găr adrĕch Tơdrong ‘Nao ‘Lơ̆ng, lei tơdrong jang ưh pă jơ̆ pŭ trăp dah tơdrong pơgŏ bơih, na gô jing tu tơdrong pŭn hiôk ưh kơ đei layơ tôch tuh ro tơ kơdih chăl arih buăl păng đĭ đăng dôm lu bơngai jum dăr buăl. Athei krao khan păng chơ chă tơdrong ‘lơ̆ng rŏ đơ̆ng Kră Yang wă, păng ăn kơ Sư chông anhăk buăl yak rok trong tơdong jang ‘bĕnh blai tơdrong pŭn hiôk kiơ̆ nơ̆r tơtă ‘lơ̆ng rŏ đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.