Lăm trong yak năm lăm teh đak, ưh kơ đei tŏ sĕt lu bơ̆n tơ’bơ̆p dôm tơdrong arih pơm kơ jơhngơ̆m lu bơ̆n hli tơrơ ưh kơ hơđơ̆ng. Kư̆m ưh kơ đei tŏ sĕt, lu bơ̆n adrin kơdih mă ưh kơ gơnang kơ Kră Yang. Lu bơ̆n hăm đei mơn Kră Yang oei yak hơdai hăm lu bơ̆n, tơdrong lu bơ̆n kăl kơ pơm noh jơ̆ lui gơnang păng mơ̆ng kơ Sư bơ̆jang ưh?

Năr ‘nâu, ‘năr 19/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gene Markland kơ̆l ‘bai INH GÔ NĂM HƠDAI KON.

“Inh gô năm hơdai hăm Ih păng Inh gô ăn kơ ih jơhngơ̆m hơđơ̆ng hiôk.” (Lĕch Đơ̆ng Êyiptơ 33:14)

Đei lơ bơngai ưh kơ wă kơ năm khăm tơ ‘bok pơgang gah sơnĕnh. Lu sư ngăl gô ding truh tơ jĭ dêh bơih ‘mơ̆i na năm; kư̆m đei bơngai ưh kơ đei layơ năm hloi. Inh hlôh kơ hli tơrơ păng ưh kơ hơđơ̆ng noh, mă đơ̆ng kơdih inh đei tơ’bơ̆p ‘bok pơgang gah sơnĕnh gơh hơgei.

Lu bơ̆n ngăl hli krê ưh kơ băt kơ lu ‘bok pơgang gô pơm kiơ kơplah ‘bôh đei jĭ lăm ‘bơ̆r sơnĕnh bơ̆n. Mă lei, wă kơ đei sơnĕnh kơjăp ‘lơ̆ng, tơdrong khăm păng bơwei wă kơ sơnĕnh rơgoh kiơ̆ kơ khei noh jơ̆ kăl tơpă.

Lăm kơplah khăm, inh adrin bơhơi jơhngơ̆m păng bơwei jơhngơ̆m rơhăo hiôk, wă kơ ‘bok pơgang gah sơnĕnh bơ̆jang hiôk. Inh băt kơ tơdah lăm ‘bơ̆r inh đei tơmam pơsĕi suĕng, na ‘lơ̆ng hloh ‘nĕ kơ tơdrŏ. Dôm tơdrong bơ̆jang đơ̆ng ‘bok pơgang gô pơklaih sơnĕnh inh, mă lei tơdah inh tơdrŏ, sơnĕnh inh gô đei jĭ.

Pơlong tơchĕng lăng tơdrong kiơ gô truh tơdah lu bơ̆n rơrĭ dah iung kơplah ‘bok pơgang oei kuer sơnĕnh? Lu sư gô pơm kơ sơnĕnh jing kơnê̆, păng gô lŭch hloh kơ hơdrol ki sơ̆.

Lăm tơdrong arih, ưh kơ đei tŏ sĕt lu bơ̆n tơ’bơ̆p dôm tơdrong arih pơm kơ bơ̆n jĭ gah akâu jăn păng lăm jơhngơ̆m. Kơplah thoi noh, lu bơ̆n krao Kră Yang dŏng iŏk bơ̆n. Mă lei, lu bơ̆n đei hiơt thoi âu, Kră Yang oei bơ̆jang tơgŭm lu bơ̆n lĕch hlôi đơ̆ng tơdrong arih thoi noh.

Kơplah ‘bok Môis tơ’bơ̆p kơ tơdrong kon pơlei Isơrael pơm yoch kơkuh kơ rơmo pơm hăm maih, sư apinh ‘Bok Kei-Dei huay kơ jô̆ yo kơ lu sư, yua kơ sư băt kơ lu sư pơm tơdrong yoch tih ‘bơ̆t anăp Kră Yang. Sơ̆p hla bơar ‘Bok Kei-Dei chih thoi âu, “Kră Yang juăt pơma dơnuh hăm Môis tơm măt thoi noh nhen thoi minh ‘nu bơngai pơma dơnuh hăm buăl juăt sư.” (Lĕch Đơ̆ng Êyiptơ 33:11)

Mă khan Môis băt hơđăl kha sư đei Kră Yang băt anăn sư păng đei pŭn ‘bơ̆t anăp Sư, mă lei sư ưh tim mă băt kơ bu wă hơdai sư yak năm tơ anăp. Kơplah thoi noh, ‘Bok Kei-Dei đei khan mĭnh nơ̆r pơkă ‘bĕnh nơ̆r pơlung: “Inh gô năm hơdai hăm Ih păng Inh gô ăn kơ ih jơhngơ̆m hơđơ̆ng hiôk.” (Lĕch Đơ̆ng Êyiptơ 33:14).

Nơ̆r pơkă “Inh gô năm hơdai hăm Ih” ăn kơ Môis băt sư ưh kơ đei yak năm adrô̆, mă yak năm hăm tơdrong pơdơh lăm Kră Yang. Pơdơh ưh kơ sĭ khan dôm tơdrong pơlong lăng hiong hloi, mă đei Kră Yang oei hơdai, Tơ’ngla oei hơdai lu bơ̆n lăm tơdrong pơlong lăng. Athei ‘blŏk kơ nơ̆r lăm Hơriso 23:4 “Mă inh năm lăm thŭng yơ̆p tơdrong lôch, inh ưh kơ hli kơ răm, yua kơ Kră Yang oei hăm inh; ‘long băl hăm ‘long jra Ih pơlung inh.”

Yua kơ thoi noh, athei ăn đon chĕng buăl gơnang kơ Kră Yang, păng lui ngeh Kră Yang gô pơm pơkeh tơdrong dan ăn lăm tơdrong arih buăl. Buăl huay kơ ling lang oei lăm tơdrong pơlong lăng ôh! Na tơdrong buăl kăl kơ pơm noh oei thĕng păng chang gô, mă hloh loi huay kơ chơchă kiơ̆ kơ jơhngơ̆m kơdih buăl, yua kơ pơm thoi noh, kơdih buăl gô đei sơ’ngon.

Đei bơngai jet minh ‘nu bơngai jĭ jăn layơ Kră Yang gô pơklaih jĭ ‘nhŏng noh. Na sư tơl: “Inh băt Kră Yang gơh pơklaih inh, na kơplah layơ noh gô trŏ kơ đơ̆ng Sư.”
Inh kư̆m đêl đei anat anot. Kơplah noh, inh đei krao khan: “Kơkuh kơ Kră Yang, kon băt kơ Ih oei chông a-nhăk kon, mă lei trong ‘nâu iĕ dêh, ‘bĕnh kơ tơmo rĕl ‘bônh kơ pơ̆k. Tơnat păt ăn kơ kon, ơ Kră Yang! Yua kơ kiơ Ih ưh kơ chông a-nhăk kon năm tơ ‘nhĕt dreng ‘lơ̆ng hloh?”

Na đơ̆ng noh, đơ̆ng rim kơ đei tơ’bơ̆p, inh đei mơn dôm kơ trong yak năm anat anot dêh noh jơ̆ tơdrong pŭn hiôk hloh. Ki sơ̆ rŏ lăng inh tam mă hlôh wao, na dang ei inh mơn ‘bôh tơdrong dan ăn đơ̆ng Kră Yang hloh kơ hlôh wao đơ̆ng inh.
Nĕ kơ hiơt thoi âu, ‘Bok Kei-Dei jơ̆ ‘Bă lu bơ̆n. Sư ‘mêm mơnat kơ lu bơ̆n păng gô pơm tơdrong ‘lơ̆ng hloh ăn kơ lu bơ̆n. Rŏ lăng buăl ưh tam mă ‘bôh tơdrong noh kơ plah jơ ‘nâu, hloh loi tơdrong arih oei pơmat tat, na athei dơ̆ng gah nơ̆r tơtă đơ̆ng Sư. Tơ’ngla ưh kơ đei hơlĕnh pơma khan: “Hreh bĕ athei băt Inh boih Kră Yang ‘Bok Kei-Dei. Inh đe gô pôk pơư tơ jơ̆p dêh char, kư̆m pôk pơư kơ Inh tơ kơpal teh.” (Hơriso 46:10)

Apĭnh đĭ đăng krao khan hơdai: Kơkuh kơ Kră Yang mă ‘mêm! Kră Yang ơi, kơplah kon oei lăm tơdrong anat anot, apinh Kră Yang tơgŭm kon huay kơ gơnang kơ kơdih, huay kơ adrin kơdih, mă apinh Kră Yang bơtho kon băt kơ tơjur jơhngơ̆m đon tơ ala, băt kơ gơnang kơ Ih, băt kơ dan tơpang ti kon tơ tơpang ti Ih, băt kơ dan jơhngơ̆m kon gơnang lăm tơdrong chông anhăk đơ̆ng Ih, băt dan jơhngơ̆m kon ‘bơ̆t jơ̆ng Ih wă kơ apinh tơgŭm đơ̆ng Ih. Apinh Kră Yang ăn kơ kon lui kơ jăp lăm dôm tơdrong tơdă ‘lơ̆ng đơ̆ng Ih lăm chăl arih kon, mă khan hrei âu kon tam mă băt tôm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, nơ̆r pơkă: “Inh gô năm hơdai hăm Ih” jơ̆ nơ̆r kăl kơ chĕp kơjăp lăm tôm tơdrong arih. Lăm rim trong, jơ̆ng buăl yak năm huay kơ bơsĕl, yua kơ Kră Yang tơtă khan gô yak năm hơdai păng buăl păng chông ba buăl năm tơ anih pơdơh pŭn hiôk đơ̆ng Sư. Buăl lap yua kơ pŭ trăp tơ hơngiĕng kơdih? Buăl mơn pă băt pơm liơ bơih lăm buăl hă? Athei năm tơ Kră Yang lăm jơ ‘nâu hloi, păng apinh Kră Yang ba buăl oei lăm Sư, păng ăn kơ buăl đei hlôi mơn nơ̆r tơtă đơ̆ng Kră Yang oei yak hơdai buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.