Buăl hăm đei layơ mơn ‘bôh nhen thoi kơdih lăp jơ̆ mĭnh ‘nu bơngai gơ̆p ưh kơ ‘bôh ưh? Mĭnh ‘nu bơngai hăm dôm tơdrong kăl yua, dôm tơdrong chơt hiôk păng tơdrong ơh sơ’ngon nhen thoi ưh kơ đei bu hiơ̆k bơngơ̆t, ưh đei bu băt? Dôm kơplah thoi noh, buăl tơchĕng kiơ? Rŏ lăng buăl hơpơi rŏ kơ đei mĭnh ‘nu bơngai bu ‘noh lăng ‘bôh dôm tơdrong tơtăm đơ̆ng buăl, yak năm păng tơ’bôh tơdrong hiơ̆k bơngơ̆t?

Năr ‘nâu, ‘năr 20/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai KRĂ YANG HNHOI LĂNG.

“Hơgar anăn Kră Yang mă đei pơma hăm sư thoi âu: “Ih boih Kră Yang ‘Bok Kei-Dei mă ‘bôh inh,” yua kơ sư khan: “Inh ‘bôh boih Kră Yang ‘Bok Kei-Dei mă ‘bôh inh.” (Blŭng-a 16:13)

Mon drŏkăn hiôk hơ iă rôp ti inh yak mơ̆t tơ lăm mâu giăo. Năr ‘nâu jơ̆ năr hnam trưng ăn kơ mĕ ‘bă gơh mơ̆t hơdai tơ lăm, hơdai mĭnh puăt năr hŏk hăm kon hơ’lơ̆p bơ̆n.

‘Bơ̆t anăp măt jơ̆ mĭnh anih hŏk ‘bĕnh kơ rup hăm lơ gôh chơt hiôk, dôm kơ gơ‘bang hơoei iĕ iĕ, hơ iă kơ lu hơ’lơ̆p iĕ đăm sơnăm hơ iă. Inh hơ oei tơ ala jê̆ mon drŏkăn, thĕng hreh lăng dôm muh măt oei kơ nhăm mơ̆ng kô bơtho, dôm kơ kơ̆l hơgrêng hơgrêng pơhrăm pơtơ̆p chih dôm kơ chư blŭng a. Lăm hŏk pơhrăm hơmet blư thar rơ ông rơ ang nhen thoi tơpu sut pơchah kơplah kơtơ̆ng teng neng tơbăt jơ sa ‘năr dơ̆ng re. Lu mŏ iĕ, dăm iĕ hăt hot kơdâu năm tơ tuh, iŏk tơlĕch kơdŭng ‘măn tơmam sa kơ kơdih, na hơoei lăm kơ’bang păng sơng iŏk tơmam sa ‘năr dơ̆ng.

Lăm kơplah lu mon oei pơma nuh roi hơ’mon hăm buôl buăl, hơoei hreh ‘bơ̆t mum kơ’bang ‘noh Amy, mŏ adruh iĕ hăm sŏk găm hơlai. Mon hơoei ‘mơng ‘bơ̆t anăp kơ thŭng mong tơmam sŏng să ‘năr dơ̆ng đei pơih, măt lăng đơ̆ng ataih nhen thoi oei hơdai lăm mĭnh dêh char kơdih kâu sư. Hăm tơdrong hlôi mơn đei bơtho ‘lơ̆p ngôi mĭnh adrô̆, inh băt kơdih athei pơm mĭnh tơdrong kiơ ‘noh. Inh năm jê̆ na pơ’lơ̆ng jet mon: “Kon sŏng sa kơdih gơh ưh?” Mon hue lăng tơ inh ưh kơ đei tơl. Na inh đei pơma pơtrơp: “Duch tơgŭm kon sŏng sa hŏ”. Oei jơ̆ mĭnh tơdrong thĕng hreh tơl tơwih nơ̆r inh. Mă lei jơ ‘nâu, hơkŭng iĕ ha să nhen thoi oei chang gô inh tơgŭm.

Pơhiơ̆ ‘me đơ̆ng rim chơ ‘mŏng por kơ mŏ adruh iĕ, inh tơchĕng truh kơ tơdrong ‘Bok Kei-Dei lăng ‘bôh dôm lu bơngai oei kăl truh kơ tơdrong tơgŭm đơ̆ng lăm Sơ̆p Hla Bơar ‘Bok Kei-Dei. Inh tơchĕng truh kơ yă Hagar, mĭnh ‘nu đam drŏkăn bơngai Êyiptơ kơ yă Sarai, akăn ‘bok Abram.

Blŭng a 16 đei chih mĭnh puăt hơ’mon kơ yă Hagar. Đơ̆ng rŏng kơ băt kơdih kâu sư đei anăp lăm kơplah yă Sarai, tơ’ngla sư, ưh kơ đei kon lơ sơnăm, Hagar đei “ưh kơ pơyom yŏng tơ’ngla sư” (Blŭng a 16:4). Tơdrong hơdai hăm yŏng-đam yua kơ ‘noh jing ưh kơ ‘lơ̆ng hloh. “Sarai pơm kơnê̆ kơ Hagar, na Hagar kơdâu jăk đơ̆ng sư” (Blŭng a 16:6, VIE 2010).

Mă lei, lăm rok trong kơdâu ôn, mĭnh tơdrong truh, mĭnh tơdrong tơ’bơ̆p đei tơplih yă Hagar. Sư tơ’bơ̆p Kră Yang thoi nơ̆r ‘Bok kei-Dei chih lăm Blŭng a 16: 7: “Mă-lei linh Jang ‘lơ̆ng Kră Yang ‘bôh Hagar tơ lăm char glă tu đak ‘bơ̆t cheng trong năm tơ char Sur.”

Ưh kơ hlĭch kơplah Sơ̆p Hla Bơar ‘Bok Kei-Dei chih răk khan lĭnh jang đơ̆ng Kră Yang tơ’bơ̆p Hagar rok trong brŏk tơ char Sur yua kơ Sur jơ̆ anih gah yă Nâm kơ dêh Êyiptơ. Hagar jơ̆ bơngai Êyiptơ na tơdrong sư chă trong brŏk tơ hnam jơ̆ tơdrong trŏ bơih.

Inh tơchĕng ‘bôh yă Hagar, mĭnh ‘nu bơngai drŏkăn ‘lơ̆ng, gleh lap, mĭnh adrô̆ rok trong brŏk tơ hnam. Rim kơ yak, rim kơ mĭnh yak rok trong char glă tŏ, inh jet kơdih dôm tơdrong ayơ brih kơ đon tơchĕng sư. Lei sư hăm đei mơn hli tơrơ? Đei mơn ‘bôh mĭnh adrô̆? Mơn ‘bôh chăl arih ‘nâu nhen thoi ưh kơ đei kơplah sư lăp jơ̆ mĭnh ‘nu bơngai đam iĕ nơ̆r pơma ưh kơ re ưh kơ gơh wă pơma dŏng kơdih? Rŏ lăng Hagar mơn ‘bôh sư lăp jơ̆ mĭnh ‘nu bơngai gơ̆p ưh kơ ‘bôh, ưh kơ đei bu lăng ‘bôh, ưh kơ đei bu hiơ̆k bơngơ̆t?

Mă khan Sơ̆p Hla Bơar Nơ̆r ‘Bok Kei-Dei ưh kơ pơma hơđăl dôm kơ tơdrong tơchĕng dah lăm jơhngơ̆m yă Hagar, mă lei lu bơ̆n, lu bơngai đŏk, gơh khan tơpă jơ̆ Kră Yang băt, Kră Yang ‘bôh păng Kră Yang hiơ̆k bơngơ̆t. Yua kơ thoi noh, Kră Yang đei wơh lĭnh jang Sư năm tơ’bơ̆p yă Hagar ‘bơ̆t cheng đak glung rok trong sư yak.

Dah đak glung cheng trong gơh pơm rơngơp kơ tơdrong rơhing oei soh lăm hơlŏng sư lei dôm lu nơ̆r mă lĭnh jang đơ̆ng Kră Yang khan kơ yă Hagar nhen thoi đak glung ruh rơngơp jơhngơ̆m oei hrĕng kro yua kơ ơh sơ’ngon đơ̆ng sư.

Jơhngơ̆m yă Hagar đei pơlung păng gơh tơplih ‘nao dĭng truh kơ sư pơma ôr, krao anăn “ Ih boih Kră Yang ‘Bok Kei-Dei mă ‘bôh inh,” yua kơ sư khan: “Inh ‘bôh boih Kră Yang ‘Bok Kei-Dei mă ‘bôh inh.” (Blŭng a 16:13). Đơ̆ng rŏng kơ tơdrong tơ’bơ̆p ‘noh, Hagar đei pơm kiơ̆ nơ̆r đơ̆ng linh jang khan bơtho păng wih brŏk tơhnam yŏng tơ’ngla sư kơdih.

Hagar, kơplah kơdâu ôn đơ̆ng hnam yŏng, lăp jơ̆ mĭnh ‘nu đam drŏkăn nhen thoi ưh kơ đei anăn păng ưh kơ ‘bôh lăm măt bơngai lăm teh đak. Mă lei Hagar, kơplah wih brŏk, đei jơ̆ mĭnh ‘nu bơngai nai yua kơ sư băt: Kră Yang lăng ‘bôh sư. “ ‘Bok Kei-Dei lăng ‘bôh” ling lang lăng ‘bôh păng hiơ̆k bơngơ̆t truh tơ sư.

Đơ̆ng rŏng kơ pêng jĭt phŭt pơhiơ̆ sơng iŏk đơ̆ng rim kơ chơ ‘mŏng mơh inh ba tơgŭm, tuch luch Amy kŭm đei sa đĭ tơmam sa ‘năr dơ̆ng sư. Thar blư, mon ngơk lăng inh na pơ’lơ̆ng dan tơpang ti rơmuăn sư tơ kơpal ti inh. Măt hlăng lăng inh lăm tŏ sĕt thoi mĭnh nơ̆r bơnê thĕng hreh pơm kơ inh hiĕk, yua kơ inh hlôh, lăm dêh char đơ̆ng ‘lơ̆p ngôi mĭnh adrô̆, tơ’bôh jơhngơ̆m băt bơnê hăm nơ̆r jơ̆ tơdrong hui dêh.

Inh rôp ti mon drŏkăn lĕch đơ̆ng lăm đơ̆ng rŏng kơ teng neng re hŏk đang. Inh tơchĕng truh kơ măt hlăng hiôk chơt đơ̆ng Army kơplah lăng inh, rŏ lăng yua kơplah mon kăl, đei bơngai tơgŭm mon. Inh tơchĕng truh kơ yă Hagar lăm Sơ̆p Hla Bơar ‘Bok Kei-Dei, truh tơ tơdrong sư rŏ kŭm đei hiôk chơt, băt bơnê kơplah Kră Yang lăng ‘bôh, yak năm păng tơgŭm sư. Tơdrong hiôk chơt ‘noh, jơhngơ̆m băt bơnê ‘noh rŏ lơ hloh yua kơ đơ̆ng Tơ’ngla Pơjing, Tơ’ngla lăng ‘bôh băt tôm tơdrong đei tôm ‘mêm mơnat, tôm hiơ̆k bơngơ̆t truh tơ chơ chă păng dŏng tơgŭm mĭnh ‘nu bơngai drŏkăn ơh sơ’ngon, mĭnh adrô̆ thoi sư.

Inh đei tơchĕng truh tơ lơ wơ̆t Kră Yang kŭm lăng ‘bôh păng tơl tơwih tơdrong kăl yua đơ̆ng lăm mŭk tơmam, jơhngơ̆m truh tơ pơhngol đơ̆ng inh. Dah ki sơ̆, Kră Yang đei ‘bôh păng tơl tơwih tơdrong kăl yua kơ yă Hagar lăm Sơ̆p Hla Bơar Nơ̆r ‘Bok Kei -Dei, lei năr ‘nâu, ‘Bok Kei-Dei, Tơ’ngla hnhoi lăng, tơpă oei lăng ‘bôh păng tơl dŏng tơgŭm tơdrong kăl yua kơ buăl păng inh.

Apĭnh đĭ đăng krao khan hơdai: Kơkuh kơ Kră Yang ‘mêm, kon bơnê kơ Kră Yang yua kơ Ih jơ̆ Tơ’ngla lăng ‘bôh. Dah kon tơchĕng kơdih nhen thoi jơ̆ mĭnh ‘nu bơngai gơ̆p ưh kơ ‘bôh lăm măt teh đak, Kră Yang oei ling lang lăng ‘bôh kon. Kơplah dôm tơdrong kăl yua nhen hloh kơ jơhngơ̆m pran kon, Kră Yang băt păng ăn trŏ kơ tơdrong kon kăl. Dah dôm tơdrong hli tơrơ păng mĭnh adrô̆ gom lơ̆p kon, Kră Yang truh păng dŏng tơgŭm kon. Apĭnh tơgŭm kon pơtrơp băt lui gơnang, pơtrơp băt gơnang ưh kơ đei bu ‘ngoaih kơ Ih, Tơ’ngla lăng ‘bôh kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kăl hloh jơ̆ dôm lu bơngai drŏkăn, năr ‘nâu dah buăl oei mơn ‘bôh nhen thoi buăl lăp jơ̆ bơngai mă bơngai nai ưh kơ ‘bôh, athei băt khan Kră Yang lăng ‘bôh buăl. Mă buăl oei hrĕp hreh bơwih bơwăn đơ̆ng dôm lu tơdrong jang lăm Khŭl Bơngai Lui, đơ̆ng tơdrong wei rong đơ̆ng kơ tơdrong sŏng sa, tep kơ hnam dơnŏ kơdih, dah đơ̆ng tơdrong jang keh ‘lơ̆ng đei pơjao tơ anih jang sa, athei ‘blŏk khan Kră Yang jơ̆ Tơ’ngla lăng. Sư băt păng Sư ‘mêm mơnat kơ buăl, tơdrong ‘mêm ‘noh tôm mah ăn kơ Sư wă mơ̆t truh păng tơgŭm buăl kơplah kăl. Thoi noh, athei kư̆ kơ jơhngơ̆m kơjăp, buăl hŏ!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.