Đei bơngai drŏ kăn lăng nhen hmă đĕch, mă lei Kră Yang yua lăm tơdrong jang tih. Đơ̆ng sơ̆ truh tơ dang ei, lăm chăl arih đei ‘bôh dôm kơ lu jơhngơ̆m tơnăp, ‘lơ̆ng tơpăt păng pơ̆n nuih pơjao tơdrong arih ăn kơ Kră Yang – păng bơ̆n ‘bôh noh jơ̆ Esther. Esther jơ̆ minh ‘nu bơngai drŏ kăn mơti, arih lăm anih pơtao ‘lơ̆ng rŏ. Mă lei truh tơ jơ năr wă bơ̆jang, sư pơ̆n nuih iung, dan tơdrong arih sư lăm tơpang ti Kră Yang wă dŏng pơklaih adrĕch adrŭng sư.

Năr ‘nâu, ‘năr 21/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Joy Brunson kơ̆l ‘bai PĂ ĐEI BU WĂ PƠRĂM LU BƠ̆N?

“ ‘Bok Kei-Dei Sư ‘mêm, Sư tơgŭm bơ̆n dang noh boih, na bơ̆n ưh pă hli kơ tơdrong kiơ dơ̆ng.” (Rôm 8:31)

Tam đei layơ minh adrô̆ buăl dơ̆ng iung bơwei tơdrong trŏ, mă lu bơngai jum dăr ưh kơ đei bu pơ̆n pơma ưh? Pơma tơpă, jing bơngai yak năm phara kơ buăl noh ưh kơ đei ‘bônh. Truh tơ buăl đei tơ’bơ̆p dôm tơdrong kơnê̆ yua kơ drơ̆ng iŏk gah khŭl bơngai tŏ sĕt.

Đơ̆ng oei hơ’lơ̆p inh mơ̆ng nơ̆r hơ’mon kơ Esther inh hơ iă dêh. Inh tơchĕng ưh kơ hlôh kơ jơhngơ̆m sư kơplah iung dŏng iŏk adrĕch adrŭng sư, yua anăn ‘Bok Kei-Dei pơ̆n nuih dơ̆ng ‘bơ̆t anăp pơtao pơma tơplih kơ kon pơlei. inh hưch hanh chang gô minh năr ayơ noh, inh kư̆m đei pơm minh tơdrong thoi noh lăm chăl arih inh.

Mă lei kơplah yak năm lăm chăl arih hrei âu, inh tơ’bơ̆p lơ tơdrong pơm anat anot- dôm tơdrong pơlong lăng đon lui păng jơhngơ̆m chơ̆n. Inh đei mơn ‘bôh iung bơwei yua kơ tơdrong tơpă dah tơdrong trŏ ưh kơ đei layơ ‘bônh, mă hloh loi lu bơ̆n iung bơwei anăn Kră Yang.

Lăm Esther 6:2, lu bơ̆n ‘bôh nơ̆r hơ’mon gah Morđêkai, ‘nhŏng oh pôm yă ‘bok hăm yă pơtao Esther. Đe đŏk ‘bôh đei chih bơih Morđêkai đei roi boih kơ tơdrong Bikthana păng Têres, ‘bar ‘nu kuan gak ‘măng jang pơtao chă đon wă pơrăm pơtao Asêrus. Kơplah pơtao băt, na apah Morđêkai yua kơ minh jơhngơ̆m đon hăm pơtao.

Kơplah pơtao jet Haman “wă pơm thoi yơ kơ bơngai mă pơtao pơyom?” (Esther 6:6), Haman ngeh kơ noh jơ̆ kơdih sư bơih. Mă lei đơ̆ng rŏng kơ tơ̆l pơtao, na sư ‘bôh băt hloi tơdrong proh hơmet đơ̆ng pơtao ăn kơ Morđôkai mă ưh kơ sư. Sư ơh blĕk păng mơlâu, na Haman chă đon wă pơlôch Morđôkai.

Haman ră roi kơ akăn sư Sêrêt păng lu bôl buăl sư băt dôm tơdrong mă đei truh kơ sư. Lu bôl buăl sư gơh hơgei păng akăn sư Sêrêt khan kơ sư: “Ih wă pơtơm huŏng boih ‘bơ̆t anăp Morđôkai. Yua kơ sư bơngai Juđa, ih ưh kơ kĕ pơm kiơ kơ sư. Ih gô răm ngei ‘bơ̆t anăp sư.” (Esther 6:13). Inh ‘bôh hơ iă dêh ‘bôh tơdrong ‘nâu: “Tơdah sư bơngai Juđa, ih ưh kơ kĕ pơm kiơ kơ sư. Ih gô răm ngei ‘bơ̆t anăp sư.” Rŏ lăng akăn păng bôl buăl Haman mơn băt kơ Morđôkai đei ‘Bok Kei-Dei oei hơdai tuh ăn pŭn hiôk, păng ưh kơ đei kiơ găn tơdrong proh hơmet đơ̆ng Kră Yang.

Yă pơtao Esther pơdah tơdrong Haman ‘bơ̆t anăp pơtao, na tuch luch đe hrek atol sư tơ ‘long gơ̆ng mă sư đei pơdơ̆ng wă hrek atol Morđekai. Đơ̆ng tơdrong pơ̆n nuih păng gơh hơgei Esther đei tơplih minh tơdrong noh, dŏng iŏk adrĕch adrŭng sư đơ̆ng tơdrong đe pơrăm. Tơdah ưh kơ đei jơhngơ̆m pơyom păng lui gơnang kơ ‘Bok Kei-Dei đơ̆ng minh ‘nu bơngai drŏ kăn lăng nhen thoi rơdu tơrăn, đơ̆ng sơ̆ kon pơlei Isơrael rŏ lăng gô năm lăm tơdrong phara kơ noh.

Tơdrong chă đon đơ̆ng Haman wă pơrăm bơngai nai jing thoi kơ ‘năk pơrăm kơdih. Đơ̆ng pơtao ‘mêm wă, Haman hiong đĭ dôm tơdrong pôk ăn pơm yŏng, jing minh ‘nu bơngai ayăt hăm kon pơlei ‘Bok Kei-Dei.

Đei lơ ‘bai hŏk gĭt kăl ‘lơ̆ng dêh lăm sơ̆p hla bơar Esther, na ‘nâu jơ̆ minh lăm tơdrong tơpă lu bơ̆n kăl kơ tơ’blŏk ling lang:

“’Bok Kei-Dei Sư ‘mêm, Sư tơgŭm bơ̆n dang noh boih, na bơ̆n ưh pă hli kơ tơdrong kiơ dơ̆ng.” (Rôm 8:31)

Kơplah lu bơ̆n bơwei tơdrong ‘lơ̆ng tơpăt, yua kơ đơ̆ng ‘Bok Kei-Dei wă, na tơdrong kiơ gơh pơrăm lu bơ̆n? Buăl mă ‘mêm kơeng, hơpơi kơ buăl păng inh đei pơlung wă kơ yak năm hăm jơhngơ̆m hơđơ̆ng păng sĭt đei đon lui, pôk tơiung buăl lăm rim trong yak năm. ‘Nĕ kơ hli kơ tơduă bơngai, yua kơ kơplah ‘Bok Kei-Dei oei hơdai, na hăm đei kiơ gơh ayăt hăm lu bơ̆n?

Apĭnh đĭ đăng krao khan hơdai: Bơnê kơ Kră Yang yua kơ năr ‘nâu Ih tơ’blŏk kơ kon ưh kơ đei tơdrong kiơ pơgăn tơdrong proh hơmet đơ̆ng Ih. Apinh ăn kơ kon jơhngơ̆m pơ̆n nuih iung bơwei tơdrong tơpă păng tơdrong Ih wă, mă kơplah kon oei adrô̆. Apinh tơgŭm kon ling lang lui kơ jăp kơ Ih oei hơdai, tưk tơiung păng tơblah tơgŭm kon. Kon hơpơi kơ tơdrong arih kon đei pơdah mă đei tơdrong arih hiôk ‘lơ̆ng dah đei tơdrong kơnê̆ truh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng ‘mă ‘mêm kơ eng, tơdrong mơsêh păng proh hơmet đơ̆ng ‘Bok Kei-Dei hloh kơ đon kon bơngai hlôh băt. Nhen thoi Esther sơ̆ noh, minh ‘nu bơngai drŏ kăn lăng thoi kơ rơdu tơrăn jing tơmam ‘lơ̆ng dŏng pơklaih adrĕch adrŭng sư, hrei âu Kră Yang krao lu bơ̆n – lăm noh đei lu bơngai drŏ kăn – arih pơ̆n nuih iung bơwei tơdrong tơpă Kră Yang. Mă khan bơ̆n ‘bôh kơdih iĕ đĕch păng rơdu tơrăn, athei kư̆ kơ yak năm lăm đon lui gơnang, wă kơ tơdrong arih buăl pơdah tơdrong ‘mêm mơnat Kră Yang: đei ‘Bok Kei-Dei oei hơdai lu bơ̆n, na ưh kơ đei kiơ gơh ayăt hăm lu bơ̆n!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.